Baada ya Hizi “Siku za Mwisho” Ufalme wa Mungu wa Kimasihi!

 1. (a) Usemi “siku za mwisho” unahitaji kuwepo jambo gani kwa habari ya siku hizo? (b) Je! “siku za mwisho” za taratibu ya Kiyahudi zilipata kuwa na mwisho?

SIKU ambazo zinaitwa “siku za mwisho” zapaswa kuwa na mwisho. Kwa habari ya Wayahudi na hekalu lao lililojengwa upya katika Yerusalemu, siku hizo zilikoma katika mwaka 70 W.K. Kama sivyo, sababu gani ziitwe “siku za mwisho”? Walakini kulingana na historia zilikuwa na mwisho (télos). Alipokuwa akizungumza juu ya hizo siku za mwisho za taratibu ya mambo ya Kiyahudi, Yesu alisema hivi: “Kwa kuwa wakati huo kutakuwapo dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe. Na kama siku hizo zisingalifupizwa, asingeokoka mtu ye yote; lakini kwa ajili ya wateule zitafupizwa siku hizo.”​—Mt. 24:21, 22; Marko 13:19, 20.

 2. (a) Ni nani “wateule” ambao kwa ajili yao “dhiki kubwa” juu ya Yerusalemu ilifupizwa? (b) Ni maoni gani juu ya utimizo huo yanayofanya maneno ya Yesu ya kiunabii yawe yaliyoongezwa chumvi?

² Inaripotiwa kwamba kulikuwako Wayahudi 97,000 ndani ya Yerusalemu waliookoka mazingiwa na kuharibiwa kwa mji wao mtakatifu pamoja na hekalu lake lililojengwa na Mfalme Herode. Hata hivyo, hao hawakuwa “wateule” ambao kwa sababu yao “dhiki kubwa” ilifupizwa. Mahali pake, hawa walikuwa Wakristo, ambao, baada ya mazingiwa ya kwanza kuondolewa katika mwaka 66 W.K., walitii shauri la Yesu mara moja lililoko katika Mathayo 24:16-20 nao wakaukimbia mji huo uliohukumiwa maangamizi na kutoka nje ya jimbo la Yudea. Yote hayo yaliyotokea huko nyuma yalikuwa mabaya sana. Walakini ikiwa maneno ya Yesu juu yake katika Mathayo 24:21, 22 na Marko 13:19, 20 yanahusu tu mwisho (télos) wa Yerusalemu katika mwaka 70 W.K., basi usemi wake juu ya jambo hilo unakuwa wa kuongeza chumvi. Hakika hiyo haikuwa dhiki kubwa zaidi iliyopata kutokea katika historia yote ya kibinadamu iliyoandikwa.

 3. Maneno ya Yesu ya kusimulia yanakuwa na kadiri zilizo sahihi wakati tu tunapouona uharibifu Yerusalemu wa kale kwa maoni gani?

³ Maneno ya Yesu ya kulinganisha yanakuwa na kadiri zilizo sahihi wakati tunapouona uharibifu wa Yerusalemu kuwa mfano au jambo lililotangulia kuonyesha “dhiki kubwa” ya wakati ujao isiyo na mfano wake, kuharibiwa kwa Jumuiya ya Wakristo, inayodai kuwa na wafuasi elfu milioni moja walio washiriki wake. Kuharibiwa kwake kutaanzisha kuharibiwa kwa milki yote ya ulimwengu ya dini ya uongo. Upesi baada ya hilo utakuja uharibifu wa sehemu nyingine zote za kilimwengu ambazo zimejitenga na milki ya ulimwengu ya Kibabeli ya dini ya uongo, lakini zisizopendelea ufalme wa Mungu wa Kimasihi. Hesabu ya uhai wa kibinadamu utakaofutiliwa mbali katika hiyo “dhiki kubwa” itazidi sana hesabu ya wote wale walioharibiwa katika gharika ya siku za Noa, yaani, katika miaka ya 2370-2369 K.W.K.

 4. (a) “Habari za vita na ripoti za vita” ambazo Yesu alitabiri zilikuwa zile ambazo zingetokea wakati wa kipindi gani? (b) Kwa kuitwa “mwanzo wa michomo ya taabu” hiyo yaonyesha nini?

