Maswali Kutoka kwa Wasomaji

◼ Je! baadhi ya Wakristo wapakwa mafuta wataokoka “dhiki ile iliyo kuu” waishi duniani katika ulimwengu mpya kabla ya kupelekwa mbinguni?

Biblia haitaji waziwazi.

Kwa muda mrefu Wakristo wamependezwa na mapendeleo ambayo huenda Mungu akawapa. (Matendo 1:6) Hilo limekuwa ndivyo hasa katika wakati wetu tangu Ufalme wa Mungu uliposimamishwa. (Mathayo 24:3, 24, 34) Mwisho wa mfumo mbovu huu wa mambo ukiwa waja katika wakati wao, Wakristo wametaka kujua kama baadhi ya wapakwa mafuta kwa roho wataishi kupita “vita ya siku ile kuu ya Mungu” na kutumikia duniani kwa kipindi fulani kabla ya kupokea thawabu yao ya kimbingu. (Ufunuo 16:14) Biblia haisemi kwamba hilo litatukia, hata hivyo vigezo na unabii mbalimbali umechukuliwa kuwa wadokeza kwamba huenda ikawa hivyo. Badala ya kutoa maoni tu, twaweza kutazama tuone jinsi Mungu atakavyoshughulikia mambo.

Matukio fulani ya Biblia yanakuwa na vifanani baadaye miongoni mwa watu wa Mungu. Mathalani, twajua kwamba Yona alikuwa ndani ya tumbo la samaki mkubwa kwa siku tatu mchana na usiku. Huenda baadhi ya watu wakaona hilo kuwa kielelezo cha wokovu wa kimungu, lakini Yesu alisema kwamba hilo lilikuwa kigezo cha kiunabii cha jinsi angekuwa ndani ya kaburi kwa kipindi kinacholingana na hicho kabla ya ufufuo wake. (Yona 1:17; Mathayo 12:40) Ndiyo, ono la Yona lilikuwa kifananishi cha kiunabii. Yaeleweka watumishi wa Mungu wametazama unabii mbalimbali na masimulizi hususa ya Biblia kuona kama hayo yaweza kudokeza jinsi Yehova atakavyowashughulikia.

Kama kielelezo kinachohusu unabii wa Biblia, Mnara wa Mlinzi wa Desemba 15, 1928, ulizungumza juu ya Mika 5:2-15. Kitabu cha Mika kilishughulika juu ya ‘Mwashuri’ kufanya ukiwa Samaria na kurejea kwa Wayahudi kutoka uhamisho Babuloni. (Mika 1:1, 5-7; 4:10) Lakini pia kilitaja matukio ya baadaye, kama vile kuzaliwa kwa Mesiya katika Bethlehemu. (Mika 5:2) Mika alitabiri kwamba baada ya wokovu wao kutoka “Mwashuri,” “mabaki ya Yakobo” wangekuwa “mfano wa umande utokao kwa BWANA [Yehova, NW]” na “kama mwana-simba kati ya makundi ya kondoo.” (Mika 5:6-8) Mnara wa Mlinzi huo ulieleza hivi: “Huenda hicho kikachukuliwa kuwa kidokezo kwamba baadhi ya mabaki watakuwako duniani hata baada ya Har–Magedoni kupiganwa na kisha watakuwa na kazi fulani ya kufanya katika jina la Bwana na kwa sifa na utukufu wake.” Angalia lugha ya kiasi, ya akili inayotumiwa kutanguliza uwezekano huo: “Huenda . . . kikachukuliwa kuwa kidokezo fulani.”

Vipi juu ya masimulizi ya Biblia ambayo huenda yakalingana na wokovu huo duniani? Kielelezo kimoja ambacho kimetolewa chahusu Noa na familia yake. Noa ameonwa kuwa afananisha Yesu katika wakati huu wa mwisho. (Mwanzo 6:8-10; Mathayo 24:37) Kama Noa alivyoongoza mke wake na wana wao watatu na mabinti-wakwe kupita mwisho wa mfumo huo wa kale, Kristo ataandaa uongozi kwa mabaki ya jamii ya bibi-arusi wake na wale wanaokuwa watoto wa “Baba wa milele,” Yesu. Mke wa Noa aliokoka Mafuriko na kushiriki katika kufanya upya ibada ya kweli juu ya dunia iliyosafishwa. Ulinganishi mmoja waelekea kuwa ni kuokolewa kuingia katika ulimwengu mpya kwa mabaki ya jamii ya bibi-arusi.—Isaya 9:6, 7; 2 Wakorintho 11:2; Ufunuo 21:2, 9.a

Masimulizi mengine ya Kibiblia yameonwa pia kuwa yadokeza kwamba baadhi ya wapakwa mafuta huenda wakaishi kuingia katika ulimwengu mpya. Kwa kielelezo, Yeremia aliupita uharibifu wa Yerusalemu; “mtu” aliyekuwa na kidau cha wino cha mwandishi alibaki aone kazi ya ufishaji kabla ya kurudi akatoe ripoti yake.—Ezekieli 9:4, 8, 11.

