Mtumaini Yehova na Neno Lake

“Nao wakujuao jina lako wa[ta]kutumaini Wewe.”—ZABURI 9:10.

1. Kwa nini twaweza bado kuwa na uhakika katika Yehova na Neno lake katika siku yetu ya kisasa?

KATIKA ulimwengu huu wa kisasa, mwaliko wa kumtumaini Mungu na Neno lake, Biblia, huenda usionekane kuwa jambo linalofaa na la kihalisi. Hata hivyo, hekima ya Mungu imethibitika kuwa ya kweli na ifaayo kwa kipindi kirefu cha wakati. Muumba wa mwanamume na mwanamke ndiye Mwanzilishi wa ndoa na familia, naye ajua mahitaji yetu vizuri kuliko mtu mwingine yeyote ajuavyo. Kama vile mahitaji ya msingi ya kibinadamu hayajabadilika, ndivyo njia za msingi za kutimiza mahitaji hayo zimebaki zilezile. Shauri la Biblia lenye hekima, ingawa liliandikwa karne kadhaa zilizopita, bado huandaa mwongozo ulio bora zaidi ili kuwa na mafanikio katika maisha na katika kusuluhisha matatizo. Kulitii hutokeza furaha nyingi—hata katika ulimwengu tunamoishi wenye maendeleo mengi, na ulio wa kisayansi!

2. (a) Kutii amri za Mungu kumetokeza matunda gani mazuri maishani mwa watu wa Yehova? (b) Yehova huahidi nini zaidi kwa wale ambao ni watiifu kwake na kwa Neno lake?

² Kumtumaini Yehova na kutumia kanuni za Biblia huleta manufaa zenye kusaidia kila siku. Ithibati ya hilo huonekana katika maisha za mamilioni ya Mashahidi wa Yehova kotekote ulimwenguni ambao wamekuwa na usadikisho na moyo mkuu wa kutumia shauri la Biblia. Kwao, kumtumaini Muumba na Neno lake kumethibitika kuwa jambo lifaalo. (Zaburi 9:9, 10) Kutii amri za Mungu kumewafanya wawe watu bora zaidi kwa habari ya usafi, ufuatiaji wa haki, bidii ya kufanya kazi, kustahi uhai na mali za wengine, na kuwa na kiasi katika chakula na kinywaji. Kumeongoza kwenye upendo na mazoezi yafaayo katika familia—kuwa wakaribishaji-wageni, wenye subira, wenye rehema, na wenye kusamehe—na pia kuhusiana na mambo mengine mengi. Wameweza kwa kadiri kubwa kuepuka matunda mabaya ya hasira, chuki, uuaji wa kimakusudi, husuda, hofu, uvivu, kiburi, kusema uwongo, uchongezi, ngono za ovyo-ovyo, na ukosefu wa adili. (Zaburi 32:10) Lakini Mungu hufanya zaidi kuliko kuahidi matokeo mazuri kwa wale wanaofuata sheria zake. Yesu alisema kwamba wale wafuatao njia ya Kikristo wangepokea “mara mia sasa wakati huu, . . . mama, na watoto, na mashamba, pamoja na udhia; na katika ulimwengu ujao uzima wa milele.”—Marko 10:29, 30.

Epuka Kutumaini Hekima ya Kilimwengu

3. Katika kuendelea kumtumaini Yehova na Neno lake, Wakristo hukabili matatizo gani nyakati nyingine?

³ Tatizo kwa wanadamu wasio wakamilifu ni kwamba wao huelekea kupunguza au kusahau yale atakayo Mungu. Wao huanza kwa urahisi kufikiri kwamba wanajua mengi zaidi au kwamba hekima kutoka kwa wenye akili wa ulimwengu huu ni bora zaidi kuliko ya Mungu, kwamba hiyo ni ya kisasa zaidi. Watumishi wa Mungu waweza pia kusitawisha mtazamo huu, kwa sababu wanaishi katika ulimwengu huu. Hivyo, katika kutoa ule mwaliko wenye upendo wa kusikiliza shauri lake, Baba yetu wa kimbingu hutia ndani pia maonyo yanayofaa: “Mwanangu, usiisahau sheria yangu, bali moyo wako uzishike amri zangu. Maana zitakuongezea wingi wa siku. Na miaka ya uzima, na amani. Mtumaini BWANA kwa moyo wako wote, wala usizitegemee akili zako mwenyewe; katika njia zako zote mkiri yeye, naye atayanyosha mapito yako. Usiwe mwenye hekima machoni pako; mche BWANA, ukajiepushe na uovu.”—Mithali 3:1, 2, 5-7.

