Usikose Kumjali Mwenzi Wako!
WENZI wawili waliooana wanatoka kwenye Jumba la Ufalme. Nyuso zenye tabasamu za mume na mke zaonyesha furaha wanayoonea shangwe wakiwa “mwili mmoja,” wenye umoja katika ibada ya Mungu wao, Yehova. (Mathayo 19:6) Hata hivyo, sikuzote hawakuwa wameonea shangwe umoja huo wala kushiriki imani ile ile. Kuna wakati ambao mke, Atsuko, alihudhuria mikutano peke yake. Kisha angeenda nyumbani kwa mume mwenye hasira ambaye alimpigia kelele. Mume wake, Kazutaka, wakati mmoja alikuwa na kasirani sana hata akakamata meza ya chakula na, kwa mkupuo mmoja, akatupa chakula chote cha jioni juu ya sakafu.
Kama alivyotabiri Yesu, Ukristo wa kweli umetokeza mgawanyiko katika nyumba fulani. (Mathayo 10:34, 35) Hata hivyo, kama vile Kazutaka na Atsuko, baadhi yao sasa waonea shangwe umoja wa kidini na furaha nyumbani mwao. Bila shaka, umoja huo haukujitokeza tu. Waamini hao walifanya nini wakashinda upinzani na kutokeza upatano wa kweli katika familia? Kabla hatujachunguza hilo, acheni tuone ni kwa nini wenzi fulani wa ndoa hupinga.
Kwa Nini Wao Walipinga?
“Ninapotazama nyuma,” afunua siri Atsuko, “natambua kwamba nilienda kwenye mikutano bila ya kueleza kamwe mume wangu mambo.” Kwa kuachwa peke yake bila ya kuarifiwa, Kazutaka alikuwa na kasirani.
Mioto ya upinzani yaweza pia kuwaka kwa sababu ya wivu. Mume mmoja kijana, Shigeo, alisitawisha tuhuma zisizo na msingi juu ya washiriki wapya wa mke wake. “Mke wangu alipojipaka marashi na kwenda zake kwenye mikutano, nilidhani alikuwa na mwanamume mwingine.” “Kwa kweli hatukupata kamwe nafasi ya kuongea sisi wawili tu,” akubali Masako, mke wake. “Sikujulisha kamwe tamaa yangu ya moyoni kwamba yeye pia ajifunze ule ukweli wa Kikristo.”
Toshiko, mke wa nyumbani, alihisi kama Shigeo. “Mume wangu alipoanza kujifunza na Mashahidi wa Yehova, nilipinga kwa sababu kidato kwa kidato aliongeza wakati aliotumia pamoja na kundi. Nilianza kunywa ili nijiepushe na hisia zangu alipokuwa hayupo.
Uneni wa Toshiko ulidokeza sababu nyingine—upweke. Ndivyo baadhi ya waliokuwa wapinzani walihisi wakati wenzi wao walipoenda zao kwa ukawaida kwenye mikutano yao. “Nikiwa peke yangu nyumbani, nilihisi nimeachwa pekee,” mume mmoja akumbuka. “Nilihisi kama kwamba mke wangu na watoto walikuwa wakiniacha,” asema mwingine. Kwa kuwa wanaume walio wengi huona vigumu kusema, “Mimi mpweke, tafadhali kaa nyumbani,” baadhi yao hugeukia kupinga zoea la kidini la mwenzi wao.
Msongo kutoka kwa marafiki na watu wa ukoo huenda nyakati nyingine ukaongoza kwenye upinzani kutoka kwa mwenzi ambaye kwa kawaida ni mwenye uelewevu. Husemekana kwamba katika nchi za Mashariki mke kwa ujumla “hulelewa katika familia badala ya kuunganika na mume wake.” Msongo kutoka kwa watu wa ukoo waweza kutokeza faraka kwa urahisi. Mke Mkristo wa Takashi alikataa kushiriki katika ibada kwenye madhabahu ya Kibudha ya familia. “Lenye kutatanisha mambo,” aeleza Takashi, “ni kuwa tuliishi karibu na wazazi wangu. Mama yangu alinisonga, kwa hiyo nikatisha mke wangu na kutumia jeuri.”
