Kusudi Lenyewe la Uhai

WAZIA kwamba unazuru karakana ya rafiki yako. Yeye ametoka tu kumaliza kuunda kitu fulani, nawe unavutiwa nacho. Kitu hicho kimefanyizwa vizuri kwa muundo wa kuvutia. Lakini hata ujaribu namna gani, huwezi kujua kusudi la kitu hicho ni nini. Unaweza kujuaje? Ni kwa kumwuliza tu rafiki yako, naye yaelekea atafurahi kukueleza.

Kwa hiyo tunawezaje kujua kusudi la uhai? Kwa nini tusimwulize Mungu, ambaye ndiye “chemchemi ya uzima”? (Zaburi 36:9) Wewe waweza kufanyaje hivyo? Kwa kupendeza, amesema nasi kupitia kwa Biblia. Amefanya kwamba watu mmoja mmoja wenye imani wakaandika mawazo yake kwa njia tunayoweza kuelewa. Hasa, kusudi la uhai laweza kuelezwa kwa maneno machache tu: Tupo hapa tujifunze juu ya Mungu na kufanya mapenzi yake. Biblia husema: “Hii ndiyo jumla ya maneno; yote yamekwisha sikiwa; mche Mungu, nawe uzishike amri zake, maana kwa jumla ndiyo impasayo mtu.”—Mhubiri 12:13.

Je! hilo lasikika kuwa jambo rahisi sana? La sivyo. Kuwa kwetu hapa kujifunza juu ya Mungu na kufanya mapenzi yake ni kwa maana kubwa na nzuri ajabu.

Kusudi la Awali la Mungu

Kujifunza yale aliyokusudia Mungu mwanzoni kwa ainabinadamu kutakusaidia kuelewa vema zaidi kusudi la uhai. Pia kutaeleza sababu kwa nini baadhi ya mambo yaliyotajwa katika makala iliyotangulia hufanya uhai uwe wenye kusudi kwa kadiri fulani kwa wengi leo.

Maandishi ya Biblia kuhusu uumbaji wa mwanadamu husema: “Mungu akasema, Na tufanye mtu kwa mfano wetu, kwa sura yetu.” (Mwanzo 1:26) Hivyo, wanadamu waliumbwa wakiwa na uwezekano wa kuwa kama Mungu, wakiwa na sifa zenye kutokeza ambazo yeye anazo, kutia ndani hekima, uwezo, uadilifu, na upendo. Basi je! inashangaza kwamba wengine hupata uradhi kwa kutafuta maarifa mapya au kushughulika na utendaji unaotokeza ushindani kwa uwezo wao wa akili na kimwili? Na je! ni jambo lisilotazamiwa kwamba kusaidia wengine huandaa kusudi lenye kutokeza uradhi katika maisha za wengi? Sivyo kabisa. Kwa sehemu, tuliumbwa ili tuweza kufanya mambo hayo.

Maandishi ya Biblia huendelea kusema kwamba wanadamu walipewa uangalizi wa viumbe hai wengine wote duniani—“samaki wa baharini, na ndege wa angani, . . . na kila chenye kutambaa kitambaacho juu ya nchi.” (Mwanzo 1:26) Kwa hiyo, haishangazi kwamba hata leo wengi hupata uradhi kuwa na wanyama na kucheza nao. Wengine huhisi wakiwa na jukumu kuelekea wanyama hao kiasi cha kwamba wanajitahidi kuhifadhi jamii za wanyama wanaoendelea kwisha, au wanapinga kuwafanya wanyama wateseke isivyo lazima.

Wanadamu waliamuriwa pia ‘waitiishe dunia.’ (Mwanzo 1:28) Hilo lilimaanisha nini? Kwa kweli si kwamba watu wanapaswa kutumia dunia kwa ubinafsi na bila kujali hadi mali yayo iishe hali-anga yayo ichafuliwe, na bahari zayo na sehemu za nchi zijazwe takataka. Badala yake, Mungu aliweka kigezo cha kuitiisha dunia ‘alipopanda bustani upande wa mashariki wa Edeni, akamweka ndani yake huyo mtu aliyemfanya.’ (Mwanzo 2:8) Shamba hilo la Edeni lilikuwa kigezo kilichoonyesha vile dunia ingekuja kuwa. Lilionyesha kusudi la Mungu kwa sayari yetu.

