“Upendo Wao Ulitugusa Moyo Sana”

JUMAMOSI, Aprili  25, 2015, tetemeko la ardhi lenye kipimo cha 7.8 lilitikisa Nepal, nchi yenye milima mingi iliyo kaskazini mwa India. Tetemeko hilo lilitokea eneo lililo kilomita 80 hivi kaskazini magharibi mwa Kathmandu, mji mkuu wa Nepal. Zaidi ya watu 8,500 walikufa. Tetemeko hilo lilisababisha vifo vingi zaidi kuliko misiba mingine ya asili ambayo imewahi kutokea nchini Nepal. Zaidi ya nyumba laki tano ziliharibiwa. Kuna Mashahidi wa Yehova wapatao 2,200 nchini Nepal, na wengi kati yao walikuwa wanaishi katika eneo lililoathiriwa na tetemeko. Kwa kusikitisha, Shahidi mmoja na watoto wake wawili walikufa.

Shahidi anayeitwa Michelle alisema hivi: “Tetemeko lilitokea wakati ambapo ibada katika Makutaniko mengi ilikuwa ikiendelea. Kama lingetokea muda ambao watu huwa nyumbani, wengi wangekufa.” Kwa nini wale waliokuwa kwenye majumba ya ibada waliokoka? Kwa sababu ya muundo wa Majumba ya Ufalme.

Nchini Nepal, Majumba ya Ufalme ya kisasa hujengwa kwa njia inayoweza kuhimili matetemeko ya ardhi. Man Bahadur, anayehusika na ujenzi wa Majumba ya Ufalme anasema hivi: “Watu wengi huuliza kwa nini sisi hujenga msingi imara hata katika majengo madogo. Sasa tumeona faida yake! ” Baada ya tetemeko hilo, mipango ilifanywa ili Majumba ya Ufalme yatumiwe kuwa makazi ya muda. Licha ya matetemeko madogo yaliyoendelea, Mashahidi wa Yehova walihisi wakiwa salama kwenye Majumba ya Ufalme.

Mara moja, wazee Wakristo walianza kuwatafuta washiriki wa kutaniko ambao haikujulikana walipo. Shahidi anayeitwa Babita alieleza hivi: “Wazee walitanguliza kwanza mahitaji ya washiriki wa kutaniko. Upendo wao ulitugusa moyo sana.” Siku moja baada ya tetemeko, washiriki watatu wa halmashauri ya tawi inayosimamia kazi ya Mashahidi wa Yehova nchini Nepal, wakishirikiana na wahudumu wanaosafiri au waangalizi wa mzunguko, walianza kutembelea makutaniko ili wafahamu mambo yaliyohitajika na kuwasaidia wazee wa makutaniko katika eneo hilo.

Siku sita baada ya tetemeko, Gary Breaux kutoka makao makuu ya Mashahidi wa Yehova yaliyoko Marekani alitembelea Nepal pamoja na mke wake, Ruby. Reuben, mshiriki mmoja wa halmashauri iliyotajwa mwanzoni, alisema hivi: “Kwa sababu ya hali mbaya iliyokuwa Kathmandu na pia matetemeko madogo yaliyokuwa yakiendelea, hatukuwa na uhakika ikiwa Ndugu Breaux angeweza kuja. Hata hivyo, aliazimia kuja na alifanikiwa. Mashahidi katika eneo hili walithamini sana ziara yake.”

Silas, ambaye hufanya kazi katika ofisi ya Mashahidi wa Yehova nchini Nepal alisema hivi: “Baada ya huduma za simu kurudishwa, simu zilipigwa mchana na usiku! Mashahidi kutoka sehemu mbalimbali za dunia walitaka kujua hali yetu. Ingawa wengine walizungumza lugha ambazo hatukuelewa, tulihisi upendo na utayari wao wa kusaidia.”

Kwa siku kadhaa baada ya tetemeko, Mashahidi katika eneo hilo walipeleka vyakula kwenye Majumba ya Ufalme kwa ajili ya watu walio na uhitaji. Kwa kuongezea, Halmashauri ya Kutoa Misaada iliundwa, na punde si punde misaada ilianza kumiminika hasa kutoka nchini Bangladeshi, India, na Japani. Siku chache baadaye, madaktari ambao ni Mashahidi kutoka Ulaya walifika na wakachagua Jumba moja la Ufalme ili walitumie kutoa huduma. Walianza kazi mara moja kwa kutibu watu wenye majeraha na pia kuwasaidia kihisia ili kukabiliana na hali hiyo.

Mwanamke anayeitwa Uttara anawakilisha hisia za wengi kwa kusema hivi: “Tetemeko hilo lilikuwa baya sana na lenye kuogopesha. Lakini baadaye tulihisi tukiwa karibu zaidi na familia yetu ya kiroho kuliko hapo awali.” Naam, tetemeko hilo liliimarisha zaidi upendo wao kwa Yehova na kwa waabudu wenzao.