“Endelea Kunifuata”

1-3. (a) Yesu alifanya nini alipokuwa akiwaacha mitume wake, na kwa nini pindi hiyo ya kuagana haikuwa yenye kuhuzunisha? (b) Kwa nini tunahitaji kujifunza kuhusu mambo ambayo Yesu amekuwa akifanya tangu aliporudi mbinguni?

WANAUME 11 wamesimama pamoja mlimani wakimtazama mtu fulani kwa upendo na heshima kubwa. Mtu huyo si mwingine ila Yesu aliyefufuliwa, naye amejivika umbo la kibinadamu. Kwa mara nyingine tena, ndiye mwenye nguvu zaidi kati ya wana wa roho wa Yehova. Yesu amewakusanya mitume wake wawe pamoja naye kwenye Mlima wa Mizeituni kwa mara ya mwisho.

² Bila shaka, kuwa kwenye mlima huo, ambao ni sehemu ya vilima vilivyo ng’ambo ya pili ya Bonde la Kidroni kutoka Yerusalemu, kunamkumbusha Yesu mambo mengi. Jiji la Bethania, ambako Yesu alimfufua Lazaro, liko kwenye miteremko ya mlima huo. Majuma machache yaliyotangulia, Yesu alikuwa katika eneo la karibu la Bethfage alipoanza safari yenye shangwe ya ushindi ya kuingia Yerusalemu. Huenda kwenye Mlima wa Mizeituni ndiko ilikokuwa bustani ya Gethsemane, ambako Yesu alikuwa saa chache kabla ya kukamatwa akiwa na mfadhaiko mkubwa. Sasa, akiwa kwenye mlima huohuo, Yesu anajitayarisha kuwaacha rafiki zake wa karibu na wafuasi wake. Anawaaga kwa maneno yenye fadhili. Kisha anaanza kuinuka kutoka duniani! Mitume wanasimama tuli, huku wakikodoa macho kumtazama Bwana wao mpendwa akipaa angani. Mwishowe, wingu linamfunika, nao hawamwoni tena.—Matendo 1:6-12.

³ Je, unaliona tukio hilo kuwa pindi yenye huzuni ya kuagana? Halipaswi kuonwa hivyo. Malaika wawili wanawakumbusha mitume hao kwamba mambo bado. (Matendo 1:10, 11) Katika njia nyingi, kuondoka kwa Yesu kwenda mbinguni ni mwanzo tu. Neno la Mungu halituachi gizani kuhusu mambo yaliyofuata maishani mwa Yesu. Tunapaswa kujifunza mambo ambayo Yesu amekuwa akifanya tangu alipoondoka duniani. Kwa nini? Kumbuka maneno ambayo Yesu alimwambia Petro: “Endelea kunifuata.” (Yohana 21:19, 22) Sote tunapaswa kutii amri hiyo, si mara kwa mara tu, bali katika maisha yetu yote. Ili kufanya hivyo, tunahitaji kuelewa yale ambayo Bwana wetu anafanya sasa na migawo ambayo amepewa mbinguni.

4. Ni kwa njia gani Biblia ilifunua mapema mambo ambayo yangetendeka mbinguni baada ya Yesu kurudi huko?

⁴ Maandiko hayasemi chochote kuhusu jinsi Yesu alivyofika mbinguni, jinsi alivyopokewa, na shangwe ya kuungana tena na Baba yake. Hata hivyo, Biblia ilifunua mapema mambo ambayo yangetendeka mbinguni punde baada ya Yesu kurudi huko. Kwa zaidi ya karne 15, Wayahudi walikuwa na sherehe fulani takatifu kwa ukawaida. Siku moja kila mwaka, kuhani mkuu aliingia Patakatifu Zaidi pa hekalu ili anyunyize mbele ya sanduku la agano damu ya dhabihu zilizotolewa Siku ya Upatanisho. Siku hiyo, kuhani mkuu aliwakilisha Masihi. Baada ya kurudi mbinguni, Yesu alitimiza maana ya kinabii ya sherehe hiyo mara moja kwa wakati wote. Aliingia mbinguni mbele za utukufu wa Yehova—patakatifu zaidi katika ulimwengu wote—na kumpa Baba yake thamani ya dhabihu yake ya fidia. (Waebrania 9:11, 12, 24) Je, Yehova aliikubali?

5, 6. (a) Ni nini kinachoonyesha kwamba Yehova aliikubali dhabihu ya fidia ya Kristo? (b) Ni nani wanaofaidika na fidia, nao wanafaidika jinsi gani?