4. “Hekima ya ulimwengu huu,” ni ya kuenea jinsi gani, na ni kwa nini hiyo ni “upumbavu kwa Mungu”?

⁴ Hekima ya ulimwengu huu inapatikana kwa wingi na kutoka vyanzo vingi. Kuna taasisi nyingi za masomo, na “hakuna mwisho wo wote wa kutunga vitabu vingi.” (Mhubiri 12:12) Sasa ile yenye kuitwa isivyofaa, njia kuu bora ya habari ya ulimwengu wa kompyuta inaahidi kuandaa data isiyo na mwisho kuhusu karibu habari yoyote ile. Lakini kuwa na ujuzi huo wote hakufanyi ulimwengu uwe wenye hekima zaidi wala hakusuluhishi matatizo yao. Badala ya hivyo, hali ya ulimwengu huzidi kuwa mbaya kila siku. Kwa kueleweka, Biblia hutuambia kwamba “hekima ya ulimwengu huu ni upumbavu kwa Mungu.”—1 Wakorintho 3:19, 20, NW.

5. Biblia hutoa maonyo gani kuhusiana na ‘hekima ya ulimwengu huu’?

⁵ Katika sehemu hii ya mwisho ya siku za mwisho, ni jambo la kutazamiwa tu kwamba mdanganyi mkuu, Shetani Ibilisi, angeanzisha mporomoko wa uwongo mbalimbali katika jitihada ya kudhoofisha uhakika wa ukweli wa Biblia. Wahakiki wa Biblia wametokeza vitabu vingi mno vya kukisiakisia vinavyopinga uasilia na kutegemeka kwa Biblia. Paulo alimwonya Mkristo mwenzake hivi: “Ee Timotheo, ilinde hiyo amana; ujiepushe na maneno yasiyo ya dini, yasiyo na maana, na mashindano ya elimu iitwayo elimu kwa uongo; ambayo wengine wakiikiri hiyo wameikosa Imani.” (1 Timotheo 6:20, 21) Biblia huendelea kuonya hivi: “Angalieni mtu asiwafanye mateka kwa elimu yake ya bure na madanganyo matupu, kwa jinsi ya mapokeo ya wanadamu, kwa jinsi ya mafundisho ya awali ya ulimwengu, wala si kwa jinsi ya Kristo.”—Wakolosai 2:8.

Piga Vita Dhidi ya Mwelekeo wa Kushuku

6. Kwa nini bidii nyingi ni ya lazima ili kuzuia shaka zisitie mizizi moyoni?

⁶ Mbinu nyingine yenye hila ya Ibilisi ni kupanda shaka akilini. Yeye yu macho sikuzote ili kuona udhaifu fulani katika imani na kuutumia kwa faida yake. Wowote ambao huona shaka wapaswa wakumbuke kwamba yule anayeanzisha shaka hizo ni yule aliyemwambia Hawa hivi: “Ati! hivi ndivyo alivyosema Mungu, Msile matunda ya miti yote ya bustani?” Mara Mshawishi alipokuwa amepanda shaka akilini mwa Hawa, hatua iliyofuata ilikuwa ni kumwambia uwongo, ambao yeye aliamini. (Mwanzo 3:1, 4, 5) Ili kuepuka kuharibiwa kwa imani yetu na shaka, kama vile ya Hawa ilivyoharibiwa, twahitaji kuwa wenye bidii. Ikiwa kiasi chochote kidogo cha shaka kumhusu Yehova, Neno lake, au tengenezo lake kimeanza kuendelea sana moyoni mwako, chukua hatua upesi za kukiondolea mbali kabla ya hicho kusitawi na kuwa jambo ambalo lingeweza kuharibu imani yako.—Linganisha 1 Wakorintho 10:12.

7. Ni nini chaweza kufanywa ili kuondolea mbali shaka?

⁷ Ni nini kiwezacho kufanywa? Tena, jibu ni kumtumaini Yehova na Neno lake. “Mtu wa kwenu akipungukiwa na hekima, na aombe dua kwa Mungu, awapaye wote, kwa ukarimu, wala hakemei; naye atapewa. Ila na aombe kwa imani, pasipo shaka yo yote; maana mwenye shaka ni kama wimbi la bahari lililochukuliwa na upepo, na kupeperushwa huku na huku.” (Yakobo 1:5, 6; 2 Petro 3:17, 18) Kwa hiyo sala yenye bidii kwa Yehova ndiyo hatua ya kwanza. (Zaburi 62:8) Halafu, usisite kuomba msaada kutoka kwa waangalizi wenye upendo kutanikoni. (Matendo 20:28; Yakobo 5:14, 15; Yuda 22) Wao watakusaidia upate kujua chanzo cha shaka zako, ambazo huenda zikawa kwa sababu ya kiburi au kufikiri fulani kubaya.

