Kila Mtu Atakuwa Huru

“Nahesabu kwamba mateso ya majira yaliyopo si kitu kwa kulinganisha na utukufu utakaofunuliwa katika sisi. Kwa maana taraja lenye hamu la viumbe linangoja kufunuliwa kwa wana wa Mungu. Kwa maana viumbe vilitiishwa chini ya ubatili, si kwa mapenzi yavyo vyenyewe bali kupitia yeye aliyevitiisha hivyo, juu ya msingi wa tumaini kwamba viumbe vyenyewe pia vitawekwa huru kutoka katika utumwa wa uharibifu na kuwa na uhuru wenye utukufu wa watoto wa Mungu. Kwa maana twajua kwamba viumbe vyote vinafuliza kupiga kite pamoja na kuwa katika maumivu pamoja hadi sasa.”—WAROMA 8:18-22.

KATIKA fungu hili la barua yake kwa Wakristo wa Roma, mtume Paulo atoa muhtasari wenye kutokeza juu ya sababu inayofanya watu wakose uhuru wa kweli na mara nyingi sana kuhisi utupu na maumivu. Yeye pia anaeleza jinsi tuwezavyo kupata uhuru wa kweli.

“Mateso ya Majira Yaliyopo”

Paulo hadharau “mateso ya majira yaliyopo” anaposema kwamba hayo “si kitu kwa kulinganisha na utukufu utakaofunuliwa katika sisi.” Wakati wa Paulo na vilevile baadaye, Wakristo waliteseka sana chini ya utawala mkatili wa imla wa wenye mamlaka wa Roma, ambao hawakujali haki za binadamu. Wakati mmoja, Roma ilikuja kuamini kwamba Wakristo walikuwa adui za Serikali, na kuwakandamiza kikatili. Mwanahistoria J. M. Roberts asema: “Bila shaka, Wakristo wengi katika jiji kuu [Roma] walikufa kwa njia yenye kuogofya sana katika uwanja wa michezo au kuchomwa wakiwa hai.” (Shorter History of the World) Ripoti nyingine yasema hivi kuhusu watu hao walioathiriwa na mnyanyaso wa Nero: “Baadhi yao waliuawa msalabani, wakashonelewa ngozi za wanyama na kuwindwa na mbwa, wengine wakamwagiliwa lami na kuwashwa moto ili wawe mienge hai giza lilipoingia.”—New Testament History, cha F. F. Bruce.

Bila shaka, Wakristo hao wa mapema wangelipenda kuwa huru kutoka katika uonevu, lakini hawakuwa tayari kukiuka mafundisho ya Yesu Kristo ili kuupata. Kwa mfano, hawakujiingiza kabisa katika pambano baina ya wenye mamlaka waliotawala Roma na wapigania-uhuru Wayahudi kama vile Wazeloti. (Yohana 17:16; 18:36) Kwa Wazeloti, hali hiyo ya wasiwasi haikuhitaji “mazungumzo tu juu ya kungoja wakati wa Mungu uliowekwa.” Walisema kilichohitajiwa ni “hatua ya jeuri dhidi ya adui,” Roma. (New Testament History) Wakristo wa mapema walikuwa na maoni tofauti. “Kungoja wakati wa Mungu uliowekwa” ndiyo uliokuwa uchaguzi pekee wa busara kwao. Walisadiki kwamba hakuna kitu chochote ila tu Mungu achukue hatua ya kumaliza kabisa “mateso ya majira yaliyopo” na kuleta uhuru wa kweli wenye kudumu. (Mika 7:7; Habakuki 2:3) Ingawa hivyo, kabla ya kuchunguza jinsi jambo hilo litakavyotukia, acheni kwanza kabisa tuchunguze ni kwa nini “viumbe vilitiishwa chini ya ubatili.”

“Kutiishwa Chini ya Ubatili”

Katika The Emphatic Diaglott, Benjamin Wilson asema kwamba, hapa neno “viumbe” halimaanishi “wanyama na viumbe visivyokuwa na uhai” kama vile wengine hudokeza, lakini, badala yake lamaanisha “wanadamu wote.” (Linganisha Wakolosai 1:23.) Larejezea familia nzima ya kibinadamu—sote ambao twatamani sana uhuru. “[Tu]litiishwa chini ya ubatili” kwa sababu ya matendo ya wazazi wetu wa kwanza. Si “kwa mapenzi [yetu] wenyewe” au kutokana na uchaguzi wa kibinafsi kwamba jambo hilo lilitukia. Hali yetu ni ya kurithi. Kulingana na Maandiko, Rousseau alikosea aliposema kwamba “mwanadamu alizaliwa akiwa huru.” Kila mmoja wetu alizaliwa akiwa mtumwa wa dhambi na kutokamilika, akiwa amefanywa mtumwa, kusema kitamathali, kwa mfumo ambao umejaa hali zenye kukatisha tamaa na ubatili.— Waroma 3:23.

