“Mheshimu Yehova kwa Vitu Vyako Vyenye Thamani” —Jinsi Gani?

“MHESHIMU Yehova kwa vitu vyako vyenye thamani, na kwa matunda ya kwanza ya mazao yako yote.” Maneno hayo ya hekima yaliyopuliziwa, ambayo yaliandikwa yapata miaka 2,600 iliyopita, yana ufunguo wa kujionea baraka za Yehova kwa wingi, kwa kuwa mwandikaji aendelea kutaja hivi: “Ndipo ghala zako zitakapojazwa kwa wingi, na mashinikizo yako yatafurika divai mpya.”—Mithali 3:9, 10, linganisha NW.

Lakini yamaanisha nini kumheshimu Mungu? Vitu vyenye thamani tunavyopaswa kumheshimu Yehova kwavyo ni vipi? Nasi twaweza kufanyaje hivyo?

“Mheshimu Yehova”

Katika Maandiko, neno kuu la Kiebrania limaanishalo heshima, ka·vohdhʹ, kihalisi humaanisha “uzito.” Kwa hiyo kumheshimu mtu humaanisha kumwona kuwa mwenye uzito, mwenye kuvutia, au mwenye thamani. Neno jingine la Kiebrania limaanishalo heshima, yeqarʹ, pia linatafsiriwa kuwa “-enye thamani” na “vitu vyenye thamani.” Vivyo hivyo, neno la Kigiriki ti·meʹ, lenye kutafsiriwa “heshima” katika Biblia, hutoa wazo la uthamini, ubora, thamani. Kwa hiyo mtu humheshimu mwingine kwa kumwonyesha staha na uthamini wenye kina.

Kuna upande mwingine pia wa kutoa heshima. Fikiria simulizi kuhusu Myahudi mwaminifu Mordekai, ambaye pindi moja alifichua njama dhidi ya uhai wa Mfalme Ahasuero wa Uajemi ya kale. Baadaye, mfalme alipopata kujua kwamba hakuna lolote lililokuwa limefanywa ili kumheshimu Mordekai kwa tendo hilo, alimwuliza waziri mkuu wake, Hamani, njia bora ya kumheshimu mtu ambaye mfalme alimwonea upendezi. Hamani alifikiri kwamba heshima hiyo ingekuwa yake, lakini alikosea kama nini! Haidhuru, Hamani alisema kwamba mtu huyo avikwe “mavazi ya kifalme” na apande “farasi ambaye mfalme humpanda mwenyewe.” Alimalizia hivi: “Na kumrakibisha juu ya farasi kuipitia njia kuu ya mjini, na kupiga mbiu mbele yake, kusema, Hivyo ndivyo atakavyofanyiziwa mtu yule ambaye mfalme apenda kumheshimu.” (Esta 6:1-9) Katika hali hiyo, kumtolea mtu heshima kulitia ndani kumkweza hadharani ili kwamba angeweza kuthaminiwa sana na watu wote.

Vivyo hivyo, kuna pande mbili za kumtolea Yehova heshima: kumwonyesha staha kubwa kibinafsi na kumkweza hadharani kwa kushiriki katika kazi ya kutangaza hadharani jina lake, na kuitegemeza kazi hiyo.

“Vitu Vyako Vyenye Thamani”—Ni Nini?

Bila shaka vitu vyetu vyenye thamani hutia ndani uhai wetu, wakati wetu, stadi zetu, na nguvu zetu. Namna gani mali zetu za kimwili? Fikiria maneno ya Yesu alipomwona mjane mwenye uhitaji akitumbukiza sarafu mbili ndogo zenye thamani ndogo katika sanduku la hazina la hekalu. Alisema hivi: “Mjane huyu, ijapokuwa ni maskini, alitumbukiza nyingi kuliko wao wote. Kwa maana wote hawa [wachangaji wengine] walizitumbukiza ndani zawadi kutokana na ziada yao, lakini mwanamke huyu kutokana na uhitaji wake alitumbukiza ndani njia yote ya kujipatia riziki aliyokuwa nayo.” (Luka 21:1-4) Yesu alimsifu mjane huyo kwa kutumia mali zake za kimwili kuendeleza ibada ya Yehova.

Basi, kwa wazi vitu vyenye thamani vilivyotajwa na Solomoni vyatia ndani pia mali zozote za kimwili ambazo huenda tukawa nazo. Na usemi “matunda ya kwanza ya mazao yako yote” una wazo la kumtolea Yehova vitu vyetu vyenye thamani vilivyo bora.