8. Kufikiri kwa njia ya uasi-imani huanzaje mara nyingi, na suluhisho ni nini?

⁸ Je, kusoma au kusikiliza mawazo ya uasi-imani au falsafa ya kilimwengu ndiko kumeanzisha shaka zenye sumu? Kwa hekima, Biblia hushauri hivi: “Jitahidi kujionyesha kuwa umekubaliwa na Mungu, mtenda kazi asiye na sababu ya kutahayari, ukitumia kwa halali neno la kweli. Jiepushe na maneno yasiyo na maana, ambayo si ya dini; kwa kuwa wataendelea zaidi katika maovu, na neno lao litaenea kama donda-ndugu.” (2 Timotheo 2:15-17) Ni jambo la kupendeza kwamba wengi ambao wameathiriwa na uasi-imani walianza kwenye njia mbaya kwa kulalamika kwanza juu ya jinsi walihisi walivyokuwa wakitendewa katika tengenezo la Yehova. (Yuda 16) Kuona makosa katika imani kulifuata baadaye. Kama vile daktari-mpasuaji hutenda upesi ili kukatilia mbali donda-ndugu, tenda upesi kuondolea mbali kutoka akilini mwelekeo wowote wa kulalamika, wa kutoridhika na njia ambayo mambo yanafanywa katika kutaniko la Kikristo. (Wakolosai 3:13, 14) Ondolea mbali jambo lolote lichochealo shaka hizo.—Marko 9:43.

9. Kawaida nzuri ya kitheokrasi itatusaidiaje tuendelee tukiwa wenye afya katika imani?

⁹ Shikamana kwa ukaribu na Yehova na tengenezo lake. Mwige Petro kwa uaminifu-mshikamanifu, aliyesema hivi kwa kuazimia: “Bwana! Twende kwa nani? Wewe unayo maneno ya uzima wa milele.” (Yohana 6:52, 60, 66-68) Uwe na ratiba nzuri ya funzo la Neno la Yehova ili kudumisha imani yako ikiwa imara, kama vile ngao, iwezayo “kuizima mishale yote yenye moto ya yule mwovu.” (Waefeso 6:16) Endelea kuwa mwenye bidii katika huduma ya Kikristo, ukishiriki na wengine kwa upendo ujumbe wa Ufalme. Kila siku, tafakari kwa uthamini juu ya jinsi Yehova amekubariki. Uwe mwenye shukrani kwamba una ujuzi juu ya kweli. Kufanya mambo yote hayo katika kawaida nzuri ya Kikristo kutakusaidia uwe mwenye furaha, uvumilie, na ubaki bila shaka.—Zaburi 40:4; Wafilipi 3:15, 16; Waebrania 6:10-12.

Kufuata Mwelekezo wa Yehova Katika Ndoa

10. Kwa nini ni jambo la maana hasa kumwendea Yehova ili kupata mwongozo katika ndoa ya Kikristo?

¹⁰ Katika kupanga kwamba mwanamume na mwanamke waishi pamoja wakiwa mume na mke, Yehova hakukusudia kuijaza tu dunia kwa njia ifaayo bali pia kuongezea furaha yao. Hata hivyo, dhambi na kutokamilika kumeleta matatizo mazito katika uhusiano wa ndoa. Wakristo huwa nayo pia, kwa kuwa wao pia si wakamilifu nao hupatwa na mikazo ya maisha ya siku za kisasa. Bado, kwa kadiri ambayo wao wanamtumaini Yehova na Neno lake, Wakristo wanaweza kuwa na mafanikio mazuri katika ndoa na katika kulea watoto wao. Hakuna nafasi ya mazoea na mwenendo wa kilimwengu katika ndoa ya Kikristo. Neno la Mungu hutuonya hivi kwa upole: “Ndoa na iheshimiwe na watu wote, na malazi yawe safi; kwa maana waasherati na wazinzi Mungu atawahukumia adhabu.”—Waebrania 13:4.

11. Katika kusuluhisha matatizo ya kindoa, ni nini chapasa kutambuliwa na wenzi wote wawili?

¹¹ Ndoa ambayo imetimizwa kulingana na shauri la Biblia ina hali ya upendo, wajibu, na usalama. Wote mume na mke huelewa na kustahi kanuni ya ukichwa. Magumu yanapotokea, mara nyingi hayo ni kwa sababu ya kupuuza kutumia shauri la Biblia. Katika kusuluhisha tatizo lenye kuendelea sana, ni muhimu kwamba wenzi wote wawili wakaze fikira kwa unyoofu juu ya tatizo ni nini kwa kweli na washughulikie visababishi badala ya dalili. Ikiwa mazungumzo ya juzijuzi yamefanya mume na mke wakubaliane kidogo tu au wasikubaliane kabisa, wao waweza kuomba msaada usio na upendeleo kutoka kwa mwangalizi mwenye upendo.

