Jinsi Lilivyo Tukufu Jina la Yehova!

“Wewe [Yehova], Bwana wetu, jinsi lilivyo tukufu jina lako duniani mwote!”​—ZABURI 8:1,9.

 1. Kwa nini Yehova aliifanya nchi ‘iwatapike’ Wakanaani?

MWISHOWE, katika 1473 K.W.K., Israeli wakasimama katika nchi ya ahadi! Lakini miaka fulani ya vita ya kitheokrasi ilikuwa mbele yao, kwa kuwa ni lazima waisafishe nchi wakaaji wayo wapotovu. Je! kweli Wakanaani hao walikuwa wabaya hivyo? Hakika ndivyo walivyokuwa! Ibada yao ya sanamu na njia yao ya kukosa adili ilichukiza sana machoni pa Yehova na ilikuwa hatari kwa watu wa Mungu. Hivyo, Mungu alimwambia Musa atangaze kwamba Yeye angetumia taifa Lake takatifu, Israeli, liwe mtekelezaji-hukumu Wake. Hivyo, Yehova angeifanya nchi ‘iyatapike’ mataifa mabaya hayo.​—Mambo ya Walawi 18:1-30; Kumbukumbu 12:29-32.

 2. Ni “matunda” gani ambayo mifumo ya dini za ulimwengu imekuwa ikizaa?

² Leo, pia, tunaweza kuuliza ulizo, Je! ulimwengu huu ni mbaya sana hata ustahili uharibifu? Namna gani mifumo ya kidini ya ulimwengu? Jambo la kuhuzunisha ni kwamba zinakosa kumheshimu Muumba, Yehova Mungu. Watu katika Jumuiya ya Wakristo, wamemwacha, ‘aliye chemchemi ya maji ya uzima, wamejichimbia mabirika, mabirika yavujayo, yasiyoweza kuweka maji.’ (Yeremia 2:13) Imani zao za kidhehebu hazina “maji ya ukweli.” Wamejionyesha wenyewe kuwa sehemu ya ulimwengu kwa kuunga mkono vita vyao na siasa na desturi za ngono. Kama alivyosema Yesu, wanatambuliwa kwa “matunda yao”​—Mathayo 7:16, 17; linganisha Wagalatia 6:7, 8.

 3. Ni jambo gani ambalo limetokea kwa ulimwengu kwa sababu ya kuvunja sheria ya Mungu?

³ Namna gani maadili ya ulimwengu? Katika miaka ya karibuni, kumekuwako maongezeko duniani pote ya kutoa mimba, mimba katika matineja, na jamaa zilizovunjika, kwa wazi katika nchi zinazoitwa za Kikristo ati. Katika nchi fulani, ndoa kama asilimia 50 zinakoma katika talaka. “Mapinduzi katika ngono” ya miaka kuanzia 1960 yameleta matokeo mengine yenye misiba. Mojapo la hayo lilitajwa katika The New York Times la Juni 13, 1986, chini ya kichwa kikuu cha ukurasa wa kwanza: “ONGEZEKO la Kiasi cha Kumi Katika Vifo VINAVYOSABABISHWA NA UKIMWI LlNATAZAMIWA KUFIKIA MWAKA ‘91.” Makala hiyo ilionyesha kwamba kufikia mwaka 1991 hesabu ya wagonjwa wa UKIMWI (Ukosefu wa Kinga Mwilini) katika United States peke yake huenda ikawa zaidi ya 100,000, na gharama za tiba za kila mwaka zikiwa dola bilioni 16. Ugonjwa huu wenye kufisha unapitishwa hasa kwa utendaji wa kulalana watu wa jinsia moja, kutumia dawa za kulevya, na kupewa damu mishipani​—yote hayo yakiwa yanatendwa kwa kuvunja sheria ya Mungu.​—1 Wakorintho 6:9, 10; Wagalatia 5:19-21; Matendo 15:19, 20.

 4. (a) Vita vyetu vinatofautianaje na vile vya Waisraeli katika siku za Yoshua? (b) Tushirikiane na watu wa ulimwengu kwa kiasi gani, na kwa sababu gani?

