Kufundishwa na Yehova Hadi Siku Hii
“MUNGU amenipa ulimi wa hao wafundishwao.”—ISAYA 50:4.
1, 2. (a) Yehova alimtayarisha mwanafunzi wake aliyempenda sana kwa ajili ya nini, na tokeo likawa nini? (b) Yesu alikirije Chanzo cha mafundisho yake?
YEHOVA MUNGU amekuwa Mwalimu tangu alipokuwa Baba. Muda fulani baada ya watoto wake fulani kuasi, yeye alimtayarisha mwanafunzi wake aliyempenda zaidi, Mzaliwa wake wa Kwanza, ili afanye huduma fulani duniani. (Mithali 8:30) Isaya sura ya 50 yamwonyesha mwanafunzi huyo kiunabii akisema: “Bwana MUNGU amenipa ulimi wa hao wafundishwao, nipate kujua jinsi ya kumtegemeza kwa maneno yeye aliyechoka.” (Isaya 50:4) Kwa sababu ya kutumia ufundishaji wa Baba yake akiwa duniani, Yesu alikuwa chanzo cha kiburudisho kwa wote wale waliokuwa ‘wamesumbuka na kulemewa.’—Mathayo 11:28-30.
2 Yesu alifanya matendo mengi yenye nguvu wakati wa karne ya kwanza. Yeye aliyafumbua macho ya vipofu na hata akawafufua wafu, hata hivyo yeye alijulikana hasa kuwa mwalimu na watu walioishi wakati wake. Wafuasi wake na pia wapinzani wake walimwita hivyo. (Mathayo 8:19; 9:11; 12:38; 19:16; Yohana 3:2) Yesu hakujipa kamwe sifa kwa yale aliyofundisha bali alikiri hivi kwa unyenyekevu: “Mafunzo yangu si yangu mimi, ila ni yake yeye aliyenipeleka.” “Baba alivyonifundisha ndivyo ninenavyo.”—Yohana 7:16; 8:28; 12:49.
Uhusiano Bora Kabisa Kati ya Mwalimu na Mwanafunzi
3. Unabii wa Isaya waonyeshaje kupendezwa kwa Yehova na wale awafundishao?
3 Mwalimu bora hupendezwa na wanafunzi wake kibinafsi, kwa kudhamiria, na kwa upendo. Isaya sura ya 50 yafunua kwamba Yehova Mungu hupendezwa vivyo hivyo na wale awafundishao. “Huniamsha asubuhi baada ya asubuhi,” unabii huo waonyesha, “huniamsha, sikio langu lipate kusikia kama watu wafundishwao.” (Isaya 50:4) Maneno yaliyo hapa yadokeza mfunzi awaamshao wanafunzi wake mapema asubuhi ili awafundishe. Akieleza juu ya matumizi ya unabii huo, msomi mmoja wa Biblia alionelea hivi: “Wazo ni kwamba, Mkombozi angekuwa . . . mmoja aliyekuwa, kwa kusema kitamathali, katika shule ya Mungu; na ambaye angekuwa mwenye kustahili ili kufundisha wengine. . . . Mesiya angekuwa mwenye kustahili sana, kupitia ufundishaji wa Kimungu, ili kuwa mfunzi wa wanadamu.”
4. Yesu aliitikiaje ufundishaji wa Baba yake?
4 Kwa kufaa, wanafunzi huitikia ufundishaji wa mfunzi wao. Yesu aliitikiaje ufundishaji wa Baba yake? Itikio lake lilipatana na yale tusomayo kwenye Isaya 50:5: “Bwana MUNGU amenizibua sikio langu, wala sikuwa mkaidi [“mwasi,” NW], wala sikurudi nyuma.” Ndiyo, Yesu alikuwa na hamu ya kujifunza. Alikuwa msikivu sana. Kwa kuongezea, yeye alikuwa na nia ya kufanya lolote lile ambalo Baba yake alimwomba afanye. Hakuwa mwasi; badala ya hivyo, yeye alisema hivi: “Si mapenzi yangu, bali yako yatendeke.”—Luka 22:42.
