Kila Mtu Hutaka Kuwa Huru

“Mwanadamu alizaliwa akiwa huru, lakini kila mahali yeye ni mtumwa,” mwanafalsafa Mfaransa, Jean-Jacques Rousseau, akaandika mwaka wa 1762. Kuzaliwa ukiwa huru. Ni wazo lenye kupendeza kama nini! Lakini kama vile Rousseau alivyoandika, mamilioni ya watu katika historia yote hawajawahi kamwe kuwa huru. Badala yake, wameishi maisha yao “wakiwa watumwa,” wamefungwa katika mfumo ambao umewanyima kabisa furaha ya kudumu na uradhi maishani.

MAMILIONI ya watu leo bado hutambua kwamba ‘mtu anayo mamlaka juu ya mwenziwe kwa hasara yake.’ (Mhubiri 8:9) Wanapofuatilia mamlaka, wanaume na wanawake wanaotaka makuu huendelea kuonyesha majuto kidogo au kutoonyesha majuto yoyote kuhusu kukandamiza uhuru wa wengine. “Vikundi vyenye ghasia vyaua watu 21,” ripoti moja ya kawaida yasema. Nyingine yasema juu ya “uchinjaji,” huku majeshi ya usalama ‘yakiua wanawake, watoto na wazee wasioweza kukinza au kujitetea, wakikata koo, wakiwapiga risasi kichwani raia wafungwa, na kufuata sera ya kuharibu kabisa riziki ya vijiji na kutupa makombora kiholela.’

Si ajabu kwamba watu hutamani sana na, kwa kweli, hupigana ili wawe huru na ukandamizaji! Ingawa hivyo, ukweli wenye kuhuzunisha ni kwamba, kupigania uhuru wa mwanadamu mmoja mara nyingi huhusisha kukandamiza haki na uhuru wa mwingine. Wanaume, wanawake, na watoto wasio na hatia wasioweza kuepuka kuuawa huangamia mapigano yanapokuwa yakiendelea, vifo vyao “vikihalalishwa” kwa kutangaza kuwa sababu ya kupigana inastahili na ni ya haki. Kwa mfano, mwaka uliopita huko Ireland, bomu la garini lililotegwa na “wapigania-uhuru” katika mji mdogo wa Omagh, liliua watazamaji 29 wasio na hatia na kujeruhi mamia ya wengine.

Wangali “Watumwa”

Kupigana kunapomalizika, ni manufaa zipi zinazopatikana? “Wapigania-uhuru” wanaposhinda mapigano yao, huenda wakapata uhuru wa kadiri fulani. Lakini je, kwa kweli wao ni huru? Je, si kweli kwamba hata katika jamii nyingi zilizo huru kabisa katika ule uitwao eti ulimwengu huru, watu wangali “watumwa” wa mabwana-wakubwa kama vile umaskini, kutokamilika, ugonjwa, na kifo? Mtu yeyote anawezaje kusema kwamba yuko huru kikweli maadamu mambo hayo yanaendelea kumfanya mtumwa?

Musa, mwandikaji wa Biblia wa kale, alifafanua maisha kwa usahihi kama vile ambavyo yamekuwa kwa watu wengi katika historia yote na vile ambavyo yangali yako leo. Huenda tukaishi kwa miaka 70 au 80, akasema, “lakini yote ni shida na taabu!” (Zaburi 90:10, Biblia Habari Njema) Je, hali hiyo itabadilika wakati wowote? Je, itawezekana kwetu sote kuishi maisha yenye kuridhisha kabisa wakati wowote, bila maumivu na hofu kuu ambayo imewapata watu wengi leo?

Biblia hujibu ndiyo! Hiyo husema juu ya “uhuru wenye utukufu wa watoto wa Mungu.” (Waroma 8:21) Acheni tuchunguze kwa makini uhuru huo, uliozungumziwa katika karne ya kwanza na mtume Paulo katika barua aliyoandikia Wakristo wa Roma. Katika barua hiyo Paulo aeleza waziwazi jinsi kila mmoja wetu anavyoweza kupata “uhuru wenye utukufu,” ambao ni wa kweli na wenye kudumu.

[Picha katika ukurasa wa 3]

From the book Beacon Lights of History, Vol. XIII