Ingawa hivyo, kutoa vitu vya kimwili kwawezaje kumheshimu Yehova? Je, vitu vyote si vyake tayari? (Zaburi 50:10; 95:3-5) “Vitu vyote vyatoka kwako,” akakiri Mfalme Daudi katika sala ya dhati kwa Yehova. Na kwa habari ya upaji mkubwa ambao yeye na watu wake walitoa kwa ajili ya ujenzi wa hekalu, Daudi alisema hivi: “Katika vitu vyako mwenyewe tumekutolea.” (1 Mambo ya Nyakati 29:14) Kwa hiyo tumtoleapo Yehova zawadi, tunalofanya ni kumrudishia tu vitu ambavyo yeye, kutokana na wema wa moyo wake, ametupatia. (1 Wakorintho 4:7) Lakini kama ilivyotajwa mapema zaidi, kumheshimu Yehova hutia ndani kumkweza machoni pa wengine. Na zawadi za kimwili zinazotumiwa ili kusongeza mbele ibada ya kweli humheshimu Mungu. Biblia ina vielelezo bora kabisa vya njia hiyo ya kumheshimu Yehova.

Vielelezo vya Wakati Uliopita

Yapata miaka 3,500 iliyopita, wakati ulipofika ili Yehova aandae tabenakulo nyikani likiwa mahali pa ibada pa Waisraeli, uhitaji ulizuka wa vitu mbalimbali vyenye thamani vilivyotakikana kulingana na plani iliyotolewa na Mungu. Yehova alimwamuru Musa aache ‘mtu awaye yote aliye na moyo wa kupenda, ayalete matoleo kwa Yehova.’ (Kutoka 35:5) Simulizi laendelea kusema hivi: “Wakaja kila mtu ambaye moyo wake ulimhimiza, na kila mtu ambaye roho yake ilimfanya kuwa apenda, nao wakaleta sadaka za kumpa BWANA, kwa kazi ya hema ya kukutania, na kwa utumishi wake, na kwa hayo mavazi matakatifu.” (Kutoka 35:21) Kwa hakika, matoleo yao ya hiari yalithibitika kuwa mengi sana zaidi ya ilivyohitajiwa kwa ajili ya kazi hivi kwamba ilibidi watu ‘wazuiwe wasilete tena’!—Kutoka 36:5, 6.

Fikiria kielelezo kingine. Tabenakulo lilipomaliza kutumikia kusudi lake na maandalizi yalikuwa yakiendelea kwa ajili ya ujenzi wa hekalu, Daudi alitoa mchango mkubwa wa kibinafsi kwa ajili ya hekalu ambalo mwana wake Solomoni angejenga. Pia alitolea wengine mwito wa kushiriki, nao watu waliitikia kwa zawadi za vitu vyenye thamani kwa Yehova. Fedha na dhahabu pekee zingekuwa na thamani ya dola za Marekani bilioni 50 kwa viwango vya sasa. “Watu wakafurahi, kwa sababu wametoa kwa hiari yao wenyewe.”—1 Mambo ya Nyakati 29:3-9; 2 Mambo ya Nyakati 5:1.

‘Matoleo ya Hiari’ Katika Siku Yetu

Twaweza kushirikije shangwe ya kutoa matoleo ya hiari katika siku yetu? Kazi ya maana zaidi inayoendelea ulimwenguni wakati huu ni ile ya kuhubiri Ufalme na kufanya wanafunzi. (Mathayo 24:14; 28:19, 20; Matendo 1:8) Na Yehova ameona yafaa awaaminishe Mashahidi wake masilahi ya kidunia ya huo Ufalme.—Isaya 43:10.

Ni dhahiri kwamba fedha zinahitajika ili kugharimia kazi ambayo Mashahidi wa Yehova wanafanya leo. Kujenga na kudumisha Majumba ya Ufalme, Majumba ya Kusanyiko, ofisi za tawi, viwanda, na makao ya Betheli huhusisha fedha. Kuchapisha na kugawanya Biblia na vichapo vitegemeavyo Biblia katika lugha mbalimbali pia huhusisha gharama. Gharama hizo za tengenezo hulipiwaje? Kupitia michango iliyo ya hiari kabisa!

