Mahali Pafaapo pa Ibada ya Yehova Maishani Mwetu
“Kila siku nitakuhimidi, nitalisifu jina lako milele na milele.” —ZABURI 145:2.
1. Kwa habari ya ibada, Yehova anatazamia nini?
“MIMI, BWANA, Mungu wako, ni Mungu mwenye wivu [“anayedai ujitoaji kamili,” New World Translation].” (Kutoka 20:5) Musa alisikia tangazo hilo kutoka kwa Yehova, naye alirudia kulitaja alipokuwa akihutubia taifa la Israeli. (Kumbukumbu la Torati 5:9) Hakukuwa na shaka akilini mwa Musa kwamba Yehova Mungu alitazamia waabudu Wake wamwabudu Yeye peke yake.
2, 3. (a) Ni nini kilichokazia Waisraeli kwamba kile kilichotukia karibu na Mlima Sinai kilikuwa tendo lisilo la kawaida? (b) Tutachunguza maswali yapi kuhusu ibada ya Waisraeli na ya watumishi wa Mungu leo?
2 Wakiwa wamepiga kambi karibu na Mlima Sinai, Waisraeli na “kundi kubwa la watu waliochangamana” waliokuwa wametoka Misri pamoja nao walishuhudia jambo lisilo la kawaida. (Kutoka 12:38) Halikufanana na ibada ya miungu ya Misri, ambayo sasa ilikuwa imeaibishwa kwa yale mapigo kumi. Yehova alipomwonyesha Musa kuwapo kwake, mambo ya ajabu yenye kuhofisha yalitokea: ngurumo, umeme, na sauti kubwa ya baragumu iliyotetemesha kambi nzima. Kisha ukaja moto na moshi huku mlima wote ukitetemeka sana. (Kutoka 19:16-20; Waebrania 12:18-21) Ikiwa Mwisraeli yeyote alihitaji uthibitisho zaidi kwamba kile kilichokuwa kikitendeka kilikuwa tukio lisilo la kawaida, basi uthibitisho huo ulikuwa ukija upesi. Baada ya muda mfupi, Musa alishuka kutoka mlimani baada ya kupokea nakala ya pili ya sheria za Mungu. Kulingana na masimulizi yaliyovuviwa, “ngozi ya uso [wa Musa] iling’aa; [na watu] wakaogopa kumkaribia.” Kwa kweli, ono lisilosahaulika, lenye uwezo upitao wa kibinadamu!—Kutoka 34:30.
3 Kwa taifa hilo la asili la Mungu, hakukuwa na shaka juu ya mahali ambapo ibada ya Yehova ilichukua. Yeye alikuwa Mkombozi wao. Waliwiwa naye uhai wao hasa. Yeye alikuwa pia Mpaji-Sheria wao. Lakini, je, walidumisha kutanguliza ibada ya Yehova? Na vipi juu ya watumishi wa kisasa wa Mungu? Ibada ya Yehova ina mahali gani katika maisha zao?—Warumi 15:4.
Ibada ya Israeli ya Yehova
4. Kambi ya Israeli ilipangwaje katika vituo vyao vya muda nyikani, na ni nini kilikuwa katikati ya kambi?
4 Kama ungetazama kutoka angani Israeli iliyopiga kambi nyikani, je, ungeona nini? Mahema mengi sana, lakini yaliyopangwa kwa utaratibu, yenye watu wapatao milioni tatu au hata zaidi, wakiwa katika vikundi vya makabila matatu-matatu upande wa kaskazini, kusini, mashariki na magharibi. Kama ungechunguza kwa ukaribu zaidi, ungeona pia vikundi vingine karibu na katikati ya kambi. Vikundi hivyo vinne vidogo-vidogo vya mahema vilikuwa vya familia za kabila la Lawi. Katikati kabisa mwa kambi, katika eneo lililotenganishwa kwa pazia, kulikuwa na kitu cha kipekee sana. Hicho kilikuwa “hema ya kukutania,” au tabenakulo, ambayo Waisraeli ‘waliokuwa na moyo wa hekima’ walikuwa wamejenga kulingana na plani ya Yehova.—Hesabu 1:52, 53; 2:3, 10, 17, 18, 25; Kutoka 35:10.
