Yohana Mbatizaji Alikuwa Nani?

Yohana Mbatizaji alikuwa nabii wa Mungu. (Luka 1:76) Alizaliwa muda mfupi tu kabla ya mwisho wa karne ya kwanza K.W.K. na aliishi katika karne ya kwanza W.K. Mungu alimtuma ili atayarishe njia kwa ajili ya Masihi, au Kristo. Yohana alifungua njia kwa kuwahubiria Wayahudi wengine ujumbe unaotoka kwa Mungu ili kurudisha mioyo yao kwa Mungu.—Marko 1:1-4; Luka 1:13, 16, 17.

Ujumbe wa Yohana ungewasaidia wasikilizaji wanyoofu kumtambua Masihi aliyeahidiwa ambaye ni Yesu wa Nazareti. (Mathayo 11:10) Yohana aliwasihi wasikilizaji wake watubu dhambi zao na kubatizwa ili kuonyesha kwamba wametubu. (Luka 3:3-6) Kwa sababu aliwabatiza watu wengi, Yohana anaitwa Mbatizaji. Ubatizo muhimu zaidi ambao alifanya ni ule wa Yesu.a—Marko 1:9.

Katika makala hii

• Kwa nini Yohana Mbatizaji alikuwa mtu wa pekee?

• Wazazi wa Yohana Mbatizaji walikuwa nani?

• Ni nani aliyesababisha kifo cha Yohana Mbatizaji?

• Je, Yohana Mbatizaji na Yesu walikuwa washindani?

• Kuna wanaume wangapi walioitwa Yohana katika Biblia?

Jukumu lake lilitabiriwa mapema: Kupitia kazi yake ya kuhubiri, Yohana alitimiza unabii kumhusu mjumbe wa Yehova. (Malaki 3:1; Mathayo 3:1-3) Alithibitisha kwamba yeye ndiye yule ambaye angekuja “kumwandalia Yehova watu waliotayarishwa”—yaani, alitayarisha njia ili Wayahudi wengine wakubali ujumbe wa mwakilishi mkuu wa Yehova, Yesu Kristo.—Luka 1:17.

Alichotimiza: Yesu alisema kwamba “hajatokea mtu mkuu kuliko Yohana Mbatizaji, lakini mtu mdogo zaidi katika Ufalme wa mbinguni ni mkuu kuliko yeye.” (Mathayo 11:11) Kwa sababu Yohana hakuwa tu nabii bali alikuwa “mjumbe” aliyetabiriwa, hakuna mtumishi wa Mungu aliyekuja kabla yake aliyekuwa mkuu zaidi yake. Maneno ya Yesu yalionyesha pia kwamba Yohana hatakuwa sehemu ya Ufalme wa mbinguni.b Nabii huyu mwaminifu alikufa kabla Yesu hajafungua njia ya kuingia mbinguni. (Waebrania 10:19, 20) Hata hivyo, Yohana atakuwa raia wa Ufalme wa Mungu duniani, akiwa na tumaini la kuishi milele katika Paradiso.—Zaburi 37:29; Luka 23:43.

Wazazi wa Yohana walikuwa Zekaria na Elisabeti. Zekaria alikuwa kuhani Myahudi. Yohana alizaliwa kimuujiza kwa sababu mama yake alikuwa tasa, yaani, hakuwa na uwezo wa kuzaa watoto. Mbali na hilo, wazazi wake “walikuwa wamezeeka.”—Luka 1:5-7, 13.

Mfalme Herode Antipa alimkata Yohana kichwa. Alifanya hivyo kwa sababu alichochewa na mke wake, Herodia. Herodia alimchukia Yohana kwa sababu Yohana alikuwa amemwambia Herode, ambaye alidai kuwa Myahudi kwamba ndoa ya Herode na Herodia ilikuwa kinyume na sheria ya Wayahudi.—Mathayo 14:1-12; Marko 6:16-19.

Wazo la kwamba walikuwa washindani halipatikani popote katika Biblia. (Yohana 3:25-30) Na hata Yohana alisema kwamba jukumu lake ni kutayarisha njia kwa ajili ya Masihi na si kushindana naye. Yohana alisema: “Nilikuja kubatiza katika maji ili afunuliwe kwa Israeli.” Kisha akaongezea hivi: “Huyo ndiye Mwana wa Mungu.” (Yohana 1:26-34) Basi, Yohana alifurahi sana kusikia huduma aliyofanya Yesu ikisonga mbele.