Yehova Astahili Sifa ya Milele
“Kila siku nitakuhimidi, nitalisifu jina lako milele na milele.”—ZABURI 145:2.
DAUDI mtumishi mwaminifu-mshikamanifu wa Yehova alikuwa na sababu nyingi za kumsifu Mungu. Mfalme huyo ajulikanaye sana wa Israeli ya kale alijua juu ya ukubwa na wema wa Yehova na kung’amua kwamba umaliki Wake ulikuwa wa milele. Aliye Juu Zaidi alistahili sifa kwa kuridhisha tamaa ya kila kiumbe hai na kwa kuwanyooshea rehema watumishi wake waaminifu.
2 Daudi alitolea Mungu sifa hiyo katika Zaburi ya 145. Kila mstari wa zaburi hii ya kiakrosti huanza kwa herufi za alfabeti ya Kiebrania zenye kufuatana kwa mpangilio mzuri, ingawa herufi moja (nun) iliachwa nje. Huo mpango wa kiakrosti huenda ukawa ulitumika kuwa msaada wa kumbukumbu. Zaburi 145 humhimidi Yehova, kama vile katika maneno haya: “Kila siku nitakuhimidi [nitakubariki, NW], nitalisifu jina lako milele na milele.” (Zaburi 145:2) Lakini zaburi hii yaweza kutuathirije sisi? Yaweza kuufanyia nini uhusiano wetu na Mungu? Ili tujue, acheni kwanza tufikirie mistari 1 hadi 10.
Ukubwa wa Yehova Hautafutiki
3 Daudi alikuwa mfalme, lakini alikiri enzi kuu ya Yehova juu yake, akisema: “Ee Mungu wangu, Mfalme, nitakutukuza, nitalihimidi jina lako milele na milele.” (Zaburi 145:1) Wakiwa na kicho kama hicho, Mashahidi wa Yehova huliinua jina la Mungu na kumsifu duniani pote. Maisha yetu hutajirishwa tushirikipo katika utendaji huo. Kama Daudi, sisi tunawiwa na Yehova utii na unyenyekeo akiwa ‘Mungu wetu Mfalme.’ Na mbona isiwe hivyo? Yeye ndiye “Mfalme wa umilele.” (Ufunuo 15:3, NW) Zaidi ya hilo, Daudi Mkubwa Zaidi, Yesu Kristo, ambaye amekuwa akitawala akiwa kwenye Mlima Sayuni wa kimbingu tangu 1914, hutuandalia kielelezo bora kabisa cha unyenyekeo kwa Yehova, yule Mfalme wa Milele.
4 Daudi alisema kwamba yeye ‘angebariki jina la Mungu.’ Hilo lawezekanaje kwa binadamu wa kikawaida tu? Miongoni mwa mambo mengine, kubariki mtu humaanisha kusema vema juu yake. Kubariki jina la Mungu kwaonyesha kwamba sisi tuna upendo imara kwa ajili yake na jina lake takatifu, Yehova. Hatulalamiki kamwe juu ya Mungu, hatutafuti kamwe makosa kwake, hatutii shaka kamwe juu ya wema wake. Iwapo tuna maoni hayo, tumejiweka wakfu kwa Yehova, na twadumisha ukamilifu tukiwa Mashahidi wake waliobatizwa, hapo tu ndipo twaweza kusema pamoja na Daudi kwamba ‘tutabariki jina la Mungu milele.’ Tukijidumisha katika upendo wa Mungu, tutaipokea zawadi ya uhai wa milele na hivyo tuweze kumbariki Yehova milele.—Yuda 20, 21.
5 Ikiwa sisi twampenda kikweli Mpaji-Uhai wetu, tutasema hivi pamoja na Daudi: “Kila siku nitakuhimidi [nitakubariki mchana kutwa, NW], nitalisifu jina lako milele na milele.” (Zaburi 145:2, NW) Siku ingekuwa yenye ukame ulioje kama sisi hatungembariki Mungu! Na tusiwe kamwe wenye shughuli sana wala wenye kuhangaikia sana vitu vya kimwili hivi kwamba twashindwa kusema vema juu ya Baba yetu wa kimbingu au kusali kwake kila siku. Yesu alidokeza kwamba twapaswa kusali kila siku aliposema hivi katika ile sala ya kiolezo: “Tupe mkate wetu wa siku kulingana na takwa la siku.” (Luka 11:3, NW) Wengi walio katika utumishi wa wakati wote humsifu Mungu kila siku wajitiapo katika huduma ya Kikristo. Lakini hata hali zetu ziwe nini, moyo wetu wapaswa kutusukuma kumsifu Mungu kwa njia fulani kila siku. Na ebu fikiri! Sisi tulio Mashahidi waliojiweka wakfu wa Yehova wenye tumaini la uhai wa milele, tuna tazamio tukufu la kusifu jina lake milele.—Yohana 17:3.
