Ni Mungu Yupi Ambaye Wewe Unapaswa Kuabudu?
KWANZA, ni Mungu gani mmoja tu anayepasa kuabudiwa? Biblia inajibu kwa njia nyoofu sana. Kitabu cha Ufunuo kinajulisha wazi hivi: “Umestahili wewe, Bwana [Yehova, NW] wetu na Mungu wetu, kuupokea utukufu na heshima na uweza; kwa kuwa wewe ndiwe uliyeviumba vitu vyote, na kwa sababu ya mapenzi yako vilikuwako, navyo vikaumbwa.” (Ufunuo 4:11) Ndiyo, Yehova, Muumba, ndiye Mungu wa pekee anayestahili ibada yetu. Kwa nini? Tutarudia swali hilo baada ya muda mfupi. Lakini kwanza, acheni tuongee juu ya miungu mingine inayoabudiwa na ainabinadamu.
Nyuma ya Miungu Yote Isiyo ya Kweli
Ingawa wanadamu wanatumikia miungu mingi, ukweli ni kwamba ibada yote ambayo miungu yote katika mataifa yote yanapewa—mbali na ibada anayopewa Yehova, Muumba—inatimiza kusudi la mungu mmoja tu. Kwa njia gani? Soma maneno ya mtume Paulo kwa Wakristo katika Korintho. Katika jiji hilo miungu mingi iliabudiwa, kuanzia Afrodito wa matendo ya uasherati kufikia Aeskulapio, mungu wao wa kuponya. Hata hivyo, Paulo alionyesha kwamba kwa kweli kulikuwako nguvu moja tu yenye kujificha nyuma ya miungu yote hiyo. Aliandika hivi: “Vitu Mataifa wanavyotoa, wanavitolea mashetani, wala si kwa Mungu.” (1 Wakorintho 10:20, ZSB) Ndiyo, Wakorintho wapagani waliabudu roho waovu.
Roho waovu walianza kwa uasi. Aliye wa kwanza na mkubwa zaidi kati yao alikuwa yule kiumbe malaika aliyetongoza Hawa kuvunja sheria ya Mungu huko nyuma katika bustani ya Edeni. (Mwanzo 3:1-6; Yohana 8:44) Kwa kufanya hivi, kiumbe huyu aliasi enzi kuu ya Muumba. Baadaye, akaja kuitwa Shetani, maana yake “Mpingaji.” Nyumaye, viumbe roho wengine walijiunga naye katika uasi. Wao pia wakawa roho waovu, na Shetani anatambulishwa kuwa ‘mkubwa wa pepo wachafu.’ (Mathayo 12:24, 26, ZSB) Katika kitabu cha Ufunuo, hawa roho (pepo) waovu wanaitwa “malaika” za Shetani. (Ufunuo 12:7) Hivyo basi kuabudu roho waovu ni sawa na kuabudu Shetani.
Shetani ana uvutano mkubwa sana. Mtume Yohana alisema kwamba “ulimwengu mzima” umo katika nguvu zake, na Paulo alimwita “mungu wa huu mfumo wa mambo.” (1 Yohana 5:19; 2 Wakorintho 4:4, NW) Hivyo, kuabudu mungu yeyote mbali na Yehova kwa kweli ni kuabudu Shetani. Angalau kabisa, hiyo inatimiza makusudi ya Shetani kwa sababu lengo lake ni kutongoza watoto wa Adamu na Hawa kumwasi Yehova. Kwa kuwa Shetani “anaongoza vibaya dunia nzima yote inayokaliwa,” kwa wazi amefanikiwa katika visa vingi sana. (Ufunuo 12:9, NW) Lakini si katika visa vyote. Kungali kuna mamilioni wanaojitahidi kuabudu Yehova. Kwa sababu gani?
Matunda ya Ibada Isiyofaa
Kwanza, wanajua kwamba kuabudu miungu mingine ambayo si Yehova kuna bei kubwa kuliko ile wanayotaka kulipa. Machimbuo ya vitu vya kale yaliyofanywa Carthage ya kale katika Afrika ya Kaskazini yalifukua uwanja wa makaburi ya watoto. Ndani mlikuwa na magofu ya mifupa ya watoto waliokuwa wametolewa dhabihu kwa Baali mungu Mfoinike. Kudhabihu watoto ndiyo bei mbaya sana ambayo watu wa Carthage walilipa kwa kuabudu Baali. Ukatoliki wa zile enzi za kati ulitoza bei fulani pia ulipoleta mateso yasiyo na kipimo katika Vita vya Msalaba vyenye kiu ya kumwaga damu na Mabaraza ya Mateso ya ukatili. Ibada ya miungu ya Wainka katika Amerika iliyokuwa haijavumbuliwa bado na Columbus ilitia ndani uuaji wa maelfu kwa desturi ya ibada.
Katika nyakati za ki-siku-hizi, namna tofauti za ibada zimehusika katika machinjo ya ujumla katika India, na zimechangia matatizo mazito ya kisiasa katika Mashariki ya Kati na Ailandi ya Kaskazini. Kukosa maarifa, woga wa kishirikina, na hofu ni mambo yapasayo pia kutiwa katika orodha kuwa sehemu ya bei ambayo binadamu analipa kwa ajili ya ibada ya miungu yake mingi.