5. Tabenakulo lilitumikia kusudi gani katika Israeli?
5 Katika kila moja ya sehemu 40 walizopiga kambi wakati wa kutembea kwao nyikani, Israeli ilisimamisha tabenakulo, nayo ikawa ndiyo jambo kuu katika kambi yao. (Hesabu, sura 33) Kwa kufaa, Biblia yamfafanua Yehova kuwa anakaa kati ya watu wake katikati kabisa mwa kambi yao. Utukufu wake uliijaza tabenakulo. (Kutoka 29:43-46; 40:34; Hesabu 5:3; 11:20; 16:3) Kitabu Our Living Bible chaeleza hivi: “Kitu hicho kitakatifu chenye kubebeka kilikuwa cha maana sana, kwa kuwa kilitokeza kituo cha kidini kwa watu wote kwa ajili ya makabila hayo. Kwa hiyo hicho kiliwafanya wadumishe muungano katika ile miaka mirefu ya kutangatanga jangwani na kuwawezesha waungane.” Zaidi ya hayo, tabenakulo ilitumika ikiwa kikumbusha cha kila mara kwamba ibada ya Waisraeli kwa Muumba wao ilikuwa ndilo jambo kuu maishani mwao.
6, 7. Ni kitu gani cha ibada kilichotumiwa badala ya tabenakulo, nacho kilitumikiaje taifa la Israeli?
6 Baada ya Waisraeli kufika katika Bara Lililoahidiwa, tabenakulo liliendelea kuwa jambo kuu katika ibada ya Israeli. (Yoshua 18:1; 1 Samweli 1:3) Baada ya muda, Mfalme Daudi alipendekeza kujengwa kwa kitu cha kudumu. Hicho kikawa hekalu, lililojengwa baadaye na mwana wake Sulemani. (2 Samweli 7:1-10) Wakati wa kuzinduliwa kwayo, wingu lilishuka likionyesha ukubali wa Yehova wa jengo hilo. “Hakika nimekujengea nyumba ya kukaa,” Sulemani akasali, “iwe mahali pa makao yako milele.” (1 Wafalme 8:12, 13; 2 Mambo ya Nyakati 6:2) Hekalu hilo jipya sasa likawa kitovu cha ujitoaji wa taifa hilo.
7 Mara tatu kwa mwaka, wanaume wote wa Israeli walikuwa wakienda Yerusalemu kuhudhuria sherehe zenye shangwe hekaluni kwa kutambua baraka za Mungu. Kwa kufaa, mikutano hiyo iliitwa “sikukuu za BWANA,” zikikazia ibada ya Mungu. (Mambo ya Walawi 23:2, 4) Wanawake waliojitoa sana walihudhuria wakiwa na washiriki wengine wa familia.—1 Samweli 1:3-7; Luka 2:41-44.
8. Zaburi 84:1-12 yashuhudiaje umuhimu wa ibada ya Yehova?
8 Mtunga-zaburi aliyevuviwa alitaja kwa ufasaha jinsi ibada ilivyokuwa ya maana sana katika maisha zao. “Maskani zako zapendeza kama nini, Ee BWANA wa majeshi!” wana wa Kora waliimba. Hakika wao hawakuwa wakisifu jengo kubwa tu. Badala ya hivyo, walisifu Yehova Mungu kwa sauti kubwa, wakitangaza: “Moyo wangu na mwili wangu vinamlilia Mungu aliye hai.” Utumishi wa Walawi uliwaletea furaha kuu sana. “Heri wakaao nyumbani mwako,” wao wakatangaza. “Wanakuhimidi daima.” Kwa kweli, Israeli yote iliimba: “Heri ambaye nguvu zake zatoka kwako, na njia . . . zimo moyoni mwake. . . . Huendelea toka nguvu hata nguvu, huonekana Sayuni kila mmoja mbele za Mungu.” Ingawa safari ya Mwisraeli kwenda Yerusalemu huenda ilionekana kuwa ndefu na yenye kuchosha, nguvu zake zilizidishwa alipofika katika jiji kuu. Moyo wake ulifurika kwa shangwe aliposifu sana pendeleo lake la kumwabudu Yehova: “Hakika siku moja katika nyua zako ni bora kuliko siku elfu. Ningependa kuwa bawabu nyumbani mwa Mungu wangu, kuliko kukaa katika hema za uovu. . . . Ee BWANA wa majeshi, heri mwanadamu anayekutumaini Wewe.” Maneno kama hayo yaonyesha jinsi Waisraeli walivyotanguliza ibada ya Yehova.—Zaburi 84:1-12.