⁴ Katika unabii wa Mathayo 24:4-22, NW, “habari za vita na ripoti za vita” ambazo alizungumza juu yake zingekuwako katika kipindi fulani cha wakati. Kwa habari ya taratibu ya mambo ya Kiyahudi, ambayo wanafunzi wake waliuliza kwanza juu yake, hicho kilikuwa kipindi cha “siku za mwisho” tangu mwaka 29 mpaka mwaka 70 W.K. Hakika kipindi hicho kilikuwa na “habari za vita na ripoti za vita,” pamoja na njaa, magonjwa yenye kuenea na matetemeko ya ardhi. Bila shaka Wayahudi walipatwa na matokeo fulani ya mambo hayo yenye msiba. Lakini Yesu alisema kwamba mambo hayo yangekuwa “mwanzo wa michomo ya taabu.” (Mt. 24:8, NW) Isingekuwa michomo ya mwisho ya kifo.

 5. (a) Je! mambo hayo yenye kutaabisha huko nyuma yaliongoza kwenye “kuwapo” kwa Kristo na “mwisho wa taratibu ya mambo”? (b) Vilevile, kuhubiriwa kwa Ufalme kulifanywa kwa kadiri iliyotabiriwa au sivyo, na sababu gani?

⁵ Mambo hayo yenye msiba yalitokeza mwisho (télos) wa taratibu ya mambo ya Kiyahudi katika Palestina. Walakini, kama tunavyoweza kuona leo, hayakuwa “ishara ya kuwapo [kwa Kristo] na ya mwisho wa taratibu ya mambo,” mambo ambayo yalitiwa ndani katika maulizo ya wanafunzi hao. (Mt. 24:3, NW; Marko 13:4) Vilevile, wakati wa “siku za mwisho” wa taratibu ya Kiyahudi, kuhubiriwa kwa “habari njema hizi za ufalme . . . katika dunia yote inayokaliwa na watu kwa ushuhuda kwa mataifa yote” kulikuwa kwa kadiri ndogo, kwa sababu ya uchache wa wahubiri wa Ufalme, nako kuhubiri huko kulifanywa chini ya mateso. (Mt. 24:9-14, NW) Lakini, bila shaka, ulimwengu mzima ulikuwa shamba lililokuwa wazi kwao, kwa sababu kuhubiriwa kwa Ufalme kusingefanywa kwa Wayahudi waliotahiriwa peke yao. Baada ya kufufuliwa kwa Yesu kutoka kwa wafu, wanafunzi wake walipewa amri ya kwenda na ‘kufanya wanafunzi kutoka kwa watu wa mataifa yote.’ (Mt. 28:19, 20, NW) Kwa hiyo kuhubiriwa kwa Ufalme duniani pote kungefanywa wakati ujao, baada ya mwaka 70 W.K.

 6. (a) Ni mambo gani yaliyotabiriwa ambayo yangetokea baada ya dhiki juu ya Wayahudi huko nyuma? (b) Sababu gani “wateule” hawakujiunga pamoja na “mataifa yote ya ulimwengu” katika kuomboleza kwao?

⁶ Akizungumza juu ya “dhiki kubwa” juu ya Yerusalemu katika mwaka 70 W.K., Yesu aliendelea kuzungumza juu ya mambo ambayo yangetokea “mara, baada ya dhiki ya siku zile.” (Mt. 24:29) ‘Ishara ya Mwana wa Adamu ingetokea’; vilevile, kuomboleza, si kwa makabila 12 peke yao ya Wayahudi wa asili waliotawanyika, bali pia kwa “mataifa yote ya ulimwengu.” Vilevile, kungekuwako kukusanywa kikamilifu kwa “wateule wake” wote. “Wateule” hao hawangejiunga na “mataifa yote ya ulimwengu” katika kuomboleza juu ya msiba wa ulimwengu wenye kukaribia. Wangefurahi, mahali pa kuomboleza kwa ajili ya “ishara yake Mwana wa Adamu” kutokea mbinguni. (Mt. 24:30, 31) Wangefurahi kwamba walikuwa na ushuhuda kwamba walikuwamo ndani ya “siku za mwisho” wa taratibu ya kale ya ulimwengu. Tangu ule mwaka wenye maombolezo wa 1914 W.K., mwaka wa vita ya ulimwengu ya kwanza ya wanadamu, tunao ushuhuda huo kwa wingi sana.

