Ulimwengu

Je, ulimwengu utaangamizwa kwa moto?

2 Pet. 3:7: “Kwa neno hilohilo [la Mungu] mbingu na dunia za sasa zimewekwa akiba kwa ajili ya moto nazo zinahifadhiwa mpaka ile siku ya hukumu na ya kuangamizwa kwa watu wasiomwogopa Mungu.” (Ona kwamba wale watakaoangamizwa ni “watu wasiomwogopa Mungu,” wala si wanadamu kwa ujumla. Vivyo hivyo, mstari wa 6 unataja kuangamizwa kwa “ulimwengu” katika siku za Noa. Watu waovu waliangamizwa, lakini dunia na pia Noa mwenye kumwogopa Mungu na nyumba yake walibaki. Je, “moto” katika siku ya hukumu inayokuja utakuwa halisi, au je, ni mfano wa maangamizi kamili? Moto halisi ungekuwa na matokeo gani juu ya vitu halisi vya mbinguni kama vile jua na nyota ambazo tayari ni moto sana? Ili kupata habari zaidi kuhusu andiko hilo, ona ukurasa wa 71, 72, chini ya kichwa “Dunia.”)

Met. 2:21, 22: “Wanyoofu ndio watakaokaa duniani, na wasio na lawama ndio watakaobaki ndani yake. Nao waovu, watakatiliwa mbali kutoka duniani; nao wenye hila, watang’olewa kutoka ndani yake.”

Ni nani anayetawala ulimwengu huu —Mungu au Shetani?

Dan. 4:35: “[Mungu Aliye Juu Zaidi, Yehova] anafanya kulingana na mapenzi yake kati ya majeshi ya mbinguni na wakaaji wa dunia. Wala hakuna yeyote anayeweza kuzuia mkono wake au anayeweza kumuuliza, ‘Umekuwa ukifanya nini?’” (Vivyo hivyo, andiko la Yeremia 10:6, 7 humwita Yehova “Mfalme wa mataifa” kwa sababu yeye ndiye Mfalme Bora Zaidi, yule aliye na uwezo na ambaye atawatoza hesabu wafalme wanadamu na mataifa wanayotawala. Akiwa Muumba wa dunia, Yehova ndiye Mtawala wake halali; yeye hajaacha kamwe cheo hicho.)

Yoh. 14:30: “[Yesu akasema:] Mtawala wa ulimwengu anakuja. Naye hana uwezo juu yangu.” (Kwa wazi mtawala huyo si Yehova Mungu, ambaye Yesu anafanya mapenzi yake kwa ushikamanifu sikuzote. Huyo “mtawala wa ulimwengu” ni lazima awe “yule mwovu,” Shetani Ibilisi, ambaye “ulimwengu mzima unakaa” katika nguvu zake, kama ilivyoandikwa katika 1 Yohana 5:19. Ijapokuwa wanadamu wanaishi katika dunia ya Mungu, ulimwengu wa wale wasio watumishi watiifu wa Yehova uko chini ya uongozi wa Shetani kwa sababu watu hao humtii yeye. Wale wanaojitiisha kwa moyo wote chini ya utawala wa Yehova si sehemu ya ulimwengu huo. Linganisha na 2 Wakorintho 4:4.)

Ufu. 13:2: “Yule joka mkubwa [Shetani Ibilisi] akampa huyo mnyama nguvu zake na kile kiti chake cha ufalme na mamlaka kubwa.” (Maelezo kuhusu “mnyama” huyo yanapolinganishwa na Danieli 7 huonyesha kwamba anawakilisha serikali za wanadamu, si serikali moja tu bali mfumo wa duniani pote wa utawala wa kisiasa. Uhakika wa kwamba Shetani ndiye mtawala wa serikali hizo unapatana na Luka 4:5-7, pia na Ufunuo 16:14, 16, maandiko ambayo huonyesha maneno yanayoongozwa na roho waovu yakiwaongoza watawala wa dunia yote wapigane vita na Mungu kwenye Har–Magedoni. Utawala wa Shetani juu ya ulimwengu unavumiliwa tu na Mungu mpaka wakati Wake uliowekwa ufike wa kumaliza lile suala la enzi kuu ya ulimwengu wote.)