⁴ Katika siku za Yoshua. Yehova, alituma taifa Lake takatifu liisafishe Nchi ya Ahadi kupitia vita halisi. Leo, vita vyetu ni vya kiroho. (2 Wakorintho 10:3, 4) Sisi Mashahidi hatuchukui hatua ya jeuri ili kuondoa wale ambao wanadharau Neno la Mungu. Yehova atawaondoa wakati unaofaa na kwa njia yake. (Kumbukumbu 32:41. 43.) Sisi hatuwakubali watu wasiofuata kanuni waingie katika ushirika wetu wa karibu. ingawa tunaweza kuwaonyesha upendo kweli kweli kwa kuwajulisha habari njema za Ufalme. (1 Wakorintho 15:33) Tunaweza kujifunza Neno la Mungu pamoja nao na kuwatia moyo ‘watubu, warejee, ili dhambi zao zifutwe.’​—Matendo 3:19; Mathayo 21:31, 32; Luka 5:27-32.

Rahabu na Nyumba Yake

 5, 6. (a) Kwa sababu gani wapelelezi walienda Yeriko na katika nyumba ya Rahabu? (b) Leo Yehova amejibuje mara nyingi kilio cha kutaka msaada? (c) Rahabu alijionyeshaje kuwa “rafiki ya amani”?

⁵ Hata kabla ya Israeli kuvuka Mto Yordani, Yehova alielekeza fikira kwenye mji wa Yeriko. Yoshua aliwatuma wapelelezi wawili, wakiwakilisha Israeli yote, na kuwaambia: “Enendeni mkaitazame nchi hii, na Yeriko.” Kwa nini wapeleleze Yeriko? Ijapokuwa mji huo ulikuwa mdogo na haungetosha jeshi la Israeli, ulikuwa ndio mahali penye kufaa sana kuanzia mashambulizi ya Kanaani. Kulingana na jinsi ilivyotendeka, kuwapo kwa wapelelezi wawili kungewapa nafasi wale waliokuwa katika Yeriko kujitambulisha wenyewe waziwazi kama walikuwa upande wa Yehova au kinyume chake. “[Wapelelezi] wakaenda wakafika nyumbani kwa kahaba mmoja jina lake aliitwa Rahabu, wakalala huko.” (Yoshua 2:1-7) Bila shaka mwongozo wa kimungu uliwapeleka wapelelezi hao kwenye nyumba ya Rahabu, kama vile mwongozo wa kimalaika unavyowapeleka Mashahidi wa Yehova mara nyingi leo kwa watu wanaoomba ili wapate msaada wa kiroho! “Macho ya [Yehova] huwaelekea wenye haki, na masikio yake hukielekea kilio chao.”​—Zaburi 34:15; ona pia 2 Nyakati 16:9.

⁶ Kwa sababu gani wapelelezi hao wangeenda katika nyumba ya kahaba? Si kwa makusudi ya kukosa adili, lakini yaelekea kuwa ili wawapotoze Wakanaani watazamaji. Maneno ya Rahabu kuwaelekea wapelelezi hao yalionyesha kwamba yeye hakupendezwa nao kwa njia ya kukosa adili. Akijua kwamba walikuwa watumishi wa Yehova, yeye angewaambia tamaa yake ya kutaka sana kuwa mwabudu wa Yehova. Hata alihatirisha uhai wake kwa kuwaficha juu ya paa yake. Yeye alikuwa kama “kondoo” katika mfano wa Yesu, ambao wanawaonyesha fadhili “ndugu” za Bwana. (Mathayo 25:31-46) Huku wakienda kwa busara Mashahidi wa Yehova leo hawasiti kuwatembelea na kujifunza Biblia pamoja na ‘wana wa amani’ kama hao wanaopendezwa.​—Luka 10:5-7.

 7. (a) Rahabu alionyeshaje imani yake katika Yehova? (b) Wapya wanapasa kuonyesha mwelekeo gani leo, nao wanapasa kutendaje?

⁷ Rahabu alikuwa amejifunza matendo makuu ya Yehova. Kwa wapelelezi waliofichwa yeye angeweza kuonyesha imani, akisema: “Mimi najua ya kuwa [Yehova] amewapa ninyi nchi hii, na ya kuwa hofu imetuangukia mbele yenu, na ya kuwa wenyeji wote wa nchi wanayeyuka mbele yenu.” Baada ya kueleza habari aliyosikia kuhusu matendo makuu ya Yehova, Rahabu aliendelea kusema: “[Yehova], Mungu wenu, yeye ndiye Mungu, katika mbingu juu na katika nchi chini. Basi sasa, nawasihi, niapieni kwa [Yehova], kwa kuwa nimewatendea ihisani, ya kwamba ninyi nanyi mtaitendea ihisani nyumba ya baba yangu; tena nipeni alama ya uaminifu.” (Yoshua 2:9-13) Kama Rahabu, wapya wanaojifunza kweli leo hawahitaji kuogopa kwa sababu ya hukumu ambayo itatekelezwa wakati wa “siku ya [Yehova].” (Sefania 1:14-18) Badala yake, wanageuka na kuacha njia za kilimwengu na kutafuta msaada wa Mashahidi wa Yehova ili wapate wokovu.​—Zaburi 3:6-8; Mithali 18:10.