 7. Baada ya “siku za mwisho” za mwisho wa taratibu ya mambo ya duniani pote, ni jambo gani la kutazamiwa, kulingana na Sala ya Bwana?

⁷ “Siku za mwisho” za jambo lo lote lazima zifuatwe na jambo jingine. Ni nini kitakachofuata “siku za mwisho” za taratibu hii ya mambo ya kidunia? Yajapokuwapo yale ambayo watabiri wa kilimwengu wanatangulia kuona kuwa hali ya dunia baada ya vita ya ulimwengu ya tatu inayotazamiwa, Mashahidi wa Yehova wanatangulia kuona ufalme wa Mungu wa Kimasihi, ambao Yesu aliwafunza wanafunzi wake waombe katika Sala ya Bwana.​—Mt. 6:9, 10.

 8. Sababu gani Wakristo wangali wanaomba Sala ya Bwana yajapokuwapo yale ambayo Paulo aliandika karibu na mwaka 60-61 W.K. katika Wakolosai 1:13?

⁸ Tungali tunaomba sala hiyo yajapokuwapo yale ambayo mtume Paulo aliandika katika Wakolosai 1:13, karibu na mwaka 60-61 W.K. Huko nyuma aliandika hivi: “Naye [Baba ya kimbinguni] alituokoa katika nguvu za giza, akatuhamisha na kutuingiza katika ufalme wa Mwana wa pendo lake.” Hiyo inahusu ufalme wa kiroho ambao katika huo Wakristo Wakolosai, wakati walikuwa wangali katika mwili hapa duniani, katika mji ulio Asia Ndogo ambao ulikuwa umetiwa giza kidini, walikuwa wamehamishwa. Bila shaka, makao yao hayo ya kiroho duniani chini ya utawala wa Shetani Ibilisi hayakuwa utimizo wa Sala ya Bwana: “Baba, Jina lako litakaswe, Ufalme wako uje.” (Luka 11:2; Mt. 6:9, 10) Ili sala ijibiwe kikamilifu, kulipaswa kuwepo kukalishwa kwenye kiti cha enzi kwa Mwana wa pendo la Mungu kukiwako zaidi ya ufalme wa kiroho wenye kutenda juu ya wanafunzi wake wa kidunia.

MFALME WA KIMASIHI PAMOJA NA RAIA ZAKE WENYE MFANO WA KONDOO

 9, 10. (a) Katika mfano wake wa kondoo na mbuzi, Yesu alikuwa anazungumza juu ya ufalme wake kufikia kadiri gani? (b) Kazi hiyo ya kubagua ingetokea baada ya Yesu kufanya jambo gani, nalo jambo hilo lingeonyesha au lingemaanisha nini?

⁹ Katika unabii wake kuhusu “mwisho wa taratibu ya mambo,” Yesu alizungumza juu ya ufalme wake kwa maana kamili. Kulingana na masimulizi ya mtume Mathayo, Yesu alimalizia unabii wake kwa kutoa mfano wa kondoo na mbuzi wa mfano. Katika Mathayo 25:31, 32 aliuanza mfano huo kwa kusema hivi: “Hapo atakapokuja Mwana wa Adamu katika utukufu wake, na malaika watakatifu wote pamoja naye, ndipo atakapoketi katika kiti cha utukufu wake; na mataifa yote watakusanyika mbele zake; naye atawabagua [watu, si mataifa] kama vile mchungaji abaguavyo kondoo na mbuzi.” Jambo hilo latokea baada ya Shetani Ibilisi na mashetani zake kutupwa kutoka makao yao ya kimbinguni na kutoka kwa mapendeleo yao mpaka kwenye ujirani wa dunia yetu na Mfalme Yesu Kristo aliyekalishwa juu ya kiti cha enzi. Yote hayo yanaonyeshwa kiunabii katika Ufunuo 12:5-9. Juu ya yanayomaanishwa na kutekelezwa kwa tukio hilo, twasoma hivi:

¹⁰ “[Mimi Yohana] nikasikia sauti kuu mbinguni, ikisema, Sasa kumekuwa wokovu, na nguvu, na ufalme wa Mungu wetu, na mamlaka ya Kristo wake; kwa maana ametupwa chini mshitaki wa ndugu zetu, yeye awashitakiye mbele za Mungu wetu, mchana na usiku. Nao wakamshinda kwa damu ya Mwana-Kondoo, na kwa neno la ushuhuda wao; ambao hawakupenda maisha yao hata kufa. Kwa hiyo shangilieni, enyi mbingu, nanyi mkaao humo. Ole wa nchi na bahari! kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.”​—Ufu. 12:10-12,

11. (a) Kulingana na matukio, “wapanda farasi wanne wa Ufunuo” walianza kukimbia wakati gani? (b) Kipindi chetu cha vita tangu mwaka 1914 kinalingana na kipindi gani kilichotabiriwa katika unabii wa Yesu juu ya “siku za mwisho”?