⁵ Jibu linapatikana kwa kuchunguza yaliyotokea siku chache baada ya Yesu kurudi mbinguni. Kikundi kidogo cha Wakristo 120 hivi kilikuwa kimekusanyika Yerusalemu katika chumba cha juu wakati ambapo kelele kama ya upepo wenye nguvu unaovuma ilitokea ghafula na kujaza mahali hapo. Ndimi kama za moto zilionekana juu ya vichwa vyao, wakajazwa roho takatifu, nao wakaanza kusema katika lugha mbalimbali. (Matendo 2:1-4) Tukio hilo lilionyesha kuzaliwa kwa taifa jipya, Israeli la kiroho, ambalo lilikuwa “jamii [mpya] iliyochaguliwa” ya Mungu na “ukuhani wa kifalme” ambao ungetimiza mapenzi ya Mungu duniani. (1 Petro 2:9) Ni wazi kwamba Yehova Mungu aliipokea na kuikubali dhabihu ya fidia ya Kristo. Kumiminwa huko kwa roho takatifu ni mojawapo ya baraka za kwanza zilizotokana na fidia hiyo.

⁶ Tangu wakati huo, fidia ya Kristo imewafaidi wafuasi wake ulimwenguni pote. Iwe tumo miongoni mwa “kundi dogo” la watiwa-mafuta, watakaotawala pamoja na Kristo mbinguni, au miongoni mwa “kondoo wengine,” watakaoishi chini ya utawala wake hapa duniani, tunafaidika na dhabihu yake. (Luka 12:32; Yohana 10:16) Dhabihu hiyo ndio msingi wa tumaini letu na wa msamaha wa dhambi zetu. Tukiendelea ‘kuwa na imani’ katika fidia hiyo na kumfuata Yesu kila siku, tunaweza kuwa na dhamiri safi na tumaini zuri la wakati ujao.—Yohana 3:16.

7. Yesu alipewa mamlaka gani baada ya kurudi mbinguni, nawe unaweza kufanya nini kumuunga mkono?

⁷ Yesu amekuwa akifanya nini mbinguni tangu aliporudi huko? Ana mamlaka kubwa. (Mathayo 28:18) Kwa kweli, Yehova alimweka atawale kutaniko la Kikristo, mgawo ambao ameutekeleza kwa upendo na haki. (Wakolosai 1:13) Kama ilivyotabiriwa, Yesu ameandaa wanaume wenye kutegemeka walitunze kundi. (Waefeso 4:8) Kwa mfano, alimchagua Paulo awe “mtume kwa mataifa,” akamtuma aeneze habari njema katika mataifa ya mbali. (Waroma 11:13; 1 Timotheo 2:7) Karibu na mwisho wa karne ya kwanza, Yesu alitoa ujumbe wa kupongeza, kushauri, na kurekebisha makutaniko saba yaliyokuwa Asia, mkoa wa Roma. (Ufunuo, sura ya 2-3) Je, unamtambua Yesu kuwa Kichwa cha kutaniko la Kikristo? (Waefeso 5:23) Ili kuendelea kumfuata Yesu, unapaswa kujitahidi kuendeleza roho ya utii na ushirikiano katika kutaniko lenu.

8, 9. Yesu alipewa mamlaka gani mwaka wa 1914, na hilo linapaswa kuongoza jinsi gani maamuzi tunayofanya?

⁸ Yesu alipewa mamlaka zaidi mwaka wa 1914. Mwaka huo, aliwekwa kuwa Mfalme wa Ufalme wa Kimasihi wa Yehova. Utawala wa Yesu ulipoanza, ‘vita vilitokea ghafula mbinguni.’ Matokeo? Shetani na malaika zake walitupwa duniani, na huo ukawa mwanzo wa kipindi cha ole. Mambo yanayowakumba wanadamu leo, kama vile ongezeko la vita, uhalifu, ugaidi, magonjwa, matetemeko ya nchi, na njaa, yanatukumbusha kwamba Yesu anatawala mbinguni sasa hivi. Bado Shetani ndiye “mtawala wa ulimwengu huu” kwa “kipindi kifupi cha wakati.” (Ufunuo 12:7-12; Yohana 12:31; Mathayo 24:3-7; Luka 21:11) Hata hivyo, Yesu anawapa nafasi watu ulimwenguni pote wakubali utawala Wake.

⁹ Tunapaswa kumuunga mkono Mfalme wa Kimasihi. Katika maamuzi yote tunayofanya kila siku, lazima tujitahidi kumpendeza yeye bali si kuupendeza ulimwengu huu mfisadi. Yesu, yule “Mfalme wa wafalme na Bwana wa mabwana,” anapowatazama wanadamu mbalimbali, moyo wake mwadilifu unawaka hasira na pia unasisimka kwa shangwe. (Ufunuo 19:16) Kwa nini?