5. (a) Ni nini kionyeshacho kwamba Yesu alijua kimbele majaribu ambayo yeye angekuwa nayo duniani? (b) Unabii kwenye Isaya 50:6 ulitimizwaje?
5 Unabii huo waonyesha kwamba Mwana alijulishwa yale ambayo yangeweza kutokana na kufanya kwake mapenzi ya Mungu. Hilo laonyeshwa kwa yale ambayo huyo mwenye kufundishwa asemayo: “Naliwatolea wapigao mgongo wangu, na wang’oao ndevu mashavu yangu; sikuficha uso wangu usipate fedheha na kutemewa mate.” (Isaya 50:6) Kama vile unabii huo uonyeshavyo, Yesu alitendwa kikatili akiwa duniani. “Wakamtemea mate ya uso,” mtume Mathayo akaandika. “Wengine wakampiga makofi.” (Mathayo 26:67) Hilo lilitendeka mikononi mwa viongozi wa kidini usiku wa Sikukuu ya Kupitwa ya 33 W.K. Siku iliyofuata Yesu aliwapa wapigao mgongo wake, huku askari-jeshi Waroma walipokuwa wakimpiga bila rehema kabla ya kumwangika juu ya mti ili afe.—Yohana 19:1-3, 16-23.
6. Ni nini kionyeshacho kwamba Yesu hakupoteza kamwe uhakika katika Mwalimu wake, na uhakika wake ulithawabishwaje?
6 Huyo Mwana, aliyekuwa amefundishwa vema kimbele, hakupoteza kamwe uhakika katika Mwalimu wake. Hilo laonyeshwa na yale asemayo baada ya hapo kulingana na unabii huo: “Bwana MUNGU atanisaidia; kwa sababu hiyo sikutahayari.” (Isaya 50:7) Uhakika wa Yesu katika msaada wa Mwalimu wake ulithawabishwa sana. Baba yake alimtukuza, akimbariki kwa kumpa cheo cha juu zaidi kupita kile cha watumishi wa Mungu wengine wote. (Wafilipi 2:5-11) Sisi pia tumewekewa baraka tukufu tukishikamana kwa utii na ufundishaji wa Yehova na ‘haturudi nyuma.’ Acheni tuone vile ufundishaji huo umefanywa upatikane hadi siku yetu.
Programu ya Ufundishaji Iliyopanuka
7. Yehova ameendelezaje ufundishaji wake duniani?
7 Kama tulivyoona mapema, Yehova alimtumia Mwakilishi wake wa kidunia, Yesu Kristo, ili kuendeleza ufundishaji wa kimungu wakati wa karne ya kwanza. (Yohana 16:27, 28) Sikuzote Yesu alielekeza kwenye Neno la Mungu kuwa ndilo mamlaka ya ufundishaji wake, akiwekea kielelezo wale aliowafundisha. (Mathayo 4:4, 7, 10; 21:13; 26:24, 31) Baadaye, ufundishaji wa Yehova uliendelezwa duniani kupitia huduma ya hao wenye kufundishwa. Kumbuka kwamba Yesu aliwaamuru hivi: ‘Basi, enendeni, mkawafanye mataifa yote kuwa wanafunzi na kuwafundisha kuyashika yote niliyowaamuru ninyi.’ (Mathayo 28:19, 20) Watu walipofanywa kuwa wanafunzi, hao walikuwa sehemu ya “watu wa nyumbani mwa Mungu, . . . kutaniko la Mungu aliye hai.” (1 Timotheo 3:15, NW) Walifanyizwa pia kuwa makutaniko moja-moja ambamo wao walifundishwa na Yehova. (Matendo 14:23; 15:41; 16:5; 1 Wakorintho 11:16) Je, ufundishaji wa kimungu katika njia hiyo umeendelea hadi siku yetu?