¹¹ Ni mtu yupi mwenye ufahamu anayeweza kukana kwamba “ole wa nchi na bahari” usiokuwa wa kawaida umekuwako katika karne yetu ya 20 tangu mwaka 1914, mwaka ambao katika huo, kulingana na ushuhuda wote, wale wanaoitwa “wapanda farasi wanne wa Ufunuo” walianza kupanda farasi wao? (Angalia Ufunuo 6:1-8.) Bila shaka hiyo ni “ishara” isiyoweza kufahamika kwa kosa kwamba katika mwaka 1914 “siku za mwisho” wa taratibu hii ya mambo ya ulimwengu zilianza na kwamba tumeingia katika “mwisho wa taratibu ya mambo.” Hakika, pia, tangu kutupwa kwa Shetani Ibilisi na mashetani zake toka mbinguni, zimekuwa “siku za mwisho” kwao kabla hawajatupwa ndani ya shimo lile kabla ya utawala wa miaka 1,000 wa Masihi Yesu. (Ufu. 20:1-3, 7) Kwa wazi Vita ya Ulimwengu ya Kwanza ya mwaka 1914 na Vita ya Ulimwengu ya Pili ya mwaka 1939 na vita vingi ambavyo vimefuata tangu mwaka 1945 duniani pote, vyote hivyo ni ulinganifu wa kisasa wa “habari za vita na ripoti za vita” (pamoja na njaa, magonjwa yenye kuenea na matetemeko ya ardhi) ambazo Yesu alisema zingefanya mwaka wa 29 mpaka mwaka 70 W.K. kuwa “siku za mwisho” wa taratibu ya mambo ya Kiyahudi ambayo ilitegemewa Yerusalemu na hekalu lake lililojengwa upya.

12. Ikiwa, katika mwaka 70 W.K., Yerusalemu haukufikia kupata yale ambayo Yesu alitabiri katika Mathayo 24:21. 22, basi namna gani yale ambayo taratibu ya mambo ya duniani pote leo inaelekea kupatwa nayo?

¹² Taabu yenye kuumiza ambayo iliupata Yerusalemu katika mwaka 70 W.K. haikufikia ile ambayo Yesu alisimulia katika unabii wake wa Mathayo 24:21, 22. Walakini leo mfano wa kisasa wa Yerusalemu (Jumuiya ya Wakristo), ndiyo, milki nzima ya ulimwengu ya dini ya uongo, ndiyo, taratibu nzima ya mambo ya duniani pote, vyote vinaelekea kwenye “dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe.” Basi haishangazi kwamba tunaona unabii ambao mtume Paulo alitoa karibu na mwaka 65 W.K. na ulioandikwa katika 2 Timotheo 3:1 ukitimizwa: “[Timotheo] unaweza kuwa na hakika kabisa kwamba katika siku za mwisho kutakuwako nyakati ngumu.”​—The Jerusalem Bible.

TANGAZO LA MWISHO LA ULIMWENGUNI POTE!

13. Kwa kupatana na Ufunuo 12:11, ni sehemu gani nyingine ya unabii wa Yesu ingefanya “mwisho wa taratibu ya mambo” uwe wenye kutokeza?

¹³ Kulingana na Ufunuo 12:11, baada ya Shetani Ibilisi kutupwa toka mbinguni, Wakristo ambao aliwashitaki ‘walimshinda kwa neno la ushuhuda wao.’ Utimizo wa jambo hilo umekuwa sehemu nyingine ambayo Yesu alisema ingefanyiza “mwisho wa taratibu ya mambo” iliyopo. Sehemu gani? “Habari njema hizi za ufalme zitahubiriwa katika dunia yote inayokaliwa na watu kwa ushuhuda kwa mataifa yote; na ndipo ule mwisho [télos] utakapokuja.” (Mt. 24:14, NW) Jambo hilo linatangulia mwisho wa “siku za mwisho.”

