Bariki Jina Takatifu la Yehova!

“Kinywa changu kitazinena sifa za BWANA [Yehova, NW]; wote wenye mwili na walihimidi jina lake takatifu milele na milele.”—ZABURI 145:21.

1, 2. (a) Ni katika njia gani Shetani ametokeza wito wa ushindani kwa utawala wa Mungu? (b) Ni maswali gani yatokezwa kuhusu Zaburi 145:11-21?

YEHOVA ndiye Mwenye Enzi Kuu wa Ulimwengu Wote Mzima pasipo shaka. Lakini Shetani ametokeza wito wa ushindani juu ya uadilifu na kufaa kwa utawala wa Mungu. (Mwanzo 2:16, 17; 3:1-5) Pia Ibilisi ametia shaka juu ya ukamilifu wa watumishi wote wa Mungu mbinguni na duniani. (Ayubu 1:6-11; 2:1-5; Luka 22:31) Hivyo basi Yehova ameruhusu wakati ili viumbe wote wenye uelewevu waone tunda baya la uasi dhidi ya utawala wake na kuonyesha wao wasimama wapi kuhusu masuala hayo.

² Zaburi 145 hutusaidia kuchukua msimamo imara upande wa utawala wa Mungu. Jinsi gani? Je! Daudi asema nini juu ya umaliki wa Yehova? Na je! Mungu awatendeaje mawakili wake? Majibu yenye msaada yaonekana kwenye Zaburi 145:11-21.

Ongea Juu ya Umaliki wa Yehova

3. Ikiwa umaliki wa Yehova ni kipenzi kwetu, tutafanya nini?

³ Utawala wa Yehova ulikuwa hangaikio kubwa kwa Daudi, aliyesema hivi: “Wataunena utukufu wa ufalme wako, na kuuhadithia uweza wako. Ili kuwajulisha watu matendo yake makuu, na utukufu wa fahari ya ufalme wake.” (Zaburi 145:11, 12) Watu huongea juu ya mambo yawapendezayo. Ndivyo mtu aongeavyo juu ya familia yake, nyumba yake, mazao yake. “Mtu mwema katika hazina njema ya moyo wake hutoa yaliyo mema,” akasema Yesu. (Luka 6:45) Ikiwa utawala wa Mungu ni kipenzi kwa moyo wetu, tutasali ili Ufalme wake uje, nasi tutawaambia wengine juu ya haki, amani, na uadilifu utakaoenea pote chini ya utawala wao. Tutamsifu Yehova kuwa ndiye “Mfalme wa umilele,” nasi tutaongea juu ya wonyesho wa enzi kuu yake kupitia Ufalme wa Kimesiya ulio mikononi mwa Mwana wake mpendwa, Yesu Kristo. (Ufunuo 15:3, NW; Isaya 9:6, 7) Ni pendeleo kama nini kusema juu ya utukufu wa kimbingu wa umaliki wa Yehova, ambao hivi karibuni utaonyeshwa kwa upendezi wa paradiso ya kidunia yenye kujawa na viumbe wakamilifu wenye furaha!—Luka 23:43, ZSB.

4. Ni lini sisi tuwapo na pindi ya kusema juu ya “uweza” wa Yehova, nasi hutegemezwaje katika utendaji huo?

⁴ Pia uthamini utatusukuma tuseme juu ya “uweza” wa Yehova. Ingawa yeye “ni mkuu mwenye uweza,” hautumii vibaya kamwe. (Ayubu 37:23) Alitumia nguvu yake kuumba dunia na ainabinadamu na ataitumia kuwaharibu waovu. Sisi huwa na pindi ya kusema juu ya uweza wa Mungu tujulishapo rasmi habari njema. Na je! hatuna shukrani kwamba Chanzo huyu aliye upeo wa imara hututia nguvu ya kufanya kazi hiyo? (Isaya 40:29-31) Ndiyo, imara na roho ya Mungu ndiyo hututegemeza sisi Mashahidi wa Yehova katika utumishi mtakatifu. Ni kwa njia hii tu kwamba ujumbe wa Ufalme unapigiwa mbiu kwa mafanikio mazuri ajabu ulimwenguni pote.—Zaburi 28:7, 8; Zekaria 4:6.

