Amani Kutoka kwa Mungu Wakati Gani?

“Mungu wa amani atamseta Shetani chini ya miguu yenu upesi.”​—WARUMI 16:20.

 1, 2. (a) Mhindu mwenye hekima nyingi alisema nini juu ya vita na amani? (b) Ni akina nani wenye furaha wanaokuja kufurahia amani kutoka kwa Mungu?

“IKIWA yale mashindano yenye kichaa ya kutengeneza silaha yataendelea, pasipo shaka yatatokeza mauaji ambao hayajapata kutukia katika historia. Kukiwa na taifa lenye ushindi, ushindi huu wenyewe utakuwa kifo kilicho hai kwa taifa lenye kushinda.” Kwa kweli utabiri huo uliofanywa mwaka 1938 na Mohandas Ghandi uliona mambo ya mbele zaidi ya wakati wake.

² Kabla ya hapo, mwaka 1931 Ghandi alikuwa amemwambia hivi mwakilishi wa mfalme wa Uingereza: “Wakati nchi yako na yangu zitakapokubaliana juu ya mafundisho yaliyotolewa na Kristo katika haya Mahubiri ya Mlimani, tutakuwa tumeyatatua matatizo si ya nchi zetu tu bali pia yale ya ulimwengu mzima.” Kama vile Mhindu huyo mwenye hekima nyingi alivyoonyesha, mahubiri ya Yesu yanaonyesha njia ya kupata amani inayodumu. Katika mahubiri hayo Kristo alisema, “Wenye furaha ni wenye kuamanika, kwa kuwa wataitwa ‘wana wa Mungu.’” (Mathayo 5:9, NW) “Wana” wengi sasa wanafurahia amani kutoka kwa Mungu. Baadaye, wapole wote wa dunia “watajifurahisha kwa wingi wa amani.” (Zaburi 37:11) Lakini, Je! tunaweza kuwa na uhakika kwamba ndivyo itakavyokuwa?

 3. Kwa sababu gani hakuna amani ya kweli duniani leo?

³ Leo, wasiwasi mwingi wa kwamba ulimwengu utaangamizwa unakalia wanadamu. Uchunguzi uliofanywa hivi majuzi unaonyesha hivi: “Upumbavu ambao umetokana na jambo hilo ni kutumika kwa dola trilioni 3 mpaka 4 tangu Vita ya Ulimwengu ya Pili ili kutengeneza mabohari ya silaha za nyukilia ambazo, zikitumiwa, zitafanya mwanadamu ajiue mwenyewe duniani pote. . . . Nguvu za makombora makubwa sana ya nyukilia yaliyorundikwa katika mabohari ya ulimwengu zinatosha kuua watu bilioni 58, au kuua kila aliye hai sasa mara 12.”a Na bado yale mashindano yenye kichaa ya kutengeneza silaha yameendelea kuongezeka. Ni KICHAA kweli kweli, kwa kuwa herufi hizo zinasimamia Kithibitisho cha Angamizano (“Mutually Assured Destruction”). Wazo hilo lililo waziwazi ndilo linalotegemewa na zile serikali mbili zenye nguvu mno ili kudumisha kati yazo ile inayoitwa amani ati. Hakika hiyo siyo amani inayotoka kwa Mungu.

 4. (a) Ulimwengu unaonekana ukiwa na hali gani sasa? (b) Ni tumaini gani lenye nguvu walilo nalo waabudu wa Yehova?

⁴ Kwa kila njia, ulimwengu huu una mambo ya kusikitisha sana. Hakujawa kamwe na wakati kama huu ambapo jamii ya kibinadamu imelazimika kuvumilia ufisadi mwingi wa kisiasa, jeuri nyingi wa uhalifu, matatizo mengi ya kiuchumi yanayoumiza fikira, ukosefu mwingi wa kumwogopa Mungu na mvurugo wa kidini, kama ule uliopo katika kizazi cha sasa. Hakujapata kamwe kuwa na wakati ambapo imekuwa wazi zaidi juu ya wanadamu kwamba “viumbe vyote pia vinaugua pamoja, navyo vina utungu pamoja.” Hata hivyo Mungu anaahidi kwamba uumbaji wake wa kibinadamu ‘utawekwa huru na kutolewa katika utumwa wa uharibifu, hata uingie katika uhuru wa utukufu wa watoto wa Mungu.’ (Warumi 8:21, 22) Wale wapenda amani wanaomwabudu Mungu wa Biblia yule Bwana Mwenye Enzi Kuu Yehova, wanahakikishiwa kwamba wataingia katika uhuru huu. Utakuwa uhuru ulioimarika kabisa katika amani ya kweli, amani ya milele. (Ezekieli 37:26-28) Lakini ni wakati na jinsi gani amani hiyo itakuja?