14. Huku kutoa ushuhuda juu ya Ufalme kumeshindaje kule kwa wakati wa “siku za mwisho” wa taratibu ya mambo ya Kiyahudi?

¹⁴ Ushuhuda huo, ambao umetolewa na Mashahidi wa Yehova tangu mwisho wa Vita ya Ulimwengu ya Kwanza katika Novemba 11, 1918, umeshinda sana sana ushuhuda wa mataifa yote uliotolewa wakati wa “siku za mwisho” wa taratibu ya mambo ya Kiyahudi katika mwaka 29 mpaka mwaka 70 W.K. Huko nyuma ushuhuda ulitolewa katika Asia, Ulaya na Afrika. Leo umetolewa si katika bara hizo tu bali pia katika bara za Amerika, katika Australia na kwenye visiwa vya Bahari ya Pasifiki, ndiyo, duniani pote.

15. Ili wapunguze ukubwa wa jambo hilo, huenda watu wenye kudhihaki wakasema nini juu ya wamisionari wa Jumuiya ya Wakristo wakati wa karne zilizopita?

¹⁵ Wenye kudhihaki jambo hilo huenda wakapunguza ukubwa wa jambo hilo lililofanywa na kukazia kwamba wamisionari wa Jumuiya ya Wakristo wakati wa karne zilizopita walifika sehemu hizo zote kabla mashahidi Wakristo wa Yehova kufika huko. Ni kweli! Walakini kutoa ushuhuda juu ya Ufalme kwa Mashahidi wa Yehova tangu mwaka 1914 kumekuwa jambo tofauti sana na lile ambalo wamisionari wa Jumuiya ya Wakristo wamekuwa wakihubiri tangu na wakati wa mwaka wa 1914.

16, 17. (a) Ni kwa njia gani kutoa ushuhuda juu ya Ufalme ambako kumetolewa tangu kumalizika kwa Vita ya Ulimwengu ya Kwanza katika mwaka 1918 kumekuwa tofauti na kule ambako wamisionari wa Jumuiya ya Wakristo wamehubiri? (b) Katika kuthibitisha jambo hilo, gazeti Mnara wa Mlinzi lilisema nini katika toleo lake la Julai, 1920?

¹⁶ “Tofauti”​—vipi? Kwa kuwa umekuwa si ushuhuda unaohusu ufalme unaotajwa katika Wakolosai 1:13, “ufalme wa Mwana wa pendo [la Mungu],” ambao katika huo wale 144,000 “waliotiwa muhuri” Waisraeli wa kiroho wamekwisha hamishwa tayari. (Ufu. 7:1-8) Yale ambayo Mashahidi wa Yehova wamehubiri ulimwenguni pote tangu mwaka 1918 ni jambo lisilo la kawaida, jambo ambalo limetofautisha hizi kuwa “siku za mwisho” za taratibu ya mambo ya kisiasa, kijamii, kisheria, ya kijeshi. Umekuwa ushuhuda wa ulimwenguni pote kuhusu serikali ya kifalme ambayo sasa imesimamishwa mbinguni, ambayo imepewa uwezo wa kumtupa Ibilisi na mashetani zake kutoka makao ya kiti cha enzi cha serikali hiyo ya kifalme. (Ufu. 12:5-9) Muda usiozidi miaka miwili baada ya Vita ya Ulimwengu ya Kwanza kumalizika, katika toleo lake la Julai 1, 1920 Mnara wa Mlinzi wa Sayuni na Kutangaza Kuwapo kwa Kristo (Kiingereza) ulichapisha makala kubwa yenye kichwa “Injili ya Ufalme” na kutaja maneno ya Mathayo 24:14, na, chini ya kichwa kidogo “Kazi kwa Wote,” uliendelea kusema hivi:

¹⁷ “Injili maana yake ni habari njema. Habari njema hapa zinahusu mwisho wa taratibu ya kale ya mambo na kusimamishwa kwa ufalme wa Kimasihi. Inamaanisha usiku wenye giza wa dhambi na huzuni unapita. Inamaanisha kwamba milki ya Shetani inaanguka, isipate kusimama tena.”​—Kurasa 199, 200.