5. Madhali umati wa watu haujui juu ya ‘matendo makuu’ ya Yehova, sisi twapaswa kufanya nini?

⁵ Kuna uhitaji wa sisi kujulisha wana wa wanadamu ‘matendo makuu’ ya Yehova, kama vile Waisraeli walivyowaambia watoto wao jinsi Mungu alivyowakomboa kutoka utumwa wa Kimisri. (Kutoka 13:14-16) Watu hujenga majengo ya kuwakumbuka wanadamu ambao wao huona kuwa ni wenye matendo ya kusifika, lakini ni wangapi wajuao juu ya matendo makuu ya Mungu? Kama vile mwanachuo mmoja alivyoliweka wazo hilo: “Wao huandika matendo ya mashujaa wao juu ya shaba nyeupe, lakini matendo matukufu ya Yehova huandikwa juu ya mchanga, na wimbi la wakati huyaosha kutoka kwenye kumbukumbu la kisasa.” Kwa kweli matendo hayo hayaoshwi kupotelea mbali, ingawa hayajulikani kwa umati wa watu. Hivyo basi katika kazi yetu ya nyumba kwa nyumba, tunapoongoza mafunzo ya nyumbani ya Biblia, na katika pindi nyinginezo, acheni tuseme kwa bidii juu ya matendo makuu ya Mungu.

6. (a) Ni katika pindi gani miaka mingi iliyopita roho ya bidii ambayo kwayo sisi hutimiliza huduma yetu ilionyeshwa? (b) Kwa kueleza maana tu, ni jambo gani lililosemwa katika 1922 juu ya kutangaza Ufalme?

⁶ Pia twapaswa kujulisha kwa bidii utukufu wa umaliki wa Mungu. Bidii kwa utumishi huo wa Ufalme ilionekana wazi kwa uhakika wakati ambapo, katika 1922, J. F. Rutherford, msimamizi wa wakati huo wa Watch Tower Society, alipohutubia wakusanyikaji Seda Pointi, Ohio, na kusema: “Tangu 1914 Mfalme wa utukufu amechukua uwezo wake . . . Ufalme wa mbinguni u karibu; Mfalme atawala; milki ya Shetani inaanguka; mamilioni wanaoishi sasa hawatakufa kamwe. Je! nyinyi mwaamini hivyo? . . . Basi rudini shambani, Enyi wana wa Mungu aliye juu zaidi! Jivikeni viunoni silaha zenu! Iweni makini, kesheni, iweni watendaji, iweni mashujaa. Iweni mashahidi waaminifu na wa kweli wa Bwana. Songeni mbele katika vita mpaka kila kisehemu cha Babuloni kiwe ukiwa. Pelekeni ujumbe kwa marefu na mapana. Lazima ulimwengu ujue kwamba Yehova ni Mungu na kwamba Yesu Kristo ni Mfalme wa wafalme na Bwana wa mabwana. Hii ndiyo siku ya siku zote. Tazameni, Mfalme atawala! Nyinyi ni mawakili wake wa utangazaji. Kwa hiyo vumisheni habari, vumisheni habari, vumisheni habari, ya Mfalme na Ufalme wake.”

7. Twapaswa kuhisije juu ya utendaji wetu tukiwa wapiga mbiu wa Ufalme?

⁷ Ni shangwe iliyoje ‘kufikiria jina la Mungu,’ kuambia wengine juu ya utawala wake, na kutangaza Ufalme wa Kimesiya wa Mwana wake mpendwa! (Malaki 3:16) Sisi tulio wapiga mbiu na mawakili wa Ufalme, twathamini sana pendeleo letu la kujulisha rasmi habari njema na kugeuza mioyo ya wengine ielekee Mungu, Kristo, na Ufalme. Ndani yetu, twapaswa kuwa na tamaa inayowaka ya kuwaambia wengine juu ya mng’ao mtukufu wa umaliki wa Yehova.—Linganisha Yeremia 20:9.

8. (a) Utawala wa Yehova wawakilishwa katika nini leo? (b) Kwa nini yaweza kusemwa kwamba Mungu ana utawala katika ‘vizazi vyote vyote vyenye kufuatana’?

