Sura 13

Kwa Nini Kuishi Maisha ya Kimungu Huleta Furaha

 1. Sababu gani twaweza kusema kwamba njia ya Yehova huleta furaha?

YEHOVA ni “Mungu mwenye furaha,” naye anakutaka ufurahie maisha. (1 Timotheo 1:11, NW ) Kwa kutembea katika njia yake, unaweza kujinufaisha na kuwa na utulivu mwingi na wenye kudumu, kama mto unaotiririka daima. Kutembea katika njia ya Mungu hutusukuma pia tuendelee kufanya matendo ya uadilifu, “kama mawimbi ya bahari.” Hilo huleta furaha ya kweli.—Isaya 48:17, 18.

 2. Wakristo wanaweza kuwaje wenye furaha ingawa nyakati nyingine wao hutendwa vibaya?

² Huenda wengine wakapinga hivi, ‘Nyakati nyingine watu huteseka kwa ajili ya kufanya yaliyo sawa.’ Ni kweli, na hilo ndilo jambo lililowapata mitume wa Yesu. Hata hivyo, ingawa walinyanyaswa wao walishangilia wakaendelea “kuhubiri habari njema za Yesu kwamba ni Kristo.” (Matendo 5:40-42) Sisi twaweza kujifunza masomo yenye maana kutokana na hili. Moja ni kwamba kuishi kwetu maisha ya kimungu hakuhakikishi kwamba tutatendewa vema sikuzote. “Naam,” akaandika mtume Paulo, “na wote wapendao kuishi maisha ya utauwa [“ujitoaji wa kimungu,” NW] katika Kristo Yesu wataudhiwa [“watanyanyaswa,” NW].” (2 Timotheo 3:12) Sababu ya hilo ni kwamba Shetani na ulimwengu wake wanapinga wale wanaoishi kwa njia ya kimungu. (Yohana 15:18, 19; 1 Petro 5:8) Lakini furaha ya kweli haitegemei mambo ya nje. Badala ya hivyo, inatokana na usadikisho wa kwamba sisi tunafanya yaliyo sawa na kwa hiyo tuna kibali cha Mungu.—Mathayo 5:10-12; Yakobo 1:2, 3; 1 Petro 4:13, 14.

 3. Ibada ya Yehova inapaswa kuathirije maisha ya mtu?

³ Kuna watu fulani wanaohisi kwamba wanaweza kupata upendeleo wa Mungu kupitia matendo ya ujitoaji ya mara kwa mara lakini wanaweza kumsahau nyakati nyinginezo. Ibada ya kweli kwa Yehova Mungu si hivyo. Inaathiri mwenendo wa mtu saa zake zote za kuamka, kutoka siku hadi siku, mwaka baada ya mwaka. Hiyo ndiyo sababu inaitwa “ile Njia.” (Matendo 19:9; Isaya 30:21) Ni njia ya maisha ya kimungu inayotutaka tuseme na kutenda kwa kupatana na Neno la Mungu.

 4. Sababu gani inanufaisha kufanya mabadiliko ili kuishi kulingana na njia za Mungu?

⁴ Wanafunzi wapya wa Biblia wanapoona kwamba wanahitaji kufanya mabadiliko fulani ili kumpendeza Yehova, huenda wakajiuliza, ‘Je, kweli kuna thamani ya kuishi maisha ya kimungu?’ Unaweza kuwa na hakika kwamba kuna thamani. Sababu gani? Kwa sababu “Mungu ni upendo,” na kwa hiyo njia zake zinakusudiwa kutunufaisha. (1 Yohana 4:8) Mungu ni mwenye hekima pia na ajua yanayotufaa zaidi. Kwa kuwa Yehova Mungu ni mweza yote, yeye aweza kututia nguvu ili tutimize tamaa yetu ya kumpendeza kwa kukomesha tabia mbaya. (Wafilipi 4:13) Ebu tufikirie baadhi ya kanuni zinazohusika katika maisha ya kimungu na tuone jinsi kuzitumia kunavyoleta furaha.