8. Yesu alionyeshaje kwamba kazi ya kuhubiri ingeelekezwa duniani kabla ya mwisho kuja?
8 Kwa kweli, umeendelea! Siku tatu kabla ya kifo chake, Yesu alitabiri kwamba kabla ya mwisho wa mfumo huu wa mambo, kungekuwa na kazi kubwa ya kuhubiri. “Habari njema ya ufalme itahubiriwa katika ulimwengu wote, kuwa ushuhuda kwa mataifa yote,” yeye akasema, “hapo ndipo ule mwisho utakapokuja.” Yesu aliendelea kufafanua njia ambayo programu hiyo ya kuhubiri na kufundisha ya ulimwenguni pote ingeelekezwa. Alisema juu ya “mtumwa mwaminifu mwenye akili” ambaye angetumikia akiwa njia, au chombo, cha kuwatolea watumishi Wake chakula cha kiroho. (Mathayo 24:14, 45-47) Yehova Mungu amemtumia “mtumwa” huyu ili kusimamia masilahi ya Ufalme kotekote duniani.
9. Ni nani wafanyizao mtumwa mwaminifu mwenye akili?
9 Leo, mtumwa mwaminifu mwenye akili amefanyizwa na mabaki ya warithi wa Ufalme. Hawa ni Wakristo watiwa-mafuta, wale wa 144,000 wanaobaki duniani, ambao “ni wa Kristo” na ambao ni sehemu ya “mbegu ya Abrahamu.” (Wagalatia 3:16, 29, NW; Ufunuo 14:1-3) Wewe waweza kumtambulishaje huyu mtumwa mwaminifu mwenye akili? Hasa kwa kazi wafanyayo na kwa ushikamano wao wa karibu na Neno la Mungu, Biblia.
10. Jamii ya mtumwa inatumia vichapo vipi ili kuendeleza mafundisho ya Yehova?
10 Yehova hutumia “mtumwa” huyu kuwa njia yake ya kufundisha watu leo. Wale wa jamii ya mtumwa walianza kutumia jina Mashahidi wa Yehova katika 1931. Tangu wakati huo mamilioni wameshirikiana nao na wamekubali jina hilo na kujiunga katika kupiga mbiu juu ya Ufalme wa Mungu. Gazeti hili, Mnara wa Mlinzi Unaotangaza Ufalme wa Yehova, ndilo chombo kikuu kitumiwacho na huyu “mtumwa” katika kazi ya kufundisha. Hata hivyo, vichapo vingine hutumiwa pia, kutia ndani vitabu, vijitabu, broshua, trakti, na gazeti la Amkeni!
11. “Mtumwa” amedhamini shule zipi, na kila moja ya shule hizo ina kusudi jipi?
11 Kwa kuongezea, huyo “mtumwa” hudhamini shule mbalimbali. Hizo zatia ndani Watchtower Bible School of Gilead, ambayo ni mtaala wa miezi mitano unaotayarisha wahudumu vijana kwa ajili ya utumishi wa mishonari wa ugenini, na ule mtaala wa miezi miwili wa Shule ya Mazoezi ya Kihuduma, unaozoeza wazee na watumishi wa huduma waseja kwa ajili ya migawo ya pekee ya kitheokrasi. Kunayo pia Shule ya Huduma ya Ufalme, ambamo wazee Wakristo na watumishi wa huduma hufundishwa pindi kwa pindi juu ya madaraka yao ya kikutaniko, na Shule ya Utumishi wa Painia, inayotayarisha waeneza-evanjeli wa wakati wote wawe wenye matokeo zaidi katika utendaji wao wa kuhubiri.
12. Ni nini sehemu ya kila juma ya programu ya ufundishaji?
12 Sehemu nyingine ya hiyo programu ya ufundishaji ni mikutano mitano ya kila juma inayofanywa katika yale makutaniko zaidi ya 75,500 ya watu wa Yehova ulimwenguni pote. Je, wewe hunufaika kikamili iwezekanavyo kutokana na mikutano hiyo? Kwa kusikiliza kwako kwa uangalifu mafundisho yanayotolewa, je, wewe huonyesha kwamba waamini kwelikweli kwamba wewe umo, kwa kusema kitamathali, katika shule ya Mungu? Je, maendeleo yako ya kiroho hufanya iwe wazi kwa wengine kwamba wewe una “ulimi wa hao wafundishwao”?—Isaya 50:4; 1 Timotheo 4:15, 16.