Maandishi ya Biblia hueleza: “Mungu akawabarikia, Mungu akawaambia, Zaeni, mkaongezeke, mkaijaze nchi, na kuitiisha.” (Mwanzo 1:28) Mungu alitaka wanadamu wapate watoto na kuijaza dunia. Alimleta mwanamume na mwanamke wa kwanza pamoja na, kwa hakika, akafanyiza ndoa ya kwanza kabisa. (Mwanzo 2:22-24) Haishangazi kwamba ndoa na familia hufanya maisha za watu wengi ziwe na maana na zenye kusudi!

Vile Ambavyo Uhai Ungaliweza Kuwa

Tunapojifunza Biblia, ni wazi kwamba Mungu alitaka familia ya Adamu ikue naye [Adamu] na watoto wake wapanue mipaka ya shamba la Edeni hadi hapo wanadamu wangeijaza dunia nzima. Nayo dunia iliyotiishwa ingekuwa paradiso. Ni kweli, mwanadamu angetumia mali ya dunia kwa faida yake. Lakini hilo lingefanywa kwa njia ya kujali. Mwanadamu alipaswa awe msimamizi wa dunia, si mwenye kuiharibu. Uharibifu wa dunia tunaoushuhudia leo unapingana na mapenzi ya Mungu, na wale wanaoushiriki wanafanya kinyume cha kusudi la uhai.—Ufunuo 11:18.

Tunajifunza jambo jingine kutokana na maandishi ya mapema ya Biblia, na hilo ni kwamba halikuwa kusudi la Mungu watu wafe. Wazazi wetu wa kwanza walikufa kwa sababu tu walikosa kumtii Mungu. (Mwanzo 2:16, 17) Walipokosa kutii, hawakuwa tena wakitimiza kusudi la uhai—hawakuwa tena wakifanya mapenzi ya Mungu. Kwa hiyo si kwamba wao walikufa tu bali pia wazao wao wote waliletwa katika hali ya kufa kwa sababu ya kurithi kutokamilika kutoka kwao. (Warumi 5:12) Hata hivyo, wanadamu walikusudiwa waishi milele, si wafe. Hiyo inaelekea ndiyo sababu kwa nini wengi hufadhaika wanapofikiria kwamba kifo kimekatiza kazi yao ya maisha.

Kutimiza Kusudi la Mungu

Kusudi la awali la Mungu kwa ainabinadamu na dunia hii halijabadilika. Bado yeye anakusudia kuwa na dunia-paradiso iliyojaa jamii kamilifu ya kibinadamu. Hata hivyo, yeye amepanga mipango ili kuondoa matokeo mabaya ya kushindwa kwa wazazi wetu wa kwanza. Kufanya mapenzi ya Mungu leo hutia ndani kutenda kupatana na mipango hiyo yote ya Mungu. Kwa furaha, Biblia huandaa maelezo ya utimizo wenye kuendelea wa kusudi lake.

Tunasoma katika kitabu cha kwanza cha Biblia kwamba Mungu alisema kuhusu ‘mbegu’ ambaye angekuja kuondoa madhara yote yaliyoletwa na kule kushindwa kwa Adamu na Hawa kufanya mapenzi Yake. (Mwanzo 3:15) Katika Maandiko ya Kigiriki ya Kikristo (“Agano Jipya”), tunasoma kuhusu kutokea kwa Yesu Kristo akiwa ‘mbegu’ hiyo, kuhusu maisha yake yasiyo na dhambi, na kifo chake mikononi mwa maadui wake. Kifo cha Yesu kilikuwa hasa, dhabihu kwa ajili yetu, kikifungua njia kwetu kupata tena uhai wa milele ambao Adamu na Hawa walipoteza. (Waebrania 7:26; 9:28) Naam, Biblia husema: ‘kila mtu amwaminiye hatapotea, bali atapata uzima wa milele.’—Yohana 3:16.