UFUATIAJI-HAKI HUTOKEZA FURAHA

 5. Biblia husema nini juu ya kusema uwongo na wizi?

⁵ Yehova ni “Mungu wa kweli.” (Zaburi 31:5) Bila shaka, wewe unatamani kufuata kielelezo chake na kujulikana kuwa mtu wa kweli. Ufuatiaji-haki huongoza kwenye hali ya kujistahi na kuhisi ukiwa na hali njema. Hata hivyo, kwa sababu kutokufuatia haki ni jambo la kawaida katika ulimwengu huu wenye dhambi, Wakristo wahitaji kikumbusha hiki: “Mkaseme kweli kila mtu na jirani yake . . . Mwibaji asiibe tena; bali afadhali afanye juhudi . . . apate kuwa na kitu cha kumgawia mhitaji.” (Waefeso 4:25, 28) Waajiriwa Wakristo hufanya kazi yenye kuleta sifa kila siku. Isipokuwa mwajiri wao awapa ruhusa, wao hawachukui vitu ambavyo ni mali yake. Iwe ni kazini, shuleni, au nyumbani, ni lazima mwabudu wa Yehova ‘afuatie haki katika mambo yote.’ (Waebrania 13:18, NW) Mtu yeyote anayefanya zoea la kusema uwongo au kuiba hawezi kuwa na upendeleo wa Mungu.—Kumbukumbu la Torati 5:19; Ufunuo 21:8.

 6. Ufuatiaji-haki wa mtu amwogopaye Mungu ungeweza kumleteaje Yehova utukufu?

⁶ Kuwa mwenye kufuatia haki hutokeza baraka nyingi. Selina ni mjane Mwafrika mwenye uhitaji anayempenda Yehova Mungu na kanuni zake za uadilifu. Siku moja, yeye alipata mkoba uliokuwa na kitabu cha benki na kiasi kikubwa cha fedha. Kwa kutumia kitabu chenye nambari za simu, yeye aliweza kupata mwenye vitu hivyo—mwenye duka aliyekuwa amepokonywa. Huyo mwanamume hakuweza kuamini macho yake wakati Selina alipomtembelea na kurudisha vitu vyote vilivyokuwa katika mkoba huo, ingawa alikuwa mgonjwa sana. “Ufuatiaji-haki wa jinsi hii lazima uthawabishwe,” huyo mwanamume akasema na akampa Selina kiasi fulani cha fedha. Jambo la maana zaidi ni kwamba, mwanamume huyo alisifu dini ya Selina. Ndiyo, matendo ya kufuatia haki yanayapamba mafundisho ya Biblia, humtukuza Yehova Mungu, na kuletea furaha waabudu wake wenye kufuatia haki.—Tito 2:10; 1 Petro 2:12.

UKARIMU HULETA FURAHA

 7. Kuna ubaya gani na kucheza kamari?

⁷ Kuna furaha katika kuwa mwenye ukarimu, lakini watu wenye pupa “hawataurithi ufalme wa Mungu.” (1 Wakorintho 6:9) Namna ya pupa iliyo ya kawaida ni kucheza kamari, ambalo ni jaribio la kuchuma fedha kupitia hasara za wengine. Yehova hakubali wale ambao ni “wenye pupa ya pato lisilo la haki.” (1 Timotheo 3:8, NW) Hata mahali ambapo kucheza kamari ni halali na mtu anacheza kamari ili kujifurahisha, yeye angeweza kuwa mraibu na kuwa akiendeleza zoea ambalo limeharibu maisha nyingi. Mara nyingi kucheza kamari huletea familia ya mcheza-kamari shida, ambayo huenda ikaachwa na fedha kidogo za kununua mahitaji kama vile chakula na mavazi.—1 Timotheo 6:10.