Kufundishwa Kwenye Mikutano ya Kutaniko
13. (a) Ni nini njia ya maana ambayo Yehova hufundisha watu wake leo? (b) Twaweza kuonyeshaje uthamini wetu wa Mnara wa Mlinzi?
13 Yehova huwafundisha watu wake hasa kupitia funzo la Biblia la kila juma kwa kutumia Mnara wa Mlinzi likiwa msaada wa kufundisha. Je, wewe huona mkutano huu kuwa mahali uwezapo kufundishwa na Yehova? Ingawa andiko la Isaya 50:4 latumiwa kumhusu Yesu hasa, laweza pia kutumiwa kuwahusu wote wale wanaojipatia maandalizi ya Mungu ili kupokea “ulimi wa hao wafundishwao.” Njia moja ambayo wewe waweza kuonyesha kwamba wathamini Mnara wa Mlinzi ni kwa kusoma kila toleo upesi iwezekanavyo baada ya kulipokea. Halafu, mnapojifunza Mnara wa Mlinzi kutanikoni, wewe waweza kuonyesha uthamini wako kwa Yehova kwa kuwapo na pia kwa kuwa tayari kufanya tangazo la hadharani la tumaini lako.—Waebrania 10:23.
14. (a) Kwa nini kutoa maelezo kwenye mikutano ni pendeleo la maana sana? (b) Ni maelezo ya aina gani ya wachanga hutia moyo zaidi?
14 Je, wewe watambua kwamba kwa maelezo yako kwenye mikutano, waweza kuwa na sehemu katika programu tukufu ya ufundishaji ya Yehova? Kwa hakika, kutoa maelezo kwenye mikutano ni njia ya maana ambayo twaweza kuchocheana “kwenye upendo na matendo yaliyo bora.” (Waebrania 10:24, 25, NW) Je, watoto waweza kuwa na sehemu pia katika programu hii ya mafundisho? Ndiyo, wao waweza kuwa na sehemu. Mara nyingi maelezo ya wachanga ya kuhisiwa moyoni huwatia moyo wale wenye umri mkubwa zaidi. Nyakati nyingi, wapya kwenye mikutano yetu wamechochewa na maelezo ya watoto kuanza kupendezwa kwa uzito zaidi na kweli ya Biblia. Wachanga fulani hufanya zoea la kusoma maelezo yao moja kwa moja kutoka katika fungu au kurudia yale ambayo mtu mzima anawanong’onezea katika sikio lao. Hata hivyo, yatia moyo sana wakati maelezo yao yametayarishwa vema. Kutoa maelezo jinsi hiyo kwa kweli humletea heshima Mfunzi wetu Mtukufu na programu yake tukufu ya ufundishaji.—Isaya 30:20, 21.
15. Wazazi waweza kufanya nini ili kusaidia watoto watoe maelezo kwa matokeo zaidi?
15 Ni shangwe kuona watoto wakitaka kushiriki katika kumsifu Mungu wetu. Yesu alithamini maneno ya sifa kutoka kwa wachanga. (Mathayo 21:15, 16) Mzee mmoja Mkristo aonelea hivi: “Nilipokuwa mtoto, nilitaka kutoa elezo kwenye Funzo la Mnara wa Mlinzi. Baada ya kunisaidia kutayarisha elezo, baba yangu alikuwa akitaka nijizoeze elezo hilo angalau mara saba.” Labda wakati wa funzo lenu la Biblia la familia, nyinyi wazazi mngeweza kusaidia watoto wenu watayarishe maelezo katika maneno yao wenyewe kwenye mafungu yaliyoteuliwa katika Mnara wa Mlinzi. Wasaidie wathamini pendeleo kubwa walilo nalo la kushiriki katika programu ya ufundishaji ya Yehova.