Michango iliyo mingi zaidi hutoka kwa watu mmoja-mmoja ambao—kama mjane aliyeangaliwa na Yesu—wana fedha za kiasi tu. Kwa kuwa hawataki kukosa fursa nzuri katika upande huo wa kumheshimu Yehova, wao huchanga kiasi cha kadiri “kulingana na uwezo wao halisi,” na, nyakati nyingi, hata “kupita uwezo wao halisi.”—2 Wakorintho 8:3, 4.

“Acheni kila mmoja afanye kama vile ameazimia moyoni mwake, si kwa kinyongo au kwa shurutisho, kwa maana Mungu hupenda mpaji mchangamfu,” mtume Paulo akawaambia Wakristo katika Korintho. (2 Wakorintho 9:7) Upaji mchangamfu hutaka mpango mzuri. Paulo aliwaambia Wakorintho hivi: “Kila siku ya kwanza ya juma acheni kila mmoja wenu kwenye nyumba yake mwenyewe aweke kando kitu fulani katika akiba kama aelekeavyo kuwa anafanikiwa, ili niwasilipo michango isitukie wakati huo.” (1 Wakorintho 16:2) Vivyo hivyo, katika njia ya faragha na ya hiari, wanaotaka kutoa upaji ili kuendeleza kazi ya Ufalme leo waweza kuweka kando kiasi fulani cha mapato yao kwa kusudi hilo.

Yehova Hubariki Wamheshimuo

Ingawa ufanisi wa kimwili wenyewe hauongozi kwenye ufanisi wa kiroho, kutumia vitu vyetu vyenye thamani kwa ukarimu—wakati wetu, nguvu zetu, na mali zetu za kimwili—ili kumheshimu Yehova huleta baraka nyingi. Iko hivyo kwa sababu Mungu, ambaye kila kitu ni chake, hutuhakikishia hivi: “Nafsi ya mtu mkarimu itawandishwa; anyweshaye atanyweshwa mwenyewe.”—Mithali 11:25.

Kufuatia kifo cha Mfalme Daudi, mwana wake Solomoni alitumia michango ya hiari ambayo baba yake alikuwa amekusanya ili kujenga hekalu lenye utukufu, kama Yehova alivyokuwa ameelekeza. Maadamu Solomoni alidumu akiwa mwaminifu katika ibada yake kwa Mungu, “Yuda na Israeli wakakaa salama . . . tokea Dani mpaka Beer-sheba, siku zote za Sulemani.” (1 Wafalme 4:25) Nyumba za kuwekea akiba zilijazwa, mapipa makubwa ya divai yalifurika—maadamu Israeli ‘walimheshimu Yehova kwa vitu vyao vyenye thamani.’

Baadaye, kupitia nabii Malaki, Yehova alisema hivi: “Mkanijaribu kwa njia hiyo, asema BWANA wa majeshi; mjue kama sitawafungulia madirisha ya mbinguni, na kuwamwagieni baraka, hata isiwepo nafasi ya kutosha, au la.” (Malaki 3:10) Ufanisi wa kiroho ambao watumishi wa Yehova huonea shangwe leo ni uthibitisho wa kwamba Mungu ametimiza ahadi yake.

Bila shaka Yehova anapendezwa tufanyapo sehemu yetu katika kusongeza mbele masilahi ya Ufalme. (Waebrania 13:15, 16) Naye huahidi kututegemeza ‘tukifuliza kutafuta kwanza ufalme na uadilifu wake.’ (Mathayo 6:33) Tukiwa na shangwe kubwa ya moyoni, na ‘tumheshimu Yehova kwa vitu vyetu vyenye thamani.’

[Sanduku katika ukurasa wa 28]

Njia Ambazo Watu Fulani Huchagua Kutoa Michango kwa Kazi ya Ulimwenguni Pote

Wengi huweka kando, au hupangia, kiasi cha fedha ambazo wao hutia katika masanduku ya michango yaliyo na kibandiko hiki: “Michango kwa Kazi ya Ulimwenguni Pote ya Sosaiti—Mathayo 24:14.” Kila mwezi makutaniko hupeleka kiasi hicho ama kwenye makao makuu ya ulimwengu katika Brooklyn, New York, ama kwenye ofisi ya tawi ya mahali hapo.

Upaji wa hiari wa fedha waweza kupelekwa pia moja kwa moja kwenye Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, au kwenye ofisi ya tawi ya Sosaiti inayotumikia nchi yako. Vito au mali nyingine zenye thamani zaweza kutolewa pia. Barua fupi inayotaarifu kwamba hiyo ni zawadi ya moja kwa moja yapaswa iambatane na michango hiyo.