Maoni ya Mungu Juu ya “Nyakati na Majira”

 5. Ni ulizo gani linalotokea kuhusiana na 1 Wathesalonike 5:1?

⁵ Mtume Paulo alikuwa amewafariji Wakristo katika Thesalonike kwa kueleza jinsi ufufuo unavyohusiana na “kuwapo kwa Bwana” Yesu. Ndipo anaposema hivi: “Kwa habari ya nyakati na majira, hamna haja niwaandikie.”​—1 Wathesalonike 4:15; 5:1.

 6. Tunajuaje kwamba “nyakati na majira” ni za maana kwa Mungu?

⁶ Je! maneno ya mtume yanaonyesha kwamba “nyakati na majira” si za maana kwa Mungu? Si hivyo kamwe! (Mhubiri 3:1) ‘Ulipowaadia utimilifu wa wakati,” mwishoni mwa majuma 69 ya miaka, ndipo “Mungu alimtuma mwanawe.” Na huduma ya Yesu ilichukua muda wa miaka mitatu na nusu​—kuanzia 29 W.K, mpaka 33 W.K,—sawasawa na ilivyokuwa imesemwa katika unabii. (Wagalatia 4:4; Danieli 9:24-27) Yesu alitawazwa kuwa Mfalme katika “Yerusalemu wa mbinguni” katika wakati barabara ambao “nyakati zilizowekwa za mataifa” zilikwisha mwaka 1914. (Luka 21:24, NW; Waebrania 12:22, UV; Ezekieli 21:27; Danieli 4:31, 32) Pia “dhiki kubwa” itakuja katika ‘siku na saa’ iliyoamriwa na Yehova. “Haitachelewa.”​—Mathayo 24:21, 36, UV; Habakuki 2:3, NW.

 7. Kwa sababu gani Paulo hakuwa na uhitaji wa kuwaandikia Wathesalonike juu ya “nyakati na majira”?

⁷ Lakini, wakati huo Paulo hakuhitaji kuandika juu ya “nyakati na majira.” Wakristo hao Wathesalonike walikuwa tayari wamesadiki kwamba hayo yalikuwa ndiyo “majira” ya umalizio wa mfumo wa mambo ya Kiyahudi ambao ungekoma miaka karibu 20 baadaye, katika mwaka 70 W.K. Bidii yao na ‘furaha ya roho takatifu’ iling’aa ikiwa mfano mwema. (1 Wathesalonike 1:4-7) Vivyo hivyo, Mashahidi wa Yehova leo wanajua kabisa kwamba vile vita vya ulimwengu na matokeo mengine yenye kutaabisha sana tangu mwaka 1914 ni “ishara” ya kuwapo kusikoonekana kwa Yesu katika mamlaka na utukufu wa Ufalme.​—Mathayo 24:3-8; 25:31, NW.

 8. Kwa sababu gani ni lazima tuendelee kukesha na kuwa watendaji?

⁸ Halafu, mtume anawapa Wakristo wenzake uhakikisho wenye faraja, akisema: “Maana ninyi wenyewe mnajua yakini ya kuwa siku ya [Yehova] yaja kama vile mwivi ajavyo usiku.” (1 Wathesalonike 5:2) Ingawa hatuujui wakati barabara, siku hiyo ya kufikiliza hukumu inaendelea kukaribia zaidi na zaidi. Itafyatuka kwa ghafula, hapo kwa hapo, katika saa iliyowekwa na Mungu. Basi, ni lazima sisi tuendelee kukesha na kuwa watendaji.​—Luka 21:34-36.

