91 Yeyote anayekaa mahali pa siri pa Aliye Juu Zaidi+
Ataishi katika kivuli cha Mweza-Yote.+
2 Nitamwambia Yehova: “Wewe ni kimbilio langu na ngome yangu,+
Mungu wangu ninayemtumaini.”+
3 Kwa maana atakuokoa usinaswe na mtego wa mwindaji wa ndege,
Kutoka kwa ugonjwa wa kuambukiza unaoangamiza.
4 Kwa manyoya yake atakufunika,
Nawe utapata kimbilio chini ya mabawa yake.+
Uaminifu wake+ utakuwa ngao kubwa+ na ukuta wa ulinzi.
5 Hutaogopa vitisho vya usiku,+
Wala mshale unaoruka mchana,+
6 Wala ugonjwa wa kuambukiza unaonyemelea gizani,
Wala maangamizi yanayoharibu wakati wa adhuhuri.
7 Elfu moja wataanguka kando yako
Na elfu kumi mkono wako wa kulia,
Lakini hayatakukaribia wewe.+
8 Utayaona tu kwa macho yako
Unaposhuhudia adhabu ya waovu.
9 Kwa sababu ulisema: “Yehova ni kimbilio langu,”
Umemfanya Aliye Juu Zaidi kuwa makao yako;+
10 Hutapatwa na msiba,+
Na hakuna pigo litakalokaribia hema lako.
11 Kwa maana atawaagiza malaika zake+ kukuhusu wewe,
Ili kukulinda katika njia zako zote.+
12 Watakubeba mikononi mwao,+
Ili mguu wako usigonge jiwe.+
13 Utamkanyaga mwanasimba na swila;
Utamkanyagia chini simba mwenye manyoya marefu shingoni na nyoka mkubwa.+
14 Mungu alisema: “Kwa sababu ananipenda, nitamwokoa.+
Nitamlinda kwa sababu analijua jina langu.+
15 Ataniita, nami nitamjibu.+
Nitakuwa pamoja naye katika taabu.+
Nitamwokoa na kumtukuza.
16 Nitamshibisha kwa maisha marefu,+
Nami nitamfanya aone matendo yangu ya wokovu.”+