16. Shule ya Huduma ya Kitheokrasi imekuwa na manufaa gani, na ni nani wawezao kujiandikisha katika hiyo shule?
16 Ufundishaji kwenye mikutano mingine ya Kikristo wapaswa ufikiriwe kwa uzito pia, na wale wenye upendeleo wa kutoa habari na pia wale wasikilizao mafundisho yanayotolewa. Kwa miaka zaidi ya 50 sasa, Yehova ametumia Shule ya Huduma ya Kitheokrasi ya kila juma kuzoeza mamilioni ya wanaume na wanawake ili watoe ujumbe wa Ufalme kwa matokeo zaidi. Wale wanaoshirikiana na kutaniko kwa bidii waweza kujiandikisha, kutia na watu ambao wameanza kuhudhuria mikutano hivi majuzi, maadamu wao wanaishi maisha yanayopatana na kanuni za Kikristo.
17. (a) Mkutano wa Watu Wote ulianzishwa kwa kusudi jipi hasa? (b) Wasemaji wa mkutano wa watu wote wanapaswa kukumbuka mambo yapi?
17 Sehemu nyingine ya tangu zamani ya programu ya ufundishaji ni Mkutano wa Watu Wote. Kama vile jina lao lionyeshavyo, mkutano huu ulianzishwa hasa ili kujulisha wasio Mashahidi mafundisho ya msingi ya Biblia. Hivyo, yule atoaye hotuba ahitaji kutoa habari ili iweze kueleweka kwa wale wanaosikia huo ujumbe kwa mara ya kwanza. Hilo lamaanisha kueleza maneno kama vile “kondoo wengine,” “ndugu,” na “mabaki,” maneno ambayo wasio Mashahidi huenda wasielewe. Kwa kuwa watu wanaohudhuria Mkutano wa Watu Wote huenda wakawa na itikadi au mitindo-maisha zilizo kinyume sana na Maandiko—ingawa zakubalika katika jamii ya leo—msemaji apaswa awe mwenye busara sikuzote na hapaswi kamwe kudhihaki itikadi hizo wala mitindo-maisha hiyo.—Linganisha 1 Wakorintho 9:19-23.
18. Kuna mikutano ipi mingine ya kutaniko ya kila juma, nayo ina makusudi yapi?
18 Funzo la Kitabu la Kutaniko ni mkutano ambao katika huo kila juma twajifunza vichapo vinavyotayarishwa chini ya mwelekezo wa mtumwa mwaminifu mwenye akili pamoja na Biblia. Kitabu Ufunuo—Upeo Wao Mtukufu U Karibu! ndicho kinachosomwa wakati huu katika mabara mengi. Mkutano wa Utumishi umekusudiwa ili kutayarisha watu wa Yehova kuwa na ushiriki kamili katika kuhubiri habari njema ya Ufalme na kufanya wanafunzi.—Mathayo 28:19, 20; Marko 13:10.
Kufundishwa Kwenye Mikutano Mikubwa Zaidi
19. Ni vikusanyiko vipi vikubwa zaidi ambavyo “mtumwa” hupanga kila mwaka?
19 Kwa muda wa zaidi ya miaka mia moja, ‘mtumwa mwaminifu’ amepanga mikusanyiko na makusanyiko kwa ajili ya ufundishaji na kitia-moyo cha pekee cha Wakristo wa kweli. Mikutano mikubwa mitatu ya jinsi hiyo hufanywa sasa kila mwaka. Kuna lile kusanyiko la siku moja linalohudhuriwa na kikundi cha makutaniko yafanyizayo mzunguko. Wakati fulani wa mwaka, kila mzunguko huwa pia na kikusanyiko cha siku mbili kiitwacho kusanyiko la mzunguko. Kwa kuongezea, kuna kikusanyiko kiitwacho mkusanyiko wa wilaya, kinachohudhuriwa na mizunguko kadhaa. Katika miaka fulani huenda kukawa na mikusanyiko ya kimataifa. Vikusanyiko hivyo vikubwa vikiwa na Mashahidi wageni kutoka nchi nyingi kwa kweli ni vyenye kutia imani nguvu kwa watu wa Yehova!—Linganisha Kumbukumbu la Torati 16:16.