Mwito Wenye Umaana Mkubwa wa Kutaka Amani

 9. (a) Ni tangazo gani linalokuja kutokea, na kwa sababu gani Wakristo wa kweli hawalishiriki? (b) Ni nani wanaotangaza mwito huo, nao wanalinganaje na watawala katika siku za Yeremia?

⁹ “Kuna amani na salama”! Hapa Paulo anatufanya tukae chonjo kuhusu tangazo litakalosikiwa kwenye upeo wa “kuwapo kwa Kristo”! (1 Wathesalonike 5:3.) Je! tutasikia tangazo hilo karibuni? Je! mwito huo wa kutaka amani na usalama ulimwenguni ungeweza kutokana na mahali gani? Kwa wazi haungeweza kutoka kati ya wafuasi wa Kristo, kwa maana Yesu alisema kwamba wala wao wala Ufalme wake si “sehemu ya ulimwengu.” (Yohana 15:19; 17:14, 16; 18:36, NW) Basi pasipo shaka wale wanaoutangaza mwito huo ni walimwengu wanaopinga Ufalme wa Mungu unaokuja. Wao ni sehemu ya ulimwengu ambao “umo katika uwezo wa yule mwovu,” Shetani Ibilisi. (1 Yohana 5:19, NW) Kama viongozi wa kisiasa na wa kidini wa siku za Yeremia, walimwengu hao watanena “maono ya mioyo yao wenyewe,” wakisema, “Mtakuwa na amani,” wakishikilia kwa makosa kwamba amani hiyo inatoka kwa Mungu. Dai lao litaonekana kuwa la uwongo kweli kweli!—Yeremia 23:16, 17, 19, 20.

10. Ni mfululizo gani wa matukio ambao umeitokeza hali ya sasa ya ulimwengu?

¹⁰ Mfululizo fulani wa matukio unaongoza kwenye tangazo hilo la “Kuna amani na salama.” Mwaka 1920 ndipo Ushirika wa Mataifa ulipotokezwa baada ya ile Vita Kuu, ambayo sasa inajulikana kuwa Vita ya Ulimwengu ya Kwanza. Kusudi la Ushirika huo lilikuwa kuondoa vita duniani milele. Lakini Vita ya Ulimwengu ya Pili iliutumbukiza Ushirika katika shimo refu. Katika Oktoba 24, 1945, baraza hilo lilirudishwa, likaanza upya kabisa likiwa na jina jipya, Umoja wa Mataifa. (Linganisha Ufunuo 17:8) Lengo kubwa la baraza hilo ni ‘kuhifadhi amani na usalama wa ulimwengu.’ Waanzilishi walo walipiga moyo konde “kuokoa vizazi vitakavyofuata visipatwe na pigo la vita.” Je! UM umefanikiwa kuhakikishia watu amani na usalama huo?

11. Hatari inayouelekea ulimwengu ni kubwa kadiri gani?

¹¹ Ingawa huenda wengine wa waanzilishi wa UM wakawa walikuwa na mioyo myeupe sana walipoanzisha baraza hilo, limeshindwa kama ule Ushirika ulilolitangulia kutimiza kusudi lililofanya lianzishwe. Sasa ulimwengu ni kama unakalia mtungi wenye silaha za nyukilia ambao unaweza kulipuka. Ule msiba uliotokea katika Chernobyl, Urusi, katika Aprili 1986, pamoja na sumu ya makombora iliyotoka ikaenea katika sehemu kubwa ya Ulaya, unaonyesha kwamba hata wakati nguvu za nyukilia zinapotumiwa kwa makusudi ya amani zinaweza kuleta mabaya makubwa. Mataifa fulani katika eneo la Pasifiki ya Kusini yanajaribu kuendeleza eneo lao kuwa lisilo la kuhusishwa katika mambo ya nyukilia. Lakini kama vita kamili ya nyukilia ingetokea, hakungekuwa na waokokaji​—mahali po pote.

Je! “Amani na Usalama” Vinaweza Kupatikana?

