Adhimisheni Ukumbusho Inavyostahili

ILIKUWA jioni ya Nisani 14, 33 W.K., kwamba Yesu alianzisha Ukumbusho.a Alikuwa amemaliza tu kuadhimisha Sikukuu ya Kupitwa pamoja na mitume wake 12, kwa hiyo twaweza kuwa na uhakika kuhusu hiyo tarehe. Baada ya kumwondosha yule msaliti, Yuda, Yesu “alichukua mkate, akasema baraka, akaumega, akawapa, na kusema: ‘Chukueni, huu wamaanisha mwili wangu.’ Na akichukua kikombe, akashukuru akawapa hicho, nao wote wakanywa kutoka hicho. Naye akawaambia: ‘Hii yamaanisha “damu yangu ya agano,” ambayo hakika itamwagwa kwa ajili ya wengi.’”—Marko 14:22-24, NW.

Yesu aliamrisha wanafunzi wake waadhimishe kifo chake kwa sababu ya umaana wacho. (Luka 22:19; 1 Wakorintho 11:23-26) Ni dhabihu yake tu ambayo ingeweza kukomboa jamii ya kibinadamu kutokana na laana ya dhambi na kifo vilivyorithiwa. (Warumi 5:12; 6:23) Mkate na divai aliyotumia ilikuwa mifano ya mwili wake mkamilifu na damu yake. Tukijua tarehe ambayo Yesu alianzisha ukumbusho, twaweza kuadhimisha pindi hiyo katika siku inayolingana na hiyo kila mwaka, kama tu ilivyofanywa na Sikukuu ya Kupitwa ya Kiyahudi. Lakini ni lazima tufanye inavyostahili. Kwa nini?

Mtume Paulo alisema kwamba wale wenye kushiriki mifano ya mikate na divai wangekuwa ‘wakitangaza mauti ya Bwana hata ajapo.’ (1 Wakorintho 11:26) Hivyo jambo la kukaziwa fikira la sikukuu hiyo lingekuwa kifo cha Yesu na umaana wacho kwa wanadamu. Pindi hiyo ingekuwa ya maana, wakati wa kutafakari wema wa Mungu na uthamini tupaswao kuwa nao kwa Yehova na Mwana wake. (Warumi 5:8; Tito 2:14; 1 Yohana 4:9, 10) Kwa hiyo, Paulo alionya hivi: “Basi kila aulaye mkate huo, au kukinywea kikombe hicho cha Bwana isivyostahili, atakuwa amejipatia hatia ya mwili na damu ya Bwana.”—1 Wakorintho 11:27.

Inavyostahili—Jinsi Gani?

Kwa wazi, Mungu hangefurahishwa ikiwa tungekosa staha ifaayo kwa pindi hiyo kwa kujihusisha katika mazoea yenye kutilika shaka au kuingiza desturi za kipagani. (Yakobo 1:27; 4:3, 4) Hilo lingeondosha matukio yapendwayo sana ya wakati wa Ista. Kufuatia agizo la Yesu la ‘kufuliza kufanya hili katika ukumbuko wake,’ tungetaka kuadhimisha Ukumbusho sawa tu na vile alivyouanzisha. (Luka 22:19, NW; 1 Wakorintho 11:24, 25) Hilo lingeondosha yale mapambo ambayo yameongezwa kwa sikukuu hiyo na makanisa ya Jumuiya ya Wakristo. New Catholic Encyclopedia yakubali kwamba “Misa za leo zatofautiana sana na sherehe sahili sana iliyofuatwa na Kristo na Mitume Wake.” Na kwa kuadhimisha Misa mara nyingi, hata kila siku, Jumuiya ya Wakristo imeenda kando kutoka kile Yesu alikusudia na imeufanya kuwa tukio la kawaida.

Paulo aliandikia Wakristo Wakorintho kuhusu kushiriki isivyostahili kwa sababu tatizo lilikuwa limezuka kutanikoni kuhusu Mlo wa Jioni wa Bwana. Wengine hawakustahi utakatifu wa huo mlo. Walileta chakula chao cha jioni na kukila kabla ya au baada ya mkutano. Mara nyingi walikula na kunywa kupindukia. Hili liliwafanya wasinzie na kuwa na hisi nzito. Kwa kutokuwa chonjo kiakili na kiroho, hawangeweza ‘kuupambanua ule mwili’ na hivyo wakawa ‘wamejipatia hatia ya mwili na damu ya Bwana.’ Wakati huohuo, wale ambao hawakuwa wamekula chakula cha jioni walikuwa na njaa na pia wakakengeushwa. Yaelekea hakuna yeyote kati yao alikuwa katika hali ya kushiriki mifano kwa uthamini na utambuzi kamili wa umaana wa pindi hiyo—kwamba sherehe hiyo ilikuwa ya kukumbuka kifo cha Bwana. Hili lilitokeza hukumu dhidi yao, kwa kuwa walikuwa wakionyesha ukosefu wa staha, hata kuidharau.—1 Wakorintho 11:27-34.

