Sura ya Ishirini na Moja

Kusudi la Yehova Lafanikiwa

1, 2. (a) Yehova anakusudia malaika na wanadamu wote wafanye nini? (b) Ni nani waliokuwa sehemu ya familia yenye umoja ya waabudu wa Mungu?

KWA upendo, Yehova anakusudia malaika na wanadamu wote wamwabudu kwa umoja akiwa Mungu wa pekee wa kweli, na wafurahie uhuru mtukufu wakiwa watoto wake. Watu wote wanaopenda uadilifu wanatamani sana kufanya hivyo.

² Yehova alianza kutimiza kusudi hilo lenye kuvutia wakati wa uumbaji. Kwanza alimuumba Mwana ambaye tangu alipofufuliwa amekuwa “mrudisho wa utukufu [wa Mungu] na mwakilisho sawasawa wa utu wake mwenyewe.” (Waebrania 1:1-3) Mwana huyo alikuwa wa pekee sana kwa sababu aliumbwa na Mungu peke yake. Baadaye, viumbe wengine wote waliumbwa kupitia Mwana huyo: kwanza, malaika waliumbwa mbinguni, kisha wanadamu duniani. (Ayubu 38:7; Luka 3:38) Wote walikuwa sehemu ya familia moja ya ulimwenguni pote. Yehova alikuwa Mungu wao, Mwenye Enzi Kuu ya Ulimwengu, na Baba yao mwenye upendo.

 3. (a) Sote tumerithi nini kutoka kwa wazazi wetu wa kwanza? (b) Kwa upendo, Yehova alifanya mpango gani kwa ajili ya wazao wa Adamu?

³ Wazazi wetu wa kwanza walipohukumiwa kifo kwa sababu ya kutenda dhambi kimakusudi, walifukuzwa kutoka Edeni na kukataliwa na Mungu. Hawakuwa tena sehemu ya familia ya Mungu ya ulimwenguni pote. (Mwanzo 3:22-24; Kumbukumbu la Torati 32:4, 5) Sote ni wazao wao, kwa hiyo tumezaliwa tukiwa na mielekeo ya dhambi. Lakini Yehova alijua kwamba baadhi ya wazao wa Adamu na Hawa wangependa uadilifu. Kwa hiyo kwa upendo alifanya mpango ambao ungewasaidia kuwa na “uhuru wenye utukufu wa watoto wa Mungu.”—Waroma 8:20, 21.

Waisraeli Wakataliwa na Mungu

 4. Yehova aliwapa Waisraeli wa kale pendeleo gani?

⁴ Miaka 2,500 hivi baada ya Adamu kuumbwa, Yehova aliwapatia wanadamu fulani pendeleo la kuwa na uhusiano wa pekee pamoja naye. Aliwachagua Waisraeli wa kale kuwa watu wake, Naye aliwapa Sheria yake. (Mwanzo 12:1, 2) Aliwafanya kuwa taifa na akawatumia kutimiza kusudi lake. (Kumbukumbu la Torati 14:1, 2; Isaya 43:1) Hata hivyo, bado walikuwa watumwa wa dhambi na kifo, kwa hiyo hawakuwa na uhuru mtukufu ambao Adamu na Hawa walikuwa nao hapo mwanzoni.

 5. Waisraeli walipotezaje uhusiano wao wa pekee pamoja na Mungu?

⁵ Isitoshe, Waisraeli walikuwa na uhusiano mzuri na Mungu. Walikuwa pia na daraka la kumheshimu Baba yao Yehova, na kufanya kazi kupatana na kusudi lake. Yesu alikazia umuhimu wa kutimiza daraka hilo. (Mathayo 5:43-48) Hata hivyo, taifa la Israeli lilishindwa kutimiza daraka hilo. Ingawa Wayahudi walidai kwamba ‘wana Baba mmoja, Mungu,’ Yesu alisema wazi kwamba matendo yao na mwelekeo wao haukupatana na dai hilo. (Yohana 8:41, 44, 47) Mungu aliikomesha Sheria mwaka wa 33 W.K., na uhusiano wa pekee ambao alikuwa nao na Waisraeli ukakoma. Lakini je, hilo lilimaanisha kwamba wanadamu hawawezi kamwe kuwa na uhusiano mzuri pamoja na Mungu?

Kukusanya “Vitu Vilivyomo Katika Mbingu”

 6. Kusudi la “uhudumiaji” unaotajwa na Paulo kwenye Waefeso 1:9, 10 ni nini?

⁶ Mtume Paulo alisema kwamba wanadamu fulani wangeweza kuwa na uhusiano wa pekee pamoja na Mungu. Kwa mfano, Paulo aliandika hivi kuhusu mpango wa Yehova wa kuwakubali wale wenye imani kuwa washiriki wa familia Yake: “[Mungu] alitujulisha siri takatifu ya mapenzi yake. Ni kulingana na upendezi wake mwema alioukusudia katika yeye mwenyewe kwa ajili ya uhudumiaji kwenye kikomo kamili cha nyakati zilizowekwa rasmi, yaani, kukusanya tena pamoja vitu vyote katika Kristo, vitu vilivyomo katika mbingu na vitu vilivyo duniani.” (Waefeso 1:9, 10) “Uhudumiaji” huo unamtegemea Yesu Kristo. Kupitia kwake, wanadamu wanaingizwa katika uhusiano mzuri pamoja na Mungu. Wanadamu wachache wana tumaini la kwenda mbinguni. Wengine wengi wataishi milele duniani.