12. Ni tangazo gani ambalo UM umefanya kuhusu mwaka 1986, na mataifa yameliitikiaje?

¹² Kwa kujua kabisa kwamba hatari inaendelea kuongezeka, Umoja wa Mataifa ulitangaza 1986 kuwa Mwaka wa Amani ya Kimataifa. Mataifa yamelipokea tangazo hilo kwa maoni yenye kutofautiana. Yaliyo mengi yameuunga mkono Mwaka wenyewe kwa njia hii au ile, lakini yanaonyesha vita ya nyukilia kuwa ndiyo inayotisha kuwa kizuizi cha amani. Kwa sasa, vita vidogo-vidogo vinaendelea kupigwa katika sehemu zote za dunia. Vita karibu 150 vimepigwa tangu Vita ya Ulimwengu ya Pili, jumla ya watu waliokufa kutokana navyo ikiwa ni zaidi ya milioni 30. Je! inaweza kusemwa kwamba taifa lo lote linachukua kikweli hatua ya kwanza litende kupatana na yale maneno yanayojulikana sana ya Isaya 2:4 ambayo yamepambwa katika ukuta wa njia kuu ya UM?

13. Viongozi wa kidini wameungaje mkono?

¹³ Dini za ulimwengu hazikujiepusha kuunga mkono ule Mwaka wa Amani wa UM. Papa John Paul wa Pili aliitangaza Januari 1 kuwa Siku ya Ulimwengu ya Amani na akahimiza viongozi wa mataifa watoe uongozi unaohitajiwa ili kuanzisha msingi wa amani ya ulimwengu wote. Yeye aliziomba pia dini za ulimwengu zikutane ili kusali katika Assisi, Italia, wakati wa Mwaka wa Amani ya Kimataifa. Askofu mkuu wa Canterbury, aliye kichwa cha Kanisa la Uingereza, na vikundi vya Wabuddha waliupokea kwa uchangamfu mwaliko huo. Baraza la Makanisa Ulimwenguni lilitokeza tangazo lililohusu ule Mwaka wa Amani ya Kimataifa, likihimiza kwamba upunguzaji wa silaha za nyukilia uanze bila kukawizwa.

14. Ni kwa njia gani tu shughuli ya kuleta amani inavyoweza kufanikiwa?

¹⁴ Lakini, katika jambo hili la kuanzisha “amani na usalama,” ni nini mapenzi ya yule ‘Mungu apaye amani’? Je! Neno la Mungu la kiunabii linaonyesha kwamba wanadamu na mataifa yasiyo na ukamilifu wanaweza kuletea ulimwengu huu amani na usalama? Si hivyo kamwe! “Mafanikio hakika” katika shughuli yo yote ya namna hiyo yanategemea kufanya mambo kupatana na uadilifu wa Yehova na kwa kusudi la kumletea yeye sifa.​—Isaya 55:11; 61:11, NW.

‘Uharibifu wa Ghafula’ Unaokaribia

15. Ni tangazo gani la kugutusha ambalo Paulo anafanya halafu?

¹⁵ Mtume Paulo anatuambia linalokaribia kutukia. Yeye anasema: “Wakati wo wote wanaposema: ‘Amani na usalama!’ ndipo uharibifu wa ghafula utakapokuwa juu yao papo kwa hapo sawasawa na uchungu juu ya mwanamke mwenye mimba; nao hawataokoka kwa vyo vyote.​—1 Wathesalonike 5:3, NW.

16. Kwa sababu gani njia za mataifa sizo njia za Mungu?

¹⁶ Kwa kuyasoma maneno hayo mara ya kwanza, huenda yakaelekea kuwa ya kushtua. Lakini Biblia inaeleza mambo wazi. Njia za mataifa leo sizo njia za Mungu. (Isaya 55:8, 9) Sababu yake ya kuruhusu namna mbalimbali za utawala wa wanadamu ziendelee kuwapo ni kujibu suala fulani ambalo yule Nyoka mjanja, Shetani Ibilisi, alitokeza miaka karibu 6,000 iliyopita. Shetani alipobembeleza wazazi wetu wa kwanza wachague kujitegemea kwa kuacha Mungu, yeye alitoa ubishi juu ya kama kweli wanadamu wanahitaji utawala wa Mungu.​—Mwanzo 3:4, 5.

