Muono-Ndani Juu ya Habari

Kutatua Uhalifu

Ijapokuwa wanasiasa wenye kufanya kampeni za uchaguzi hufanya ahadi za kuandaa sheria bora kuhusu uhalifu katika United States, hivi majuzi Shirika la Wanasheria wa Amerika (ABA) lilikubali kwamba uhalifu umeruka mipaka ya kuzuiliwa na kwamba mfumo wa kufikiliza haki juu ya uhalifu hauwezi kabisa kuu-zuia. Shirika hilo la ABA Iilikadiria kwamba matendo milioni 34 ya uhalifu yalifanywa katika 1986, na bado uchunguzi mbalimbali wa kiserikali unafunua kwamba “ni elfu mia chache tu [za visa hivyo] ambavyo matokeo yalikuwa kuhukumiwa vifungo gerezani,” inaripoti The New York Times. Kuongezea hilo, shirika la ABA linadai kwamba visa vingi vya uhalifu hupita bila kuripotiwa kwa polisi. Ijapokuwa hivyo, magereza yamejazana watu kweli kweli, na visa vya uhalifu vinafurika mahakamani. Uchunguzi huo ulikubali kwamba “hakuna tumaini la kikweli kwamba kuna wakati ambapo kushtakiwa na kutiwa gerezani kutakuja kuzuia uhalifu,” inasema Times.

Ingawa huenda halaiki ya watu waliovurugika mawazo wakaona ukiri huu kuwa wa kushtua, wanafunzi wa Biblia walio na habari za kutosha hawashtuki. Karne kadhaa zilizopita mtume Paulo alitabiri kwamba katika “siku za mwisho” za mfumo huu uliopo, “watu wabaya . . . wataendelea, na kuzidi kuwa waovu.” (2 Timotheo 3:​1, 13) Hata hivyo, kile ambacho mwanadamu hawezi kufanya, Mungu anaweza. Yeye anaahidi kwamba waovu ‘watakatiliwa mbali kutoka kwenye dunia yenyewe.’​—⁠Mithali 2:22, NW.

Ni Nani wa Kulaumika?

Wakati ndege ya Shirika la Pan American World Airways ya mruko wa 103 ilipolipuka angani juu ya Lockerbie, Scotland, Desemba uliopita, abiria wote 258 walikufa. Raia kumi na mmoja wa Lockerbie walikufa pia wakati visehemu vilivyoharibika-haribika vilipogonga makao kadhaa. Wapendwa waliopotezwa katika msiba huo wa hewani wenye kushtusha waliombolezwa na watu wa ukoo na marafiki vilevile. Je! Mungu ndiye wa kulaumika kwa tanzia hii?

Askofu mmoja Mkatoliki katika Scotland anaonekana kuwa anafikiri hivyo. Kulingana na The New York Times, yeye alisema hivi katika mahubiri yake kwenye Kanisa Katoliki la Utatu Mtakatifu: “Baba, ikiwa Wewe ndiwe Mungu wa upendo, mbona Wewe uliacha jambo hili litendeke? Mbona Wewe uliruhusu uharibifu wa mamia ya maisha zisizo na hatia? . . . Na mbona Wewe unaruhusu watu wengi hivyo walazimike kuteswa na hilo lemeo katili, lenye msiba wa kufiwa?”

Je! kweli Mungu ndiye wa kulaumiwa kwa mteseko huo? Kulingana na wachunguzi, katika maharibiko ya ndege hiyo ulipatikana ushuhuda wa kuonyesha ilibomolewa kimakusudi na kombora la wavamizi-haramu. Wakati wanadamu wanapopigana ili kuendeleza masilahi yao wenyewe ya ubinafsi, je! Mungu anapasa kulaumiwa kwa dhara ambalo huenda tendo hilo likaletea wengine? Sivyo! Inapasa itazamiwe kwamba wanadamu hawangekosa kupatwa na matokeo ya mambo wanayofanya. Mtume Paulo aliandika hivi: “Cho chote apandacho mtu, ndicho atakachovuna.” (Wagalatia 6:7) Tena, kuhusu majeruhi wasio na hatia wanaopatwa na vitendo vya wengine vya kikatili na vya kutojali, Mhubiri 9:​11, NW, inasema kwamba “wakati na tukio lisilotazamiwa huwaangukia wote.” Hivyo, mtu anaweza kuumia au hata kupoteza uhai wake, si kwa sababu Mungu anataka mwanadamu ateseke bali kwa sababu, kwa nasibu, yeye yumo mahali pasipofaa wakati ule wa hatari.

Muuaji Halisi

Wastadi wameamini kwa miaka mingi kwamba watu wenye kujitahidi sana kukabiliana na magumu na walio na haraka sikuzote ndio hasa wanaoelekea zaidi kupatwa na ugonjwa wa ghafula wa moyo. Hata hivyo, sasa ushuhuda mpya unadokeza kwamba hasira, wala si kukosa subira, huenda ikawa ndiye muuaji halisi. Dakt. Redford Williams, Jr., wa Kitovu cha Tiba Kwenye Chuo Kikuu cha Duke, alieleza kwamba kuwa katika haraka au kuwa mlevi wa kazi “kwa lazima [si] jambo baya kwa moyo wako,” inaripoti New York Post. Williams alionyesha kwamba “jambo baya ni kuwa kwako na kadiri kubwa za uhasama na hasira na kwamba hujali kuificha wakati unaposhughulika na watu wengine.” Wale walio katika hatari kubwa ya kupatwa ghafula na ugonjwa wa moyo walisemwa kuwa ni “wenye haraka kuchemka” na ni watu wasioamini wengine. “Wao hukasirika mara nyingi na kuonyesha waziwazi ukosefu wao wa raha, badala ya kuuzuilia,” inasema Post.

Matokeo mabaya ya hasira yamejulikana kwa muda mrefu kwa wanafunzi wa Biblia. Karne kadhaa zilizopita Mfalme Sulemani mwenye hekima aliandika hivi: “Yeye aonaye hasira upesi atatenda kwa ujinga” na “mtu wa hasira huchochea ugomvi.” Hata hivyo, mtu “asiye mwepesi wa hasira hutuliza mashindano.” (Mithali 14:17; 15:18) Wale wanaofuata kwa hekima ushauri huu wa Kibiblia wanaweza kupunguza hatari ya kupata ugonjwa wa moyo. Neno la Mungu ni kweli linaposema hivi: “Moyo ulio mzima [ulio mtulivu, “NW”] ni uhai wa mwili; bali husuda [wivu] ni ubovu wa mifupa.”​—⁠Mithali 14:30.