9. Ni nini kilichopata taifa la Israeli lilipokosa kutanguliza ibada ya Yehova?
9 Kwa kusikitisha, Israeli haikuendelea kutanguliza ibada ya kweli. Wao waliruhusu ujitoaji kwa miungu ya uongo udhoofishe bidii yao kwa Yehova. Kwa hiyo, Yehova aliwaachilia kwa maadui zao, akiwaacha wapelekwe uhamishoni katika Babiloni. Waliporudishwa nyumbani kwao baada ya miaka 70, Yehova aliandalia Israeli mahimizo yenye kuchochea moyo ya manabii waaminifu Hagai, Zekaria, na Malaki. Kuhani Ezra na Gavana Nehemia walichochea watu wa Mungu wajenge upya hekalu na kuanzisha tena ibada ya kweli huko. Lakini karne nyingi zilipopita, tena ibada ya kweli ikawa haitangulizwi katika taifa hilo.
Bidii ya Ibada ya Kweli Katika Karne ya Kwanza
10, 11. Ibada ya Yehova ilikuwa na mahali gani maishani mwa wale waaminifu wakati Yesu alipokuwa duniani?
10 Kwa wakati uliowekwa na Yehova, Mesiya alitokea. Watu mmoja-mmoja waaminifu walikuwa wakimtazamia Yehova kwa ajili ya wokovu. (Luka 2:25; 3:15) Masimulizi ya Gospeli ya Luka yafafanua wazi Ana mwenye umri wa miaka 84 kuwa mjane ambaye “haondoki katika hekalu, ila huabudu usiku na mchana kwa kufunga na kuomba.”—Luka 2:37.
11 “Chakula changu,” akasema Yesu, ‘ni kuyatenda mapenzi yake aliyenipeleka, nikaimalize kazi yake.’ (Yohana 4:34) Fikiria jinsi Yesu alivyoitikia alipokabili wabadili-fedha katika hekalu. Alipindua meza zao pamoja na viti vya wauza njiwa. Marko asimulia: “[Yesu] hakuacha mtu achukue chombo kati ya hekalu. Akafundisha, akasema, Je! haikuandikwa, Nyumba yangu itaitwa nyumba ya sala kwa mataifa yote? Bali nyinyi mmeifanya kuwa pango la wanyang’anyi.” (Marko 11:15-17) Ndiyo, Yesu hata hakuruhusu mtu yeyote kuchukua njia ya mkato iliyopitia ua la hekalu akiwa anapeleka vyombo upande mwingine wa jiji. Matendo ya Yesu yaliimarisha shauri alilokuwa ametoa awali: “Utafuteni kwanza ufalme wake, na haki [ya Mungu].” (Mathayo 6:33) Yesu alituachia kielelezo bora sana cha kumtolea Yehova ujitoaji wa pekee. Hakika yeye alitenda kwa kupatana na yale aliyohubiri.—1 Petro 2:21.
12. Wanafunzi wa Yesu walionyeshaje jinsi walivyotanguliza ibada ya Yehova?
12 Yesu vilevile aliwekea wanafunzi wake kigezo cha kufuata kwa njia ambayo alitimiza utume wake wa kufungua Wayahudi waaminifu lakini waliodharauliwa kutoka kwa mizigo ya mazoea ya dini ya uongo. (Luka 4:18) Kwa kutii amri ya Yesu ya kufanya wanafunzi na kuwabatiza, Wakristo wa mapema walitangaza kwa ujasiri mapenzi ya Yehova kwa habari ya Bwana wao aliyefufuliwa. Yehova alifurahia sana jinsi walivyotanguliza ibada Yake. Hivyo, malaika wa Mungu mwenyewe aliwafungua kimwujiza mitume Petro na Yohana kutoka gerezani na kuwaamuru hivi: “Enendeni mkasimame hekaluni mkawaambie watu maneno yote ya Uzima huu.” Wakiwa wameimarishwa, wao walitii. Kila siku, katika hekalu la Yerusalemu na pia nyumba kwa nyumba “hawakuacha kufundisha na kuhubiri habari njema za Yesu kwamba ni Kristo.”—Matendo 1:8; 4:29, 30; 5:20, 42; Mathayo 28:19, 20.
13, 14. (a) Tangu nyakati za mapema za Ukristo, Shetani amejaribu kufanyia watumishi wa Mungu nini? (b) Watumishi waaminifu wa Mungu wameendelea kufanya nini?