17. Ni kumbukumbu la matendo gani ambalo utawala wa wanadamu umejifanyia, na jambo hilo linathibitisha nini?

¹⁷ Wakati wa mileani ambazo zimefuata, Mungu ameruhusu wanadamu wajaribu kila namna ya serikali ya kibinadamu inayoweza kuwaziwa. Iwe imeendelea kwa miaka michache au kwa mamia ya miaka, kila aina ya utawala wa wanadamu imeshindwa vibaya sana kuleta amani na usalama wa kweli. Vita, uhalifu, maogofyo, na kifo yamekuwa ndiyo mambo yenye kuendelea kupata wanadamu chini ya kila namna ya serikali ya kibinadamu. Katika muda wote wa kihistoria, “mwanadamu ametawala mwanadamu kwa kumdhuru.” (Mhubiri 8:9, NW) Mambo hayakuwa tofauti leo. Mtu ye yote anayelijua suala linalohusika anaweza sasa kusema, kama alivyofanya nabii wa Mungu: “Ee [Yehova], najua ya kuwa njia ya wanadamu haimo katika nafsi yake; kuelekeza hatua zake si katika uwezo wa wanadamu.”​—Yeremia 10:23.

18. Kwa sababu gani tangazo la mataifa juu ya “Amani na Usalama”! ni kazi ya bure?

¹⁸ Sasa wakati umekaribia wa kuimaliza suala hilo mara moja tu na basi. Utawala wa Mungu tu ndio unaoweza kuletea wanadamu amani na usalama wa kweli. Lakini, si utawala wa Mungu ambao mataifa yanapendelea wakati yanapotangaza “kuna amani na usalama”! Wao wanataka kuendeleza utawala kulingana na mawazo yao wenyewe ya kiburi. Lakini wakati umekwisha! Mataifa yanahisi kwamba ni lazima hatua fulani kubwa ichukuliwe. Ama sivyo, mambo yote yatamalizikia katika maangamizi fulani ya nyukilia. Kwa hiyo wao watafanya kama Yeremia alivyotabiri: “Wameiponya jeraha ya watu wangu kwa juu juu tu, wakisema, Amani, Amani, wala hapana amani.” Lakini hiyo ni kazi ya bure tu!—Yeremia 6:14; 8:11, 15.

Ule Mwisho Uliosemwa Katika Unabii

19. “Siku ya Yehova” itafyatukaje?

¹⁹ “Uharibifu wa ghafula . . . papo kwa hapo,” anasema mtume Paulo. Isaya nabii wa Mungu anaongeza hivi: “Angalia, mashujaa wao wanalia nje, wajumbe wa amani wanalia kwa uchungu.” (Isaya 33:7) Katika mahali pengi, Biblia inaonyesha kwamba Yehova atafikiliza hukumu juu ya mataifa na wanadamu kwa haraka sana, bila kutazamiwa​—“kama mwivi usiku.” (1 Wathesalonike 5:2, 3; Yeremia 25:32, 33; Sefania 1:14-18; 2 Petro 3:10) Katika wakati ambao ulimwengu unatangaza kwa sauti kubwa kwamba umefikia usawa fulani wa amani na usalama. “siku ya Yehova” itafyatuka kwa ghafula yenye kugutusha. Watu wa Mungu watakuwa wamelitambua tangazo hilo la “Kuna amani na salama”! Kama lilivyo hasa, nao watakuwa salama katika kimbilio waliloandaliwa na Yehova.​—Zaburi 37:39, 40; 46:1, 2; Yoeli 3:16.

20. (a) UM ni “mnyama” wa aina gani? (b) Yehova ana maoni gani juu ya dini ya uwongo, na kwa sababu gani?