 8. Yesu aliwekaje kielelezo chema cha ukarimu, na sisi tunaweza kuwaje wenye ukarimu?

⁸ Kwa sababu ya ukarimu wao wenye upendo, Wakristo hupata shangwe katika kusaidia wengine, hasa waamini wenzao walio na uhitaji. (Yakobo 2:15, 16) Kabla ya Yesu kuja duniani, yeye aliona ukarimu wa Mungu kuelekea wanadamu. (Matendo 14:16, 17) Yesu mwenyewe alitoa wakati wake, stadi zake, na hata uhai wake kwa niaba ya jamii ya kibinadamu. Kwa sababu hiyo, alikuwa mwenye kustahili vema kusema: “Ni heri [“kuna furaha zaidi katika,” NW] kutoa kuliko kupokea.” (Matendo 20:35) Yesu alisema vema pia juu ya yule mjane maskini aliyetia kwa ukarimu sarafu ndogo mbili katika sanduku la hazina la hekalu, kwani yeye alitoa “riziki yake yote.” (Marko 12:41-44) Waisraeli wa kale na Wakristo wa karne ya kwanza hutoa vielelezo vya ukarimu wenye shangwe katika kutoa utegemezo wa kimwili kwa kutaniko na kazi ya Ufalme. (1 Mambo ya Nyakati 29:9; 2 Wakorintho 9:11-14) Zaidi ya kufanya michango ya kimwili kwa makusudi haya, Wakristo wa siku hii humtolea Mungu sifa kwa furaha na kutumia maisha zao katika utumishi wake. (Warumi 12:1; Waebrania 13:15) Yehova huwabariki kwa ajili ya kutumia wakati, nishati, na mali nyinginezo, kutia na fedha zao, ili kutegemeza ibada ya kweli na kuendeleza kazi ya ulimwenguni pote ya kuhubiri habari njema ya Ufalme.—Mithali 3:9, 10.

MAMBO MENGINE YANAYOENDELEZA FURAHA

 9. Kuna ubaya gani na unywaji wenye kupita kiasi wa vinywaji vyenye alkoholi?

⁹ Ili wawe na furaha, ni lazima Wakristo ‘walinde uwezo wao wa kufikiri.’ (Mithali 5:1, 2, NW) Hili lataka kwamba wasome na kutafakari juu ya Neno la Mungu na fasihi za Biblia zenye kufaa. Lakini kuna mambo ya kuepuka. Kwa mfano, unywaji wenye kupita kiasi wa vinywaji vyenye alkoholi unaweza kumfanya mtu apoteze udhibiti juu ya kufikiri kwake. Wakiwa katika hali hiyo, watu wengi huhusika katika mwenendo usio wa adili, hutenda kijeuri, na kusababisha aksidenti zenye kufisha. Si ajabu kwamba Biblia husema kwamba walevi hawataurithi Ufalme wa Mungu! (1 Wakorintho 6:9, 10) Wakiwa na azimio la kuendelea kuwa na “utimamu wa akili,” Wakristo wa kweli huepuka ulevi, na hilo husaidia kuendeleza furaha miongoni mwao.—Tito 2:2-6.

10. (a) Sababu gani Wakristo hawatumii tumbaku? (b) Ni manufaa zipi zinazotokana na kukomesha tabia za uraibu?

¹⁰ Mwili ulio safi huchangia furaha. Hata hivyo, wengi huwa waraibu wa vitu vyenye kudhuru. Kwa kielelezo, fikiria utumizi wa tumbaku. Shirika la Afya Ulimwenguni huripoti kwamba kuvuta sigareti “huua watu milioni tatu kila mwaka.” Kukomesha tabia ya kuvuta tumbaku kunaweza kuwa jambo gumu kwa sababu ya maumivu ya muda yanayotokana na kukomesha tabia hiyo. Kwa upande mwingine, watu waliokuwa wavutaji wa sigareti hapo awali wanagundua kwamba wana afya bora na fedha zaidi kwa ajili ya mahitaji ya kinyumbani. Ndiyo, kushinda tabia ya kuvuta tumbaku au uraibu wa vitu vingine vyenye kudhuru kutachangia mwili ulio safi, dhamiri iliyo safi, na furaha ya kweli.—2 Wakorintho 7:1.