18. (a) Kulingana na unabii wa Yesu, “mwisho utakuja” baada ya nini? (b) Kwa habari ya Yoeli 2:28, 29, “siku za mwisho” zetu zinalingana na siku zipi zilizotangulia?

¹⁸ Baada ya kuhubiri habari njema hizi za ufalme wa Kimasihi uliosimamishwa mbinguni katika mwaka 1914 kufanywa kwa kadiri anavyotaka Mungu, “ndipo ule mwisho [télos] utakapokuja.” (Mt. 24:14, NW) Kwa hiyo kuhubiri huku kwa mwisho kwa Ufalme ulimwenguni pote kunakuja ndani ya “siku za mwisho” wa taratibu hii ya mambo. Basi hizi ndizo siku zinazofaa unabii wa Yoeli 2:28, 29 utimizwe, kama vile tu kulivyokuwa utimizo wa kwanza wa unabii huo katika siku za mtume Petro na mitume wenzake, kama vile yeye mwenyewe alivyoeleza katika Pentekoste ya mwaka 33 W.K. Kwa hiyo “siku za mwisho” zetu zinalinganana na “siku za mwisho” zao.

19. Ili kukamilisha ulinganifu wa vipindi vya “siku za mwisho” kwa habari ya sehemu zote, ni tukio gani wakati wa “siku za mwisho” za mitume ambalo” lazima pia liwe na ulinganifu wa kisasa?

¹⁹ Hata hivyo, ili kufanya ulinganifu huo uwe kamili kwa habari ya sehemu zote, je! kumekuwako pia kumwagwa kwa roho takatifu ya kutia mafuta juu ya “wote wenye mwili” katika “siku za mwisho” zetu? (Matendo 2:16-19) Hatusiti kusema kwamba kumekuwako utimizo wenye kuonekana wa Yoeli 2:28, 29 tangu mwaka wenye kutikisa ulimwengu wa 1914. Wakati wa Vita ya Ulimwengu ya Kwanza maadui wa ufalme wa Kimasihi, sana sana viongozi wa kidini wa Jumuiya ya Wakristo, walifaulu kufanya kuhubiriwa kwa Ufalme na watumishi wa Yehova waliotiwa mafuta ama kukatazwe ama kupunguzwe sana. Hiyo ilikuwa kama wakati wa siku 51 tangu kifo cha Yesu katika Nisani 14 mpaka asubuhi ya Pentekoste katika Siwani 6, mwaka 33 W.K. Katika siku ya 50 tangu kufufuliwa kwa Yesu, wanafunzi wake wachache, walikusanyika katika Yerusalemu, wakapokea uwezo kutoka juu wakati roho ya kutia mafuta ilipofika juu yao nao wakawa mashahidi wake wa hadharani.

20. Baada ya watumishi mashuhuri wa Sosaiti kufunguliwa kutoka kifungoni katika mwaka 1919, ni jambo gani lililotokea linalolingana na yale yaliyoandikwa katika Ufunuo 11:7-13?

²⁰ Vivyo hivyo, baada ya wakuu wa Sosaiti na wafungwa wenzao kufunguliwa toka katika kifungo cha taifa katika Atlanta, Georgia, Amerika, katika Machi wa mwaka 1919 uliofuata kipindi cha vita, roho takatifu ilitenda kazi kwa nguvu nyingi juu ya mabaki ya watumishi wa Yehova waliojiweka wakf na kubatizwa walioko duniani. Chini ya nguvu zake zenye kuchochea walijieleza juu ya kazi ambayo wamearifiwa katika Mathayo 24:14, kutoa ushuhuda wa mwisho juu ya ufalme wa Mungu uliosimamishwa mpaka “mwisho.” Jambo hilo linalingana na yale yaliyoonyeshwa katika Ufunuo 11:7-13.

21. (a) Katika Pentekoste ya mwaka 33 W.K., ni jambo gani lililotokea kwa maelfu ya waadhimishaji Wayahudi katika Yerusalemu? (b) Kwa kulingana na hilo tangu mwaka 1919 kuendelea makusanyiko makubwa yalikuwa na sehemu gani yenye kutokeza?