⁸ Twapaswa kusukumwa na moyo kutangaza Ufalme wa Mungu kwa bidii nyingi, kwa maana Daudi alisema hivi halafu yake: “Ufalme wako ni ufalme wa zamani zote, na mamlaka yako ni ya vizazi vyote [vyenye kufuatana, NW].” (Zaburi 145:13) Matafakari ya mtunga zaburi juu ya umaliki wa Yehova yalipoendelea, yeye alibadili vijina vikaacha kusema “-ake” na kuwa “-ako,” akielekeza maneno yake ya sala kwa Mungu moja kwa moja. Bila shaka, utawala wa Yehova kama uwakilishwavyo katika Ufalme wa Kimesiya hauchukui mahali pa umaliki wa milele wa Mungu. Kwa uhakika, ainabinadamu yenye utiifu ikiisha kuinuliwa kwenye ukamilifu, Kristo atampa Baba yake ule Ufalme. (1 Wakorintho 15:24-28) Hivyo basi Mungu awa na utawala katika ‘vizazi vyote vyenye kufuatana.’ Yehova alikuwa Mfalme wakati Adamu alipoumbwa na atakuwa na utawala juu ya wanadamu waadilifu milele.

9. Katika Zaburi 145, ni nini liwezalo kusemwa juu ya mstari unaoanza kwa herufi ya Kiebrania nun?

⁹ Katika zaburi hii ya kiakrosti, andishi la Kimasoreti laacha nje mstari mmoja unaoanza kwa herufi ya Kiebrania nun. Lakini kulingana na Septuagint ya Kigiriki, Peshitta ya Kisiria, na Vulgate ya Kilatini, hapa hatimkono fulani za Kiebrania husomeka hivi: “Yehova ni mwaminifu katika maneno yake yote, na kwa upendo ni mwenye fadhili katika kazi zake zote.” (New World Translation of the Holy Scriptures—With References, maelezo ya chini) Mungu hutimiza ahadi zake zote na “kwa upendo ni mwenye fadhili” kwa wote wathaminio wema wake.—Yoshua 23:14.

Tegemezo la Yehova Halishindwi Kamwe

10. Mungu ‘hututegemeza’ jinsi gani?

¹⁰ Mfalme wa Milele hapuuzi kamwe shida ya watumishi wake. Hivyo, Daudi angeweza kusema hivi: “BWANA [Yehova, NW] huwategemeza wote waangukao, huwainua wote walioinama chini.” (Zaburi 145:14) Tangu siku za Abeli, Yehova amewategemeza waabudu Wake. Tukiachwa peke yetu, tungeanguka mara nyingi chini ya mizigo yetu. Hatuna imara ya kutosha kuhimili ole zetu zote za maisha na mnyanyaso utujiao sisi watu wa Mungu, lakini Yehova hutusaidia. Namna ya kitenzi cha Kiebrania kilichotumiwa hapa huonyesha kwamba Mungu ‘hututegemeza’ kwa uendelevu. Yaweza kuonwa kwamba Yohana Mbatizaji na Mwana wa Mungu mwenyewe walisaidia kuwainua kiadili watenda dhambi walioanguka. Watu hawa mmoja mmoja walipotubu wakawa watumishi wa Yehova, walikuwa na shangwe ya kupata baraka nzuri ajabu ya tegemezo la kimungu.—Mathayo 21:28-32; Marko 2:15-17.

11. Ni katika njia gani Yehova “huwainua wote walioinama chini”?

¹¹ Inafariji kujua kwamba ‘Yehova anawainua wote walioinama chini’ na majaribu mbalimbali. Yeye huwachangamsha waliopondeka roho miongoni mwetu, huwafariji walio na kihoro, na hutusaidia kusema neno lake kwa ujasiri tunyanyaswapo. (Matendo 4:29-31) Yeye haruhusu kamwe mizigo yetu itukandamize ikiwa tu twaukubali msaada wake. (Zaburi 55:22) Hivyo basi, kama yule “binti ya Abrahamu” aliyekuwa ‘amekunjika maradufu’ lakini akaponywa kimwili na Yesu, sisi twapaswa ‘kumtukuza Mungu’ atuinuapo kiroho kwa upendo. (Luka 13:10-17, NW) Wapakwa-mafuta walioinamilia chini katika utumwa wa Kibabuloni walishukuru Mungu alipowainua katika 1919, naye amekuwa akiwainua “kondoo wengine” wenye uthamini tangu 1935.—Yohana 10:16.

