“Endelea Kunifuata”

1-3. (a) Yesu alifanya nini alipokuwa akiwaacha mitume wake, na kwa nini pindi hiyo ya kuagana haikuwa yenye kuhuzunisha? (b) Kwa nini tunahitaji kujifunza kuhusu mambo ambayo Yesu amekuwa akifanya tangu aliporudi mbinguni?

WANAUME 11 wamesimama pamoja mlimani wakimtazama mtu fulani kwa upendo na heshima kubwa. Mtu huyo si mwingine ila Yesu aliyefufuliwa, naye amejivika umbo la kibinadamu. Kwa mara nyingine tena, ndiye mwenye nguvu zaidi kati ya wana wa roho wa Yehova. Yesu amewakusanya mitume wake wawe pamoja naye kwenye Mlima wa Mizeituni kwa mara ya mwisho.

² Bila shaka, kuwa kwenye mlima huo, ambao ni sehemu ya vilima vilivyo ng’ambo ya pili ya Bonde la Kidroni kutoka Yerusalemu, kunamkumbusha Yesu mambo mengi. Jiji la Bethania, ambako Yesu alimfufua Lazaro, liko kwenye miteremko ya mlima huo. Majuma machache yaliyotangulia, Yesu alikuwa katika eneo la karibu la Bethfage alipoanza safari yenye shangwe ya ushindi ya kuingia Yerusalemu. Huenda kwenye Mlima wa Mizeituni ndiko ilikokuwa bustani ya Gethsemane, ambako Yesu alikuwa saa chache kabla ya kukamatwa akiwa na mfadhaiko mkubwa. Sasa, akiwa kwenye mlima huohuo, Yesu anajitayarisha kuwaacha rafiki zake wa karibu na wafuasi wake. Anawaaga kwa maneno yenye fadhili. Kisha anaanza kuinuka kutoka duniani! Mitume wanasimama tuli, huku wakimtazama Bwana wao mpendwa akiinuliwa juu angani. Mwishowe, wingu linamfunika, nao hawamwoni tena.​—Matendo 1:6-12.

³ Huenda hiyo ingeonekana kuwa pindi yenye kuhuzunisha kwa sababu ilikuwa ni pindi ya mwisho ambayo Yesu angekuwa pamoja na mitume wake. Lakini malaika wawili waliwatia moyo mitume. (Matendo 1:10, 11) Katika njia nyingi, kuondoka kwa Yesu kwenda mbinguni ni mwanzo tu. Neno la Mungu halituachi gizani kuhusu mambo yaliyofuata maishani mwa Yesu. Ni muhimu kujifunza kuhusu mambo ambayo Yesu amekuwa akifanya tangu alipoondoka duniani. Kwa nini? Kumbuka maneno ambayo Yesu alimwambia Petro: “Endelea kunifuata.” (Yohana 21:19, 22) Sisi sote tunapaswa kutii amri hiyo, si katika hali fulani tu, bali katika maisha yetu yote. Ili kufanya hivyo, tunahitaji kuelewa yale ambayo Bwana wetu anafanya sasa na migawo ambayo amepewa mbinguni.

Maisha ya Yesu Tangu Alipoondoka Duniani

4. Biblia ilifunuaje mapema mambo ambayo yangetendeka mbinguni baada ya Yesu kurudi huko?

⁴ Maandiko hayasemi chochote kuhusu jinsi Yesu alivyofika mbinguni, jinsi alivyokaribishwa, na shangwe ya kuungana tena na Baba yake. Hata hivyo, Biblia ilifunua mapema mambo ambayo yangetendeka mbinguni muda mfupi baada ya Yesu kurudi huko. Kwa zaidi ya karne 15, Wayahudi walikuwa na sherehe fulani takatifu kwa ukawaida. Siku moja kila mwaka, kuhani mkuu aliingia Patakatifu Zaidi pa hekalu ili anyunyize damu ya dhabihu zilizotolewa Siku ya Upatanisho mbele ya sanduku la agano. Siku hiyo, kuhani mkuu aliwakilisha kile ambacho Masihi angefanya wakati ujao. Baada ya kurudi mbinguni, Yesu alitimiza maana ya kinabii ya sherehe hiyo mara moja kwa wakati wote. Aliingia mbinguni mbele za utukufu wa Yehova—mahali patakatifu zaidi katika ulimwengu wote—na kumpa Baba yake thamani ya dhabihu yake ya fidia. (Waebrania 9:11, 12, 24) Je, Yehova aliikubali?