²¹ Nyuma katika mwaka 33 W.K., waadhimishaji Wayahudi wa sikukuu ya Pentekoste wapatao 3,000 walibatizwa katika Yerusalemu “katika jina la Baba na la Mwana na la roho takatifu” na wakiwa na uhakikisho wa kumwagiwa roho takatifu. Baadaye hesabu ya wapokeaji wa roho takatifu yenye kutia mafuta iliongezeka kufika karibu 5,000. (Matendo 2:37-41; 4:4; Mt. 28:19, 20, NW) Katika “siku za mwisho” zetu za kisasa na muda usiozidi miezi sita baada ya washiriki wa wafanya kazi wa makao makuu ya Sosaiti kufunguliwa kutoka kifungoni Atlanta, Georgia, kusanyiko kubwa lilifanywa huko Cedar Point, Ohio, Amerika, katika Septemba 1-8, 1919, na katika kusanyiko hilo zaidi ya watu 200 walibatizwa katika Ziwa la Erie wakiwa na tumaini la kubatizwa katika mwili wa kiroho wa Kristo. Kwenye kusanyiko la pili la Cedar Point miaka mitatu baadaye watu 361 walibatizwa wakiwa washiriki wenye kutarajia kuwa wa mwili wa kiroho wa Kristo na wakiwa na tumaini la kimbinguni. Kwenye kusanyiko la Columbus (Ohio) katika mwaka 1924 kulikuwako watu 485 waliobatizwa.

22. Kwenye kusanyiko la Indianapolis la mwaka 1925, ni matumizi gani ya Yoeli 2:28, 29 yaliyotolewa, na ni nini kimethibitisha kuwa Mungu ni Mtunza-Wakati aliye sahihi na pia Nabii kuhusiana na unabii huo?

²² Katika mwaka wa 1925, kwenye kusanyiko la Indianapolis, Indiana, si kwamba wengi walibatizwa tu, bali pia hotuba yenye maana sana ilitolewa. Kichwa chake kilikuwa “Roho Takatifu Yamwagwa,” nayo ilionyesha matumizi ya kisasa ya Yoeli 2:28, 29. Maelfu mengi zaidi kuliko wakati mwingine wo wote uliotangulia waliripotiwa kuwa walikula mkate na kunywa divai kwenye mwadhimisho wa kila mwaka wa Chakula cha Bwana cha Jioni, (Kurasa 339-344 za Mnara wa Mlinzi (Kiingereza), Novemba 15, 1925) Kwa hiyo, wakati wa hizi “siku za mwisho” tangu mwaka wa 1914 wa vita yenye kuharibu roho takatifu imemwagwa katika njia yenye kutokeza sana ili kuthibitisha kwamba Yehova ni Mtunza-Wakati mwaminifu na Nabii asiyekosea. Karibuni sasa hizi “siku za mwisho” zitafikia “mwisho” (télos) katika “dhiki” iliyo kubwa zaidi ya dunia.

23. Baada ya mambo hayo yote, kutakuwako serikali gani, kukiwa na faida gani kwa waokokaji wa “dhiki” na kwa wafu wote waliokombolewa?

[Blabu katika ukurasa wa 17]

Ingawa uharibifu wa Yerusalemu katika mwaka 70 W.K. ulikuwa mbaya sana, haukuwa “dhiki” kubwa zaidi katika historia.​—Mt. 24:21

[Sanduku katika ukurasa wa 20]

Kuhubiri Ufalme kwa Mashahidi wa Yehova tangu mwaka 1914 ni tofauti sana na kule kwa wamisionari wa Jumuiya ya Wakristo, kwa kuwa:

Kunakuja ndani ya “Siku za Mwisho” za hii taratibu ya mambo iliyopotoka

Kunaelekeza kwenye kusimamishwa kwa ufalme wa Mungu kuwa jambo lililotokea katika mwaka 1914

Kumeonyeshwa na kumwagwa kunakotokeza kwa roho ya Mungu tangu mwaka 1919, na utimizo kamili wa Yoeli 2:28, 29

Kunafikia upeo wake wa “mwisho,” télos, wa “Siku za Mwisho,” katika dhiki iliyo kubwa zaidi ya dunia

Kunatoa tumaini bora sana la kuokoka kwa mabaki waliotiwa mafuta na “mkutano mkubwa” na kuingia kwenye makao ya ufalme wa mileani wa Masihi

Kunaelekeza kwenye utimizo unaokaribia wa ahadi ya Mungu ya kufufua wanadamu waliokufa kwenye dunia iliyo paradiso