 8. (a) Ni jambo gani linalofananishwa na “kamba nyekundu” iliyowekwa na Rahabu dirishani mwake? (b) Kwa sababu gani na katika maana gani Rahabu alitangazwa kuwa mwadilifu?

⁸ Alama ambayo wapelelezi walimpa Rahabu ilikuwa “kamba nyekundu” ambayo alipaswa kuifunga dirishani katika dirisha ambalo kupitia hilo wapelelezi walitoroka. (Yoshua 2:17-21) Kwa sababu ya Rahabu kuonyesha alama hiyo, nyumba yake ingeachwa wakati Yeriko ungeharibiwa. Vivyo hivyo leo, wale wanaofananishwa na Rahabu wanatambulishwa kwa ajili ya wokovu wakiwa waabudu wa Yehova waliojiweka wakfu na kubatizwa. Ufunuo 7:9, 10, 14 unaeleza juu yao kuwa “mkutano mkubwa” ambao “wamefua mavazi yao na kuyafanya meupe katika damu ya Mwana-Kondoo.” Wao wanaonyesha imani katika damu ya dhabihu ya Yesu na kuthibitisha hivyo kwa kazi za Kikristo. (Warumi 10:9, 10) Tunasoma hivi katika Yakobo 2:24, 25: “Mwaona kwamba mwanadamu [hutangazwa kuwa mwadilifu] kwa matendo yake; si kwa imani peke yake. Vivyo hivyo na Rahabu, yule kahaba naye, je! hakuhesabiwa kuwa ana haki kwa matendo, hapo alipowakaribisha wajumbe, akawatoa nje kwa njia nyingine?”

 9. (a) “Matendo” ya Rahabu yalitia ndani nini? (b) Ni jambo gani limetokea leo kwa sababu ya kutoa ushuhuda bila kuogopa?

⁹ “Matendo” ya Rahabu yalitia ndani kuwalinda wale wapelelezi wawili na kukusanya wengine kwenye nyumba yake waje wapate wokovu. Katika njia ile ile, “mkutano mkubwa” wa nyakati za kisasa unajishughulisha katika kuwaunga mkono kwa ushikamanifu wapakwa-mafuta wa “mtumwa mwaminifu mwenye akili” wakati jamii hii inapotoa ‘chakula cha kiroho kwa wakati wake’ na kusimamia utendaji wa kuhubiri Ufalme duniani pote. (Mathayo 24:45-47) Kwa upande wake, Rahabu alikuwa asiyeogopa katika kuwatolea ushuhuda watu wa nyumbani mwa baba yake.​—utendaji uliojawa na hatari, kwa kuwa yeye angesalitiwa. (Linganisha Mathayo 10:32-36.) Vivyo hivyo, katika nchi nyingi ambamo mna upinzani leo, Mashahidi wa Yehova lazima watoe ushuhuda bila kuogopa. Jambo hili limefokeza kukusanywa kukuu, na mara nyingi jamaa nzima nzima zimetoka katika Babuloni Mkuu ili zichukue msimamo wazo upande wa ibada safi ya Yehova.​—Zaburi 73:28; 107:21, 22.

Yeriko—Wakati Huo na Sasa

10. Yeriko ulipasa utolewe uangalifu gani wa pekee?

¹⁰ Ebu na tuyaangalia matukio haya ya kutazamisha kwa upande tofauti. “Yeriko ulikuwa umefungwa kabisa kwa sababu ya wana wa Israeli, hapana mtu aliyetoka wala hapana mtu aliyeingia.” Huu ndio uliokuwa mji wa kwanza wa Wakanaani kuja chini ya upanga wa Yehova wa kuua. Kwa sababu hiyo, ukiwa matunda ya kwanza yaliyotolewa kwa Yehova, ulipasa upokee uangalifu wa pekee. Yoshua anaeleza hivi: “Ni lazima mji uwe kitu kilichotolewa kwenye uharibifu, wenyewe na kila kitu kilicho ndani ni cha Yehova.”​—Yoshua 6:1, 17, NW; linganisha Kutoka 22:29; Walawi 27:26.