²⁰ Katika Neno la Mungu, mwendo uliochukuliwa na Ushirika wa Mataifa na mwandamizi wao. Umoja wa Mataifa, unafananishwa na ule wa “mnyama mwekundu” mwenye vichwa saba (vinavyofananisha serikali kubwa za ulimwengu ambazo mnyama huyo alitokana nazo) na pembe kumi (zinazosimamia mamlaka za kiserikali ambazo zinamwunga mkono mnyama huyo sasa). Biblia inaonyesha “mnyama” huyo kuwa ni wa kisiasa, anayelinganika na “simba” wa Uingereza na “dubu” wa Urusi. Juu ya mgongo wake amepandwa na mwanamke. “Babuloni mkuu. mama wa [makahaba] na wa mambo yote ya kuchukiza sana duniani.” (Ufunuo 17.3-8, HNWW) Maneno hayo yanaeleza vizuri juu ya maoni ya Yehova kuhusu dini ya uwongo, ambayo haimwakilishi yeye na Ufalme wake wa uadilifu. Dini ya uwongo inafanya ukahaba wa kiroho kwa kuhusika katika siasa. Kujiunga kwa dini pamoja na UM katika shughuli ya ulimwengu ya kujitahidi kuleta amani na usalama ni mfano mmoja wa jambo hilo. Dini ingependa pia kuwa na amani na usalama wa kutokupatwa na ujumbe wa hukumu ya Mungu unaotangazwa na Mashahidi wa Yehova. Kwa kusudi hilo, imechochea serikali fulani fulani zipige marufuku utendaji wa Kikristo wa Mashahidi.​—Zaburi 2:1-3.

21. (a) Ni kitendo gani kinachoonyesha mwanzo wa “siku ya Yehova”? (b) “Siku hiyo inasonga mbele kwenye hatua gani kubwa ya mwisho?

²¹ “Siku ya Yehova” itafyatukaje? Katika usiku huu ambao ndio wenye giza lililo tititi katika historia ya kibinadamu, siku hiyo kwa kweli itakuja “kama mwivi”! Huo ni wakati ambao Mungu atatumia maarifa kuyaongoza mataifa ya mnyama wa UM aigeuke kwa ghafula dini ya uwongo. Kwa kuonyesha chuki ambayo mataifa hayo yamekuwa yakimwonea Babuloni Mkuu kwa njia ya chini chini, yatamfunua wazi aonekane jinsi alivyo hasa na kumharibu kabisa kabisa. Uuaji huo utakuja haraka sana hata waliokuwa hawara wake wa kisiasa wapaaze sauti kwa mshangao wakisema: “Ole! Ole kwa Babuloni, mji maarufu na wenye nguvu! Kwa muda wa saa moja tu adhabu yako imekupata.” Lakini mataifa na majeshi yao yatashambulia watu wa Mungu pia. Halafu, yule Mfalme wa wafalme, Yesu Kristo, atawaharibu adui hao wote na kumwingiza katika shimo refu sana yule mpinzani mkuu, Shetani Ibilisi.​—Ufunuo 17:16, 17; 18:10, HNWW; 19:11-21; 20:1-3; linganisha Ezekieli 38:11, 16, 18-23, UV.

22. (a) Ni taraja gani kubwa ambalo wanadamu wenye kuamini wanalo leo? (b) Wewe unaweza kupataje kufurahia amani kutoka kwa Mungu?

²² Mwisho, amani na usalama wa kweli utasitawi chini ya Ufalme wa Mungu! (Zaburi 72:1, 7; Isaya 9:6, 7) Jambo la kufurahisha ni kwamba wengi leo ‘wanaokesha na kubaki wakiwa na fahamu zao’ wataishi waone jambo hilo likitendeka. (1 Wathesalonike 5:4-6, NW) “Mkutano mkubwa . . . wa kila taifa,” wanaojizoeza imani katika uandalizi wa Yehova wa ukombozi kupitia Kristo, wataokolewa katika ‘dhiki kubwa,’ wafurahie amani ya milele kutoka kwa Mungu. (Ufunuo 7:9-17; 21:3, 4) Wewe na uwe mmoja wao!

[Maelezo ya Chini]

Wewe Ungejibuje?

◻ Kwa sababu gani “nyakati na majira” ni za maana kwa Mungu na kwetu sisi?

◻ Inatupasa tuoneje kukaribia kwa “siku ya Yehova”?

◻ Ni akina nani wanaoshiriki katika tangazo lile la 1 Wathesalonike 5:3 na wakati gani?

◻ Ni matukio gani yenye umaana mkubwa yanayotokezwa na tangazo hilo?