10. Yesu ana utu wa aina gani, hata hivyo ni nini kinachomfanya Bwana wetu awake hasira adilifu?

¹⁰ Kama Baba yake, furaha ni sehemu ya utu wa Bwana wetu. (1 Timotheo 1:11) Akiwa duniani, Yesu hakuwa mchambuzi wala mwenye kudai mno. Hata hivyo, kuna mengi yanayotendeka leo duniani ambayo haikosi yanamfanya awake hasira adilifu. Bila shaka, anakasirishwa na dini zote zinazodai kwa uwongo kwamba zinamwakilisha. Alitabiri jambo hilo aliposema: “Si kila mtu anayeniambia, ‘Bwana, Bwana,’ atakayeingia katika ufalme wa mbinguni, bali yule anayefanya mapenzi ya Baba yangu aliye mbinguni ndiye atakayeingia. Wengi wataniambia siku hiyo, ‘Bwana, Bwana, . . . [hatu]kufanya matendo mengi yenye nguvu katika jina lako?’ Na hata hivyo nitawaambia waziwazi: Sikuwajua ninyi kamwe! Ondokeni kwangu, ninyi wenye matendo ya uasi-sheria.”—Mathayo 7:21-23.

11-13. Kwa nini huenda wengine wakashangazwa na maneno makali ya Yesu kuelekea wale wanaofanya “matendo mengi yenye nguvu” katika jina lake, hata hivyo, kwa nini anakasirika? Toa mfano.

¹¹ Huenda wengi wa wale wanaojiita Wakristo leo wakashangazwa na maneno hayo. Kwa nini Yesu awashutumu vikali watu ambao wamekuwa wakifanya “matendo mengi yenye nguvu” katika jina lake? Dini zinazodai kuwa za Kikristo zimetoa misaada, zimewasaidia maskini, zimejenga hospitali na shule, na kufanya matendo mengine mengi. Ili kuelewa ni kwa nini Yesu amekasirishwa nao, fikiria mfano huu.

¹² Baba na mama wanataka kusafiri. Hawawezi kwenda pamoja na watoto wao, kwa hiyo wanamwajiri yaya. Wanampa maagizo haya rahisi: “Watunze watoto wetu. Uwalishe, uhakikishe kwamba wako safi, na kuhakikisha kwamba wako salama salimini.” Hata hivyo, wazazi wanaporudi wanashangaa kuona kwamba watoto wao wamedhoofika kwa kukosa chakula. Ni wachafu, wagonjwa, na wenye huzuni. Wanamlilia yaya, lakini anawapuuza. Kwa nini? Yuko juu kwenye ngazi, akiosha madirisha. Wakiwa wamekasirika, wazazi hao wanataka kujua ni kwa nini anawapuuza watoto hao. Yaya huyo anajibu: “Angalieni mambo yote niliyofanya! Nimeosha madirisha! Pia nimerekebisha nyumba! Nimefanya yote hayo kwa faida yenu!” Je, hilo litatuliza hasira ya wazazi hao? Hapana! Hawakumwambia afanye kazi hizo; walitaka tu awatunze watoto wao. Hasira yao inawaka kwa sababu hakutii maagizo yao.

¹³ Dini zinazodai kuwa za Kikristo zimetenda kama yaya huyo. Yesu aliwapa maagizo wawakilishi wake wawalishe watu kiroho kwa kuwafundisha kweli ya Neno la Mungu na kuwasaidia wawe safi kiroho. (Yohana 21:15-17) Hata hivyo, dini hizo zimeshindwa kabisa kutii maagizo yake. Zimewaacha watu wakiwa na njaa ya kiroho, wakiwa wamechanganyikiwa na mafundisho ya uwongo, bila ufahamu wa kweli za msingi za Biblia. (Isaya 65:13; Amosi 8:11) Jitihada zake za kuboresha ulimwengu huu hazipaswi kuwa kisingizio cha kutotii kimakusudi. Isitoshe, ulimwengu huu ni kama nyumba inayokusudiwa kubomolewa! Neno la Mungu linaonyesha wazi kwamba ulimwengu wa Shetani utaharibiwa karibuni.—1 Yohana 2:15-17.

