Ile Ishara Ni Uthibltisho wa Kwamba Ulimwengu Mpya Uko Karibu?

“Taifa litaondoka kupigana na taifa, na ufalme kupigana na ufalme; kutakuwa na njaa, na matetemeko ya nchi mahali mahali.”​—Mathayo 24:7.

WAKATI Vita ya Ulimwengu 1 ilipokuwa ikiwaka moto, Mnara wa Mlinzi, Aprili 15, 1917 (kwa Kiingereza), ulinukuu maneno hayo na kutaarifu hivi: “Sisi tunaona sasa utimizo wa sehemu wa taarifa hiyo ya kiunabii, katika jambo la kwamba karibu mataifa yote kabisa ya dunia yanahusika katika pigano la kufisha. Chakula kilichoko kila mahali kinapungua na gharama ya maisha inaongezeka.”

Sasa, miaka 71 baadaye, gazeti hili lingali linavuta fikira za wasomaji walo kwenye unabii huo. Wanahistoria watatu wa kale walitia unabii huo katika kumbukumbu za maandishi kuwa sehemu ya “ishara” iliyotolewa na Yesu Kristo.​—Mathayo 24:3, 7; Marko 13:4, 8; Luka 21:7, 10,11.

Tangu 1914, mamia ya mamilioni ya maisha zimefutiliwa mbali na vita, ukosefu mkubwa wa vyakula, magonjwa ya kipuku, na misiba mingine. The New Encyclopædia Britannica (1987) inaorodhesha “Matetemeko ya dunia yaliyo makubwa-makubwa katika historia” 63 yenye kuhusika katika muda mrefu wa miaka 1,700 iliyopita. Kati ya jumla hiyo, 27, au asilimia 43, yamefanya mpigo tangu 1914. Kitabu Terra Non Firma, kilichotungwa na Maprofesa Gere na Shah, kina orodha ndefu ambayo ni yenye kuhusisha kipindi kirefu zaidi. Kati ya jumla ya matetemeko ya dunia ‘yaliyo na umaana mkubwa’ katika orodha hiyo, asilimia 54 yametukia tangu 1914.a Hata tukichukua kwamba kumbukumbu za maandishi ya karne zilizopita si kamili, hatuwezi kuepuka kukata shauri kwamba katika wakati wetu aina ya binadamu imeathiriwa kwa njia kubwa na matetemeko ya dunia.

Jambo fulani lenye kutia hofu mbaya hata zaidi lilipiga mioyo ya wanadamu wakati makombora ya atomi yalipolipuka juu ya majiji ya Kijapani ya Hiroshima na Nagasaki. Zile serikali kubwa zilizo na nguvu za nyukilia sasa zina silaha nyingi sana za kuharibu tungamano la watu kwa kadiri ambayo jamii ya kibinadamu inatishwa kutokomezwa kabisa. Ni kama vile mwanahistoria Luka alivyoendelea kuandika katika unabii wa Yesu: “Kutakuwako maono yenye kutisha na kutoka mbinguni ishara kubwa . . . na duniani huzuni kuu ya mataifa, yasijue njia ya kutokea . . . huku watu wakizirai kwa sababu ya woga na taraja la vitu vinavyokuja juu ya dunia inayokaliwa.”​—Luka 21:11, 25, 26, NW.

Ingawa zile serikali mbili zenye nguvu kupita zote huenda zikaafikiana kupunguza hesabu za silaha fulani zilizo katika mabohari yazo, maafikiano hayo hayatapunguza woga wa mwanadamu juu ya uhalifu wenye jeuri, uangamivu wa uchumi, na uvamizi-haramu. “Kinachowatia wasiwasi watu walio wengi siku hizi,” inataarifu karatasi-habari moja ya Kiafrika, “ni usalama wao wenyewe wa kibinafsi . . . Uhalifu umeongezeka kikichaa . .. ; kuna woga wenye kusambaa kila mahali.” Ndiyo, na Yesu alitabiri kwamba “kuongezeka maasi” ni kijambo kingine bado kilicho sahihi kuhusiana na ile ishara.​—Mathayo 24:12.

“Habari Njema”

Ingawa hivyo, wewe utatusha pumzi ya utulizo kwa sababu ya kwamba matukio yenye msiba yaliyotajwa sasa hivi yanatabiriwa kuandamana na kuhubiriwa kwa ‘habari njema katika dunia yote inayokaliwa.’ (Mathayo 24:14, NW) “Habari njema” hizo ni kuhusu Ufalme wa Mungu. Tayari, hiyo serikali ya ulimwengu iliyo na nguvu nyingi kupita zile za kibinadamu imekusanya mamilioni ya raia washikamanifu. Karibuni hiyo itaingilia mambo ya wanadamu na kutosheleza uhitaji wa mwanadamu wa ulimwengu mpya wenye uadilifu.​—Luka 21:28-32; 2 Petro 3:13.

Wengi wanasukumia kando “habari njema” hizo kwa kutoitikadi. Wengine wanasema wanaziitikadi, lakini wanazichukulia hatua kidogo sana. Baadhi yao wanazichukulia hatua kwa kitambo tu, halafu wanaanza tena kutia shaka. Je! maitikizo hayo ya mwelekeo hasi yalitabiriwa pia kuwa sehemu ya ile ishara? Na la maana zaidi, ni jinsi gani wewe binafsi unaweza kunufaika kutokana na ishara hiyo?

[Maelezo ya Chini]