6 Kwa uhakika tuna sababu ya kumsifu Mungu mchana kutwa, kwa maana Daudi aliongezea hivi: “BWANA [Yehova, NW] ndiye mkuu mwenye kusifiwa sana, wala ukuu wake hautambulikani [hautafutiki, NW].” (Zaburi 145:3) Yehova ni mkubwa sana hivi kwamba hana kifani, na enzi kuu yake ni kamili kabisa. Nebukadreza Mfalme Mbabuloni alilazimika kukiri hivi: “Hapana awezaye kuuzuia mkono wake [Mungu], wala kumwuliza, Unafanya nini wewe?” (Danieli 4:34, 35) Yehova ni “wa kuhofiwa kuliko miungu yote.” (Zaburi 96:4) Si ajabu kwamba apasa “kusifiwa sana.” Kwani, hakuna maneno ya sifa yanayopita kiasi katika kumtukuza Yehova! Yeye astahili sifa yetu ya milele, isiyo na mipaka.
7 “Ukuu wake [Yehova] hautambulikani.” Bila kujali ana ukubwa gani wa kimwili, ukubwa wake ni kwa sababu ya aina ya Mungu aliyo. Ndiyo, vitu ambavyo ameumba ni vya ajabu mno kwa kadiri tusiyoweza kuelewa, na sisi wenyewe ‘tumeumbwa kwa jinsi ya ajabu.’ (Zaburi 139:14; Ayubu 9:10; 37:5) Zaidi ya hilo, Yehova Mungu hujiendesha vizuri kama nini! Yeye hutimiza ahadi zake kwa uaminifu na huyafunua kwa upendo makusu-di yake. Hata hivyo, sisi hatutapata kamwe kujua kila jambo juu ya Mungu. Muda wote wa umilele, tutaweza kukua katika maarifa juu yake, uumbaji wake, na makusudi yake.—Warumi 11:33-36.
Sifu Kazi za Yehova
8 Mengi sana yaweza kusemwa kwa kumsifu Mungu wetu aliye na ukubwa usiotafutika hivi kwamba Daudi alisukumwa na moyo kusema hivi: “Kizazi kwa kizazi kitayasifu matendo yako, kitayatangaza matendo yako makuu.” (Zaburi 145:4) Vizazi vyenye kufuatana vya ainabinadamu vimesifu kazi za Yehova na kusimulia matendo yake makuu. Ni pendeleo kama nini kusimulia mambo hayo kwa wale ambao sisi huwaongoza katika mafunzo ya nyumbani ya Biblia! Kwa kielelezo, twaweza kuwaambia kwamba Mungu aliumba vitu vyote. (Mwanzo 1:1–2:25; Ufunuo 4:11) Twaweza kusema juu ya matendo yake makuu wakati alipokomboa Waisraeli kutoka utumwa wa Kimisri, akawasaidia kufutilia mbali maadui Wakanaani, akawahifadhi ili wao wote wakiwa taifa zima wasiangamizwe kabisa katika Uajemi ya kale, na mengi zaidi. (Kutoka 13:8-10; Waamuzi 4:15; Esta 9:15-17) Na je! hatusukumwi na mioyo yetu kuambia watoto wetu juu ya kazi na matendo ya Yehova? Tukiwapa wazao wetu maagizo hayo nao watuone tukimtumikia Mungu kwa shangwe, yaelekea watakuwa na maoni ya kwamba ni jambo la kufurahisha kumwabudu yeye na wakue ‘shangwe ya Yehova ikiwa ngome yao.’ (Nehemia 8:10, NW; Zaburi 78:1-4) Mabaki wapakwa-mafuta hujumlika kuwa “kizazi” kimoja chenye shangwe cha Mashahidi wa Yehova ambacho husifu kazi za Mungu kwa “umati mkubwa,” ulio sehemu ya kizazi kitakachokaa katika dunia-Paradiso.—Ufunuo 7:9, NW.