Kutokuelewana, kunakokuzwa mno kwa sababu ya mawasiliano yasiyo mazuri, wivu, upweke, au msongo kutoka kwa watu wa ukoo, yaweza kulipuka kuwa jeuri. Mwanamume mmoja aliyekuwa akipiga mke wake akubali hivi: “Mimi sikutaka dini ininyang’anye familia yangu.” Mwingine asema: “Mimi nilichukia kuja nyumbani kwenye nyumba iliyo tupu.” Labda wao waliwaza, ‘Ikiwa maneno hayawezi kukomesha ari hii ya kidini, makonde machache yatafanya hivyo.’
Kwa furaha, wenzi wote waliotajwa juu waliunganika katika ibada baadaye. Mambo waliyojionea yenye kuvuruga sasa yamepita. Lakini kwa kuwa waliyapitia, wako katika hali njema ya kutoa madokezo yenye kutumika ambayo yangeweza kusaidia kuondoa hali zinazoweza kulipuka na yaweza kutokeza ibada ya umoja katika familia ambazo zingali zimegawanyika katika jambo hilo.
Jibandike Kwenye Ukweli
Unaponyoosha mkono wako uvute mtu anayekufa maji, lazima wewe mwenyewe uwe umekanyaga mahali imara. Usipofanya hivyo, huenda mwisho wako pia ukawa katika maji. Vivyo hivyo, ufunguo wa kusaidia mwenzi wako ni wewe mwenyewe kushikilia imara ukweli wenye kuokoa uhai. “Upinzani wangu ulipochacha zaidi,” asema mmoja ambaye wakati mmoja alipinga, “mke wangu bado alishika watoto mkono na kwenda kwenye mikutano. Kama angelififia, huenda ningalitilia shaka kama imani yake ni halisi.”
Kazutaka, aliyepindua meza ya chakula, afunua kilichobadili mtazamo wake anapoeleza juu ya salio la hadithi yake: “Hatimaye, nilikataa kumpa Atsuko pesa za usafiri. Hata hivyo, yeye alienda kwenye mikutano yote akiandamana na watoto. Ili afanye hivyo, aliuza mali zake za kibinafsi, kidogo kidogo. Nilihisi kuwa mpumbavu nikaishiwa na nia ya kumpinga. Badala yake, nilianza kusoma magazeti aliyoacha nje ili niyaone.”
Wasiliana na mwenzi Wako
“Ningalipaswa kuwa nilimwalika mume wangu ajiunge nami na kumjulisha kwamba nilitaka tujifunze Biblia pamoja,” asema Atsuko, mke wa Kazutaka. “Yeye alihangaika juu yangu na familia. Uwasiliano mzuri ungelisaidia sana kuepusha hangaiko lake.” Ndiyo, uwasiliano mzuri ndio ufunguo wa uelewevu. Biblia yashauri hivi: “Pasipo mashauri makusudi hubatilika.” (Mithali 15:22) Katika muktadha huu, “mashauri” pamoja na mwenzi wako kuhusu utendaji wako mbalimbali wa kidini lazima yawaziwe vizuri na kufanywa kwa nadhari. “Moyo wa mwenye hekima hufundisha kinywa chake; huzidisha elimu ya midomo yake [huongeza ushawishi, NW],” yasema Biblia. (Mithali 16:23) Ni jambo lenye umaana pia kuwa na busara katika kuchagua wakati unaofaa kunena.—Mhubiri 3:7.
Unavyonena labda ni jambo la maana sawa na yale unayosema. Mtume Paulo ashauri hivi: “Maneno yenu yawe na neema sikuzote, yakikolea munyu, mpate kujua jinsi iwapasavyo kumjibu kila mtu.” (Wakolosai 4:6) Unaponena kwa neema, kwa njia ya kuvutia, mwenzi wako hataelekea sana kufunga masikio yake kuelekea unayosema.
Waume wengi huona vigumu kufunzwa na wake zao. Kwa hiyo wake wapaswa kuwa na akili nyingi. Kikuyo alitumia vizuri vichapo vya Sosaiti ya Mnara wa Mlinzi. Yeye asema: “Mara tu Amkeni! langu lilipofika na barua, ningelipitia nione habari ambazo zingependeza mume wangu. Kisha nilisali kwa ajili ya fursa ya kushiriki hizo pamoja naye.” Yeye angeacha gazeti hilo katika bafu na kuchunguza kurasa kila siku ili aone kama mume wake alikuwa amesoma makala fulani. Ilipoonekana haendelei kusoma, angebadili gazeti hilo. Sasa mume wa Kikuyo ni mtumishi wa huduma na painia.