 7. “Vitu vilivyomo katika mbingu” ni nani?

⁷ Kwanza, tangu Pentekoste ya mwaka wa 33 W.K., “vitu vilivyomo katika mbingu,” yaani, wale ambao wangetawala na Kristo katika Ufalme wa mbinguni walianza kukusanywa. Mungu aliwatangaza kuwa waadilifu kwa msingi wa imani yao katika thamani ya dhabihu ya Yesu. (Waroma 5:1, 2) Baadaye, Wayahudi na wasio Wayahudi walitiwa ndani, na mwishowe idadi ya “vitu vilivyomo katika mbingu” ingekuwa 144,000. (Wagalatia 3:26-29; Ufunuo 14:1) Ni wachache tu walio duniani leo.

Kukusanya “Vitu Vilivyo Duniani”

 8. “Vitu vilivyo duniani” ni nani, nao wana uhusiano gani pamoja na Yehova?

⁸ Uhudumiaji huohuo unakusanya pia “vitu vilivyo duniani.” Mamilioni ya watu wenye tumaini la kuishi milele duniani wanakusanywa leo. Wanalitukuza jina la Yehova na kuikweza ibada yake wakishirikiana na mabaki ya warithi wa Ufalme. (Isaya 2:2, 3; Sefania 3:9) Wao pia wanamwita Yehova “Baba” kwa sababu wanajua yeye ndiye chanzo cha uhai. Nao wana uhusiano mzuri pamoja naye kwa msingi wa imani yao katika damu ya Yesu iliyomwagwa. (Ufunuo 7:9, 14) Lakini kwa kuwa bado hawajakamilika, Mungu atawakubali kabisa wakati ujao kuwa watoto wake watakapokuwa wakamilifu.

 9. Andiko la Waroma 8:21 linawaahidi nini wanadamu?

⁹ Watu hao wenye tumaini la kuishi duniani wanasubiri kwa hamu wakati ambapo wanadamu wote ‘watawekwa huru kutoka katika utumwa wa uharibifu.’ (Waroma 8:21) Wataanza kuwekwa huru baada ya Kristo na majeshi yake ya mbinguni kukomesha dhiki kubwa wakati wa Har–Magedoni. Ulimwengu wote mwovu wa Shetani utaharibiwa wakati huo, halafu Utawala wa Kristo wa Miaka Elfu Moja utaleta baraka.—Ufunuo 19:17-21; 20:6.

10. Watumishi wa Yehova wataimba wimbo gani wa sifa?

¹⁰ Itafurahisha sana wakati watumishi wote wa Yehova walio duniani pamoja na wale walio mbinguni watakapomsifu hivi kwa shangwe: “Ni kubwa na za ajabu sana kazi zako, Yehova Mungu, Mweza-Yote. Ni za uadilifu na za kweli njia zako, Mfalme wa umilele. Ni nani ambaye kwa kweli hatakuhofu wewe, Yehova, na kulitukuza jina lako, kwa sababu wewe peke yako ni mwaminifu-mshikamanifu? Kwa maana mataifa yote yatakuja na kuabudu mbele yako, kwa sababu maagizo yako ya uadilifu yamefanywa kuwa dhahiri.” (Ufunuo 15:3, 4) Naam, watumishi wote wa Yehova watamwabudu kwa umoja akiwa Mungu wa pekee wa kweli. Hata wafu watafufuliwa na kupewa nafasi ya kujiunga na wengine kumsifu Yehova.—Matendo 24:15.

Uhuru Mzuri Ajabu Utakaokuwapo Wakati Ujao

11. Waokokaji wa dhiki kubwa watafurahia uhuru gani wa ajabu?

¹¹ Dhiki kubwa iishapo wakati wa Har–Magedoni, uovu utakuwa umekomeshwa duniani, na Shetani Ibilisi hatakuwa tena “mungu wa huu mfumo wa mambo.” Waabudu wa Yehova hawatapambana tena na uvutano mwovu wa Shetani. (2 Wakorintho 4:4; Ufunuo 20:1, 2) Dini isiyo ya kweli haitamletea Yehova suto tena wala kuwagawanya wanadamu. Watumishi wa Mungu wa kweli hawatadhulumiwa wala kuteswa tena na mamlaka za wanadamu. Watafurahia uhuru mzuri ajabu!