9 Tufikiriapo kazi na matendo makuu ya Yehova, twasadiki hata zaidi kwamba “BWANA [Yehova, NW] hatawaacha watu wake kwa ajili ya jina lake kuu.” (1 Samweli 12:22; Zaburi 94:14) Tukabilipo majaribu, magumu, na mnyanyaso, twaweza kuwa watulivu kabisa na kuwa na uhakika kwamba “amani ya Mungu” italinda mioyo na nguvu zetu za akili. (Wafilipi 4:6, 7, NW) Hivyo basi yafaa kama nini tuwaambie wengine juu ya Baba yetu wa kimbingu mwenye upendo na mwenye ulinzi!
10 Twapaswa kuchukua wakati wa kutafakari adhama na matendo ya Yehova, kwa maana Daudi aliongezea hivi: “Nitaifikiri fahari ya utukufu wa adhama yako, na matendo yako yote ya ajabu.” (Zaburi 145:5) Fahari ya Mungu ni yenye kuvuvia hofu na haina kifani. (Ayubu 37:22; Zaburi 148:13) Hivyo, Daudi aliufanya mng’ao mtukufu wa fahari ya Yehova ukawa hangaikio lake. Pia mtunga zaburi alijihangaisha na ‘matendo ya ajabu’ ya Mungu. Hayo ni kutia na kujizoeza haki ya kimungu katika kuwaharibu watenda dhambi na kuwahifadhi wacha Mungu, kama ilivyokuwa kwenye Gharika. (Mwanzo 7:20-24; 2 Petro 2:9) Kutafakari mambo ya jinsi hiyo huimarisha uhusiano wetu na Yehova na kutuwezesha tuambie wengine juu ya fahari na matendo yake ya ajabu. Wakati wa siku 40 za kuwa jangwani, Yesu alifanywa madhubuti dhidi ya kishawishi kwa kutafakari juu ya mambo ambayo mbingu zilizofunguliwa zilikuwa zimeleta kwenye uangalifu wake. (Mathayo 3:13–4:11) Baada ya hapo Yesu aliambia wengine juu ya fahari na matendo ya ajabu ya Yehova.
11 Tusemapo juu ya fahari na matendo ya Mungu, sisi huchochea wengine waongee juu yayo. Alisema hivi Daudi: “Watu watayataja matendo yako ya kutisha, nami nitausimulia ukuu wako.” (Zaburi 145:6) Rahabu alisema juu ya ogofyo lililoangukia wakaaji wa Yeriko waliposikia jinsi Yehova alivyokuwa amewaokoa Waisraeli kwenye Bahari Nyekundu na kuwafanya washinde wafalme wawili Waamori. Ni lazima kuwe kulitokea maongezi mengi juu ya hayo ‘matendo ya kutisha’ katika Yeriko. (Yoshua 2:9-11) Na kwa uhakika “dhiki kubwa” iliyo karibu itakuwa yenye kutisha. (Mathayo 24:21) Lakini mambo yenye kuwaogofya sana watu waliotengwa mbali na urafiki wa Mungu huvuvia ndani ya mioyo yenye uadilifu “hofu ya Yehova,” kicho kifaacho juu yake. (Mithali 1:7, NW) Wakiwa na roho hiyo ya kicho chenye staha, Mashahidi wa Yehova huongea juu ya madhihirisho ya nguvu za Mungu. Kwani, Mfanya-maajabu huyo mkubwa ndiye habari kubwa ya maongezi kati ya wapakwa-mafuta na waandamani wao wa kidunia! Na hata mnyanyaso hauwazuii kuambia wengine juu ya mambo haya na “ukuu” wa Yehova.—Matendo 4:18-31; 5:29.