11. (a) Tunaona ulinganifu gani wenye kutokeza leo? (b) Toa mfano wa ‘hofu’ ya Babeli Mkuu.

¹¹ Jinsi hilo linavyolingana vizuri sana na Babeli Mkuu, milki ya ulimwengu ya dini ya uwongo ambayo imefikia upeo wa uovu wayo katika karne hii ya 20 yenye kujawa na umwagaji wa damu! Imejaribu kufunga malango yayo ili Mashahidi wa Yehova wasijipenyeze. Kwa maneno ya Rahabu, “hofu” ya watu wa Yehova imeiangukia. Kwa mfano, gazeti la Kiitalia La Repubblica la Novemba 12, 1985, lilikuwa na kichwa hiki “KlLlO CHA HATARI KUTOKA KANISA DHIDI YA MASHAHIDI WA YEHOVA.” Makala hiyo ilizungumzia mkutano ulioshirikiwa na kardinali Mkatoliki wa Roma, uliofanywa katika Bologna ili kuzuia “tisho” la Mashahidi wa Yehova. Papa alipeleka simu ya kitia-moyo na kuunga mkono. Kilio hicho kilivumishwa hivi: “Tayari wanaendelea kuenea pote ulimwenguni kama nzige,” na ilitangazwa kwamba “sasa kanisa litajikusanya lijiweke tayari” kukabiliana na “hatari” hii. Lakini je! litashinda?​—Yeremia 1:17-19.

12. (a) Wazo la Babeli Mkuu kuhusu “mungu” linatofautianaje na ukweli? (b) Kwa sababu gani Yehova atawapigania mashahidi Wake?

¹² Babeli Mkuu inakubali kwa moyo wote miungu mingi yenye kuleta mvurugo, kuanzia Utatu wa miungu ya Jumuiya ya Wakristo ulio fumbo mpaka mamilioni ya miungu ya dini za Mashariki. Kabla ya kumwagiza Yoshua, Musa alikuwa ametangaza hivi: “Sikiza, Ee Israeli; [Yehova], Mungu wetu, [Yehova] ndiye mmoja.” Leo, Mashahidi wa Yehova peke yao ndio wanaomtukuza huyu ‘Mungu mmoja na Baba.’ (Kumbukumbu 6:4; Waefeso 4:6) Yehova atatupigania kama alivyofanya katika siku za Yoshua na viongozi wengine washikamanifu katika Israeli.​—2 Nyakati 20:15, 17; 32:7, 8; Isaya 54:17.

Kufikiliza Hukumu

13. (a) Ni matukio gani yaliyotangulia kwenye kuzungukwa kwa Yeriko? (b) Tunaona ulinganifu gani leo?

¹³ Yoshua alifanya matayarisho kamili kwa ajili ya kuzungukwa kwa Yeriko. Wale wanaume waliokua jangwani walitahiriwa. Jambo hili lilionyesha tendo lao la kuondolea mbali jambo lo lote ambalo lingeweza kuzuia kujitoa kwao kwa moyo wote kwa Yehova. (Kumbukumbu 10:16; 30:5, 6) Kusherehekea Sikukuu ya Kupitwa kulianzishwa tena. Watu wakaanza kulishwa mazao ya nchi huku mana iliyotolewa kwa njia ya mwujiza ikikoma. Tena, “huyo amiri wa jeshi la [Yehova],” bila shaka Logosi aliyekuwako kabla ya kuwa binadamu, alimtokea Yoshua, akimpa tumaini. Naye Yoshua alikubali kwa unyenyekevu kuwapo kwake Huyo. Katika yote haya, tunaweza kuona ulinganifu mwingi katika mambo yanayowapata mashahidi wa kisasa wa Yehova kwa kuwa wamejitoa wenyewe kwa kazi iliyopo. Chakula chetu cha kiroho kimekuwa cha namna nyingi zaidi na bora huku “mtumwa mwaminifu mwenye akili” akiendelea kusonga mbele chini ya uongozi wa Bwana Yesu Kristo.​—Yoshua 5:1-15

14. Ni mbinu gani zisizo za kawaida ambazo Yehova anaagiza zitumiwe kuzunguka Yeriko?

¹⁴ Ebu tazama sasa tamasha ya pigano. Yehova ameagiza mbinu zisizo za kawaida kweli kweli! Mara moja kila siku kwa siku sita, makuhani wa Israeli wanauzunguka Yeriko, wakilibeba Sanduku, linalowakilisha kuwapo kwa Yehova. Wanatanguliwa na makuhani saba wakipuliza pembe za kondoo waume, wakiwa na askari wa Israeli mbele na nyuma yao. Lakini siku ya saba wanaondoka “mapema wakati wa mapambazuko,” na kuuzunguka mji mara saba. Lazima wakaaji wa Yeriko wanatetema kwa hofu!—Yoshua 6:2:1-15.