Maelezo juu ya uwezekano wa kwamba baadhi ya wapakwa mafuta huenda wakaokolewa waingie katika ulimwengu mpya hutolewa yakiwa na madhumuni mazuri na kwa kupatana na vitangulizi vya Kibiblia katika kujaribu kuelewa unabii mbalimbali au vigezo ambavyo huenda vikawa na ulinganishi wa baadaye. Ikitukia kwamba hakuna wowote wa wapakwa mafuta atakayebaki duniani, hakutakuwako sababu ya kutoridhika. Tayari sisi tumekwisha kubali kwamba mambo ya Kibiblia hueleweka vizuri zaidi kwa kadiri wakati unavyopita. Mathalani, Mnara wa Mlinzi wa Januari 15, 1982, ulizungumza juu ya Mika 5:6-9 kwa mara nyingine na kueleza kwamba “haijapata kuwa lazima mabaki ya Israeli wa kiroho wangojee mpaka baada ya . . . Har–Magedoni ili wawe kama “umande” wa kuburudisha watu.” Mazungumzo hayo kwa mara nyingine yalionyesha uwezekano wa kwamba mabaki huenda wakaokoka vita ile kuu ya Mungu na kwa muda waende-lee “kuwa kama ‘umande’ unaoburudisha kwa ‘mkutano mkubwa’ wa ‘kondoo wengine.’” Hata hivyo, twaweza kuona kwamba kupita kwa wakati na kuongezeka kwa nuru ya kiroho kwaweza kupanua na kubadili uelewevu wetu wa unabii au drama za Biblia.—Mithali 4:18.

Twajua kwamba Biblia huunganisha ‘kuja kwa Mwana wa Adamu’ na ‘kukusanywa kwa wateule toka pepo nne.’ (Mathayo 24:29-31) Pia, wakati wa “kuwapo kwa Bwana” katika uwezo wa Ufalme, wapakwa mafuta waliolala katika kifo wainuliwa kwenye uhai katika mbingu. (1 Wathesalonike 4:15, 16, NW) Hao waliotiwa muhuri wapo ili wawe sehemu ya mke wa Mwana-Kondoo. Hilo litatukia wakati gani?

Katika kitabu cha Ufunuo, mara baada ya Yohana kueleza juu ya Mungu kufisha kahaba wa kidini, Babuloni Mkubwa, aeleza juu ya “arusi ya Mwana-Kondoo.” “Mwanamke” mchafu asiye na adili aondoshwa tamashani, nasi twaona “Bibi-arusi, mke wa Mwana-Kondoo” ‘amevikwa kitani nzuri, ing’arayo, safi, inayosimamia matendo ya haki ya watakatifu.’ (Ufunuo 18:10; 19:2, 7, 8; 21:9) Uharibifu wa Babuloni Mkubwa ni sehemu ya ile dhiki kuu. (Mathayo 24:21; Ufunuo 7:14) Kwa hiyo ingeweza kuwazwa kwamba baadhi ya jamii ya bibi-arusi wataiokoka ile dhiki kuu kuwa uthibitisho wa kibali na himaya ya Yehova. (Sefania 2:3; linganisha Mathayo 24:22.) Wakihifadhiwa hivyo duniani, wangeweza kubaki hapa hadi Mungu achague kuwapeleka mbinguni.

Hata hivyo, maelezo katika Ufunuo hayafuatii kabisa utaratibu wa kufuatana kwa matukio. Na si kama kwamba mabaki wachache wa wapakwa mafuta watahitajiwa ili kuuanzisha ulimwengu mpya, kwa maana tayari wamekwisha kuzoeza mamilioni ya Wakristo waaminifu-washikamanifu ambao wataishi milele duniani. Kwa hiyo, Mungu angeweza kuchukua wapakwa mafuta wake mbinguni mara tu baada ya uharibifu wa Babuloni Mkubwa, hivyo kutayarisha “arusi ya Mwana-Kondoo” itokee. Kwa njia hiyo watakatifu wote wangeweza kushiriki pamoja na Kristo ‘kuchunga mataifa kwa fimbo ya chuma’ katika salio la dhiki kuu. (Ufunuo 2:26, 27; 19:11-21) Ikiwa ndivyo Mungu atakavyoshughulikia mambo, wote 144,000 wangekuwa na Yesu ‘watawale wakiwa wafalme pamoja na Kristo kwa miaka elfu moja kamili.’—Ufunuo 20:4.

Hakika ni vema kwamba watu wa Mungu wapendezwa kwa makini kuchungulia jinsi atakavyoelekeza na kuthawabisha watumishi wake. (Linganisha 1 Petro 1:12.) Hilo laonyesha uhakika wao kwamba mapenzi yake yatafanywa. Ingawa hatuwezi na hatupaswi kutoa maoni juu ya mambo hususa, twaweza kutazamia kwa hamu yale yatakayotukia.

[Maelezo ya Chini]