Maisha Bora—Karibuni!

WAZIA mtabiri wa hali ya hewa ambaye karibu kila wakati matabiri yake ni sahihi. Akitabiri habari ya jioni kwamba itanyesha siku ifuatayo, husitasiti kuchukua mwavuli wako uondokapo nyumbani asubuhi ifuatayo. Rekodi yake ya wakati uliopita imekufanya umwamini. Unatenda kulingana na asemayo.

Sasa, ahadi ya Yehova ya maisha bora katika dunia iliyo paradiso ni yenye kutegemeka kadiri gani? Rekodi yake ya wakati uliopita inaonyesha nini? Utimizo wa unabii mbalimbali wa Biblia kwa wazi huthibitisha rekodi ya Yehova. Yeye ni Mungu wa usahihi na ukweli usioshindwa. (Yoshua 23:14; Isaya 55:11) Ahadi za Yehova Mungu ni zenye kutegemeka sana hivi kwamba nyakati nyingine yeye asema kwa hakika juu ya matukio ya wakati ujao yaliyoahidiwa kana kwamba tayari yametendeka. Kwa kielelezo, kufuatia ahadi yake ya ulimwengu mpya ambapo mauti na maombolezo hazitakuwapo tena, twasoma: “[Baraka zilizoahidiwa] [zi]mekuwa.” Kwa maneno mengine, “Hizo ni hakika!”—Ufunuo 21:5, 6, NW, kielezi chini.

Ndiyo, kutimizwa kwa ahadi za Yehova za wakati uliopita hutupa uhakika katika kutimizwa kwa ahadi yake ya maisha bora kwa wanadamu. Lakini haya maisha bora yatakuja lini?

Maisha Bora—Lini?

Maisha bora zaidi yatakuja karibuni! Twaweza kuwa na uhakika wa jambo hilo kwa sababu Biblia husema kwamba mambo mengi mabaya yangetokea duniani kabla tu Paradiso haijaleta maisha bora. Mambo hayo mabaya yanatendeka sasa.

Kwa kielelezo, Yesu Kristo alitabiri kwamba kungekuwa na vita vikubwa. Alisema: “Taifa litaondoka kupigana na taifa, na ufalme kupigana na ufalme.” (Mathayo 24:7) Unabii huu umetimizwa. Wakati wa miaka ya 1914 hadi 1945, kulikuwa na vita vya ulimwengu viwili, navyo vimefuatwa na vita vinginevyo vingi ambavyo katika hivyo mataifa yamepigana. “Kwa wastani wa kila mwaka, idadi ya waliokufa vitani katika kipindi hiki [tangu Vita ya Ulimwengu ya 2] imekuwa zaidi ya mara mbili ya vifo katika karne ya 19 na mara saba zaidi kuliko katika karne ya 18.”—World Military and Social Expenditures 1993.

Kuenea kwa magonjwa ni uthibitisho mwingine wa kukaribia kwa maisha bora katika Paradiso. Yesu alitabiri kwamba kungekuwa na “tauni mahali mahali.” (Luka 21:11) Je, unabii huu umetimia? Ndiyo. Baada ya vita ya ulimwengu ya kwanza, homa ya Kihispania iliua zaidi ya watu milioni 20. Tangu wakati huo, kansa, ugonjwa wa moyo, malaria, UKIMWI, na maradhi mengine yameua mamilioni ya watu. Katika nchi zinazositawi, magonjwa yanayotokana na maji machafu (kutia ndani kuhara na maambukizo ya mnyoo wa tumboni) yanamaliza maisha ya mamilioni ya watu kila mwaka.

Pia Yesu alisema: “Kutakuwa na njaa.” (Mathayo 24:7) Kama ionyeshwavyo katika makala inayotangulia, maskini wa ulimwenguni hawana chakula cha kutosha. Hii ni sehemu nyingine ya uthibitisho wa kwamba maisha bora zaidi katika Paradiso yatakuja karibuni.

“Kutakuwa na matetemeko makubwa ya nchi,” Yesu akasema. (Luka 21:11) Jambo hilo pia limetimia katika wakati wetu. Tangu 1914 matetemeko ya dunia yenye kuangamiza yamemaliza maisha za mamia ya maelfu ya watu.