12. (a) Biblia huandaa shauri juu ya matatizo gani ya kawaida katika ndoa? (b) Kwa nini kuna uhitaji kwa upande wa wenzi wote wawili kufanya mambo kwa njia ya Yehova?

¹² Je, tatizo linahusu uwasiliano, kustahi hisia za mmoja na mwenzake, kustahi ukichwa, au jinsi maamuzi yanavyofanywa? Je, linahusu kulea watoto, au kuwa na usawaziko kuhusiana na mahitaji ya kingono? Au ni matumizi ya fedha ya familia, tafrija, mashirika, kama mke apaswa awe na kazi ya kuajiriwa, au ni wapi mwapaswa kuishi? Tatizo liwe ni nini, Biblia hutoa shauri lifaalo iwe ni moja kwa moja kupitia sheria au kwa njia isiyo ya moja kwa moja kupitia kanuni. (Mathayo 19:4, 5, 9; 1 Wakorintho 7:1-40; Waefeso 5:21-23, 28-33; 6:1-4; Wakolosai 3:18-21; Tito 2:4, 5; 1 Petro 3:1-7) Wenzi wote wawili wanapoepuka kudai mambo kwa njia ya ubinafsi na wanaporuhusu upendo uonyeshwe kikamili katika ndoa yao, tokeo ni furaha kubwa zaidi. Wenzi wa ndoa wote wawili wapaswa kutamani sana kufanya mabadiliko yanayohitajiwa, ili kufanya mambo kwa njia ya Yehova. “Atakayelitafakari neno atapata mema; na kila amwaminiye BWANA ana heri.”—Mithali 16:20.

Vijana—Sikilizeni Neno la Mungu

13. Kwa nini si rahisi kwa vijana Wakristo kukua wakiwa na imani imara katika Yehova na Neno lake?

¹³ Si rahisi kwa vijana Wakristo kukua wakiwa imara katika imani wakati ambapo ulimwengu mwovu umewazunguka kotekote. Sababu moja ni kwamba “ulimwengu wote unatawaliwa na yule mwovu,” Shetani Ibilisi. (1 Yohana 5:19, HNWW) Vijana wanashambuliwa na adui huyu mwovu awezaye kufanya mabaya yaonekane kuwa mazuri. Mitazamo ya mimi-kwanza, kujitakia makuu kwa ubinafsi, kutamani sana mambo yasiyo ya adili na yaliyo makatili, na ufuatiaji wa anasa wa kupita kiasi—yote hayo yanajumuika kuwa katika kile kigezo kimoja kikuu cha kufikiria kinachofafanuliwa katika Biblia kuwa ‘roho ile itendayo kazi sasa katika wana wa kuasi.’ (Waefeso 2:1-3) Shetani ameiendeleza “roho” hiyo kwa ujanja katika vitabu vya mafundisho vya shule, katika muziki mwingi unaopatikana, katika michezo, na katika namna nyinginezo za vitumbuizo. Wazazi wahitaji wawe macho kusawazisha mivutano ya jinsi hiyo kwa kuwasaidia watoto wao wakue wakimtumaini Yehova na Neno lake.

14. Vijana waweza ‘kuzikimbiaje tamaa za ujanani’?

¹⁴ Paulo alitoa shauri hili la kibaba kwa mshiriki wake kijana Timotheo: “Zikimbie tamaa za ujanani; ukafuate haki, na imani, na upendo, na amani, pamoja na wale wamwitao Bwana kwa moyo safi.” (2 Timotheo 2:22) Ingawa si “tamaa [zote] za ujanani” zilizo mbaya, vijana wapaswa ‘wazikimbie’ kwa habari ya kwamba hawapaswi kuruhusu hizo ziwashughulishe sana, zikiacha wakati mchache, ikiwa zawacha wakati wowote, kwa ufuatiaji wa kimungu. Kuujenga mwili, michezo, muziki, vitumbuizo, ufuatiaji wa mambo yenye kupendeza, na kusafiri, ingawa si lazima kuwe ni kubaya, kwaweza kuwa mtego kukiwa mambo ya maana maishani. Yakimbie kabisa mazungumzo yasiyo na kusudi, kuzurura-zurura, kupendezwa na ngono kupita kiasi, kukaa kitako tu na kuwa mwenye kuchoshwa, na kulalamika kwamba wazazi wako hawakuelewi.