13 Upinzani dhidi ya mahubiri yao ulipoendelea kukua, Mungu aliwaongoza watumishi wake waaminifu kuandika shauri hili lililofaa sana. ‘Mmtwike Yehova fadhaa zenu zote, kwa maana yeye hujishughulisha sana kwa mambo yenu,’ akaandika Petro karibu miaka ya 60 W.K. “Mwe na kiasi na kukesha; kwa kuwa mshitaki wenu Ibilisi, kama simba angurumaye, huzunguka-zunguka, akitafuta mtu ammeze. Nanyi mpingeni huyo, mkiwa thabiti katika imani, mkijua ya kuwa mateso yale yale yanatimizwa kwa ndugu zenu walioko duniani.” Bila shaka, Wakristo wa mapema walipata faraja kwa maneno hayo. Wao walijua kwamba baada ya kupata mateso kwa muda mfupi, Mungu angemaliza mazoezi yao. (1 Petro 5:7-10) Katika siku hizo za mwisho za mfumo wa mambo wa Kiyahudi, Wakristo wa kweli waliinua sana ibada yenye upendo wa Yehova.—Wakolosai 1:23.
14 Kama ambavyo mtume Paulo alivyokuwa ametabiri, uasi-imani, ule ukengeufu kutoka kwa ibada ya kweli, ulitokea. (Matendo 20:29, 30; 2 Wathesalonike 2:3) Ushuhuda wa jambo hilo uliongezeka sana tokea miongo ya mwisho ya karne ya kwanza. (1 Yohana 2:18, 19) Shetani alipanda kwa mafanikio Wakristo bandia miongoni mwa wale wa kweli, likifanya iwe vigumu kutofautisha “magugu” haya kutoka kwa Wakristo wenye mfano wa ngano. Lakini, kwa karne zilizopita, watu fulani mmoja-mmoja waliweka ibada ya Mungu kwanza, wajapohatarisha uhai wao. Lakini haikuwa mpaka miongo ya mwisho-mwisho ya “majira ya mataifa” ndipo Mungu alikusanya tena watumishi wake ili wainue ibada ya kweli.—Mathayo 13:24-30, 36-43; Luka 21:24.
Ibada ya Yehova Yainuliwa Leo
15. Tangu 1919, unabii wa Isaya 2:2-4 na Mika 4:1-4 umetimizwaje?
15 Katika 1919, Yehova aliwaimarisha mabaki watiwa-mafuta kuanzisha kampeni ya kutoa ushahidi kwa ujasiri ulimwenguni pote ambayo imeinua ibada ya Mungu wa kweli. Kukiwa na mmiminiko wa “kondoo wengine” wa mfano tangu 1935 na kuendelea, idadi ya watu wanaokwea kwa njia ya kiroho “mlima wa nyumba ya BWANA” imeongezeka zaidi na zaidi. Katika mwaka wa utumishi wa 1993, Mashahidi wa Yehova 4,709,889 walimsifu kwa kuwaalika wengine kujiunga na ibada yake iliyoinuliwa. Hilo ni tofauti kama nini na hali ya kiroho iliyopotoka ya “vilima” vya madhehebu vya milki ya ulimwenguni pote ya dini ya uongo, hasa Jumuiya ya Wakristo!—Yohana 10:16; Isaya 2:2-4; Mika 4:1-4.
16. Watumishi wote wa Mungu wahitaji kufanya nini kwa habari ya yale yanayotabiriwa katika Isaya 2:10-22?
16 Wafuasi wa dini ya uongo huona makanisa na makathedro yao na hata makasisi wao kuwa ‘wameinuka sana,’ wakiwapa mataji na heshima zenye utukufu. Lakini tazama yale ambayo Isaya alitabiri: “Macho ya mwanadamu yaliyoinuka yatashushwa chini, na kiburi cha mwanadamu kitainamishwa, naye BWANA, yeye peke yake, atatukuzwa siku hiyo.” Hiyo itakuwa lini? Katika dhiki kuu inayokuja kwa kasi ambapo “sanamu zitatoweka kabisa.” Kwa sababu ya ukaribu mno wa wakati huo wenye kuhofisha, watumishi wote wa Mungu wahitaji kuchunguza kwa uzito mahali ambapo ibada ya Yehova inachukua maishani mwao.—Isaya 2:10-22.