Biblia yazidi kusema kwamba “siku za mwisho” zingejulikana kwa kubadilika kwa watu. Wangekuwa “wenye kujipenda wenyewe” na “wenye kupenda fedha,” na watoto wangekuwa “wasiotii wazazi.” Watu kwa ujumla wangekuwa “wapendao anasa kuliko kumpenda Mungu.” (2 Timotheo 3:1-5) Je, hukubali kwamba wengi wanalingana na ufafanuzi huu?

Watu wengi zaidi na zaidi wafanyapo kwa kawaida mambo mabaya, kunakuwa na ongezeko la uvunjaji wa sheria. Jambo hilo pia lilitabiriwa. Kulingana na Mathayo 24:12, Yesu alizungumza juu ya ‘kuongezeka kwa maasi.’ Yamkini utakubali kwamba uhalifu ni mbaya zaidi sasa kuliko ulivyokuwa miaka kadhaa iliyopita. Watu kila mahali wanahofu kwamba wataibiwa, watadanganywa, au kudhuriwa kwa njia fulani.

Vita, magonjwa yenye kuenea sana, upungufu wa chakula, matetemeko ya dunia, uhalifu unaoongezeka, na kuharibika kwa uhusiano wa kibinadamu—yote hayo ni dhahiri leo, kama vile Biblia ilivyotabiri. ‘Lakini je, mambo hayo si yametokea katika historia yote ya kibinadamu?’ huenda ukauliza. ‘Ni nini lililo tofauti kuhusu siku yetu?’

Kuna mambo fulani ya maana sana kuhusu yanayotendeka leo. Biblia haisemi kwamba jambo lolote moja tu, kama vile upungufu wa chakula, peke yalo lingekuwa uthibitisho wa kwamba tumo katika wakati wa mwisho na kwamba maisha bora yako karibu. Unabii mbalimbali wa Biblia kuhusu wakati wa mwisho ungetimizwa juu ya kizazi kisichokuwa na Mungu.—Mathayo 24:34-39; Luka 17:26, 27.

Zaidi ya hayo, ni jambo lisilo la kawaida kabisa kwamba mambo fulani ya unabii wa Yesu—hasa yale yanayohusu upungufu wa chakula na magonjwa yenye kuenea sana—yanatimizwa leo. Kwa sababu gani? Kwa sababu matimizo ya kisayansi hayajawa makubwa kama yalivyo sasa. Ujuzi wa kitiba na namna namna za kutibu hazijawa kamwe zenye maendeleo zaidi au zenye kuenea kotekote kama zilivyo sasa. Ni Mungu pekee angeweza kutabiri katika Neno lake, Biblia, kwamba wakati kama huu, magonjwa na njaa kuu zingeongezeka, wala si kupunguka.

Kwa kuwa unabii wote wa Biblia kuhusu wakati wa mwisho, au “siku za mwisho,” unatimia, twaweza kufikia mkataa gani? Kwamba maisha bora yako karibu! Lakini yatakuja kuwapo jinsi gani?

Maisha Bora—Jinsi Gani?

Je, unafikiri wanadamu wanaweza kuleta Paradiso? Katika historia yote kufikia siku ya leo, kumekuwako aina nyingi za serikali za kibinadamu. Nyingine zimejaribu sana kutosheleza mahitaji ya watu. Hata hivyo, matatizo mengi yanazidi kuwa mabaya. Katika nchi zilizo tajiri na zilizo maskini vilevile, serikali mbalimbali hushindana na matumizi mabaya ya madawa, ukosefu wa nyumba, umaskini, uhalifu, ukosefu wa kazi ya kuajiriwa, na vita.

Hata kama serikali zingeweza kutatua baadhi ya matatizo hayo, hazingeweza kamwe kuandaa uhuru kamili kutokana na afya mbaya; wala hazingeweza kukomesha uzee na kifo. Kwa wazi, binadamu hawataweza kamwe kuleta Paradiso katika dunia hii.