15. Ni ulinganifu gani unaoonwa leo katika utendaji wa Mashahidi wa Yehova?

¹⁵ Tunaona ulinganifu wenye kutazamisha sana kwenye jambo hili katika yale wanayofanya Mashahidi wa Yehova duniani pote leo. Hivi majuzi, kumekuwa na maongezeko yenye kutazamisha katika utendaji wetu wa Ufalme. Kwa miaka mitano mpaka mwaka wa 1985, hesabu ya mapainia imeongezeka asilima 134. Jeshi la mapainia na wahubiri wengine wa Ufalme waaminifu wanaamka mapema,” mara nyingi kwa njia halisi, na kushiriki kwa bidii kutangaza hukumu za Yehova. Kwa viongozi wa dini za Jumuiya ya Wakristo, Mashahidi hawa wanaonekana kuwa “taifa lenye watu wengi na lenye nguvu.” Viongozi wa kidini wamo katika “maumivu makali” wanapoona kwamba utangazaji wa ukweli unawafanya wengi wenye mioyo minyofu wawaache na kuchukua msimamo kwa ajili ya Yehova.​—Yoeli 2:1-3, 6, NW.

16. (a) Ni miujiza gani iliyoonyesha kuanguka kwa Yeriko? (b) Imani ya Rahabu inathawabishwaje?

¹⁶ Mwisho, Yoshua anawaamuru watu: “Pigeni kelele; kwa maana [Yehova] amewapeni mji huu.” Mlio mkubwa wa kivita unanguruma kote! Dunia inatikisika na​—mwujiza wa miujiza yote​—kuta za Yeriko zinaanguka chini kabisa! Kwa kutii, Waisraeli mara moja wanakimbia na kwenda mbele ili waangamize kila kitu kilicho hai katika mji. Wanauchoma kwa moto. Lakini tazama! Sehemu moja ya ukuta wa nje ingali inasimama, na katika dirisha lake kuna kamba nyekundu. Rahabu na jamaa ya baba yake wanatolewa nje bila kuumizwa. Baadaye, imani ya Rahabu inathawabishwa zaidi kwa maana yeye anakuwa mke wa Salmoni Mwisraeli na nyanya ya Yesu Kristo.​—Yoshua 6:16-26; Mathayo 1:5.

17. Miujiza hii inaonyesha kivuli cha jambo gani?

¹⁷ “Basi [Yehova] alikuwa pamoja na Yoshua; sifa zake zikaenea katika [dunia] yote.” Katika njia ile ile, jina tukufu la Yehova litatetewa wakati Babeli Mkuu utaharibiwa na kuondolewa utajiri na utukufu wake wakati wa mwanzo wa “dhiki kubwa.”​—Ufunuo 17:16; 18:9, 10, 15-17; Mathayo 24:21, 22.

Mwasi-Imani Ashindwa

18. (a) Kwa nini ‘mioyo ya watu ilianza kuyeyuka’? (b) Yoshua alitendaje kuhusu hatari hiyo?

¹⁸ Muda mfupi tu baada ya ushindi wenye sifa katika Yeriko, jambo la ajabu lilitukia. Jeshi la ushambulizi ambalo Yoshua alikuwa amepeleka ili liangamize mji jirani wa Ai lilishindwa. “Mioyo ya watu ikayeyuka, ikawa kama maji.” Yoshua mwenye majonzi alilia kwa sauti hivi katika sala: “Ee [Yehova] Mungu, . . . utafanya nini kwa ajili ya jina lako kuu?”​—Yoshua 7:2-9.

19, 20. (a) Yehova aliuondoleaje mbali upumbavu wa Akani, akimpa Yoshua uhakikisho gani? (b) Tunaweza kuona ulinganifu gani wa kisasa?