17. Watumishi wa Yehova leo huonyeshaje jinsi wanavyotanguliza ibada ya Yehova?
17 Wakiwa udugu wa kimataifa, Mashahidi wa Yehova wanajulikana sana kwa bidii yao ya kuhubiri juu ya Ufalme. Ibada yao si dini tu, inayofuatwa kwa muda wa saa moja hivi katika juma. La, hiyo ni njia yao yote ya maisha. (Zaburi 145:2) Hakika, mwaka uliopita zaidi ya Mashahidi 620,000 walipanga mambo yao ili washiriki katika huduma ya wakati wote ya Kikristo. Hakika wale waliobaki hawakupuuza ibada yao kwa Yehova. Hiyo hutokea sana katika mazungumzo yao ya kila siku na mahubiri yao ya peupe, hata kama wajibu wa familia wawalazimisha kufanya kazi za kimwili kwa bidii.
18, 19. Taja vielelezo vya kitia-moyo ambavyo huenda ulipokea kutokana na kusoma kwako masimulizi ya maisha ya Mashahidi.
18 Masimulizi ya maisha ya Mashahidi ambayo huchapishwa katika Mnara wa Mlinzi huandaa ufahamu wa ndani katika njia ambazo ndugu na dada tofauti-tofauti wametanguliza ibada ya Yehova maishani mwao. Dada mmoja mchanga aliyeweka maisha yake wakfu kwa Yehova akiwa na umri wa miaka sita aliweka mradi wa utumishi wa mishonari. Enyi ndugu na dada wachanga, mwaweza kuchagua mradi gani utakaowasaidia kutanguliza ibada ya Yehova maishani mwenu?—Ona makala “Kuufuatia Mradi Uliowekwa Tangu Umri wa Miaka Sita,” katika Mnara wa Mlinzi la Machi 1, 1992, kurasa 26-30.
19 Dada mmoja mzee-mzee ambaye ni mjane aandaa kielelezo kingine cha kuweka ibada ya Yehova katika mahali panapoifaa. Alipata kitia-moyo kingi cha kuvumilia kutoka kwa wale aliowasaidia kujifunza kweli. Wao walikuwa “familia” yake. (Marko 3:31-35) Ukijikuta katika hali kama hizo, je, utakubali utegemezo na msaada kutoka kwa wale wachanga katika kutaniko? (Tafadhali ona jinsi Dada Winifred Remmie alivyojieleza katika makala “Mimi Niliitikia Wakati wa Mavuno,” iliyochapishwa katika Mnara wa Mlinzi la Julai 1, 1992, kurasa 21-23.) Enyi watumishi wa wakati wote, onyesheni kwamba ibada ya Yehova hakika inakuja kwanza maishani mwenu kwa kutumikia kwa unyenyekevu katika migawo yenu, mkinyenyekea kwa hiari kwa mwelekezo wa kitheokrasi. (Tafadhali ona kielelezo cha Ndugu Roy Ryan, kama ilivyosimuliwa katika makala “Kushikamana kwa Ukaribu na Tengenezo la Mungu,” katika Mnara wa Mlinzi la Desemba 1, 1991, kurasa 24-7.) Kumbukeni kwamba tutangulizapo ibada ya Yehova, tunakuwa na uhakikisho kwamba yeye atatutunza. Hatuhitaji kuhangaika juu ya jinsi tutakavyopata mahitaji ya kimwili. Maono ya Dada Olive na Dada Sonia Springate yatoa kielezi cha jambo hilo.—Ona makala “Tumeutafuta Ufalme Kwanza,” katika Mnara wa Mlinzi la Februari 1, 1994, kurasa 20-5.
20. Ni maswali gani yanayotuhusu tunayohitaji kujiuliza?
20 Basi sisi watu mmoja-mmoja, je, hatuhitaji kujiuliza maswali fulani ya kupekua moyo? Ibada ya Yehova inachukua mahali gani maishani mwangu? Je, ninaishi kwa kupatana na wakfu wangu wa kufanya mapenzi ya Mungu kwa kadiri niwezavyo? Naweza kufanya maendeleo katika sehemu zipi za maisha? Ufikirio wenye uangalifu kwa makala ifuatayo utatupa fursa ya kuona jinsi tunavyotumia mali zetu kwa kupatana na jambo tutangulizalo maishani—ibada ya Bwana Mwenye Enzi Kuu Yehova, Baba yetu mwenye upendo.—Mhubiri 12:13; 2 Wakorintho 13:5.
Kwa Kupitia
◻ Kwa habari ya ibada, Yehova anatazamia nini?
◻ Tabenakulo ilitumika ikiwa kikumbusha cha nini?
◻ Katika karne ya kwanza W.K., ni nani waliokuwa vielelezo vyenye kutokeza juu ya bidii kwa ibada ya kweli, na jinsi gani?
◻ Tangu 1919, ibada ya Yehova imeinuliwaje?