Unabii

Ni matabiri gani yaliyoandikwa katika Biblia ambayo tayari yametimizwa?

Ili upate mifano fulani, ona vichwa “Biblia,” “Siku za Mwisho,” na “Vipindi vya Wakati,” pia kitabu “Kila Andiko, Lenye Pumzi ya Mungu, Lafaa,” ukurasa wa 343-346.

Ni unabii gani wenye kutokeza wa Biblia ambao bado haujatimizwa?

1 The. 5:3: “Wakati watakapokuwa wakisema: ‘Amani na usalama!’ ndipo uharibifu wa ghafula utakapokuwa juu yao mara moja kama vile maumivu ya taabu juu ya mwanamke mwenye mimba; nao hawataponyoka hata kidogo.”

Ufu. 17:16: “Zile pembe kumi ulizoona, na yule mnyama-mwitu, hawa watamchukia yule kahaba [Babiloni Mkubwa] na kumfanya kuwa ukiwa na uchi, nao watakula sehemu zake zenye nyama na kumteketeza kabisa kwa moto.”

Eze. 38:14-19: “Umwambie Gogu, ‘Bwana Mwenye Enzi Kuu Yehova amesema hivi: “Je, haitakuwa katika siku ile wakati watu wangu Israeli [wa kiroho] wanapokaa kwa usalama kwamba utajua hilo? Nawe hakika utakuja kutoka mahali pako, kutoka sehemu za mbali zaidi za kaskazini, wewe na vikundi vingi vya watu pamoja nawe . . . ” “Na itatukia katika siku hiyo, katika siku ambayo Gogu atakuja juu ya nchi ya Israeli,’ asema Bwana Mwenye Enzi Kuu Yehova, “kwamba ghadhabu yangu itapanda puani mwangu. Na katika ukali wangu, katika moto wa ghadhabu yangu, nitalazimika kusema.”’”

Dan. 2:44: “Ufalme huo [uliosimamishwa na Mungu] . . . utazivunja na kuzikomesha falme hizi zote [za wanadamu], nao utasimama mpaka wakati usio na kipimo.”

Eze. 38:23: “Hakika nitajitukuza mwenyewe na kujitakasa mwenyewe na kujijulisha mwenyewe mbele ya macho ya mataifa mengi; nao watalazimika kujua kwamba mimi ni Yehova.”

Ufu. 20:1-3: “Nami nikamwona malaika akishuka kutoka mbinguni mwenye ufunguo wa abiso na mnyororo mkubwa mkononi mwake. Naye akamkamata yule joka mkubwa, yule nyoka wa zamani, ambaye ni Ibilisi na Shetani, na kumfunga kwa miaka elfu. Naye akamtupa ndani ya abiso na kuifunga na kuitia muhuri juu yake, ili asipotoshe mataifa tena mpaka ile miaka elfu itakapokwisha. Baada ya mambo hayo yeye atafunguliwa kwa muda kidogo.”

Yoh. 5:28, 29: “Msistaajabie jambo hili, kwa sababu saa inakuja ambayo wale wote waliomo ndani ya makaburi ya ukumbusho wataisikia sauti yake na kutoka, wale waliotenda mambo mema kwenye ufufuo wa uzima, wale waliokuwa na zoea la kutenda mambo maovu kwenye ufufuo wa hukumu.”

Ufu. 21:3, 4: “Ndipo nikasikia sauti kubwa kutoka katika kile kiti cha ufalme ikisema: ‘Tazama! Hema la Mungu liko pamoja na wanadamu, naye atakaa pamoja nao, nao watakuwa watu wake. Na Mungu mwenyewe atakuwa pamoja nao. Naye atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.’”

1 Kor. 15:24-28: “Halafu, ule mwisho, wakati atakapomkabidhi ufalme Mungu wake ambaye pia ni Baba yake . . . Lakini vitu vyote vitakapokuwa vimetiishwa kwake, ndipo Mwana mwenyewe atakapojitiisha pia kwa Yeye aliyevitiisha vitu vyote kwake, ili Mungu awe vitu vyote kwa kila mtu.”

Kwa nini Wakristo wanapaswa kupendezwa sana na matabiri ya Biblia?

Mt. 24:42: “Endeleeni kukesha kwa sababu hamjui ni siku gani Bwana yenu atakuja.”

2 Pet. 1:19-21: “Tuna neno la kinabii likiwa limefanywa hakika zaidi [kwa sababu ya yale yaliyotendeka Yesu alipogeuka sura]; nanyi mnafanya vema kulikazia uangalifu . . . Kwa maana unabii haukuletwa wakati wowote kwa mapenzi ya mwanadamu, bali wanadamu walisema yaliyotoka kwa Mungu kama walivyoongozwa na roho takatifu.”

Met. 4:18: “Njia ya waadilifu ni kama nuru inayong’aa, inayozidi kuongezeka mpaka mchana mkamilifu.”

Mt. 4:4: “Mwanadamu ataishi, si kwa mkate tu, bali kwa kila neno linalotoka katika kinywa cha Yehova.” (Hilo linatia ndani ahadi zake tukufu za kinabii.)

2 Tim. 3:16: “Andiko lote limeongozwa na roho ya Mungu nalo ni lenye faida kwa kufundisha, kwa kukaripia, kwa kunyoosha mambo, kwa kutia nidhamu katika uadilifu.” (Kwa hiyo, tunastahili kujifunza kwa bidii Neno lote la Mungu lililoandikwa.)

‘Ninyi mnakazia mno unabii. Linalohitajiwa tu ni kumkubali Kristo kuwa Mwokozi wako na kuishi maisha mema ya Kikristo’

Unaweza kujibu hivi: ‘Hakika ni muhimu kutambua daraka la Yesu Kristo. Lakini je, unajua kwamba sababu moja iliyowafanya Wayahudi wa karne ya kwanza wakose kumkubali ni kwamba hawakuangalia unabii vya kutosha?’ Kisha unaweza kuongezea: (1) ‘Unabii katika Maandiko ya Kiebrania ulikuwa umetabiri wakati wa kuja kwa Masihi (Kristo) na mambo ambayo angefanya. Lakini Wayahudi kwa ujumla hawakujali yale ambayo unabii huo ulisema. Wao walikuwa na mawazo yao wenyewe kuhusu yale ambayo Masihi alipaswa kufanya, na kwa sababu hiyo wakamkataa Mwana wa Mungu. (Ona ukurasa wa 429, 430, chini ya kichwa “Yesu Kristo.”)’ (2) ‘Sisi leo tunaishi katika wakati ambao Kristo ameanza kutawala akiwa Mfalme mbinguni naye ameagiza ujumbe wake uhubiriwe kwa watu wa mataifa yote. (Mt. 24:14) Lakini watu wengi wanatazamia jambo tofauti.’

Au unaweza kusema: ‘Nakubali kwamba kuwa Mkristo mwema ni jambo la maana. Lakini je, nitakuwa Mkristo mwema nikifanya baadhi ya mambo ambayo Yesu alifundisha lakini nipuuze aliyosema tunapaswa kutanguliza maishani? . . . Ona yale aliyosema kama yalivyoandikwa hapa katika Mathayo 6:33.’ Kisha unaweza kuongezea: ‘Je, si kweli kwamba Yesu alitufundisha tusali kuhusu Ufalme huo, hata kabla ya kuomba msamaha kwa sababu ya imani yetu kwake akiwa Mwokozi? (Mt. 6:9-12)’