Mambo Makuu ya Biblia Wimbo Ulio Bora 1:1–8:14

Upendo wa Kweli Ni Wenye Shangwe ya Ushindi!

Kuna upendo usioshindwa kamwe. Ni thabiti, mvumilivu, wenye shangwe ya ushindi. Upendo huo usioyumbayumba upo kati ya Yesu Kristo na “bibi-arusi” wake, au kundi lililozaliwa kwa roho. (Ufunuo 21:2, 9; Waefeso 5:21-33) Nao, upendo huu unaonyeshwa katika njia nzuri jinsi gani katika Wimbo Ulio Bora!

‘Wimbo huu ulio bora’ (1:1) uliotungwa karibu miaka 3,000 iliyopita na Mfalme Sulemani wa Israeli, unatuambia juu ya upendo uliokuwako kati ya mchungaji mmoja na msichana mmoja wa mashambani kutoka katika kijiji cha Shunemu (Shulamu). Mfalme hakuweza kupata upendo wa Mshulami huyu, ijapokuwa mali na fahari yote aliyokuwa nayo, kwa kuwa msichana huyo alikuwa mshikamanifu kwa mchungaji mpenzi wake.

Kitabu hiki cha kimashairi kinaposomwa kwa uangalifu na uthamini unaofaa, kinawapa watumishi wa Yehova walio waseja na waliofunga ndoa jambo la kufikiria kuhusu usafi, wororo, ushikamanifu, na upendo wenye kudumu sifa ambazo zapasa kuwa chapa za kifungo cha ndoa ya Kikristo. Kwa Kweli, sisi sote tunaweza kunufaika kutokana na wimbo huu kuhusu ushindi wenye shangwe wa upendo wa kweli.

Yule Mshulami Akiwa Katika Kambi ya Sulemani

Tafadhali soma Wimbo Ulio Bora 1:1-14. Katika mahema ya kifalme, Mshulami aliongea kama kwamba mchungaji mpenzi wake alikuwapo. Sulemani alisifu sana urembo wake naye akaahidi kumpamba kwa vitu vya dhahabu na fedha. Lakini mwanamwali huyo alikataa urafiki wake na akamjulisha kwamba yeye alikuwa na upendo wa kweli kwa yule mchungaji peke yake.

◆ 1:2, 3, NW—Kwa sababu gani ulinganisho huu kati ya divai na mafuta unafaa?

Divai inafurahisha moyo na kutia nguvu nafsi iliyoshuka moyo. (Zaburi 104:15; Mithali 31:6) Wageni waliopendelewa walimwagiwa mafuta kwa sababu ya uwezo wayo wenye kuburudisha. (Zaburi 23:5; Luka 7:38) Hivyo Mshulami mwenye kutaabika alitiwa nguvu na kufarijiwa kwa kukumbuka “maneno yenye kuonyesha upendo” ya mchungaji na “jina” lake. Vilevile, mabaki wa wafuasi watiwa-mafuta Wakristo wanatiwa nguvu wanapotafakari juu ya upendo na mahakikisho ya Mchungaji wao, Yesu Kristo, ijapokuwa bado wako ulimwenguni na wametenganishwa naye.

Somo Kwetu Sisi: Sulemani angempamba Mshulami kwa “mashada ya dhahabu” na “vifungo vya fedha” lakini yeye alikataa vishawishi vyote hivi vya kimwili naye akasema kwa uthabiti juu ya upendo wake usioshindwa kwa mchungaji yule. (1:11-14) Kuufikiria mwelekeo wake kunaweza kutia nguvu azimio la jamii ya “bibi-arusi” isukumie mbali ushawishi wa vitu vya kimwili wa ulimwengu na kuendelea kuwa waaminifu kwa Bwana-arusi wao wa kimbingu. Ikiwa matumaini yetu ni ya kidunia, nasi tunafikiria ndoa, kielelezo hiki cha mwanamwali na kitusukume tuhangaikie kwanza masilahi ya kiroho, si ya kimwili.

Shauku ya Mmoja kwa Mwenziwe

Soma 1:15–3:5. Yule mchungaji aliingia katika kambi ya kifalme naye akasema juu ya upendo wake kwa Mshulami mwenye kiasi, ambaye alimheshimu sana zaidi ya wengine wote. Walipokuwa wametenganishwa, mwanamwali huyo alikumbuka pindi zenye furaha alizokuwa nazo pamoja na mpenzi wake naye akasihi kwamba aje haraka upande wake. Usiku, yeye alikuwa na shauku sana kwake.

◆ 2:1-3—Ni nini kinachomaanishwa na semi hizi?