12. Ni jinsi gani ‘macho ya watu wote humwelekea Mungu kwa tumaini’?

¹² Yehova hawakatishi tamaa kamwe watu wake, kama vile Daudi alivyofuata kuelewesha wazi kwa kusema hivi: “Macho ya watu wote yakuelekea Wewe [kwa tumaini, NW], nawe huwapa chakula chao wakati wake. Waufumbua mkono wako, wakishibisha kila kilicho hai matakwa yake.” (Zaburi 145:15, 16) Ni kana kwamba macho ya viumbe vyote vilivyo hai yamegeuzwa kwa tumaini kumwelekea Mwenye Enzi Kuu wa Ulimwengu Wote Mzima. Malaika humtegemea Mungu kwa uhai mwendelevu. Na kama vile mtoto atazamavyo kwenye mzazi ili apate vitu ambavyo avihitaji, sisi hutazama kwenye Baba yetu wa kimbingu. Kwa uhakika, wanadamu na wanyama hali moja hupokea riziki kutoka kwake. Hakuna mtu mwingine yeyote awezaye kuridhisha mahitaji yao. Mungu huwapa ‘chakula chao katika wakati wake,’ yaani, kihitajiwapo.

13. Ni katika njia zipi Yehova ‘afumbua mkono wake na kushibisha kila kilicho hai matakwa yacho’?

¹³ Mungu ‘hufumbua mkono wake na kushibisha kila kilicho hai matakwa yacho.’ (Zaburi 104:10-28) Ni kweli, wanyama fulani hufa kwa kukosa chakula. Wanadamu wengi huwa na njaa wakiwa wahanga wa kutendwa ubinafsi, uonevu, na utumizi mbaya wa mali. Zaidi ya hilo, Yesu alitabiri kwamba “upungufu wa chakula” ungekuwa sehemu moja ya ile “ishara” ya kuwapo kwake katika hizi siku za mwisho. (Mathayo 24:3, 7, NW) Lakini hakuna lolote la mambo hayo hutukia kwa sababu Yehova ni mnyimivu au hawezi kuandaa. Fikiria maelfu ya mamilioni ya viumbe ambavyo hupewa riziki! Zaidi ya hilo, zaburi hii yaandaa uhakikishio wa kwamba chini ya utawala wa Ufalme, wakati ambapo ‘mtu hatakuwa na mamlaka juu ya mwenziwe kwa hasara yake,’ Mungu ataridhisha mahitaji yetu ya vitu vya kimwili na kiroho. (Mhubiri 8:9; Isaya 25:6) Hata leo, hatuhitaji kuwa na njaa ya chakula cha kiroho, kwa maana Mungu hukiandaa kwa wingi katika majira yacho kupitia “mtumwa mwaminifu mwenye akili.” (Mathayo 24:45-47; 1 Petro 2:2) Kwa usemi wa kiroho, Mashahidi wa Yehova ndio watu walishwao vizuri zaidi duniani. Je! wewe huonyesha uthamini wa kina kirefu kwa umaridhawa huo?

Yehova Huwalinda Wale Wanaompenda

14. Kwa nini Daudi angeweza kusema kwamba ‘Yehova ni mwadilifu katika njia zake zote, na mwaminifu-mshikamanifu katika kazi zake zote’?

¹⁴ Huenda upumbavu wetu ‘ukapotosha njia yetu’ na kuleta magumu juu yetu, lakini hatupaswi kamwe kulaumu Mungu kwa magumu hayo. (Mithali 19:3) Daudi aonyesha sababu asemapo hivi: “BWANA [Yehova, NW] ni mwenye haki [mwadilifu, NW] katika njia zake zote, na mwenye fadhili [mwaminifu-mshikamanifu, NW] juu ya kazi zake zote.” (Zaburi 145:17) Sikuzote Mungu hutenda kwa njia nyoofu, ya haki, na yenye rehema. Hasa rehema yake yaonekana wazi katika uandalizi wake wa wokovu kupitia dhabihu ya ukombozi ya Yesu. (Matendo 2:21; 4:8-12) Pia Yehova ni ‘mwaminifu-mshikamanifu katika kazi zake zote,’ sikuzote akiwa mwaminifu, mwenye upendo, na asiye na upendeleo. Basi, tukiwa “waigaji wa Mungu,” acheni sisi tuwe wanyoofu, wenye haki, wenye rehema, wasio na upendeleo, na waaminifu-washikamanifu.—Waefeso 5:1, 2, NW; Kumbukumbu 32:4; Zaburi 7:10; 25:8; Isaya 49:7; Matendo 10:34, 35.