Kwa nini hali ikawa hivyo? Kwa sababu wazazi wetu wa kwanza, Adamu na Hawa, walitaka kuwa “kama Mungu,” ili wajitegemee kikamili, wakijiamulia yaliyo mema na yaliyo mabaya. (Mwanzo 3:5) Walipuuza jambo moja muhimu kuhusu uhuru. Ni Muumba pekee awezaye kuwa na uhuru kamili. Yeye ndiye Mwenye Enzi Kuu ya Ulimwengu. (Isaya 33:22; Ufunuo 4:11) Uhuru wa kibinadamu lazima umaanishe uhuru wenye mipaka. Hiyo ndiyo sababu mwanafunzi Yakobo aliwatia moyo Wakristo wa siku yake waongozwe na “sheria kamilifu iliyo ya uhuru.”—Yakobo 1:25.

Kwa haki, Yehova aliwafukuza Adamu na Hawa kutoka katika familia yake ya ulimwengu wote, nao wakafa kutokana na jambo hilo. (Mwanzo 3:19) Lakini namna gani wazao wao? Kwa rehema, Yehova bado aliwaruhusu wazae watoto ingawa sasa wangeweza tu kuwapitishia kutokamilika, dhambi, na kifo. Kwa hiyo, “kifo kikasambaa kwa watu wote.” (Waroma 5:12) Kwa maana hiyo, Mungu “alitiisha [viumbe] chini ya ubatili.”

“Kufunuliwa kwa Wana wa Mungu”

Yehova alitiisha viumbe chini ya ubatili “juu ya msingi wa tumaini” ili siku moja, familia ya kibinadamu ipate kurudishiwa uhuru kupitia utendaji wa “wana wa Mungu.” Hao “wana wa Mungu” ni nani? Hao ni wanafunzi wa Yesu Kristo ambao, sawa na ‘viumbe vingine vya kibinadamu,’ huzaliwa wakiwa chini ya utumwa wa dhambi na kutokamilika. Kupitia kuzaliwa, wao hawana mahali pafaapo katika familia ya Mungu ya ulimwengu wote, iliyo safi na kamilifu. Lakini Yehova huwafanyia jambo fulani lenye kutokeza. Kupitia dhabihu ya fidia ya Yesu Kristo, Yeye huwaweka huru kutoka katika utumwa wa dhambi iliyorithiwa na huwatangaza kuwa “waadilifu,” au safi kiroho. (1 Wakorintho 6:11) Kisha anawafanya kuwa “wana wa Mungu,” akiwarudisha tena katika familia yake ya ulimwengu wote.—Waroma 8:14-17.

Wakiwa wamefanywa na Yehova kuwa wana wake, watakuwa na pendeleo tukufu. Watakuwa “makuhani kwa Mungu wetu nao watatawala wakiwa wafalme juu ya dunia,” pamoja na Yesu Kristo wakiwa sehemu ya Ufalme, au serikali ya Mungu ya kimbingu. (Ufunuo 5:9, 10; 14:1-4) Hii ni serikali inayosimamishwa imara juu ya kanuni za uhuru na haki—si juu ya uonevu na udhalimu. (Isaya 9:6, 7; 61:1-4) Mtume Paulo asema kwamba hawa wana wa Mungu ni washiriki wa Yesu, ‘mbegu ya Abrahamu’ iliyoahidiwa muda mrefu uliopita. (Wagalatia 3:16, 26, 29) Wakiwa mbegu ya Abrahamu, wana fungu muhimu katika kutimizwa kwa ahadi ya Mungu aliyomtolea Abrahamu rafiki yake. Sehemu moja ya ahadi hiyo ni kwamba kupitia mbegu ya Abrahamu (au, uzao), “mataifa yote ya dunia watajibarikia.”—Mwanzo 22:18.

Wao huletea wanadamu baraka gani? Wana wa Mungu hushiriki katika kuiweka huru familia nzima ya kibinadamu kutoka katika matokeo mabaya ya dhambi ya Adamu, na hushiriki pia katika kurudisha wanadamu kwenye hali ya ukamilifu. Watu “kutoka katika mataifa yote na makabila na vikundi vya watu” wanaweza kujibarikia kwa kudhihirisha imani katika dhabihu ya fidia ya Yesu Kristo na kujitiisha chini ya utawala wake wa Ufalme, wenye ukarimu. (Ufunuo 7:9, 14-17; 21:1-4; 22:1, 2; Mathayo 20:28; Yohana 3:16) Kwa njia hiyo “viumbe vyote” vitafurahia kwa mara nyingine tena “uhuru wenye utukufu wa watoto wa Mungu.” Huo hautakuwa uhuru wa muda wa kisiasa wa aina fulani lakini, badala yake, huo utakuwa uhuru kutoka katika jambo lolote ambalo limeiletea familia ya kibinadamu maumivu na msononeko tangu Adamu na Hawa walipokataa enzi kuu ya Mungu. Si ajabu kwamba mtume Paulo angeweza kusema kwamba “mateso ya majira yaliyopo si kitu” kwa kulinganisha na utumishi mtukufu ambao waaminifu watatekeleza!