Yule Mshulami alijiita mwenyewe “ua la uwandani” tu kwa sababu yeye alikuwa mwanamke kijana mnyenyekevu, na mwenye kiasi alijiona kuwa ua moja tu kati ya maua mengi ya kawaida. Hata hivyo, yule mchungaji aling’amua kwamba yeye alikuwa “nyinyoro kati ya miiba,” kwa kuwa alikuwa mwenye madaha, hodari, na mwaminifu kwa Yehova. Kwa mwana-mwali huyo, yule mchungaji alikuwa kama “mpera kati ya miti ya msituni,” kwa sababu alikuwa mwanamume kijana ambaye ana mwelekeo wa kiroho amejitoa vilevile kwa Mungu na ana tabia na ustadi wenye kupendeza sana. Mkristo ambaye hajafunga ndoa anayetafuta mwenzi wa maisha apasa kutafuta mwamini mwenzake tu aliye mwaminifu mwenye sifa kama zile za Mshulami au mchungaji mpenzi wake.

◆ 3:5—Kwa sababu gani kiapo hiki kilihusianishwa na wanyama hawa?

Paa na ayala ni wanyama wapole, wazuri, na wenye kupendeza ambao pia ni wenye haraka na wenye mwendo ulio hakika. Basi, katika maana halisi, yule mwana-mwali alikuwa akiwafunga “binti za Yerusalemu” katika kiapo kwa yote ambayo ni mazuri na yenye kupendeza. Kwa viumbe hawa, alikuwa akiwawekea masharti wanawake hawa wasijaribu kuamsha mapenzi ndani yake kwa mtu ye yote ila mchungaji mpenzi wake.

Somo Kwetu Sisi: Mwana-mwali huyo aliwaapisha “binti za Yerusalemu,” au wanawake wa kao la kifalme waliomtumikia mfalme, ‘wasichochee mapenzi, wala kuyaamsha hata yatakapoona vema yenyewe.’(2:7; 3:5) Jambo hili linaonyesha kwamba haiwezekani kuwa na mapenzi ya kimahaba kwa ye yote tu. Yule mwanamwali hakuhisi akivutwa na Sulemani. Basi, ni jambo lenye hekima jinsi gani, kwa Mkristo ambaye hajafunga ndoa anayefikiria kufunga ndoa kufikiria tu mwabudu wa Yehova anayefaa na aliye mwaminifu na ambaye anaweza kupendwa kikweli!—1 Wakorintho 7:39.

Yule Mwanamwali Akiwa Yerusalemu

Soma 3:6–6:3. Sulemani alirudi Yerusalemu kwa fahari. Yule mchungaji alionana na mwana-mwali yule huko naye akamtia nguvu kwa maneno ya mapenzi. Akiwa katika ndoto, yeye aliitikia kubisha mlango kwa mpenzi wake kwa kuchelewa naye alitendwa vibaya na walinzi alipokuwa akimtafuta kwa bidii sana. Alipoulizwa kitu kilichomfanya mpenzi wake awe mwenye kutokeza sana, yeye aliwapa “binti za Yerusalemu” elezo lenye fahari juu yake.

◆ 5:12—Macho ya mchungaji yule yalikuwaje kama ‘hua penye vijito yakioga kwa maziwa’?

Mapema, macho ya Mshulami yalikuwa yamefananishwa na hua kwa sababu ya kuwa laini, mwanana. (1:15; 4:1) Kwa habari hiyo, yule mchungaji alikuwa amemwita yule mwanamwali “hua.” (5:2) Hapa mwanamke kijana mwenye kutamani sana upendo aliyafananisha macho ya mchungaji na hua wenye rangi ya buluu na kijivu wakioga katika vijito vya maziwa. (5:8, 12) Yaelekea kwamba, haya maneno ya mfano yalielekeza kwenye duara nyeusi ya mboni ya jicho la mchungaji iliyozungukwa na sehemu nyeupe yenye kung’aa ya macho yake.

Somo Kwetu Sisi: Mshulami alikuwa kama “bustani iliyofungwa.” (4:12) Mara nyingi shamba katika Israeli wa kale lilikuwa kama bustani, paradiso halisi yenye chanzo kizuri cha maji na mboga za aina mbalimbali, maua, na miti. Kwa kawaida, lilizungushiwa ua au ukuta na lingeingiwa tu kupitia lango lililofungwa. (Isaya 5:5) Kwa mchungaji yule, usafi wa adili na uzuri wa Mshulami ulikuwa kama shamba lenye uzuri usio wa kawaida, zao zuri, harufu yenye kupendeza, na upendezi wenye kufurahisha. Yeye hakuonyesha mwanamume ye yote tu shauku yake, kwa kuwa alikuwa safi, kama “bustani iliyofungwa” kwa wadukizi wasiotakwa na ambalo lilifunguliwa tu mwenyeji walo aliyekuwa halali. Kwa maadili na ushikamanifu Mshulami huyo aliweka kielelezo bora kwa wanawake Wakristo ambao bado hawajafunga ndoa leo.