¹⁹ Ndiposa Yehova akamfunulia wazi Yoshua “upumbavu” wenye kuaibisha uliokuwa umetendwa katika Israeli. Akani wa kabila la Yuda alitambuliwa kuwa ndiye mkosaji. Alikuwa ameiba joho “zuri” la Kibabuloni kutoka katika nyara za Yeriko, pia dhahabu na fedha. Yehova ‘alimtenga Akani na upendeleo’ naye pamoja na jamaa yake walipigwa kwa mawe. Kisha wao pamoja na mali zao wakateketezwa kwa moto. Kama ushuhuda wenye kudumu wa kufikilizwa huko kwa hukumu ya Yehova, chungu kubwa ya mawe ilikusanywa juu ya Akani mwenyewe, na sehemu hiyo iliitwa “Bonde la Akori,” jina linalomaanisha “Balaa; Matata.” Tena, Yehova akamwambia Yoshua: “Usiche, wala usifadhaike.” Jina la Yehova lilitukuzwa, katika njia ya kwamba Yoshua hakushindwa tena vitani.​—Yoshua 7:10–8:1.

²⁰ Je! kuna ulinganifu wa kisasa wa dhambi ya Akani? Ndiyo, uko. Mtume Paulo alionya juu ya “mbwa-mwitu wakali” ambao wangepuuza mpango wa kitheokrasi na kufuata njia yao wenyewe wa ubinafsi. Mara kwa mara tangu 1919, wenye pupa wa namna hiyo wametokea katikati ya watu wa Mungu. Mfano wa karibuni, miaka ya katikati kuanzia 1970 wazee wengine mashuhuri wakawa wasioridhika. Waliliona kuwa jambo lisilo na “heshima” kutoa ushuhuda wa ujumbe wa Ufalme nyumba kwa nyumba, kwa kufuata kiolezo cha mitume wa Yesu. (Matendo 5:42; 20:20, 21, 29, 30) Lilionekana kuwa jambo bora kwao kuyarudia mafundisho ya Kibabeli. Kwa siri wakaanza kutokeza mashaka kuhusu “siku za mwisho” na kupunguza mwendo wa kazi ya Mashahidi wa Yehova. (2 Petro 3:3, 4) Mwishowe, walilazimika kutengwa na ushirika.​—2 Yohana 10:11; linganisha Wafilipi 1:15-17; Waebrania 6:4-8.

21. (a) Ni jambo gani linaloonekana kuwa lilikuwa sababu moja ya kupungua kwa mwendo katika miaka ya mwisho ya kuanzia 1970? (b) Ni jambo gani huenda likawa limesaidia ‘kuhimizwa’ kwa kazi tangu wakati huo?

²¹ Mnara wa Mlinzi wa Desemba 15, 1979, ulionyesha wazi sana msingi wa Kimaandiko wa huduma ya nyumba kwa nyumba, na umuhimu wayo. Mashahidi washikamanifu walisonga mbele kwa uhodari katika miaka ya kuanzia 1980! Yaelekea kwamba kuwapo kwa hesabu ndogo ya waasi-imani kulitokeza kupungua kwa mwendo wa kazi ya Yehova wakati wa sehemu ya mwisho ya miaka ya kuanzia 1970—wakati ongezeko la wastani la kila mwaka la Mashahidi wa Yehova watendaji lilipopungua chini ya asilimia moja. Lakini, ongezeko la kila mwaka katika miaka mitano iliyopita limekadiriwa zaidi ya asilimia 6. Wahubiri wa Ufalme walifikia kilele cha ulimwenguni pote cha 3,024,131 katika 1985, ikilinganishwa na 2,179,256 katika 1975. Yehova anaendelea ‘kuhimiza’ kazi yake!—Isaya 54:2, 3; 60:22.

22. Tunapoangalia zaidi kitabu cha Yoshua, lazima tuthamini jambo gani kuhusu jina la Yehova?

²² Kweli kweli, jina la Yehova limekuwa tukufu duniani pote! Lakini yeye ‘anatuambia’ mambo zaidi kupitia kitabu cha Yoshua, kama tutakavyoona sasa.​—Isaya 42:8, 9, NW.

Katika Kitabu cha Yoshua—

◻ Tunapata kiolezo kipi cha ulimwengu leo?

◻ Tunajifunza nini kutokana na masimulizi juu ya Rahabu?

◻ Tunapata nini kinacholingana na utendaji wetu wenye kuongezwa mwendo?

◻ Ni nini kinachotolewa kivuli na anguko la Yeriko?

◻ Ni nini linaloonyeshwa na vile dhambi ya Akani ilivyoshughulikiwa?