Na kuna mengi zaidi. Baada ya kifo chake, Yesu alifufuliwa akiwa kiumbe wa kiroho asiyeweza kufa na sasa anatawala akiwa Mfalme wa Ufalme wa kimbingu wa Mungu. Karibuni Ufalme huo utatenda ili jamii ya ulimwengu mpya ambayo itachukua usimamizi wa mambo ya wanadamu ichukue mahali pa serikali za sasa za kidunia. Unabii wa Biblia huahidi: “Na ufalme wenyewe hautapitishwa kwa watu wengineo wote. Utaponda-ponda na kuweka mwisho kwenye falme zote hizi, na huo wenyewe utasimama hadi nyakati zisizo dhahiri.”—Danieli 2:44, NW.

Baadaye, Ufalme huu utasimamia utendaji wenye kufurahisha wa kurudisha Paradiso duniani na kuinua ainabinadamu kwenye ukamilifu. Biblia hata huzungumzia ufufuo wa wafu, ili kwamba wao pia wawe na fursa ya kushiriki katika utimizo wa kusudi kuu la Mungu kwa wanadamu. (Matendo 24:15) Ndipo ahadi hii nzuri ajabu itakapotimizwa: “Wenye upole watairithi nchi, watajifurahisha kwa wingi wa amani. Wenye haki watairithi nchi, nao watakaa humo milele.”—Zaburi 37:11, 29.

Kufaidika Kibinafsi

Ili kufaidika kibinafsi kutokana na kutimizwa kwa kusudi kuu la Mungu kwa dunia, ni lazima kwanza tupate kumjua Mungu. Yesu Kristo alisema: “Na uzima wa milele ndio huu, Wakujue wewe, Mungu wa pekee wa kweli na Yesu Kristo uliyemtuma.” (Yohana 17:3) Tunaweza kufanyaje hivyo? Sisi hujifunza mambo fulani kuhusu Mungu kwa kuchunguza ulimwengu unaotuzunguka, uumbaji, kutia na mbingu zenye nyota. (Zaburi 19:1) Hata hivyo, hasa sisi hujifunza kuhusu Mungu—pamoja na Mwana wake, Yesu Kristo—kupitia Biblia. Tunajifunza juu ya jina lake na sifa zake, na tunajua hata jambo lililo dogo kuhusu yale ambayo Mungu amefanyia ainabinadamu. Maarifa kama hayo hutufanya tumpende na hutuvuta karibu sana naye na Mwanaye.

Kupata kumjua Mungu hutufanya tutake kufanya mapenzi yake. Labda tumesali kama vile Yesu alivyoagiza: “Ufalme wako uje, mapenzi yako yatimizwe, hapa duniani kama mbinguni.” (Mathayo 6:9, 10) Kusudi lenyewe la uhai—lile linaloleta uradhi wa kweli—ni kuishi kupatana na mapenzi hayo ya Mungu.

Hata hivyo, ni nini kinachotiwa ndani katika kufanya mapenzi ya Mungu? Kwa Adamu na Hawa, kulitia ndani usimamizi wa jamii nzima ya wanyama na kutiisha dunia na kuijaza kwa wazao wakamilifu. Ikiwa tutafanya mapenzi ya Mungu leo, ni lazima tujifunze na kujizoeza imani katika dhabihu ya fidia ya Yesu. Na ni lazima tufuate mfano wa Yesu kwa kuwaambia wengine kuhusu “habari njema ya ufalme.”—Mathayo 24:14.

Kufanya mapenzi ya Mungu pia hutia ndani kukuza utu wa kimungu. Kwa hiyo tunatambua mambo ambayo Mungu huchukia—kama vile kusema uongo, kuiba, porojo zenye kuumiza, hasira isiyozuiliwa—na kuyakataa. Pia tunajifunza sifa ambazo Mungu hupenda—kama vile upendo, furaha, amani, fadhili, na wema—na kuzisitawisha kwa msaada wa roho takatifu ya Mungu. (Wagalatia 5:19-24) Ikiwa sisi tutapata uhai wa milele, tunahitaji kuwa aina ya watu ambao Mungu atataka kuwa nao kwa umilele wote. Kwa kweli, kujifunza juu ya Mungu na kufanya mapenzi yake hufanya uhai wetu uwe wenye kusudi na maana kuliko vile kitu kingine chochote kiwezavyo!