FURAHA KATIKA NDOA

11. Ni nini kinachotakiwa ili kuwa na ndoa yenye kudumu iliyo halali na yenye kuheshimiwa?

¹¹ Wale wanaoishi pamoja wakiwa mume na mke wanapaswa kuhakikisha kwamba ndoa yao imesajiliwa ifaavyo na wenye mamlaka wa serikali. (Marko 12:17) Wanahitaji pia kuiona ndoa kuwa daraka zito. Ni kweli, mtengano huenda ukawa wa lazima katika hali za kutokutoa riziki kimakusudi, kutendwa vibaya kupita kiasi, au kuhatarishwa kabisa-kabisa kwa hali ya kiroho. (1 Timotheo 5:8; Wagalatia 5:19-21) Lakini maneno ya mtume Paulo kwenye 1 Wakorintho 7:10-17 hutia moyo wenzi waliooana wakae pamoja. Bila shaka, ili wawe na furaha ya kweli ni lazima wawe waaminifu mmoja kwa mwenzake. Paulo aliandika hivi: “Ndoa na iheshimiwe na watu wote, na malazi yawe safi; kwa maana waasherati na wazinzi Mungu atawahukumia adhabu.” (Waebrania 13:4) Neno “malazi” huonyesha ngono kati ya mwanamume na mwanamke waliooana kisheria. Hakuna uhusiano mwingine wowote wa kingono, kama vile kufunga ndoa na mke zaidi ya mmoja, uwezao kufafanuliwa kuwa ‘wenye kuheshimiwa na watu wote.’ Zaidi ya hayo, Biblia hulaumu ngono ya kabla ya kufunga ndoa na ugoni-jinsia-moja.—Warumi 1:26, 27; 1 Wakorintho 6:18.

12. Ni nini baadhi ya matokeo mabaya ya uasherati?

¹² Huenda uasherati ukaleta dakika chache za raha ya kimwili, lakini hautokezi furaha ya kweli. Unamchukiza Mungu na unaweza kutia kovu katika dhamiri ya mtu huyo. (1 Wathesalonike 4:3-5) Matokeo yenye kuhuzunisha ya ngono haramu huenda yakawa UKIMWI na maradhi mengine ya kupitishwa kingono. “Imekadiriwa kwamba watu zaidi ya milioni 250 ulimwenguni pote wanaambukizwa kila mwaka na kisonono, na wapatao milioni 50 [wanaambukizwa] na kaswende,” yasema ripoti moja ya kitiba. Pia kuna lile tatizo la mimba zisizotakwa. Shirika la Muungano wa Kimataifa wa Uzazi Uliopangwa laripoti kwamba, kotekote ulimwenguni, wasichana zaidi ya milioni 15 kati ya miaka ya 15 na ya 19 huwa na mimba kila mwaka, na theluthi moja kati yao hutoa mimba. Uchunguzi mmoja ulionyesha kwamba katika nchi moja ya Afrika, matatizo yanayotokana na utoaji-mimba husababisha asilimia 72 ya vifo vyote miongoni mwa wasichana matineja. Waasherati fulani huenda wakaepuka maradhi na mimba lakini si madhara ya kihisiamoyo. Wengi hupoteza hali yao ya kujistahi na hata hujichukia.

13. Ni matatizo gani ya ziada yanayosababishwa na uzinzi, na ni nini kinachowangojea wale wanaoendelea kuwa waasherati na wazinzi?