Sifu Yehova kwa Wema Wake
12 Mungu astahili sifa si kwa sababu ya ukubwa wake tu bali kwa sababu ya wema na uadilifu wake pia. Hivyo basi Daudi alisema: “Watalihubiri [watafurika, NW] kumbukumbu la wema wako mkuu. Wataiimba haki yako.” (Zaburi 145:7) Wema wa Yehova ni mkubwa sana hivi kwamba sisi ‘twafurika’ misemo ya shangwe kuuhusu. Katika Kiebrania, wazo ni lile la maji yachuruzikayo kutoka kwenye chemchemi. Hivyo basi sisi na tufurike sifa za shukrani kwa Mungu, kama bubujiko la maji. (Mithali 18:4) Israeli walisahau wema wa Yehova, wakapata umizo kubwa la kiroho. (Zaburi 106:13-43) Bali, acheni moyo wetu ufurike shukrani nyingi sana hivi kwamba wengine watubu wakiisha kujifunza jinsi Yehova alivyo mwema kwa Mashahidi wake waliojiweka wakfu.—Warumi 2:4.
13 Madhihirisho ya haki na uadilifu wa kimungu pia na yatusukume kupaaza kilio kwa shangwe. Ikiwa twahisi hivyo, tutatafuta kwanza si Ufalme tu wa Mungu bali pia uadilifu wake. Sikuzote tutataka mwenendo wetu umsifu Yehova. Ndiyo, tutakuwa wapiga mbiu wa kawaida wa Ufalme tukiwa na mengi ya kufanya katika utumishi wa Mungu. Sifa yetu kwa Yehova haitazikwa kamwe katika ziara (kaburi) la unyamavu.—Mathayo 6:33; 1 Wakorintho 15:58; Waebrania 10:23.
Yehova Ni Mwenye Rehema
14 Akitaja sifa zaidi za Mungu ambazo za-stahiki sifa, Daudi alisema: “BWANA [Yehova, NW] ana fadhili, ni mwingi wa huruma, si mwepesi wa hasira, ni mwingi wa rehema [fadhili-upendo, NW].” (Zaburi 145:8) Mungu ni mwenye rehema katika jambo la kwamba ni mwema na mkarimu kabisa. (Mathayo 19:17; Yakobo 1:5) Yeye huwafanyia mema hata wale wasiomtumikia. (Matendo 14:14-17) Pia Yehova ni mwenye rehema, mwenye huruma, ‘akikumbuka ya kuwa sisi tu mavumbi.’ Yeye hadharau moyo uliopondeka wala hashughuliki nasi kulingana na dhambi zetu bali ni mwenye rehema kuliko baba wa kibinadamu aliye mwenye upendo kabisa. (Zaburi 51:17; 103:10-14) Kwani, katika wonyesho ulio mkubwa kupita wote wa rehema, yeye alituma Mwana wake mpendwa atufie ili tuweze kupatanishwa na Mungu na kwa kweli tuonje kiasi cha neema yake!—Warumi 5:6-11.
15 Baba yetu wa kimbingu ni wa polepole kuwa na kasirani. Yeye hafyatushi hasira kali ya kiupofu. Pia Yehova ni mwingi wa “fadhili-upendo.” Hapa Kiebrania chamaanisha fadhili ambayo hutokana na upendo na kujishikamanisha na kitu. Hufanya hivyo mpaka kusudi layo kuhusu kitu hicho litimie. Ufasiri mwingine badala ya huo ni “upendo wenye uaminifu-mshikamanifu.” Miongoni mwa mambo mengine, fadhili-upendo za Mungu, au upendo wenye uaminifu-mshikamanifu, huonyeshwa kwa matendo ya ukombozi, uhifadhi, ulinzi, utulizo wa kuondolewa taabu, na kuponywa madhara ya dhambi kupitia ukombozi. (Zaburi 6:4; 25:7; 31:16, 21; 40:11; 61:7; 119:88, 159; 143:12; Yohana 3:16) Uhakika wa kwamba Yehova hakuleta Har–Magedoni mara tu baada ya ile “vita mbinguni” huwezesha umati wa watu kupata wokovu, huo ukiwa ni wonyesho mkubwa wa fadhili-upendo za kimungu.—Ufunuo 12:7-12; 2 Petro 3:15.