14. Ni kazi gani inayomfurahisha Yesu leo, na kwa nini?

¹⁴ Kwa upande mwingine, haikosi Yesu anafurahi sana anapotazama kutoka mbinguni na kuona kwamba mamilioni ya watu wanatimiza kazi ya kufanya wanafunzi ambayo aliwapa wafuasi wake kabla ya kuondoka duniani. (Mathayo 28:19, 20) Ni pendeleo lililoje kuchangia shangwe ya Mfalme huyo wa Kimasihi! Na tuazimie kutoacha kumsaidia “mtumwa mwaminifu na mwenye busara.” (Mathayo 24:45) Tofauti na makasisi wa dini zinazodai kuwa za Kikristo, kikundi hiki kidogo cha ndugu watiwa-mafuta kimeelekeza kwa utiifu kazi ya kuhubiri, nacho kimewalisha kondoo wa Kristo kwa uaminifu.

15, 16. (a) Yesu anahisije kuhusu ukosefu wa upendo ambao umeenea sana leo, nasi tunajuaje kwamba anahisi hivyo? (b) Kwa nini dini zinazodai kuwa za Kikristo zinamkasirisha Yesu?

¹⁵ Tuna hakika kwamba Mfalme huyo hukasirika anapoona ukosefu wa upendo ambao umeenea sana duniani leo. Huenda tunakumbuka jinsi Mafarisayo walivyomchambua Yesu kwa kuponya watu siku ya Sabato. Mafarisayo walikuwa na mioyo migumu na vichwa vigumu sana hivi kwamba walishikilia tu maoni yao yaliyopotoka kuhusu Sheria ya Musa na sheria ya mdomo. Miujiza ya Yesu ilitimiza mambo mengi mema! Hata hivyo, miujiza hiyo iliyoleta shangwe, kitulizo, na kuitia nguvu imani ya watu haikuwa na maana yoyote kwao. Yesu alihisije kuwahusu? Pindi moja, ‘aliwatazama huku na huku kwa ghadhabu, akiwa amehuzunishwa na jinsi mioyo yao ilivyokuwa migumu.’—Marko 3:5.

¹⁶ Leo, Yesu anaona mengi zaidi ‘yanayomhuzunisha’ sana. Viongozi wa dini zinazodai kuwa za Kikristo wamepofushwa kwa sababu wameazimia kufuata mapokeo na mafundisho ambayo hayapatani na Maandiko. Isitoshe, wanakasirishwa na kazi ya kuhubiriwa kwa habari njema ya Ufalme wa Mungu. Katika sehemu nyingi za ulimwengu, makasisi wamechochea mateso makali dhidi ya Wakristo wanaojitahidi kikweli kuhubiri ujumbe ambao Yesu alihubiri. (Yohana 16:2; Ufunuo 18:4, 24) Wakati huohuo, mara nyingi makasisi hao wanawahimiza wafuasi wao wenyewe waende vitani kuwaua wengine, kana kwamba kufanya hivyo kutamfurahisha Yesu Kristo!

17. Ni kwa njia gani wafuasi wa kweli wa Yesu huufanya moyo wake ushangilie?

¹⁷ Tofauti nao, wafuasi wa kweli wa Yesu hujitahidi kuwapenda wanadamu wenzao. Ijapokuwa kuna upinzani, wanawahubiria habari njema “watu wa namna zote,” kama Yesu alivyofanya. (1 Timotheo 2:4) Na upendo wanaoonyeshana ni wa pekee; ndilo jambo kuu linalowatambulisha. (Yohana 13:34, 35) Wanapowatendea Wakristo wenzao kwa upendo na heshima, wanamfuata Yesu kikweli—na kuufanya moyo wa Mfalme huyo wa Kimasihi ushangilie!

18. Ni nini ambacho humhuzunisha Bwana wetu, hata hivyo, tunaweza kumfurahisha jinsi gani?

¹⁸ Pia, tusisahau kwamba Bwana wetu huhuzunika wafuasi wake wanaposhindwa kuvumilia, wakiruhusu upendo wao kwa Yehova upoe na kuacha kuwa watumishi Wake. (Ufunuo 2:4, 5) Hata hivyo, Yesu anafurahishwa na wale wanaovumilia mpaka mwisho. (Mathayo 24:13) Hivyo basi, na tukumbuke sikuzote amri hii ya Kristo: “Endelea kunifuata.” (Yohana 21:19) Acheni tuzungumzie baraka mbalimbali ambazo Mfalme wa Kimasihi atawapa wale wanaovumilia mpaka mwisho.

19, 20. (a) Kumfuata Yesu huleta baraka gani leo? (b) Ni kwa njia gani kumfuata Kristo kunaweza kutusaidia kutosheleza tamaa yetu ya kuwa na baba?