Ufu. 11:15: “Sauti kubwa zikatokea mbinguni, zikisema: ‘Ufalme wa ulimwengu umekuwa ufalme wa Bwana wetu [Yehova] na wa Kristo wake.’” (Hilo lilipotukia mwaka wa 1914, “siku za mwisho” za mfumo mbovu uliopo zilianza. Wonyesho mpya wa enzi kuu ya Yehova ukaonekana, wakati huu kupitia Mwana wake mwenyewe akiwa Mtawala wa Kimasihi. Hivi karibuni ulimwengu mbovu utaharibiwa, na Shetani, mtawala wake mwovu wa kiroho, atatupwa katika abiso, asiweze kuwapotosha wanadamu.)

Wakristo wa kweli wana mtazamo gani kuhusu ulimwengu na kuhusu watu walio sehemu ya ulimwengu?

Yoh. 15:19: “Ninyi [wafuasi wa Yesu] si sehemu ya ulimwengu, bali nimewachagua ninyi kutoka ulimwenguni.” (Kwa hiyo Wakristo wa kweli si sehemu ya jamii ya wanadamu waliojitenga na Mungu. Wao wanafanya shughuli za kawaida za wanadamu, lakini wanaepuka mitazamo, maneno, na mwenendo unaoonyesha tabia ya ulimwengu na unaopingana na njia za uadilifu za Yehova.) (Ona ukurasa wa 133-139, pia 246-250.)

Yak. 4:4: “Enyi wazinzi, je, hamjui kwamba urafiki na ulimwengu ni uadui na Mungu? Kwa hiyo, yeyote anayetaka kuwa rafiki ya ulimwengu anajifanya kuwa adui ya Mungu.” (Kwa sababu Wakristo si wakamilifu, huenda nyakati nyingine wakachafuliwa na ulimwengu. Lakini wanaposhauriwa kutokana na Neno la Mungu, wao hutubu na kurekebisha njia zao. Hata hivyo, ikiwa wengine, kwa uchaguzi wa kukusudia, wanajiunga na ulimwengu au wanaiga roho yake, wanaonyesha kwamba wao si Wakristo wa kweli tena bali wamekuwa sehemu ya ulimwengu ambao ni adui ya Mungu.)

Rom. 13:1: “Kila nafsi na ijitiishe kwa mamlaka zilizo kubwa, kwa maana hakuna mamlaka isipokuwa kwa njia ya Mungu; mamlaka zilizopo zimesimamishwa na Mungu katika vyeo vyao vya kadiri.” (Wale wanaotii shauri hilo si waasi, wanaojaribu kupindua serikali za ulimwengu. Wanajitiisha kwa mamlaka ya watawala wa kisiasa, wakiwatii kwa kadiri ambayo matakwa ya watawala hao hayapingani na matakwa ya Mungu. Mungu aliziona mapema na kuzitabiri serikali hizo. Zinatawala, si kwa sababu yeye amezipa uwezo, bali kwa ruhusa yake. Wakati wake utakapofika, ataziondoa.)

Gal. 6:10: “Tukiwa na wakati unaofaa kwa ajili ya hilo, tuwatendee wote mema, na hasa wale ambao katika imani ni jamaa zetu.” (Kwa hiyo, Wakristo wa kweli hawaachi kuwatendea mema wanadamu wenzao. Wao humwiga Mungu, anayefanya jua liangaze juu ya watu waovu na pia wema.—Mt. 5:43-48.)

Mt. 5:14-16: “Ninyi ndio nuru ya ulimwengu. . . . Acheni nuru yenu iangaze mbele ya watu, ili wapate kuona matendo yenu mazuri na kumpa utukufu Baba yenu aliye mbinguni.” (Ili wengine wampe Mungu utukufu kwa sababu ya yale ambayo Wakristo wanafanya, ni wazi kwamba ni lazima hao Wakristo wawe mashahidi watendaji kwa ulimwengu kuhusu jina na kusudi la Mungu. Wakristo wa kweli hutanguliza utendaji huo.)

Hali za sasa za ulimwengu zinamaanisha nini?

Ona kichwa “Siku za Mwisho.”