Kwa hekima Biblia husema: “Msiwatumainie wakuu, wala binadamu ambaye hakuna wokovu kwake.” Basi, tunapaswa kuweka tumaini letu katika nani? Biblia hujibu: “Heri ambaye Mungu wa Yakobo ni msaada wake, na tumaini lake ni kwa BWANA, Mungu wake.” (Zaburi 146:3, 5) Tukiweka tumaini letu katika Yehova Mungu, hatutakata tamaa.

Kwa kweli Yule mwenye hekima na uwezo wa kuumba dunia, jua, na nyota anaweza pia kufanya dunia kuwa paradiso. Yeye anaweza kufanya binadamu wafurahie maisha bora. Jambo lolote Yehova Mungu anapanga kufanya, anaweza naye atalitimiza. Neno lake husema: “Hakuna neno lisilowezekana kwa Mungu.” (Luka 1:37) Lakini Mungu ataletaje maisha bora?

Yehova ataletea wanadamu maisha bora zaidi kupitia Ufalme wake. Na Ufalme wa Mungu ni nini? Ni serikali halisi iliyo na Mtawala, Yesu Kristo, aliyewekwa rasmi na Mungu. Makao ya Ufalme wa Mungu yako mbinguni, lakini karibuni utaleta baraka za ajabu na maisha bora zaidi kwa wenyeji wa dunia iliyo Paradiso.—Isaya 9:6, 7.

Huenda tayari unajua sala ya kigezo ya Yesu, ipatikanayo katika Biblia kwenye Mathayo 6:9-13. Sehemu ya sala hiyo kwa Mungu inasema: “Ufalme wako uje, mapenzi yako yatimizwe, hapa duniani kama huko mbinguni.” Kupatana na sala hiyo, Ufalme wa Mungu ‘utakuja’ kutimiza kusudi la Yehova Mungu kwa dunia. Na ni kusudi lake kwamba dunia iwe paradiso.

Swali moja la mwisho lazuka: Unapaswa kufanya nini ili ufurahie maisha bora katika Paradiso ijayo?

Unachohitaji Kufanya

Kwa upendo Yehova Mungu hutoa taraja la maisha bora katika Paradiso kwa wote wafanyao mapenzi yake. Biblia hutuambia hivi: “Wenye haki watairithi nchi, nao watakaa humo milele.” (Zaburi 37:29) Lakini ni nini hufanya mtu awe mwadilifu machoni pa Mungu?

Ili kumpendeza Yehova tunahitaji kujifunza zaidi kuhusu kile anachotaka tufanye. Tukijipatia ujuzi juu ya Mungu na kuutumia katika maisha zetu, tunaweza kuishi milele. Katika sala kwa Mungu, Yesu alisema: “Na uzima wa milele ndio huu, Wakujue wewe, Mungu wa pekee wa kweli, na Yesu Kristo uliyemtuma.”—Yohana 17:3.

Kitabu kituelezacho juu ya Yehova Mungu na Yesu Kristo ni Neno la Mungu, Biblia. Ni mojapo ya zawadi zenye thamani zaidi kutoka kwa Yehova. Biblia ni kama barua kutoka kwa baba mwenye upendo kwa watoto wake. Hutuambia kuhusu ahadi ya Mungu ya kuleta maisha bora kwa wanadamu na hutuonyesha jinsi tuwezavyo kuyapata. Biblia hutujulisha yale ambayo Mungu amefanya wakati uliopita na yale atakayofanya wakati ujao. Pia hutupa shauri lenye kutumika la jinsi ya kushughulikia matatizo yetu kwa mafanikio. Kwa kweli, Neno la Mungu hutufundisha jinsi ya kupata kiasi fulani cha furaha hata katika ulimwengu huu wenye matatizo.—2 Timotheo 3:16, 17.

Kwa furaha Mashahidi wa Yehova watakufanyia mpango wa funzo la Biblia nyumbani bila malipo. Jifunze jinsi uwezavyo kupata maisha yenye furaha zaidi sasa, ukiwa na taraja la maisha bora katika wakati ujao ulio karibu.

[Picha katika ukurasa wa5]

Unabii mbalimbali wa Biblia huonyesha kwamba maisha bora yako karibu

[Picha katika ukurasa wa7]

Ufalme wa Mungu utaleta maisha bora kwa wanadamu