Kwa Sababu Gani Unapaswa Kutumikia Yehova Mungu?
Kwa upande mwingine, kuabudu Yehova kunaleta faida tu. Kwanza, yeye ndiye “aliye hai hata milele na milele, aliyeumba mbingu na vitu vilivyo ndani yake, na dunia na vitu vilivyo ndani yake, na bahari na vitu vilivyo ndani yake.” (Ufunuo 10:6, ZSB) Hivyo, sisi tunapaswa kuabudu yeye kwa sababu ndiye Muumba wetu.
Zaidi ya hilo, tunapaswa kuabudu Yehova Mungu kwa sababu sifa zake zinatualika kuabudu yeye. Mtume Yohana alisema kwamba “Mungu ni upendo.” (1 Yohana 4:8) Yule mwanamume mwaminifu Ayubu alisema kwamba “[Mungu] ni mwenye hekima moyoni, na mwenye uwezo katika nguvu.” (Ayubu 9:4) Musa aliimba hivi juu yake: “Yeye Mwamba, kazi yake ni kamilifu; maana, njia zake zote ni haki. Mungu wa uaminifu, asiye na uovu, yeye ndiye mwenye haki na adili.” (Kumbukumbu 32:4) Ni nani angesita-sita kutumikia Mungu wa jinsi hiyo?
Kwa kuongezea, Biblia inasema hivi: “Utawa [ujitoaji kimungu, NW] una ahadi ya uzima wa sasa na wa ule utakaokuja.” (1 Timotheo 4:8, ZSB) Hili ni jambo la kweli kama nini! Yehova anataka lililo jema kwa ajili ya ainabinadamu. Yeye aliandaa dunia iwe makao ya kupendeza kwa ajili ya uumbaji wake, na alifanya uandalizi mwingi ili maisha yaweze kuonewa shangwe. Ijapokuwa uasi wa mwanadamu, Mungu ameendelea kutegemeza uhai katika dunia hii, akitoa mahitaji yote ya kimwili ya ainabinadamu “anaangazia jua lake waovu na wema, naye ananyeshea mvua wenye haki na wasio haki.”—Mathayo 5:45, ZSB.
Lakini “ahadi ya uzima wa sasa” ni zaidi ya hilo. Kutumikia Mungu kunatosheleza na kutimiza matazamio. Sisi tuliumbwa ili tufanye hivyo. Na Mungu anasaidia wale wanaotumikia yeye kwa uaminifu wafanikiwe maishani. Kupitia Biblia, yeye anatoa mwongozo kwa watu ambao hawajafunga ndoa, waliofunga ndoa, watoto—watu katika namna zote za maisha. Anatoa hekima yenye kutegemeka na kutumika ili kusaidia katika hali zote ili tuweze kutatua matatizo ya maisha tukiwa wanadamu wasiokamilika katika ulimwengu ulio chini ya uvutano wa Shetani. Tukiabudu Mungu katika njia inayopendeza yeye, tunaweza kuona shangwe ya “amani ya Mungu, ipitayo akili [fikira, NW] zote.”—Wafilipi 4:7.
Inayostahili kuangaliwa, pia, ni “ahadi ya uzima . . . utakaokuja.” Yesu aliambia Farisayo Nikodemo hivi: “Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.” (Yohana 3:16) Uzima wa milele! Ni mungu gani mwingine isipokuwa Yehova anayeweza kuahidi jambo la jinsi hiyo halafu atimize ahadi yake? Hali ya mwisho ya wenye kupokea zawadi hiyo tukufu inaelezwa katika Ufunuo: “[Mungu] atayafuta machozi yao yote; maana hakutakuwako tena na kifo, wala uchungu, wala kilio, wala maumivu; maana ile hali ya kale imepita.” (Ufunuo 21:4, 5, HNWW) Kwa kweli, matazamio ya uzima utakaokuja yanapasa kutufanya tutake kutumikia Yehova!
Basi, inatupasa kuabudu mungu gani? Yehova peke yake, yule Muumba. Kati ya miungu yote, ni kwake pekee maneno haya yanatumika: “Ni makuu, na ya ajabu, matendo yako, Ee Bwana [Yehova, NW] Mungu Mwenyezi; Ni za haki, na za kweli, njia zako, Ee Mfalme wa mataifa [wa umilele, NW]. Ni nani asiyekucha, Ee Bwana [Yehova, NW], na kulitukuza jina lako? kwa kuwa wewe peke yako u Mtakatifu [mwaminifu-mshikamanifu, NW]; kwa maana mataifa yote watakuja na kusujudu mbele zako; kwa kuwa matendo yako ya haki yamekwisha kufunuliwa.” (Ufunuo 15:3, 4) Ni wenye hekima kama nini wale wanaoitikia himizo la mtunga zaburi: “Njoni, tuabudu, tusujudu, tupige magoti mbele za BWANA [Yehova, NW] aliyetuumba”!—Zaburi 95:6.
[Picha katika ukurasa wa 6]
Mingine ya miungu ambayo Shetani ameongoza ainabinadamu kuabudu
[Picha katika ukurasa wa 7]
Matazamio ya uzima ambao utakuja yanapasa kutufanya tutake kutumikia Yehova