12. Wanadamu wote watawekwaje huru kutoka katika dhambi na madhara yake?

¹² Yesu, yule “Mwana-Kondoo wa Mungu ambaye huondolea mbali dhambi ya ulimwengu,” atafuta dhambi zote za wanadamu akitumia thamani ya dhabihu yake. (Yohana 1:29) Yesu alipokuwa duniani, aliwaponya watu kwa kuwasamehe dhambi zao. (Mathayo 9:1-7; 15:30, 31) Vivyo hivyo, Kristo Yesu, akiwa Mfalme wa Ufalme wa Mungu huko mbinguni, atawaponya kimuujiza vipofu, mabubu, viziwi, walemavu, wenye ugonjwa wa akili, na wale wenye magonjwa mengine yoyote. (Ufunuo 21:3, 4) “Sheria ya dhambi” ambayo watu wote watiifu wanayo itafutiliwa mbali hivi kwamba mawazo na matendo yao yatakuwa yenye kupendeza kwao wenyewe na kwa Mungu. (Waroma 7:21-23) Mwishoni mwa Miaka Elfu Moja, wanadamu watakuwa wakamilifu, katika ‘sura na mfano’ wa Mungu wa pekee wa kweli.—Mwanzo 1:26.

13. Kristo atafanya nini mwishoni mwa Utawala wa Miaka Elfu Moja, na matokeo yatakuwa nini?

¹³ Baada ya Kristo kuwasaidia wanadamu wote kuwa wakamilifu, atamrudishia Baba yake mamlaka aliyokabidhiwa ili kutimiza kazi hiyo: ‘Atamkabidhi ufalme Mungu wake aliye Baba, wakati akiwa amefanya serikali yote na mamlaka yote na nguvu kuwa si kitu. Kwa maana ni lazima yeye atawale akiwa mfalme mpaka Mungu awe ameweka maadui wote chini ya miguu yake.’ (1 Wakorintho 15:24, 25) Utawala wa Ufalme wa Miaka Elfu Moja utakuwa umetimiza kusudi lake kwa ukamili; basi hakutakuwa na uhitaji tena wa serikali hiyo saidizi kuwapatanisha watu pamoja na Yehova. Jukumu la Yesu akiwa Mkombozi litakoma kwa kuwa wanadamu watakuwa wamekombolewa, dhambi na kifo vitakuwa vimekomeshwa kabisa. Biblia yaeleza hivi: “Ndipo Mwana mwenyewe atakapojitiisha pia kwa Yule aliyetiisha vitu vyote kwake, ili Mungu apate kuwa vitu vyote kwa kila mtu.”—1 Wakorintho 15:28.

14. Wanadamu wote wakamilifu watapatwa nini, na kwa nini?

¹⁴ Kisha, wanadamu hao wakamilifu watapewa nafasi ya kuonyesha kwamba wameamua kumtumikia Mungu wa pekee wa kweli milele. Kwa hiyo, kabla ya kuwakubali kabisa kuwa watoto wake, Yehova atawaacha wanadamu hao wakamilifu wapate jaribu la mwisho. Shetani na mashetani wake watafunguliwa kutoka katika abiso. Wale wanaompenda Yehova kwelikweli hawatapata madhara ya kudumu. Lakini watu wasio waaminifu ambao watashawishiwa wamwasi Yehova wataangamizwa milele, pamoja na yule mwasi wa awali na mashetani wake.—Ufunuo 20:7-10.

15. Malaika na wanadamu wote watakuwa katika hali gani tena?

¹⁵ Kisha Yehova atawakubali wanadamu wote wakamilifu ambao waliunga mkono haki yake ya kutawala wakati wa jaribu la mwisho, kuwa watoto wake. Ndipo watakapofurahia kikamili uhuru mtukufu wa watoto wa Mungu wakiwa washiriki wa familia ya Mungu ya ulimwenguni pote. Malaika na wanadamu wote watamwabudu tena kwa umoja akiwa Mungu wa pekee wa kweli. Kusudi la Yehova litakuwa limefanikiwa! Je, ungependa kuwa mshiriki wa familia hiyo ya ulimwenguni pote yenye furaha na itakayoishi milele? Basi tunakutia moyo utii maneno ya Biblia kwenye 1 Yohana 2:17: “Ulimwengu unapitilia mbali na ndivyo na tamaa yao, lakini yeye ambaye hufanya mapenzi ya Mungu hudumu milele.”

Mazungumzo ya Kurudia

• Kabla ya uasi katika Edeni, waabudu wote wa Yehova walikuwa na uhusiano gani pamoja naye?

• Watumishi wa Mungu wana daraka gani?

• Ni nani watakaokuwa watoto wa Mungu wakati ujao, na hilo linahusianaje na kusudi la Yehova kuhusu ibada yenye umoja?

[Picha katika ukurasa wa 190]

Wanadamu watiifu watafurahia maisha katika paradiso ya duniani pote