“Kufunuliwa kwa wana wa Mungu” kunaanza lini? Hivi karibuni sana, wakati Yehova anapowadhihirishia watu wote ni nani ambao ni wana wa Mungu. Huo utakuwa wakati ambapo “wana” hawa, wenye kufufuliwa kwenye makao ya kiroho, watashirikiana na Yesu Kristo katika kuondolea dunia hii uovu na uonevu kwenye vita ya Mungu ya Har–Magedoni. (Danieli 2:44; 7:13, 14, 27; Ufunuo 2:26, 27; 16:16; 17:14; 19:11-21) Kila mahali twaona uthibitisho wenye kuongezeka kwamba tumeingia ndani sana katika “siku za mwisho,” wakati ule muda mrefu ambao Mungu amevumilia uasi pamoja na matokeo yake maovu utakoma.— 2 Timotheo 3:1-5; Mathayo 24:3-31.

Naam, kama vile mtume Paulo asemavyo, ni kweli kwamba “viumbe vyote vinafuliza kupiga kite pamoja na kuwa katika maumivu pamoja hadi sasa”—lakini hawatafanya hivyo kwa muda mrefu zaidi. Mamilioni wanaoishi sasa wataona “kurudishwa kwa mambo yote ambayo Mungu alisema kupitia kinywa cha manabii wake watakatifu wa wakati wa kale,” kutia ndani kurudishwa kwa amani, uhuru, na haki kwa familia yote ya kibinadamu.—Matendo 3:21.

Uhuru wa Kweli Hatimaye

Wapaswa kufanya nini ili ufurahie “uhuru [huu] wenye utukufu wa watoto wa Mungu”? Yesu Kristo alisema: “Ikiwa nyinyi mwakaa katika neno langu, nyinyi kwa kweli ni wanafunzi wangu, nanyi mtajua kweli, na kweli itawaweka nyinyi huru.” (Yohana 8:31, 32) Huo ndio ufunguo wa kupata uhuru—kujifunza kisha kutii amri na mafundisho ya Kristo. Jambo hilo huleta uhuru wa kadiri fulani hata sasa. Wakati ujao karibuni, jambo hilo litaleta uhuru kamili chini ya utawala wa Kristo Yesu. Hatua iliyo ya hekima ni kupata kujua “neno” la Yesu kupitia funzo la Biblia. (Yohana 17:3) Kama Wakristo wa mapema, shirikiana na kutaniko la wanafunzi wa kweli wa Kristo kwa bidii. Kwa kufanya hivyo, unaweza kunufaika na kweli zenye kuweka huru ambazo Yehova hutoa kupitia tengenezo lake leo.—Waebrania 10:24, 25.

‘Unapongojea kufunuliwa kwa wana wa Mungu,’ unaweza kusitawisha uhakika ambao mtume Paulo alikuwa nao katika utunzaji wenye ulinzi na utegemezo wa Kristo, hata wakati ambapo mateso na ukosefu wa haki waonekana kuwa usioweza kuvumilika. Baada ya kuzungumzia kufunuliwa kwa wana wa Mungu, Paulo aliuliza: “Nani atakayetutenga na upendo wa Kristo? Je, ni dhiki au taabu au mnyanyaso au njaa au uchi au hatari au upanga?” (Waroma 8:35) Bila shaka, kwa kutumia maneno ya Rousseau, Wakristo wa siku ya Paulo walikuwa wangali “watumwa” wa mambo yenye kukandamiza ya aina moja au nyingine. Walikuwa ‘wakiuawa mchana kutwa’ kama “kondoo wa kuchinjwa.” (Waroma 8:36) Je, waliruhusu jambo hilo liwashinde?

“Kinyume chake,” Paulo aandika, “katika mambo yote haya tunatokea tukiwa wenye kushinda kabisa kupitia yeye aliyetupenda.” (Waroma 8:37) Je, Wakristo wa mapema walikuwa washindi licha ya yale waliyolazimika kuvumilia? Jinsi gani? “Ninasadiki,” yeye ajibu, “kwamba wala kifo wala uhai wala malaika wala serikali wala mambo yaliyo hapa sasa wala mambo yatakayokuja wala nguvu wala kimo wala kina wala kiumbe kingine chochote hakitaweza kututenga na upendo wa Mungu ulio katika Kristo Yesu Bwana wetu.” (Waroma 8:38, 39) Wewe pia waweza ‘kutokea ukiwa mshindi’ kutoka katika “dhiki au taabu au mnyanyaso” wowote ule ambao huenda ukalazimika kuvumilia wakati huu. Upendo wa Mungu hutuhakikishia kwamba karibuni—hivi karibuni sana—‘tutawekwa huru kutoka katika utumwa wote . . . na kuwa na uhuru wenye utukufu wa watoto wa Mungu.’

[Picha katika ukurasa wa 6]

“Viumbe vyote vinafuliza kupiga kite pamoja na kuwa katika maumivu pamoja hadi sasa”

[Picha katika ukurasa wa 7]

‘Viumbe vitawekwa huru kutoka katika utumwa na kuwa na uhuru wenye utukufu wa watoto wa Mungu’