Mpango wa Upaji Wenye Masharti

Fedha zaweza kupewa Watch Tower Society kuwa amana hadi kifo cha mpaji, kukiwa na uandalizi wa kwamba kukiwa na uhitaji wa kibinafsi, zitarudishwa kwa mpaji. Kwa habari zaidi, tafadhali wasiliana na Treasurer’s Office kwenye anwani iliyoonyeshwa juu.

Utoaji Uliofanyiwa Mpango

Kuongezea zawadi za fedha za moja kwa moja na upaji wa fedha wenye masharti, kuna njia nyinginezo za kutoa ili kufaidi utumishi wa Ufalme wa ulimwenguni pote. Hizo zatia ndani:

Bima: Watch Tower Society yaweza kutajwa kuwa mfaidikaji wa sera ya bima ya maisha au katika mpango wa kustaafu kazi/malipo ya uzeeni. Sosaiti yapasa kujulishwa juu ya mpango wowote kama huo.

Akiba za Benki: Akiba za benki, hati za amana, au akiba za fedha za kustaafu za mtu mmoja-mmoja zaweza kuwekwa zikiwa amana kwa ajili ya au kuweza kulipwa wakati wa kifo kwa Watch Tower Society, kulingana na matakwa ya benki ya hapo. Sosaiti yapasa kujulishwa juu ya mpango wowote kama huo.

Hisa na Dhamana: Hisa na dhamana zaweza kupewa Watch Tower Society ama zikiwa zawadi ya moja kwa moja ama zikiwa chini ya mpango ambao mapato yaendelea kulipwa kwa mpaji.

Mashamba na Nyumba: Mashamba na nyumba ziwezazo kuuzwa zaweza kupewa Watch Tower Society ama kwa kutoa zawadi ya moja kwa moja ama kwa kuweka shamba au nyumba ya maisha kwa ajili ya mpaji, ambaye aweza kuendelea kuishi humo muda wa maisha yake. Mtu apaswa kuarifu Sosaiti kabla ya kuipa Sosaiti hati yoyote ya mashamba na nyumba.

Wasia na Amana: Watch Tower Society yaweza kurithishwa mali au fedha kwa njia ya wasia wenye kutekelezwa kisheria, au Sosaiti yaweza kutajwa kuwa mfaidikaji wa mkataba wa amana. Amana inayofaidi tengenezo la kidini yaweza kuandaa faida fulani za kodi. Nakala ya wasia au mkataba wa amana yapasa kupelekwa kwa Sosaiti.

Kama vile mtajo “utoaji uliofanyiwa mpango” udokezavyo, upaji wa aina hii hutaka mpaji afanye mipango fulani hasa. Ili kuwasaidia watu mmoja-mmoja wanaotamani kunufaisha Sosaiti kupitia aina fulani ya utoaji uliofanyiwa mpango, broshua yenye kichwa Planned Giving to Benefit Kingdom Service Worldwide imetayarishwa. Hiyo Broshua iliandikwa kufuatia maswali mengi ambayo Sosaiti imepokea kuhusu zawadi, wasia, na amana. Pia ina habari za ziada yenye mafaa juu ya mipango ya mashamba, ya kifedha, na kodi, nayo imekusudiwa kuwasaidia watu mmoja-mmoja walio Marekani wanaotamani kunufaisha masilahi ya Ufalme ulimwenguni pote kuteua njia zenye matokeo na zenye kufaa zaidi za kufanya hivyo kwa kufikiria hali za familia na za kibinafsi. Kwa kusoma hiyo broshua na kushauriana na wale wanaofanya kazi na Planned Giving Desk, watu wengi wameweza kuisaidia Sosaiti na wakati uleule kupata faida kubwa zaidi ya manufaa ya kodi ya kufanya hivyo. Hiyo broshua inapatikana kwa kuiomba, iwe ni kwa kuandika au kupiga simu.

Wenye kupendezwa na wowote wa mipango hii ya utoaji uliofanyiwa mpango wawasiliane na Planned Giving Desk, Watch Tower Bible and Tract Society of Pennsylvania, 100 Watchtower Drive, Patterson, New York 12563-9204, simu: (914) 878-7000, au wawasiliane na ofisi ya Sosaiti inayotumikia nchi yao.