Kutazama “Nyumba ya Mungu” kwa Uthamini
“NENO moja nimelitaka kwa BWANA, nalo ndilo nitakalolitafuta, nikae nyumbani mwa BWANA siku zote za maisha yangu. Niutazame uzuri wa BWANA, na kutafakari hekaluni mwake.”—Zaburi 27:4.
Mfalme Daudi mwenye uthamini alitazama hekalu la Yehova kwa furaha, au shangwe. Je! wahisi vivyo hivyo kuhusu vitovu vya ibada ya kweli leo? Makao ya Betheli zaidi ya 95 kwenye matawi ya Watch Tower Society yamo miongoni mwa majengo yanayoshirikishwa na ibada ya Yehova katika wakati wetu.
“Nikumbukapo miaka yangu mingi ya utumishi wa Betheli hiyo hunifanya niwe na shukrani nyingi na uthamini mwingi, ambao umekua mwaka kwa mwaka,” aeleza Helga, aliyeanza kazi kwenye makao hayo nchini Ujerumani katika 1948. Helga ni mmoja wa wafanyakazi wa Betheli 13,828 wenye furaha ulimwenguni pote ambao katika mwaka wa utumishi wa 1993 ‘waliutazama uzuri wa Yehova.’ Jina Betheli linamaanisha nini hasa? Kila mmoja wa Mashahidi wa Yehova, iwe anatumikia Mungu ndani au nje ya Betheli, aweza kutazamaje mpango huu kwa uthamini?
Jina Linalotaka Ujitoaji
“Betheli” ni jina linalofaa sana, kwani neno la Kiebrania Behth-ʼElʹ lamaanisha “Nyumba ya Mungu.” (Mwanzo 28:19, NW, kielezi-chini) Ndiyo, Betheli yafanana na nyumba iliyopangwa vizuri, au ‘nyumba iliyojengwa kwa hekima,’ na Mungu huku mapenzi yake yakielekezewa fikira. (Mithali 24:3) “Ni kama kuishi katika familia. Tuna ratiba ya kila siku iliyopangwa vizuri,” asema Herta kwa uthamini. Yeye amekuwa akitumikia kwa zaidi ya miaka 45 katika Betheli ileile ambayo Helga anatumikia. Kila mshiriki wa familia hii kubwa ana kazi au mahali pake, ikimruhusu kuhisi mwenye furaha na salama. Kupatana na jina Betheli, mpango na utaratibu mzuri wapatikana katika kila idara. Hilo huendeleza amani, hufanya kuhubiri habari njema kwa matokeo kuwezekane, na huyapa makutaniko sababu ifaayo ya kuona “Nyumba ya Mungu” kwa heshima kuu zaidi.—1 Wakorintho 14:33, 40.
Kwa nini majengo hayo yahitajiwa? Kwa kielelezo gazeti hili lilitokezwa katika matbaa ya Betheli. Kuhubiriwa kwa ujumbe wa Ufalme na kugawanywa kwa chakula cha kiroho, yote hayo mawili yakitabiriwa na Yesu Kristo, hufanya mipango ya kitengenezo kama Betheli iwe ya lazima—ikiungwa mkono na wafanyakazi wenye kujitolea na kuonwa kuwa kitu cha maana sana na waabudu wote wa Yehova.—Mathayo 24:14, 45.
Je! ungependa kujifunza mengi zaidi juu ya ratiba ya kazi ya siku hapa? Mahali ambapo Helga na Herta huishi, kengele yenye mlio mtamu hulia katika majengo ya wafanyakazi saa 12:30 asubuhi, ingawa wengi wa wale wafanyakazi wa kawaida zaidi ya 800 huamka mapema hata zaidi ili kujitayarisha kwa ajili ya siku hiyo. Kufikia saa 1:00 asubuhi, Jumatatu hadi Jumamosi, familia hukusanyika katika vyumba vya mlo kwa ajili ya mazungumzo ya andiko la kila siku, au ibada ya asubuhi. Kiamshakinywa chenye kujenga mwili hufuata. Kila siku ya kazi huanza saa 2:00 asubuhi na huendelea kwa muda wa saa nane, ikikatizwa tu na mapumziko kwa ajili ya chakula cha mchana. (Kwa kawaida familia hufanya kazi nusu-siku Jumamosi.) Hata iwe ni jikoni, kwenye matbaa, kwenye dobi, maofisini, karakarani, kwenye ujalidi wa vitabu, au idara nyingine yoyote, kuna mengi ya kufanya.
