Maisha Bora Yameahidiwa
JE, UNGEPENDA kuwa huru na matatizo yafanyayo maisha kuwa magumu? Je, unataka kuishi katika ulimwengu ambapo maisha ni yenye kupendeza kama yalivyo katika mandhari inayoonyeshwa katika jalada la mbele na la nyuma ya gazeti hili? Tazama picha hiyo vizuri. Watu wana chakula kingi. Watafurahia sana chakula kile kizuri. Kila mtu ni mwenye furaha. Watu wa jamii tofauti-tofauti wanakaa kwa amani. Hata wanyama ni wenye amani! Hakuna anayepigana. Hakuna maskini. Hakuna aliye mgonjwa. Kuna mazingira yenye kupendeza, miti maridadi, na maji safi kabisa. Hali nzuri kama nini!
Je, dunia hii itakuwa hivyo wakati wowote? Ndiyo, itakuwa paradiso. (Luka 23:43, New World Translation) Mungu, aliyeiumba dunia, amekusudia kwamba binadamu watafurahia maisha bora katika dunia iliyo paradiso. Nawe waweza kuwapo!
Ungependelea Maisha Gani?
Paradiso ya kidunia ya wakati ujao itakuwaje tofauti na ulimwengu tunamoishi sasa? Kwa sasa, zaidi ya watu bilioni moja hupatwa na njaa kila siku. Lakini katika Paradiso ambayo Mungu ameahidi kwa dunia, kila mtu atakuwa na chakula kingi. Biblia huahidi hivi: “BWANA wa majeshi atawafanyia mataifa yote karamu ya . . . vinono vilivyojaa mafuta, karamu ya divai iliyokaa juu ya urojorojo wake.” (Isaya 25:6) Hakutakuwa na upungufu wa chakula, kwa kuwa Biblia husema: “Na uwepo wingi wa nafaka katika ardhi juu ya milima.”—Zaburi 72:16.
Leo, wengi huishi katika vibanda na mitaa ya hali ya chini, au hujikakamua kulipa kodi ya nyumba. Wengine hawana makao na hulala mitaani. Kulingana na Shirika la Afya Ulimwenguni, watoto wapatao milioni 100 kati ya watoto wote ulimwenguni hawana makao. Lakini katika Paradiso ijayo, kila mtu atakuwa na nyumba yake mwenyewe. Neno la Mungu husema: “Watajenga nyumba, na kukaa ndani yake; watapanda mizabibu, na kula matunda yake.”—Isaya 65:21.
Wengi hufanya kazi ngumu wasizopenda. Mara nyingi wao hufanya kazi ngumu kwa saa nyingi lakini hupata mshahara kidogo. Karibu mtu 1 kwa kila watu 5 ulimwenguni huishi kwa mshahara wa chini ya dola 500 kila mwaka. Walakini, katika Paradiso ijayo, watu watafurahia kazi yao nao wataona matokeo mazuri kutokana nayo. Mungu aahidi hivi: “Wateule wangu wataifurahia kazi ya mikono yao muda wa siku nyingi. Hawatajitaabisha kwa kazi bure.”—Isaya 65:22, 23.
Sasa magonjwa na maradhi yako kila mahali. Wengi ni vipofu. Wengine ni viziwi. Wengine hawawezi kutembea. Lakini katika Paradiso, watu hawatashikwa na magonjwa. Yehova asema hivi: “Hapana mwenyeji atakayesema, Mimi mgonjwa.” (Isaya 33:24) Kwa habari ya wale ambao tayari ni viwete, ahadi yenye kuchangamsha moyo ni kwamba: “Ndipo macho ya vipofu yatafumbuliwa, na masikio ya viziwi yatazibuliwa. Ndipo mtu aliye kilema ataruka-ruka kama kulungu, na ulimi wake aliye bubu utaimba.”—Isaya 35:5, 6.
Wakati huu wa sasa, kuna mateseko na uchungu, maombolezo na kifo. Lakini katika Paradiso itakayokuwa duniani, mambo hayo yote hayatakuwapo. Ndiyo, hata kifo kitakuwa kimekwisha! Biblia husema: “Mungu mwenyewe atakuwa pamoja nao. Naye atafuta kila chozi katika macho yao, wala mauti haitakuwapo tena; wala maombolezo, wala kilio, wala maumivu hayatakuwapo tena; kwa kuwa mambo ya kwanza yamekwisha kupita.”—Ufunuo 21:3, 4.
Kwa wazi, basi, Paradiso ya kidunia iliyoahidiwa na Yehova itamaanisha maisha bora kwa wanadamu. Lakini twawezaje kuwa na hakika kwamba itakuja? Itakuja lini, na jinsi gani? Ni lazima ufanye nini ili uwepo?