Tofauti Inayotokezwa

Maisha za mamilioni ya watu kuzunguka ulimwengu hushuhudia kwamba kupata kusudi lenyewe la uhai kwa kweli hutokeza tofauti kubwa. Fikiria mfano wa Wayne, ambaye alikumbwa na kifo cha mke wake wa kwanza. Kasisi wake hakuweza kumfariji, kwa hiyo Wayne akawa mwenye shughuli nyingi katika kazi ya kujitolea. Yeye alitumika akiwa kamanda katika Kikosi cha Wanajeshi wa Amerika na alijihusisha na vikundi vya kisiasa. Ndipo akaoa tena, lakini ndoa hiyo ilikuwa yenye matatizo. Yeye na mke wake walikosa mwongozo maishani mwao.

Hata hivyo, siku moja, Wayne alichukua Biblia na kuanza kuisoma. Katika miezi mitatu akaimaliza, na anasema: “Sasa nilijua kuwa kuna kusudi fulani la sisi kuwa hapa na tumaini la uhai baada ya kufa.” Alimwambia mke wake: “Tunapaswa tuwatafute watu ambao hushikamana na Biblia ili tushirikiane nao.” Upesi wakakutana na Mashahidi wa Yehova, na mazungumzo yao pamoja nao yaliongeza tamaa yao ya kufanya mapenzi ya Mungu. Wayne na mke wake pia walijiweka wakfu kwa Mungu, na maisha yao ya familia yalifaidika sana.

Susan, binti ya wamishonari Wapresbiteri alitaka kufanya jambo fulani maishani mwake ambalo lingesaidia ulimwengu kweli kweli. Mhadhara kuhusu hatari za nguvu za nyukilia ulimsadikisha kwamba jambo hilo ndilo lilikuwa la maana zaidi. Kwa hiyo aliacha koleji ili atumie maisha yake yote kuwaelimisha watu kuhusu tatizo hilo. Alipokuwa na umri wa miaka 21, alitumika akiwa mratibu wa mkutano mkubwa wa kupinga zana za nyukilia. Baadaye alitembelewa na Mashahidi wa Yehova akaonyeshwa yale ambayo Biblia husema, na baada ya wakati fulani, akapata kusudi lenyewe la uhai. Ingawa bila shaka yeye bado huhangaishwa na tendo la ainabinadamu la kuiharibu dunia, yeye anatambua kwamba Mungu atasuluhisha matatizo hayo kupitia Ufalme wake. Kwa hiyo, yeye husaidia watu wawe na imani katika hilo.

Kusudi la maisha la Marielle lilikuwa kufurahia mambo yanayotolewa na ulimwengu. Yeye alifuatia kazi-maisha. Alifurahia vitu vyote vya kimamboleo vya Los Angeles, California, U.S.A., kutia ndani karamu na dawa za kulevya. Lakini alipoanza kujifunza Biblia, na kupata kumjua na kumtumikia Mungu, aliona jinsi mambo hayo yalivyokuwa bila maana yoyote. Yeye anasema kwamba maisha yake sasa yametajirishwa zaidi kwa kuwa sasa yanapatana na makusudi ya Mungu.

Idadi ya wale ambao maisha zao zimetajirishwa kwa kujifunza kusudi lenyewe la uhai inaongezeka kwa mamia kila siku. Kuishi kupatana na kusudi hilo la kweli la uhai kwa kufanya mapenzi ya Baba yetu wa kimbingu mwenye upendo hutokeza tofauti kubwa kweli kweli. Ni jambo linaloweza kubadilisha maisha yako yote kuwa bora zaidi. Tunakualika ujichunguzie mwenyewe jambo hilo. Maisha yako yatakuwa yenye kuridhisha zaidi ukifanya hivyo.

[Picha katika ukurasa wa 9]

Mpaji uhai alikuwa na kusudi kwa kuumba ainabinadamu

[Picha katika ukurasa wa 10]

Mungu hajaachilia mbali kusudi lake la kuwa na dunia-paradiso iliyojazwa jamii kamilifu ya kibinadamu