Wakati wa jioni au miisho-juma, washiriki wa familia hushirikiana na makutaniko ya mahali katika mikutano na pia kuhubiri peupe. Ndugu wengi wa Betheli ni wazee au watumishi wa huduma katika makutaniko hayo. Mashahidi wenyeji wathamini ushirikiano huo kikweli, vikundi vyote viwili vikifanya kazi pamoja kwa upatano kama mwili mmoja, vikistahiana na kuelewana. (Wakolosai 2:19) Kila mfanyakazi wa Betheli ajua kwamba mgawo wake katika “Nyumba ya Mungu” wachukua mahali pa kwanza badala ya utendaji mwingineo. Hata hivyo, bidii ya kuhubiri na kujihusisha na kutaniko, kutia na mtazamo uliosawazika, huimarisha hali ya kiroho ya mfanyakazi wa Betheli, huongeza shangwe yake, na kumfanya awe mshiriki wa familia mwenye matokeo zaidi. Sifa hizo ni za maana kama nini katika “nyumba” ambayo jina layo lahusianishwa na ujitoaji wa nafsi yote!
Kufanya Utumishi wa Betheli Ufanikiwe
Ni nini kimesaidia Mashahidi wa Yehova wasiohesabika kufanya utumishi wao wa Betheli uwe wenye mafanikio? Washiriki wa familia ya Betheli nchini Ufaransa wenye ujuzi wa miaka mingi watoa maelezo haya: “Kumpenda Yehova. Kuwa na azimio la kuvumilia mahali popote atuwekapo; unyenyekevu, ujitiisho, na utii kwa mwelekezo tunaopewa na Sosaiti.” (Denise) “Nimeona jinsi lilivyo jambo la maana kustahi kanuni inayotajwa na Paulo kwenye Warumi 12:10: ‘Kwa heshima mkiwatanguliza wenzenu.’ Andiko hili latuonyesha umaana wa kutosisitiza kwamba maoni yetu binafsi yakubaliwe bali, badala ya hivyo, kufikiria maoni ya wengine. Yaani, kutotafuta umashuhuri.” (Jean-Jacques) “Staha yetu kwa ajili ya utumishi wa Betheli ingeweza kuharibiwa ikiwa tungetazama mambo kwa maoni ya kimwili, yaliyo ya kibinadamu,” asema Barbara, “kwani hilo lingeweza kutufanya tusahau uhakika wa kwamba Yehova anaongoza tengenezo lake. Staha hiyo ingeweza kupotezwa ikiwa tungekwazwa na kutokamilika kwa wengine.”
Kila mtu katika Betheli hajakamilika, kwa hiyo ushirikiano wataka fikira za uangalifu. Yafaa vijana au wapya wasishirikiane na marika wao tu. Wale ambao huenda wakawa na mwelekeo wa kulalamika au kufikiri isivyofaa si washiriki wenye kujenga katika Betheli au kutanikoni. Kwa upande mwingine, kuiga “hekima itokayo juu,” inayoelezwa kwenye Yakobo 3:17, huleta baraka. Hiyo “kwanza ni safi, tena ni ya amani, ya upole, tayari kusikiliza maneno ya watu, imejaa rehema na matunda mema, haina fitina, haina unafiki.” Sifa hizo, pamoja na ustahimilivu wenye uvumilivu na fadhili, huonekana katika “Nyumba ya Mungu,” jambo linalofanya kuishi humo kupendeze na kuchochee. Mara nyingi hata wageni wasio Mashahidi huonyesha mshangao kwa ajili ya tabia njema, urafiki, na roho ya shangwe ya wafanyakazi.
Anny, ambaye ana umri wa zaidi ya miaka 70 na amekuwa mshiriki wa familia ya Betheli katika Ujerumani tangu 1956 aeleza hivi: “Kwa ajili ya hali bora yangu ya kiroho, mimi hutia jitihada kubwa ili kwenda sambamba na vichapo vya Sosaiti, kuhudhuria mikutano kwa ukawaida, na kushiriki kikawaida katika kuhubiri. Mimi pia hujaribu kuendelea kuwa mwenye afya nzuri kwa kufanya mazoezi kila asubuhi, kwa kujizuia nisitumie lifti wakati mwingi, na kwa kutembea mara nyingine iwezekanavyo, hasa katika utumishi wa shambani.”