¹³ Ingawa uzinzi waweza kusamehewa, huo ni msingi halali wa Kimaandiko wa kutaliki kwa upande wa yule mwenzi asiye na hatia. (Mathayo 5:32; linganisha Hosea 3:1-5.) Ukosefu wa adili wa jinsi hiyo unapotokeza mvunjiko wa ndoa, huo unaweza kuacha makovu makubwa ya kihisiamoyo juu ya mwenzi asiye na hatia na juu ya watoto. Kwa manufaa ya familia ya kibinadamu, Neno la Mungu huonyesha kwamba hukumu yake kali itawajia waasherati na wazinzi wasiotubu. Zaidi ya hayo, hilo huonyesha kwa wazi kwamba wale wanaozoea ukosefu wa adili katika ngono “hawataurithi ufalme wa Mungu.”—Wagalatia 5:19, 21.

“SI SEHEMU YA ULIMWENGU”

14. (a) Ni nini baadhi ya namna za ibada ya sanamu zinazoepukwa na mtu amwogopaye Mungu? (b) Ni mwongozo gani unaoandaliwa na Yohana 17:14 na Isaya 2:4?

¹⁴ Wale wanaotamani kumpendeza Yehova na kufurahia baraka za Ufalme huepuka aina yoyote ya ibada ya sanamu. Biblia huonyesha kwamba ni vibaya kufanya na kuabudu sanamu, kutia na zile za Kristo, au za Mariamu, mama ya Yesu. (Kutoka 20:4, 5; 1 Yohana 5:21) Kwa hiyo, Wakristo wa kweli hawatoi heshima ya kiibada kwa picha, misalaba, na sanamu. Wao huepuka pia namna za ibada ya sanamu zenye hila zaidi, kama vile matendo ya ujitoaji kwa bendera na kuimba nyimbo zinazotukuza mataifa. Wanaposongwa wafanye matendo ya jinsi hiyo, wao hukumbuka maneno ya Yesu aliyomwambia Shetani: “Msujudie Bwana Mungu wako, umwabudu yeye peke yake.” (Mathayo 4:8-10) Yesu alisema kwamba wanafunzi wake “si sehemu ya ulimwengu.” (Yohana 17:14, NW) Hilo lamaanisha kuwa wenye kutokuwamo katika mambo ya kisiasa na kuishi kwa amani kwa kupatana na Isaya 2:4, linalosema hivi: “Naye [Yehova Mungu] atafanya hukumu katika mataifa mengi, atawakemea watu wa kabila nyingi; nao watafua panga zao ziwe majembe, na mikuki yao iwe miundu; taifa halitainua upanga juu ya taifa lingine, wala hawatajifunza vita tena kamwe.”

15. Babiloni Mkubwa ni nini, na wanafunzi wapya wengi wa Biblia hufanya nini ili kutoka humo?

¹⁵ ‘Kutokuwa sehemu ya ulimwengu’ kwamaanisha pia kukomesha ushirika wote na “Babiloni Mkubwa,” ile milki ya ulimwengu ya dini bandia. Ibada isiyo safi ilienea kutoka Babiloni la kale mpaka ilipokuwa na utawala wa kiroho wenye kudhuru juu ya watu duniani pote. “Babiloni Mkubwa” hutia ndani dini zote ambazo mafundisho na mazoea yazo hayapatani na ujuzi juu ya Mungu. (Ufunuo 17:1, 5, 15, NW) Hakuna mwabudu mwaminifu wa Yehova atakayeshiriki katika matendo yanayohusiana na mchangamano wa dini mbalimbali kwa kushiriki katika ibada pamoja na dini tofauti-tofauti au kwa kuwa na ushirika wa kiroho pamoja na sehemu yoyote ya Babiloni Mkubwa. (Hesabu 25:1-9; 2 Wakorintho 6:14) Kwa sababu hiyo, wanafunzi wapya wengi wa Biblia hupelekea tengenezo la kidini wanaloshirikiana nalo barua ya kujiuzulu. Hilo limefanya wawe karibu zaidi na Mungu wa kweli, kama ilivyoahidiwa: “Tokeni kati yao, mkatengwe nao, asema Bwana, msiguse kitu kilicho kichafu, nami nitawakaribisha.” (2 Wakorintho 6:17; Ufunuo 18:4, 5) Je, wewe hutamani sana kukubalika hivyo kwa Baba yetu wa kimbingu?