Uwezo wa Mwenendo Mwema
Lakini vipi ikiwa mwenzi wako hana nia ya kuzungumza dini pamoja nawe? Kufahamiana na Wakristo wengine kwaweza kumaliza upinzani mkali wa mwenzi wako na kumsukuma yeye ajifunze Biblia. Masao, ambaye sasa ni mzee, wakati mmoja alikataza Mashahidi kukanyaga ndani ya nyumba yake. Yeye akumbuka hivi: “Mwishowe nilikubali funzo la Biblia pamoja na Mashahidi baada ya mke wangu kuniomba nisaidie katika kujenga Jumba la Ufalme. Mimi niliguswa kuona watu wote wakifanya kazi pamoja kwa furaha—bila ya malipo.”
Waweza kufanya nini mwenzi wako akikataa kuzungumza dini na yeyote? “Ikiwa wako wasioliamini Neno,” awaidhi mtume Petro, “wavutwe kwa mwenendo wa [wenzi wao], pasipo lile Neno.” Kwa kielelezo, ni mwenendo wa aina gani upande wa mke unaoweza kuvuta mume wake? “Mwenendo wenu safi, na wa hofu [staha ya kina kirefu, NW]” unafunua “utu wa moyoni usioonekana, katika mapambo yasiyoharibika; yaani, roho ya upole na utulivu,” asema Petro.—1 Petro 3:1-4.
Mke mmoja Mkristo alitumia kanuni hiyo wakati mume wake mpinzani alipohusika katika kashifa. Ingawa ilimvunjia heshima katika jumuiya na kumletea hasara ya kifedha, yeye hakusikia hata neno moja la lalamiko kutoka kwa mke wake au kutoka kwa watoto. “Mimi nilijua kwamba tabia yao yenye kutokeza sana ilikuwa ni kwa sababu ya funzo lao la Biblia,” mume huyo akakubali. Baada ya miaka mingi ya upinzani, yeye alianza kusoma Biblia. Waume wengine ambao baadaye walikuja kuwa Wakristo waonelea hivi: “Mimi nilikuwa mume aliyekuwa anapigiwa ubwana na mke, lakini ghafula mke wangu akanistahi kuwa kichwa cha nyumba.” “Wakati washiriki wangu wa biashara walipokuja nyumbani mwetu, mke wangu aliwakaribisha kwa uchangamfu. Nilipendezwa na hilo.”
Pia, mwenendo mzuri wa watoto, waweza kutuliza wapinzani. Alipoulizwa ni nini kilichobadili mtazamo wake, baba mmoja ambaye hapo awali alikuwa amepinga mke wake alisema: “Mwana wangu wa miaka miwili na nusu alipohisi nilikaribia kukasirika, angepaaza sauti na kukariri: ‘Upendo huvumilia, hufadhili.’” (1 Wakorintho 13:4-7) Mvulana huyu aliyefunzwa vizuri alichochea baba yake achunguze Biblia. Mababa wengi wameamua kuchunguza Biblia kwa sababu watoto wao waliwaomba wajifunze.
Mwishowe, mfikio wa uchangamfu na wa ucheshi waweza kufanya maajabu kwa mtazamo wa mwenzi wako. Mume mmoja aliambia mke wake mwamini achukue chochote alichotaka na kwenda zake, asirudi tena kamwe. “Mimi sitaki wala mtoto wangu, wala fedha, wala vitu vya kimwili,” akajibu mke wake. Kisha akatandika furoshiki kubwa (kitambaa kinachotumiwa Japani kufunga na kubebea vitu) na kusema: “Hakuna kitu kilicho na thamani kubwa kwangu zaidi yako. Wewe ingia kwenye furoshiki! Nataka kwenda nawe.” Mume huyo aliacha kupinga, akaanza kujifunza Biblia, na sasa atumikia akiwa mzee.
Ukijibandika kwenye ukweli, udumishe uwasiliano mwema, uandae ushirika unaofaa, na kujiendesha mwenyewe katika njia njema, huenda ukaweza kusaidia mwenzi wako awe mwamini. “Hata ikiwa haisikiki kama kwamba mwenzi wako anakuwa mwamini,” asema mmoja aliyekuwa mpinzani, “huenda akawa anabadilika moyoni.” Kwa hiyo usiache. Zingatia moyoni kitia-moyo cha mtume Paulo kwa wale wote wenye wenzi wasioamini: “Maana wajuaje, wewe mwanamke [mke, NW], kama utamwokoa mumeo? au wajuaje, wewe mwanamume [mume, NW], kama utamwokoa mkeo?”—1 Wakorintho 7:16.