Ufahamu Wahitajiwa

Wengine wameshiriki mifano ya Ukumbusho ingawa, baadaye, wamegundua kwamba hawakupaswa kufanya hivyo. Wale ambao wanashiriki kihalali mifano ya Ukumbusho wamechaguliwa na Mungu na wana ushuhuda wa roho ya Mungu kuhusiana na hilo. (Warumi 8:15-17; 2 Wakorintho 1:21, 22) Si uamuzi au azimio lao la kibinafsi linalowafanya wastahili. Mungu ameweka idadi ya wale watakaotawala na Kristo mbinguni kuwa 144,000, idadi ndogo kwa kulinganishwa na wale wanaonufaika na fidia ya Kristo. (Ufunuo 14:1, 3) Uteuzi ulianza katika siku ya Yesu, na basi leo kuna washiriki wachache tu. Na kadiri kifo kiwapatavyo baadhi yao, idadi hiyo yapasa kupungua.

Mtu aweza kushirikije mifano kimakosa? Huenda ikawa kwa sababu ya maoni ya kidini ya wakati uliopita—kwamba waaminifu wote huenda mbinguni. Au huenda ikawa kwa sababu ya kujitakia makuu au ubinafsi—hisia ya kwamba mtu anastahili zaidi kuliko wengine—na tamaa ya umashuhuri. Labda ni tokeo la hisia-moyo zenye nguvu zinazozuka kutokana na matatizo makali au msiba ambao wamfanya mtu apoteze upendezi katika uhai duniani. Huenda pia ikawa ni kwa sababu ya urafiki wa karibu na mtu ambaye ana mwito wa kimbingu. Sote twapaswa kukumbuka kwamba uamuzi ni wa Mungu pekee, si wetu. (Warumi 9:16) Kwa hiyo ikiwa mtu, “baada ya uchunguzi,” apata kwamba kwa kweli hakupaswa kushiriki mifano, yeye apaswa kuacha sasa.—1 Wakorintho 11:28, NW.

Tumaini ambalo Mungu ametolea wanadamu wengi ni lile la uhai wa milele kwenye dunia iliyo paradiso. Hiyo ni baraka kubwa ya kutazamia, na ambayo tunaweza kuvutiwa nayo kwa urahisi. (Mwanzo 1:28; Zaburi 37:9, 11) Ni duniani ambapo waaminifu wataunganishwa na wapendwa wao waliofufuliwa na kukutana na waadilifu wa zamani, kama vile Abrahamu, Sara, Musa, Rahabu, Daudi, na Yohana Mbatizaji—wote ambao walikufa kabla ya Yesu kufungua njia ya uhai wa kimbingu.—Mathayo 11:11; linganisha 1 Wakorintho 15:20-23.

Wale wenye matumaini ya kidunia huadhimisha Mlo wa Jioni wa Bwana inavyostahili kwa kuhudhuria na kukaza fikira zao kwa njia ya staha, hata ingawa hawashiriki kula mkate na kunywa divai. Wao pia hunufaika na dhabihu ya Kristo, ambayo huwawezesha kuwa na msimamo wenye upendeleo mbele za Mungu. (Ufunuo 7:14, 15) Wanaposikiliza hotuba inayotolewa, uthamini wao kwa mambo matakatifu unaimarishwa, na tamaa yao ya kubaki katika muungano na watu wa Mungu kila mahali inaongezeka.

Mwaka huu, baada ya mshuko-jua Jumanne, Aprili 2, Ukumbusho utaadhimishwa katika makutaniko yote ya Mashahidi wa Yehova yaliyo zaidi ya 78,000 duniani kote. Je, utahudhuria?

[Maelezo ya Chini]

[Picha katika ukurasa wa 8]

Mashahidi wa Yehova huadhimisha Ukumbusho mara moja kila mwaka