KUPIMA MIADHIMISHO YA KILA MWAKA

16. Sababu gani Wakristo wa kweli hawasherehekei Krismasi?

¹⁶ Maisha ya kimungu hutuweka huru na kule kusherehekea sikukuu za kilimwengu ambako mara nyingi ni jambo lenye kulemeza. Kwa mfano, Biblia haifunui siku barabara ya kuzaliwa kwa Yesu. ‘Nilifikiri Yesu alizaliwa Desemba 25!’ wengine hupaaza sauti. Hilo haliwezekani kwa sababu yeye alikufa katika masika ya 33 W.K. akiwa na umri wa miaka 33 1/2. Zaidi ya hayo, wakati wa kuzaliwa kwake, wachungaji walikuwa “wakikaa makondeni na kulinda kundi lao kwa zamu usiku.” (Luka 2:8) Katika nchi ya Israeli, mwisho-mwisho wa Desemba ni majira ya baridi, yenye mvua wakati ambapo kondoo wangewekwa ndani ya vibanda wakati wa usiku ili kuwalinda dhidi ya halihewa ya majira ya baridi kali. Kwa kweli, Desemba 25 uliwekwa kando na Waroma kuwa siku ya kuzaliwa kwa mungu wao jua. Karne kadhaa baada ya Yesu kuwa duniani, Wakristo waasi-imani walikopa tarehe hiyo kwa ajili ya msherehekeo wa siku ya kuzaliwa kwa Kristo. Kwa hiyo, Wakristo wa kweli hawasherehekei Krismasi au sikukuu nyingine yoyote inayotegemea imani bandia za kidini. Kwa sababu wao humpa Yehova ujitoaji usiohusisha wengine, wao pia hawaadhimishi sikukuu zinazofanya wanadamu wenye dhambi au mataifa waabudiwe kama sanamu.

17. Sababu gani watu wamwogopao Mungu hawafanyi karamu za siku ya kuzaliwa, na sababu gani watoto Wakristo ni wenye furaha hata hivyo?

¹⁷ Biblia hutaja kihususa miadhimisho miwili tu ya siku ya kuzaliwa, yote miwili ikihusisha watu wasiomtumikia Mungu. (Mwanzo 40:20-22; Mathayo 14:6-11) Kwa kuwa Maandiko hayafunui siku ya kuzaliwa kwa yule mtu mkamilifu Yesu Kristo, sababu gani tuelekeze uangalifu wa pekee kwenye siku za kuzaliwa kwa wanadamu wasio wakamilifu? (Mhubiri 7:1) Bila shaka, wazazi wamwogopao Mungu hawangoji siku ya pekee ili kuwaonyesha watoto wao upendo. Msichana Mkristo mwenye umri wa miaka 13 alisema hivi: “Familia yangu nami hujifurahisha sana. . . . Mimi niko karibu sana na wazazi wangu, na watoto wengine wanaponiuliza ni sababu gani sisherehekei sikukuu, mimi huwaambia kwamba mimi husherehekea kila siku.” Kijana Mkristo wa miaka 17 alisema hivi: “Nyumbani mwetu, kutoa zawadi ni jambo linalofanywa mwaka wote.” Kuna furaha zaidi zawadi zinapotolewa bila kutazamiwa.