20. Ni jambo jipi limekuwa likikaziwa sikuzote kwenye vikusanyiko vikubwa zaidi vya Mashahidi wa Yehova?
20 Katika 1922, wakati watu wapatao 10,000 walipokusanyika katika Cedar Point, Ohio, Marekani, wajumbe walichochewa na kitia-moyo hiki cha msemaji: “Hii ndiyo siku ya siku zote. Tazameni Mfalme atawala! Nyinyi ni mawakili wake wa utangazaji. Kwa hiyo mtangazeni, mtangazeni, mtangazeni, Mfalme na ufalme wake.” Mikusanyiko hiyo mikubwa sikuzote imekazia kazi ya kuhubiri. Kwa kielelezo, kwenye mkusanyiko wa kimataifa katika New York City katika 1953, tangazo lilifanywa juu ya kuanzishwa kwa programu ya mazoezi ya nyumba kwa nyumba katika makutaniko yote. Kuanzishwa kwayo kulikuwa na matokeo mazuri sana juu ya kuhubiriwa kwa Ufalme katika mabara mengi.
Kufundishwa na Mungu ili Kufundisha
21. Sisi twataka kukubali pendeleo jipi, bila kukosa kusudi lalo?
21 Kwa hakika, Yehova ana programu nzuri ajabu ya ufundishaji duniani leo! Wote wanaoitumia kwa manufaa yao waweza kufundishwa na Mungu, ndiyo, waweza kuwa miongoni mwa wale ambao ‘wamepewa ulimi wa hao wafundishwao.’ Ni pendeleo lililoje, kuwa katika shule ya Mungu, kwa kusema kitamathali! Hata hivyo, tunapokubali pendeleo hilo, ni lazima tusikose kusudi lalo. Yehova alimfundisha Yesu ili aweze kufundisha wengine, na Yesu aliwafundisha wanafunzi wake ili wao waweze kufanya kazi ileile aliyokuwa akifanya lakini kwa kadiri iliyo kubwa hata zaidi. Vivyo hivyo, sisi tunazoezwa katika programu tukufu ya ufundishaji ya Yehova kwa kusudi la kufundisha wengine.—Yohana 6:45; 14:12; 2 Wakorintho 5:20, 21; 6:1; 2 Timotheo 2:2.
22. (a) Musa na Yeremia walikuwa na tatizo jipi, lakini hilo lilisuluhishwaje? (b) Twaweza kuwa na uhakikishio upi kwamba Mungu atahakikisha kwamba kuhubiriwa kwa Ufalme kunatimizwa?
22 Je, wewe husema kama alivyosema Musa, “Mimi si msemaji,” au kama alivyosema Yeremia, “Siwezi kusema”? Yehova atakusaidia kama alivyowasaidia hao. “Nitakuwa pamoja na kinywa chako,” yeye akamwambia Musa. Na alimwambia Yeremia hivi: “Usiogope . . . mimi nipo pamoja nawe.” (Kutoka 4:10-12; Yeremia 1:6-8) Viongozi wa kidini walipotaka kuwanyamazisha wanafunzi wake, Yesu alisema hivi: “Wakinyamaza hawa, mawe yatapiga kelele.” (Luka 19:40) Lakini mawe hayakuhitaji kupiga kelele wakati huo, nayo hayahitaji kufanya hivyo sasa kwa sababu Yehova anatumia ulimi wa watu wake wenye kufundishwa ili kuupeleka ujumbe wake wa Ufalme.
Je, Waweza Kujibu?
◻ Ni uhusiano upi bora kabisa kati ya Mwalimu na mwanafunzi unaokaziwa katika Isaya sura ya 50?
◻ Yehova ameendelezaje programu ya ufundishaji yenye kuenea?
◻ Ni yapi baadhi ya mambo yanayokaziwa katika programu ya ufundishaji ya Yehova?
◻ Kwa nini ni pendeleo tukufu kushiriki katika programu ya ufundishaji ya Yehova?
[Picha katika ukurasa wa16]
Maelezo ya watoto ya kuhisiwa moyoni mara nyingi hutia moyo wale wenye umri mkubwa zaidi