15. Ni jinsi gani sisi ‘tumeita Mungu kwa ukweli,’ na tokeo la sisi kufanya hivyo limekuwa nini?

¹⁵ Madhali Mungu ni mwadilifu na mwaminifu-mshikamanifu, sisi twavutwa kwake. Zaidi ya hilo, Daudi atuhakikishia hivi: “BWANA [Yehova, NW] yu karibu na wote wamwitao, wote wamwitao kwa uaminifu [ukweli, NW].” (Zaburi 145:18) Katika kubatizwa tukiwa waamini waliojiweka wakfu, tuliliitia jina la Yehova. (Matendo 8:12; 18:8; Warumi 10:10-15) Madhali sisi tulimkaribia Mungu hivyo, yeye hutukaribia sisi. (Yakobo 4:8) Sisi ‘humwitia kwa ukweli’ kwa sababu twafanya hivyo katika njia ya kweli, kupitia Yesu Kristo. Na Yehova atabaki karibu tukimwabudu “katika roho na kweli,” tuonyeshe “imani isiyo na unafiki,” na ‘kustahimili kama tumwonaye yeye asiyeonekana.’ (Yohana 4:23, 24; 1 Timotheo 1:5; Waebrania 11:27) Hapo hatutasali bure wala hatutalazimika kukabiliana na ulimwengu wa Shetani tukiwa peke yetu, bali tutaendelea kuwa na shangwe ya msaada na mwongozo wa kimungu. (Zaburi 65:2; 1 Yohana 5:19) Hiyo itamaanisha kuwa na usalama kama nini!

16. Ni kwa nini na jinsi gani Yehova ‘hufanya matakwa yao wamchao’?

¹⁶ Tuna usalama wa kweli, pia, kwa sababu ya mambo mengine ambayo Yehova hufanya kwa ajili yetu. Akasema Daudi: “Atawafanyia wamchao matakwa yao, naye atakisikia kilio chao na kuwaokoa.” (Zaburi 145:19) Yehova ‘hufanya matakwa yetu’ kwa sababu sisi tuna heshima ya kina kirefu kwa Mungu na hofu ifaayo ya kutomchukiza. (Mithali 1:7) Moyo wetu mtiifu umetusukuma tujiweke wakfu kwa Yehova, na mtazamo wetu ni, “Mapenzi yako yatimizwe.” Madhali ni mapenzi yake kwamba sisi tuujulishe rasmi ujumbe wa Ufalme, yeye hutimiza tamaa yetu kufanya kazi hiyo. (Mathayo 6:10; Marko 13:10) Mungu ‘hufanya matakwa yetu’ kwa sababu hatusali kwa ubinafsi bali sisi huomba mambo kupatana na mapenzi yake. Yeye hutupa sisi yale yapatanayo na mapenzi yake na yaliyo kwa manufaa yetu.—1 Yohana 3:21, 22; 5:14, 15; linganisha Mathayo 26:36-44.

17. Kwa nini twaweza kuwa na uhakika kwamba ‘kilio chetu’ kitasikiwa na Mungu?

¹⁷ Sisi tulio Mashahidi waaminifu-washikamanifu wa Yehova, twaweza pia kuwa na uhakika kwamba ‘kilio chetu’ hakitaangukia masikio yasiyotaka kusikia. Mungu alimkomboa Daudi kwenye afa na akamwokoa Yesu, hata akamfufua kwa wafu. Tukiwa chini ya shambulio la adui, hasa wakati wa shambulio la Gogu, twaweza kuwa na uhakika kwamba Yehova atatukomboa. (Ezekieli 38:1–39:16) Kwa uhakika, katika wakati wowote wa taabu, sisi twaweza kusali kwa uhakika hivi kama Daudi: “Ee BWANA [Yehova, NW], unifadhili, maana ni katika dhiki . . . Maana nimesikia masingizio ya wengi; hofu ziko pande zote. Waliposhauriana juu yangu, walifanya hila wauondoe uhai wangu. Lakini mimi nakutumaini Wewe, BWANA [Yehova, NW], Nimesema, Wewe ndiwe Mungu wangu.”—Zaburi 31:9-14.