“Miali ya Yahu [Yah, NW]”

Soma 6:4–8:14. Sulemani alisifu urembo wa mwanamwali huyo, lakini mwanamwali alimkataa naye akatangaza kujitolea kwake kwa yule mchungaji. Sulemani aliposhindwa kupata upendo wake, alimwacha aende nyumbani. Akiwa na “mpendwa” wake kando yake, yeye alirudi Shunemu akiwa mwanamke aliyekomaa mwenye uthabiti uliojaribiwa. Upendo uliokuwa kati yake na yule kijana mchungaji ulikuwa wenye nguvu kama kifo, na mwako wao kama “miali ya Yahu [Yah, NW].

◆ 6:4, NW “Mji Wenye Kupendeza” ulikuwa nini?

Neno hilo linaweza kutafsiriwa “Tirza,” likimaanisha “Upendezi, Uzuri.” Tirza ulikuwa mji wenye uzuri wenye adhama na ukawa mji mkuu wa kwanza wa ufalme wa kaskazini wa Israeli.​—1 Wafalme 14:17; 16:5, 6, 8, 15.

◆ 7:4—Shingo ya yule mwana-mwali ilikuwaje kama “mnara wa pembe”?

Yaelekea kwamba ilikuwa na ulaini wa pembe na wembamba wa mnara. Mapema, shingo yake ilikuwa imelinganishwa na “mnara wa Daudi,” labda mnara wa Nyumba ya Mfalme huyo kwenye ukuta wa Yerusalemu wa Mashariki. Juu yao ‘silaha elfu za mashujaa zilitundikwa,’ jambo hilo likidokeza kwamba shingo yenye madaha ya Mshulami ilikuwa imepambwa kwa mkufu uliofungiwa vipambo vya mviringo au vito.—4:4; Nehemia 3:25-27.

◆ 8:6, 7—Upendo unakuwaje “una nguvu kama mauti [kifo, NW]”?

Kifo kimeyatwaa maisha ya wanadamu wenye dhambi daima, na upendo wa kweli una nguvu vivyo hivyo. Kwa huo kusisitiza kujitolea kipekee, upendo kama huo ni usioshindwa kama vile Sheoli (kaburi) inavyodai miili ya watu waliokufa. Kwa kuwa Yehova Mungu aliweka nafasi ya upendo ndani ya wanadamu, sifa hii inatoka kwake na kwa kufaa inasemwa kuwa “miali ya Yahu [Yah, NW].” Hata mfalme Sulemani mwenye utajiri hangeweza kununua upendo kama huo.

Somo Kwetu Sisi: Jambo alilopata Mshulami akiwa na MfaIme Sulemani lilikuwa mtihani wenye kuchunguza ambao yeye alipita kwa mafanikio. Yeye hakuwa mwenye kukosa uthabiti katika upendo na maadili, kama vile mlango unaofunguka kwenye bawaba zayo kwa urahisi ambao unahitaji kuzuiwa kwa ubao wa mwerezi kuuzuia usifungukie mtu asiyekaribishwa na asiyefaa. La, mwanamwali huyo alishinda kwa shangwe vishawishi vya yule mfalme, akisimama kama ukuta dhidi ya vivuta macho vyote vya kimwili vya ulimwengu huu. Kwa kumtegemea Mungu na kwa kukumbuka kielelezo bora cha huyo Mshulami, wanawake Wakristo leo wanaweza kuthibitisha kimo chao kama watu mmoja mmoja walio thabiti kwa kanuni zilizo njema na kwa sifa ya Yehova.—8:8-10.

Kwa kweli, huu “wimbo ulio bora,” upendo ukiwa kichwa chao, unazidisha uthamini wetu kwa kifungo kilichopo kati ya Yesu na wale waliochaguliwa kuwa “bibi-arusi” wake wa kimbingu. Lakini wanaume na wanawake wote vijana pia waume na wake waliojitoa kwa Yehova wanaweza kunufaika kwa kutaka kuiga ukamilifu wa Mshulami huyo na mchungaji wanapokabiliana na majaribu na vishawishi. Na sehemu hii bora sana ya Neno la Mungu yapasa itusukume sisi sote tuendelee washikamanifu kwa Yehova, Chanzo cha upendo wenye shangwe ya ushindi.