16 Kwa sababu ya rehema ya Mungu, ingeweza kusemwa kwamba yeye ana moyo mkubwa. Daudi alijulisha rasmi hivi: “BWANA [Yehova, NW] ni mwema kwa watu wote, na rehema zake zi juu ya kazi zake zote.” (Zaburi 145:9) Ndiyo, Mungu alikuwa mwema kwa Waisraeli. Kuhusiana na hilo, “yeye huwaangazia jua lake waovu na wema, huwanyeshea mvua wenye haki na wasio haki.” (Mathayo 5:43-45) Katika Edeni, Yehova aliahidi “mbegu” ambayo ingekuwa baraka. Baadaye alimwambia Abrahamu hivi: “Katika uzao wako [mbegu yako, NW] mataifa yote ya dunia watajibarikia.” (Mwanzo 3:15; 22:18) Na wema wa Mungu ni mkubwa sana katika huu “wakati wa mwisho” hivi kwamba mtu yeyote aweza ‘kuja na kutwaa maji ya uzima bure.’ (Danieli 12:4; Ufunuo 22:17) Yehova ana nia ya kuwafanyia mema viumbe wake wote wenye uelewevu, na wema wake wapasa kutuvuta karibu na yeye daima.
17 “Rehema [za Yehova] zi juu ya kazi zake zote” katika jambo la kwamba yeye hufanya uandalizi maridhawa kwa wanadamu na wanyama. Yeye ndiye Mmoja ambaye “kila chenye mwili akipa chakula chake.” (Zaburi 136:25; 147:9) Mungu hawaheshimu matajiri na kuwabeza wadhulumiwa, hawakwezi wenye majivuno na kudharau wanyenyekevu, hawapandishi cheo wapumbavu na kuwashusha cheo wenye hekima. Wanadamu wenye dhambi hufanya hivyo lakini si Baba yetu wa kimbingu mwenye rehema. (Zaburi 102:17; Sefania 3:11, 12; Mhubiri 10:5-7) Nazo rehema, wema, na fadhili-upendo za Mungu ni kubwa kama nini katika kufanya wokovu uwezekane kupitia dhabihu ya ukombozi ya Mwana wake mpendwa!—1 Yohana 4:9, 10.
Waaminifu-Washikamanifu Humbariki Yehova!
18 Mungu astahili sifa kutoka kila upande. Kama Daudi alivyoliweka wazo hilo: “Ee BWANA [Yehova, NW] kazi zako zote zitakushukuru, na wacha Mungu wako watakuhimidi [watakubariki, NW].” (Zaburi 145:10) Kazi za Mungu za uumbaji ‘humhimidi,’ kama vile nyumba iliyojengwa vizuri ilivyo sifa kwa mjenzi wayo na chungu cha kuvutia kilivyo kwa mfinyanzi wacho stadi. (Linganisha Waebrania 3:4; Isaya 29:16; 64:8.) Kazi za Yehova za uumbaji ni za ajabu sana hivi kwamba zimewasukuma malaika na wanadamu kumsifu yeye. Wana wa Mungu wa kimalaika walipaaza sauti kwa kupiga makofi ya shangwe wakati alipoweka msingi wa dunia. (Ayubu 38:4-7) Daudi alisema kwamba “mbingu zauhubiri utukufu wa Mungu, na anga laitangaza kazi ya mikono yake.” (Zaburi 19:1-6) Sisi tungeweza kumsifu Yehova tumwonapo kipanga akiruka juu katika mbingu au kinokera (paa) akienda mbio juu ya kilima chenye majani mabichi. (Ayubu 39:26; Wimbo Ulio Bora 2:17) Sifa inafaa tuvunapo mazao au tupatapo shangwe kwa kula mlo pamoja na marafiki. (Zaburi 72:16; Mithali 15:17) Miili yetu iliyobuniwa vizuri ajabu yaweza pia kuchochea misemo ya sifa yenye shukrani kwa Mungu.—Zaburi 139:14-16.
19 Leo, “wacha Mungu” [“waaminifu-washikamanifu,” NW] walio wapakwa-mafuta wa Mungu duniani humbariki yeye. Wao husema vema juu yake na kuwa na hamu nyingi ya kuona mapenzi yake yakitendwa duniani kama mbinguni. (Mathayo 6:9, 10) Wapakwa-mafuta wawaambiapo wengine juu ya kazi za ajabu za Mungu, ule umati mkubwa huitikia kwa idadi zinazoongezeka daima. Pamoja na waaminifu-washikamanifu walio wapakwa-mafuta, wao hutumikia kwa bidii wakiwa wapiga mbiu wa Ufalme. Je! shukrani zinakusukuma ushiriki kwa ukawaida katika kazi hii kwa sifa ya Mungu?