¹⁹ Kumfuata Yesu ndiyo njia ya kuwa na maisha yenye baraka kwelikweli leo. Tukimkubali Kristo kuwa Bwana wetu, kwa kufuata maagizo yake na kufuata mfano wake, tutapata baraka ambazo watu ulimwenguni pote wanatafuta lakini hawapati. Tutabarikiwa kwa kupata kazi inayofanya maisha yetu yawe na kusudi kwelikweli, familia ya waamini wenzetu iliyounganishwa na kifungo cha kweli cha upendo, dhamiri safi, na amani ya akili. Kwa ufupi, maisha yetu yatafurahisha na kuridhisha. Na bado tutapata baraka nyingi zaidi.

²⁰ Yehova amemchagua Yesu kuwa “Baba wa Milele” wa wale wanaotumaini kuishi milele duniani. Yesu anachukua mahali pa Adamu, baba ya wanadamu aliyewakosea sana wazao wake wote. (Isaya 9:6, 7) Kwa kumkubali Yesu kuwa “Baba [yetu] wa Milele,” na kumwamini, tunakuwa na tumaini hakika la uzima wa milele. Isitoshe, tunamkaribia hata zaidi Yehova Mungu. Kama tulivyojifunza, kujitahidi kufuata mfano wa Yesu kila siku ndiyo njia nzuri zaidi ya kutii amri hii ya Mungu: “Iweni waigaji wa Mungu, kama watoto wapendwa.”—Waefeso 5:1.

21. Wafuasi wa Kristo wanamulika nuru jinsi gani katika ulimwengu wenye giza?

²¹ Tunapomwiga Yesu na Baba yake, Yehova, tunapata pendeleo la pekee. Tunaangaza nuru nyangavu. Katika ulimwengu uliojaa giza, ambamo mabilioni ya watu wamepotoshwa na Shetani na wanaiga tabia zake, sisi tunaomfuata Kristo tunamulika kotekote nuru iliyo nyangavu zaidi—nuru ya kweli za Kimaandiko, nuru ya sifa nzuri za Kikristo, nuru ya shangwe ya kweli, amani ya kweli, na upendo halisi. Wakati huohuo, tunamkaribia Yehova zaidi, na huo ndio mradi wetu mkuu, ndiyo, kusudi kuu zaidi la viumbe wote wenye akili.

22, 23. (a) Wale wanaoendelea kumfuata Yesu kwa ushikamanifu watapata baraka gani wakati ujao? (b) Tunapaswa kuazimia kufanya nini?

²² Fikiria pia mambo ambayo Yehova anataka kukufanyia wakati ujao kwa kumtumia Mfalme wa Kimasihi. Hivi karibuni, Mfalme huyo atapiga vita vya uadilifu dhidi ya mfumo mbovu wa Shetani. Hakuna shaka kwamba Yesu atashinda! (Ufunuo 19:11-15) Kisha, Kristo ataanza Utawala wake wa Miaka Elfu juu ya dunia. Serikali yake ya mbinguni itamwezesha kila mwanadamu mwaminifu kufaidika na fidia, na kufikia ukamilifu. Wazia ukiwa na afya nzuri, sikuzote ukiwa kijana mwenye nguvu, ukifanya kazi kwa furaha pamoja na familia iliyoungana kuifanya dunia hii iwe paradiso! Mwishoni mwa Miaka hiyo Elfu, Yesu atamrudishia Baba yake utawala. (1 Wakorintho 15:24) Ukiendelea kumfuata Kristo kwa ushikamanifu, utapata baraka ya ajabu kwelikweli—“uhuru wenye utukufu wa watoto wa Mungu”! (Waroma 8:21) Ndiyo, tutapata baraka zote ambazo Adamu na Hawa walikuwa nazo na wakazipoteza. Tukiwa wana na binti za Yehova duniani, tutakuwa huru milele bila doa la dhambi ya Adamu. Ama kweli, “kifo hakitakuwapo tena.”—Ufunuo 21:4.

²³ Mkumbuke yule mtawala kijana tuliyemzungumzia katika Sura ya 1. Aliukataa mwaliko huu wa Yesu: ‘Njoo uwe mfuasi wangu.’ (Marko 10:17-22) Usifanye kosa hilo kamwe! Badala yake, kubali mwaliko huo wa Yesu kwa shangwe na kwa uchangamfu. Na uazimie kuvumilia, ndiyo, kuendelea kumfuata yule Mchungaji Mwema siku baada ya siku, mwaka baada ya mwaka, nawe uishi na kuona siku ambayo atakuwa ametimiza kwa utukufu makusudi yote ya Yehova!