18. Ni mwadhimisho gani mmoja wa kila mwaka ambao Yesu aliwaamuru wafuasi wake waadhimishe, nao hutukumbusha nini?

¹⁸ Kwa wale wanaofuatia maisha ya kimungu, kuna siku moja kila mwaka inayopasa kuadhimishwa kipekee. Hiyo ni Mlo wa Jioni wa Bwana, uitwao mara nyingi Ukumbusho wa kifo cha Kristo. Kuhusu huo, Yesu aliwaamuru wafuasi wake hivi: “Fanyeni hivi kwa ukumbusho wangu.” (Luka 22:19, 20; 1 Wakorintho 11:23-25) Yesu alipoanzisha mlo huo usiku wa Nisani 14, 33 W.K., yeye alitumia mkate usiotiwa chachu na divai nyekundu, ikiwakilisha mwili wake usio na dhambi na damu yake kamilifu. (Mathayo 26:26-29) Mifano hiyo inashirikiwa na Wakristo waliotiwa mafuta kwa roho takatifu ya Mungu. Wao wameingizwa katika agano jipya na katika agano kwa ajili ya Ufalme, nao wana tumaini la kimbingu. (Luka 12:32; 22:20, 28-30; Warumi 8:16, 17; Ufunuo 14:1-5) Hata hivyo, manufaa zinaonwa na wale wote wanaokuwapo katika jioni inayolingana na Nisani 14 kwenye kalenda ya kale ya Kiyahudi. Wao hukumbushwa ule upendo ulioonyeshwa na Yehova Mungu na Yesu Kristo katika dhabihu ya fidia yenye kufunika dhambi ambayo huwezesha uhai wa milele kwa wale walio na upendeleo wa kimungu.—Mathayo 20:28; Yohana 3:16.

KAZI YA KUAJIRIWA NA VITUMBUIZO

19. Wakristo hukabili tatizo gani katika kutafuta riziki?

¹⁹ Wakristo wa kweli wana wajibu wa kufanya kazi kwa bidii na kujiandalia riziki. Kutimiza hayo huletea vichwa vya familia hisia ya uradhi. (1 Wathesalonike 4:11, 12) Bila shaka, ikiwa kazi ya kuajiriwa ya Mkristo ingepingana na Biblia, hiyo ingemnyang’anya furaha. Hata hivyo, nyakati nyingine ni vigumu kwa Mkristo kupata kazi ya kuajiriwa inayopatana na viwango vya Biblia. Kwa mfano, waajiriwa fulani hutakwa wadanganye wateja. Kwa upande mwingine, waajiri wengi watairuhusu dhamiri ya mfanyakazi mwenye kufuatia haki, kwa kuwa hawataki kupoteza mwajiriwa mwenye kutumainika. Hata hivyo, chochote kile kinachotokea, wewe unaweza kuwa na hakika kwamba Mungu atabariki jitihada zako za kupata kazi ya kuajiriwa inayokuruhusu uwe na dhamiri safi.—2 Wakorintho 4:2.

20. Sababu gani tuwe wateuzi katika kuchagua vitumbuizo?

²⁰ Kwa kuwa Mungu anataka watumishi wake wawe wenye furaha, twahitaji kusawazisha kazi ngumu na vipindi vyenye kuburudisha vya tafrija na pumziko. (Marko 6:31; Mhubiri 3:12, 13) Ulimwengu wa Shetani huendeleza vitumbuizo ambavyo si vya kimungu. Lakini ili kumpendeza Mungu, ni lazima tuwe wateuzi juu ya vitabu tunavyosoma, programu za redio na muziki tunaosikiliza, na tafrija za kuimba na kuzungumza, filamu, michezo ya kuigiza, programu za televisheni, na vidio tunazotazama. Ikiwa vitumbuizo tulivyochagua wakati uliopita vinapingana na maonyo katika maandiko kama vile Kumbukumbu la Torati 18:10-12, Zaburi 11:5, na Waefeso 5:3-5, tutampendeza Yehova na kuwa wenye furaha zaidi tukifanya marekebisho.