Wengi wenye ujuzi wa muda mrefu wa maisha ya Betheli wangekubaliana na Anny. Wao hawaachi kujifunza, wala kuacha kufanya kazi. Afya ya kimwili hutaka kwamba wapate usingizi wa kutosha na mazoezi fulani na kuonyesha kiasi katika kula na kunywa. Jambo la maana zaidi ya yote, wao hawapuuzi sala ya kibinafsi na funzo la Biblia.
Kustahi Sana Utumishi Mtakatifu Katika Betheli
“Unafanya kazi wapi?” ni swali linaloulizwa washiriki wa Betheli kwa kawaida. Migawo ya kazi ni mingi, lakini kila mgawo wapaswa kustahiwa sana na kila mtu. Kwa nini? Kwa sababu kila mgawo—iwe ni kuendesha mashine inayochapa chakula cha kiroho, kufua nguo, kupika na kazi ya usafi kwa ajili ya familia, au kufanya kazi ya ofisi—ni utumishi mtakatifu. Kama vile ilivyotajwa hapo juu, Wakristo hawabagui kazi. Kumbuka kwamba kazi nyingine zote za lazima zilizofanywa na makuhani na Walawi kwenye hekalu, katika nyua zalo na katika vyumba vya mlo, zote zilionwa kuwa utumishi mtakatifu kwa Yehova. Hiyo ilitia ndani kuchinja na kutayarisha wanyama kwa ajili ya dhabihu, kujaza tena taa mafuta, hata kusafisha na kufanya kazi za kuwa walinzi. Vivyo hivyo, kila mgawo katika Betheli ni utendaji wenye kuridhisha na kutosheleza katika “kazi ya Bwana,” hivyo ni pendeleo la kipekee.—1 Wakorintho 15:58.
Fikiria kidogo juu ya tabia moja inayoweza kutuzuia tusitazame “Nyumba ya Mungu” kwa uthamini. Wakristo walio ndani na nje ya Betheli wahitaji kulinda dhidi ya husuda na wivu, ambao ni “ubovu wa mifupa.” (Mithali 14:30) Hakuna mtu anayepaswa kuwa na husuda juu ya mapendeleo ya utumishi ya wafanyakazi wa Betheli. Zaidi ya hiyo, ndani ya familia ya Betheli wivu hauruhusiwi, ambao ni mojawapo kazi za mwili. Ngoja kwa unyenyekevu—hilo ni shauri lifaalo kwa mtu ambaye huenda akaonekana kana kwamba alisahauliwa wengine walipopewa mapendeleo zaidi. Isitoshe, watu wa tabaka mbalimbali za kiuchumi waishi kwa ukaribu katika Betheli. Jinsi inavyoweza kufadhaisha ikiwa mtu aona hali zake ‘kwa kujilinganisha na yule mwingine’! Kuridhika na “chakula na nguo” kumesaidia wengi kuendelea kwa uaminifu kwa miongo mingi katika “Nyumba ya Mungu.”—Wagalatia 5:20, 26; 6:4; 1 Timotheo 6:8.
Mashahidi wa Yehova na mamilioni wengine wapata manufaa kubwa kutokana na utumishi usio na malipo unaofanywa katika Betheli—kazi inayofanywa bila ubinafsi kwa sababu ya kumpenda Mungu na jirani. Makao ya Betheli na matbaa za Watch Tower Society, kama vile majengo mengine ya kitheokrasi, hugharimiwa kwa michango ya kujitolea. (2 Wakorintho 9:7) Kama vile Mfalme Daudi na wakuu na machifu wa Israeli, twaweza kuonyesha heshima yetu na uthamini kwa “Nyumba ya Mungu” kwa kutoa utegemezo wa kiadili na kifedha kwa Sosaiti. (1 Mambo ya Nyakati 29:3-7) Ebu tuone sasa jinsi inavyowezekana ‘kutazama uzuri wa Yehova’ kwenye Betheli.