15. Ni mambo gani yawezayo kutendeka katika faragha ya nyumbani ambayo yaweza kuchangia kule kuishi maisha maradufu kwa vijana?

¹⁵ Hata katika faragha ya nyumbani, hatari yaweza kuwaotea vijana. Ikiwa programu za televisheni na vidio zisizo za adili au zenye jeuri zinatazamwa, tamaa ya kufanya mambo mabaya ingeweza kupandwa. (Yakobo 1:14, 15) Biblia hushauri hivi: “Enyi mmpendao BWANA, uchukieni uovu.” (Zaburi 97:10; 115:11) Yehova ajua ikiwa mtu yeyote anajaribu kuishi maisha maradufu. (Mithali 15:3) Vijana Wakristo, angalieni vyumba vyenu. Je, wewe hubandika ukutani picha za wahusika wakuu wa ulimwengu wa michezo na muziki wasio na adili, ama wabandika ukutani mambo yanayofaa ambayo ni vikumbusha vizuri? (Zaburi 101:3) Katika kabati yako, je, una mavazi yenye kiasi, au baadhi ya nguo zako huonyesha ile mitindo ya mavazi yenye kupita kiasi ya ulimwengu huu? Kwa njia zenye hila Ibilisi aweza kukunasa ukijiruhusu kushindwa na kishawishi cha kujaribu lililo baya. Biblia hushauri hivi kwa hekima: “Mwe na kiasi na kukesha; kwa kuwa mshitaki wenu Ibilisi, kama simba angurumaye, huzunguka-zunguka, akitafuta mtu ammeze.”—1 Petro 5:8.

16. Shauri la Biblia laweza kumsaidiaje kijana afanye watu wote wenye maana waone fahari kwa ajili yake?

¹⁶ Biblia hukuambia uangalie mashirika yako. (1 Wakorintho 15:33) Waandamani wako wapaswa wawe wale wanaomhofu Yehova. Usijiruhusu kushindwa na msongo wa marika. (Zaburi 56:11; Mithali 29:25) Uwe mtiifu kwa wazazi wako wenye kumhofu Mungu. (Mithali 6:20-22; Waefeso 6:1-3) Waendee wazee ili kupata mwelekezo na kitia-moyo. (Isaya 32:1, 2) Weka akili na macho yako juu ya kanuni na miradi ya kiroho. Tafuta fursa za kufanya maendeleo ya kiroho na kushiriki katika utendaji mbalimbali wa kutaniko. Jifunze jinsi ya kufanya mambo kwa mikono yako mwenyewe. Kua ukiwa imara na mwenye afya katika imani, ndipo utakapothibitisha kwamba wewe kwa kweli ni mtu wa maana—mtu astahiliye uhai katika ulimwengu mpya wa Yehova! Baba yetu wa kimbingu ataona fahari kwa ajili yako, wazazi wako wa kidunia watapendezwa nawe, na ndugu na dada zako Wakristo watatiwa moyo nawe. Hilo ndilo jambo la maana!—Mithali 4:1, 2, 7, 8.

17. Ni manufaa zipi zinazowajia wale wanaomtumaini Yehova na Neno lake?

¹⁷ Kwa kutumia fungu la maneno la kishairi mtunga-zaburi alipuliziwa kuandika hivi: “[Yehova] hatawanyima kitu chema hao waendao kwa ukamilifu. Ee BWANA wa majeshi, heri [“mwenye furaha ni,” NW] mwanadamu anayekutumaini Wewe.” (Zaburi 84:11, 12) Ndiyo, wale wote wanaomtumaini Yehova na Neno lake, Biblia, watapata furaha na mafanikio, si hali ya kufadhaika na kutofaulu.—2 Timotheo 3:14, 16, 17.

Ungejibuje?

◻ Kwa nini Wakristo wasitumaini “hekima ya ulimwengu huu”?

◻ Ni nini chapasa kufanywa ikiwa mtu anapata shaka?

◻ Kufanya mambo kwa njia ya Yehova huletaje mafanikio na furaha katika ndoa?

◻ Biblia huwasaidiaje vijana ‘wazikimbie tamaa za ujanani’?

[Picha katika ukurasa wa 23]

Wakristo hugeukia Yehova na Neno lake, huku wakikataa katakata “hekima ya ulimwengu huu” kuwa upumbavu

[Picha katika ukurasa wa 25]

Familia zinazomtumaini Yehova na Neno lake zina mafanikio mazuri na furaha