KUSTAHI UHAI NA DAMU

21. Kustahi uhai kunapaswa kuathirije maoni yetu juu ya utoajimimba, na pia tabia na mwenendo wetu?

²¹ Ili tuwe na furaha ya kweli, tunahitaji kuona uhai wa kibinadamu kuwa mtakatifu, kama vile Yehova huuona. Neno lake hutukataza tusiue kimakusudi. (Mathayo 19:16-18) Kwa kweli, Sheria ya Mungu kwa Israeli inaonyesha kwamba yeye huona mtoto ambaye hajazaliwa kuwa uhai wenye thamani—si kitu cha kuharibiwa. (Kutoka 21:22, 23) Kwa hiyo, ni lazima tusichukue uhai kuwa kitu duni kwa kutumia tumbaku, kwa kuutendea mwili wetu vibaya kwa kutumia dawa za kulevya au alkoholi, au kwa kuhatarisha uhai bure. Wala hatupaswi kujihusisha katika ufuatiaji mbalimbali wenye kuhatarisha uhai wala hatupaswi kupuuza maonyo ya usalama, ambako kwaweza kusababisha hatia ya damu.—Kumbukumbu la Torati 22:8.

22. (a) Maoni ya kimungu ni nini juu ya damu na utumizi wayo? (b) Ni damu ya nani peke yake iliyo yenye kuokoa uhai kwelikweli?

²² Yehova alimwambia Noa na familia yake kwamba damu inawakilisha nafsi, au uhai. Kwa hiyo, Mungu aliwakataza wasile damu yoyote. (Mwanzo 9:3, 4) Kwa kuwa sisi ni wazao wao, sheria hiyo inatuhusu sisi sote. Yehova aliwaambia Waisraeli kwamba damu ilipasa imwagwe ardhini na haikupasa itumiwe kwa makusudi ya mwanadamu mwenyewe. (Kumbukumbu la Torati 12:15, 16) Na sheria ya Mungu juu ya damu ilirudiwa wakati Wakristo wa karne ya kwanza walipoagizwa hivi: “Mjiepushe . . . na damu.” (Matendo 15:28, 29) Kwa sababu ya kustahi utakatifu wa uhai, watu wamwogopao Mungu hawakubali kutiwa damu mishipani, hata ikiwa wengine wanasisitiza kwamba utaratibu huo ungekuwa wenye kuokoa uhai. Matibabu mengine mengi badala ya damu yanayokubalika kwa Mashahidi wa Yehova yamethibitika kuwa yenye matokeo sana na hayamweki mtu katika hatari zinazohusiana na utiaji-damu mishipani. Wakristo wanajua kwamba ni damu ya Yesu iliyomwagwa peke yake iliyo yenye kuokoa uhai kwelikweli. Imani katika hiyo huleta msamaha na taraja la uhai wa milele.—Waefeso 1:7.

23. Ni nini baadhi ya thawabu za njia ya maisha ya kimungu?

²³ Kwa wazi, kuishi maisha ya kimungu kunataka jitihada. Kunaweza kutokeza dhihaka kutoka kwa washiriki wa familia au watu unaojuana nao. (Mathayo 10:32-39; 1 Petro 4:4) Lakini thawabu za kuishi maisha ya jinsi hiyo zinazidi kwa mbali majaribu yoyote. Maisha hayo hutokeza dhamiri safi na huandaa ushirika wenye kujenga pamoja na waabudu wenzetu wa Yehova. (Mathayo 19:27, 29) Kisha, wazia pia kuishi milele katika ulimwengu mpya wa Mungu wa uadilifu. (Isaya 65:17, 18) Na kuna shangwe iliyoje katika kutii shauri la Biblia na hivyo kufanya moyo wa Yehova ushangilie! (Mithali 27:11) Si ajabu kwamba kuishi maisha ya kimungu huleta furaha!—Zaburi 128:1, 2.

TAHINI UJUZI WAKO

Ni nini baadhi ya sababu zinazoonyesha kwa nini kuishi maisha ya kimungu huleta furaha?

Maisha ya kimungu huenda yakataka mabadiliko gani?

Sababu gani unataka kuishi maisha ya kimungu?

[Picha katika ukurasa wa 124, 125]

Utendaji wa kiroho ukisawazishwa na vipindi vya pumziko unachangia furaha ya wale wanaoishi maisha ya kimungu