Baraka Katika “Nyumba ya Mungu”
Uhudhuriapo mkusanyiko, je, wahisi ukiwa mwenye uradhi mwingi, ukizungukwa na waabudu wa Yehova wenye furaha? Ebu wazia, mfanyakazi wa Betheli ana pendeleo la kumtumikia Yehova miongoni mwa kikundi cha ndugu kila siku! (Zaburi 26:12) Hilo latoa mataraja mazuri kama nini ya ukuzi! Ndugu mmoja alisema kwamba alijifunza mengi kumsaidia kufanyiza utu wake kwa muda wa mwaka mmoja katika Betheli kuliko vile alivyofanya katika miaka mitatu kwingineko. Kwa nini? Kwa sababu hakuna mahali penginepo ambapo alipata fursa ya kutazama na kuiga imani ya nyutu nyingi za Kikristo zilizokomaa.—Mithali 13:20.
Katika Betheli mtu huzungukwa na washauri wenye ujuzi. Zaidi ya hiyo, kuna manufaa za kusikia maelezo yaliyotayarishwa vizuri yakitolewa wakati wa ibada ya asubuhi na kwenye Funzo la Mnara wa Mlinzi la familia ya Betheli na wakati wa kusikiliza hotuba Jumatatu jioni. Wapya hupata mafundisho katika Shule ya Wanabetheli Wapya nao hugawiwa kusoma Biblia nzima katika miezi 12 ya kwanza.
Ripoti na mambo yaliyoonwa kutoka kwa wageni wa nchi nyingine hutoa kitia-moyo zaidi. Isitoshe, washiriki wa Baraza Linaloongoza au wawakilishi wao huzuru ofisi za tawi. “Ingawa wana mengi ya kufanya,” asema Helga, “sikuzote akina ndugu hupata wakati kwa ajili ya neno la kirafiki au tabasamu.” Yatia moyo kama nini kujionea binafsi mwenendo wenye kuburudisha na wa kiasi wa wanaume hao waaminifu-washikamanifu!
Hasa katika Betheli ndipo mtu aweza kutazama kwa ukaribu jinsi tengenezo la Mungu linavyofanya kazi na jinsi roho yake takatifu inavyoamsha mioyo na watu wafanye kazi. “Mtu anapokuwa Betheli yeye huhisi kuwa karibu zaidi na ‘kitovu cha utendaji,’” aeleza ndugu mmoja, ambaye amekuwa akitumikia Betheli katika Ufaransa tangu 1949. Yeye aendelea kusema: “Naweza kusema kikweli kwamba kwangu mimi Betheli ni aina ya utumishi wa wakati wote inayoniruhusu kutumia wakati na nguvu nyingi katika utumishi wa Yehova na kutumikia idadi kubwa zaidi ya akina ndugu.” Na je, hilo si ndilo kusudi letu halisi la uhai—kufanya mapenzi ya Mungu? Katika Betheli mtu aweza ‘kujisifia Mungu mchana kutwa.’ Ni baraka iliyoje!—Zaburi 44:8.
Kama vile ambavyo tumegundua, mtu anayefanya kazi katika makao ya Betheli aweza kuona uzuri wa Yehova na kupata baraka za aina nyingi. (Waebrania 6:10) Je! utumishi katika “Nyumba ya Mungu” waweza kukufaa? Wale miongoni mwa Mashahidi wa Yehova ambao angalau wana umri wa miaka 19, wanaofurahia afya njema ya kiroho na kimwili, na ambao, kama Timotheo, ‘wasemwa vema na ndugu’ waweza kuomba watumikie Betheli. (Matendo 16:2) Wengi wamefanya utumishi wa Betheli kuwa kazi yao ya maisha, kama wale walionukuliwa juu. Kwao hamu kubwa ya mtunga-zaburi—‘kukaa katika nyumba ya Yehova siku zote za maisha yangu’—imetimia.
Mashahidi wa Yehova wana staha nyingi kwa ajili ya roho ya kujidhabihu inayoonyeshwa na ndugu na dada zao katika Betheli, wanaotimiza migawo yao kwa nia na pia kwa shangwe. Iwe twamtumikia Yehova katika Betheli au kwingineko, kila mmoja wetu ana sababu nzuri ya kuhisi kama vile Mfalme Daudi alivyohisi—kuitazama “Nyumba ya Mungu” kwa uthamini au kwa shangwe.
[Picha katika ukurasa wa 31]
Wakristo hawa wamefurahia utumishi mtakatifu katika Betheli nchini Ujerumani kwa makumi ya miaka