20 Sisi tulio Mashahidi wa Yehova, tuko kama Daudi katika kumpa Mungu sifa. Kwetu sisi, hangaiko muhimu ni kutakaswa kwa jina takatifu la Yehova na kusifiwa kwalo. Madhali jina la kimungu litatakaswa na Ufalme wa Mungu, fundisho hili la Biblia la Ufalme ni sehemu kubwa ya habari njema tujulishazo rasmi. Je! Zaburi 145 huandaa mwangazio wa nuru ya kiroho katika habari hii? Mazungumzo yetu juu ya salio la zaburi hiyo yatafunua nini? Ni kwa njia gani nyinginezo zaburi hiyo yathibitisha kwamba Yehova astahili sifa ya milele?
Ni Nini Maelezo Yako?
◻ Ni jinsi gani sisi twaweza kubariki jina la Yehova?
◻ Ni nini baadhi ya kazi za Mungu zenye kusifika?
◻ Sisi tutatendaje ikiwa twathamini wema wa Yehova?
◻ Rehema ya Mungu imeonyeshwa kwa njia zipi?
[Maswali ya Funzo]
1. Kwa nini Daudi alikuwa na sababu nyingi za kumsifu Yehova?
2. (a) Zaburi 145 imepangwaje? (b) Tutafikiria maswali gani?
3. Kama Daudi, sisi tunawiwa nini na ‘Mungu wetu Mfalme,’ na kwa nini?
4. Sisi twawezaje ‘kubariki jina la Mungu’?
5. Tamaa ya kumbariki Yehova ‘mchana kutwa’ yapasa kuwa na tokeo gani juu yetu?
6. Kwa nini Yehova ni wa “kusifiwa sana”?
7. Ni kitu gani chathibitisha kwamba “ukuu wake [Mungu] hautambulikani”?
8. (a) “Kizazi kwa kizazi” kimesifuje matendo ya Yehova? (b) Tukifundisha watoto wetu juu ya kazi na matendo ya Yehova, yaelekea watakuwa na maoni gani juu ya kumwabudu? (c) Wakiwa “kizazi” chenye shangwe, mabaki wapakwa-mafuta wamefanya nini?
9. Tufikiriapo kazi na matendo makuu ya Mungu, twaweza kuwa na uhakika juu ya nini?
10. ‘Matendo ya ajabu’ ya Yehova yahusisha nini, nasi twanufaikaje kwa kuyatafakari?
11. (a) Kwa nini ogofyo lilikuwa limewaangukia wakaaji wa Yeriko? (b) Mashahidi wa Yehova huongea juu ya “matendo [ya Mungu] ya kutisha” na juu ya “ukuu” wake wakiwa na roho gani?
12. Wema wa Yehova hutufanyaje ‘tufurike’?
13. Madhihirisho ya haki na uadilifu wa kimungu yapasa kuwa na tokeo gani juu yetu?
14. Kuna uthibitisho gani kwamba ‘Yehova ana fadhili na huruma’?
15. Kwa nini yaweza kusemwa kwamba Yehova Mungu “si mwepesi wa hasira” na “ni mwingi wa rehema [fadhili-upendo, NW]”?
16. Yehova amethibitikaje kuwa “mwema kwa watu wote”?
17. Ni katika maana gani ‘rehema za Yehova zi juu ya kazi zake zote’?
18. (a) Ni jinsi gani kazi za Mungu ‘humhimidi’? (b) Ni lini tupaswapo kusukumwa na moyo tumhimidi Yehova?
19. Ni nani walio ‘waaminifu-washikamanifu,’ nao hufanya nini?
20. (a) Jina la Yehova litatakaswaje? (b) Kuhusu Zaburi 145, ni maswali gani yabaki kufikiriwa?
[Picha katika ukurasa wa 12]
Je! wewe huambia watoto wako juu ya matendo makuu ya Yehova, kama walivyofanya wazazi wacha Mungu katika Israeli ya kale?
[Picha katika ukurasa wa 15]
Kama vile nyumba iliyojengwa vizuri ilivyo sifa kwa mjenzi wayo, ndivyo kazi za Yehova za uumbaji humletea Yeye sifa