18. Sisi twanufaikaje kwa kujua kwamba Yehova huwahifadhi wote wampendao lakini atawaangamiza kabisa waovu?

¹⁸ Sikuzote Yehova Mungu huwa tayari kutusaidia. Kama asemavyo Daudi: “BWANA [Yehova, NW] huwahifadhi wote wampendao, na wote wasio haki atawaangamiza.” (Zaburi 145:20) Ndiyo, ikiwa sisi twampenda Mungu, yeye atatubariki na kutuweka. (Hesabu 6:24-26) Yeye ‘huwalipa watendao kiburi malipo tele’ lakini huwalinda salama watumishi wake wanyenyekevu, asiache chochote kiwapate ambacho kitawatenda jeraha la daima. Madhali Yehova yupo pamoja nasi, acheni tuwe na moyo mkuu. (Zaburi 31:20-24; Matendo 11:19-21) ‘Kila silaha itakayofanyika juu yetu haitafanikiwa.’ (Isaya 54:17; Zaburi 9:17; 11:4-7) Hilo ndilo ono la wale ambao huthibitisha upendo wao kwa Mungu wakiwa watumishi wake waaminifu waliojiweka wakfu. Wakiwa kikundi, Mashahidi wa Yehova watapita salama katika “dhiki kubwa” itakayoletwa juu ya waovu. (Ufunuo 7:14, NW) Na lo, kutatuliwa kwa lile suala kubwa la umaliki wa Yehova wa ulimwengu wote mzima kutakuwa baraka iliyoje kwa “wote wampendao”!

Endelea Kubariki

Jina Takatifu la Yehova

19. Kwa nini vinywa vyetu vyasema sifa ya Yehova?

¹⁹ Daudi aimalizia zaburi hii yenye kugusa moyo kwa maneno haya: “Kinywa changu kitazinena sifa za BWANA [Yehova, NW]; wote wenye mwili na walihimidi [walibariki, NW] jina lake takatifu milele na milele.” (Zaburi 145:21) Sisi tulio Mashahidi wa Yehova, twathamini ukubwa wa Mungu, wema, umaliki wenye fadhili nyingi, tegemezo lake lisilokoma, na majaliwa ambayo yeye hututolea bila kuchoka. Hivyo basi, kama Daudi, vinywa vyetu vyasema sifa za Mungu. Twasukumwa na moyo kumpa ujitoaji usiohusisha wengine ndani, kumshukuru kwa baraka zake nyingi, na kusifu “jina lake la upendezi mwingi.”—1 Nyakati 29:10-13, NW; Kutoka 20:4-6.

20. Tukiwa na tazamio la umilele, sasa twapaswa kupiga moyo konde kufanya nini?

²⁰ Madhali Yehova hutubariki kila siku, acheni sisi tumbariki yeye kwa ukawaida, au tuseme vema juu yake. Acheni tuzihubiri habari njema kwa bidii kwa kumsifu Mungu, tukiambia wengine kwamba karibuni ‘wote wenye mwili watalibariki jina lake takatifu.’ Litakuwa jambo bora kama nini kuishi wakati ambapo wakaaji wote wa dunia—naam, viumbe wote wenye uelewevu katika ulimwengu wote mzima—wataziimba sifa kwa Baba yetu wa kimbingu! (Zaburi 148:1-13) Mbarikiwa na awe Yehova kwa kufunua jina lake na kutukidhi sisi pendeleo la kuwa Mashahidi wake. (Zaburi 83:18; Isaya 43:10-12) Acheni sisi tujiendeshe kwa namna iwafaao wale walishikao jina hilo takatifu na kusali lipate utakaso. (Luka 11:2) Acheni sisi tumtumikie Mungu kwa uaminifu-mshikamanifu, ili kwamba katika mfumo wake mpya, sauti yetu ipate kusikiwa katika wimbo wa upatani pamoja na wale walibarikio milele jina takatifu la Yehova.

Ni Nini Maelezo Yako?

◻ Sisi tutafanya nini ikiwa umaliki wa Yehova ni kipenzi kwetu?

◻ Umaliki wa Mungu wawakilishwa katika nini leo?

◻ Ni jinsi gani Yehova ‘huwainua wote walioinama chini’?

◻ Ni katika njia zipi Mungu ‘hufumbua mkono wake na kushibisha kila kilicho hai matakwa yacho’?

◻ Twawezaje kulibariki jina takatifu la Yehova?

[Picha katika ukurasa wa 17]

Katika 1922 maneno ‘vumisheni habari ya Mfalme na Ufalme’ yaliwachochea mawakili wa umaliki wa Yehova wasonge mbele kwenye tendo kubwa zaidi