5, 6. (a) Ni nini kinachoonyesha kwamba Yehova aliikubali dhabihu ya fidia ya Kristo? (b) Ni nani wanaonufaika na fidia, nao wananufaikaje?

⁵ Jibu linapatikana kwa kuchunguza mambo yaliyotokea siku chache baada ya Yesu kurudi mbinguni. Kikundi kidogo cha Wakristo 120 hivi kilikuwa kimekusanyika Yerusalemu katika chumba cha juu wakati ambapo kelele kama ya upepo wenye nguvu unaovuma ilitokea ghafla na kujaza mahali hapo. Ndimi kama za moto zilionekana juu ya vichwa vyao, wakajazwa roho takatifu, nao wakaanza kusema katika lugha mbalimbali. (Matendo 2:1-4) Tukio hilo lilionyesha kuzaliwa kwa taifa jipya, Israeli la kiroho, ambalo lilikuwa “jamii [mpya] iliyochaguliwa” ya Mungu na “ukuhani wa kifalme” ambao ungetimiza mapenzi ya Mungu duniani. (1 Petro 2:9) Ni wazi kwamba Yehova Mungu aliipokea na kuikubali dhabihu ya fidia ya Kristo. Kumiminwa huko kwa roho takatifu ni mojawapo ya baraka za kwanza zilizotokana na fidia hiyo.

⁶ Tangu wakati huo, fidia ya Kristo imewanufaisha wafuasi wake ulimwenguni pote. Iwe sisi ni miongoni mwa “kundi dogo” la watiwa-mafuta, watakaotawala pamoja na Kristo mbinguni, au miongoni mwa “kondoo wengine,” watakaoishi chini ya utawala wake hapa duniani, tunanufaika na dhabihu yake. (Luka 12:32; Yohana 10:16) Dhabihu hiyo ndio msingi wa tumaini letu na wa msamaha wa dhambi zetu. Tukiendelea ‘kuwa na imani’ katika fidia hiyo na kumfuata Yesu kila siku, tunaweza kuwa na dhamiri safi na tumaini zuri la wakati ujao.​—Yohana 3:16.

7. Yesu alipewa mamlaka gani baada ya kurudi mbinguni, na unawezaje kumuunga mkono?

⁷ Yesu amekuwa akifanya nini tangu aliporudi mbinguni? Ana mamlaka kubwa. (Mathayo 28:18) Kwa kweli, Yehova alimweka atawale kutaniko la Kikristo, mgawo ambao ameutekeleza kwa upendo na haki. (Wakolosai 1:13) Kama ilivyotabiriwa, Yesu amewachagua wanaume wenye kutegemeka ili walitunze kundi. (Waefeso 4:8) Kwa mfano, alimchagua Paulo awe “mtume kwa mataifa,” akamtuma aeneze habari njema katika mataifa ya mbali. (Waroma 11:13; 1 Timotheo 2:7) Karibu na mwisho wa karne ya kwanza, Yesu alitoa ujumbe wa kupongeza, kushauri, na kurekebisha makutaniko saba yaliyokuwa Asia, mkoa wa Roma. (Ufunuo, sura ya 2-3) Je, unamtambua Yesu kuwa kichwa cha kutaniko la Kikristo? (Waefeso 5:23) Ili kuendelea kumfuata Yesu, unahitaji kujitahidi kuendeleza roho ya utii na ushirikiano katika kutaniko lenu.

8, 9. Yesu alipewa mamlaka gani mwaka wa 1914, na hilo linawezaje kutuchochea tunapofanya maamuzi?

⁸ Yesu alipewa mamlaka zaidi mwaka wa 1914. Mwaka huo, aliwekwa kuwa Mfalme wa Ufalme wa Kimasihi wa Yehova. Utawala wa Yesu ulipoanza, ‘vita vilitokea ghafla mbinguni.’ Matokeo yalikuwa nini? Shetani na malaika zake walitupwa duniani, na huo ukawa mwanzo wa kipindi cha ole. Mambo yanayowapata wanadamu leo, kama vile ongezeko la vita, uhalifu, ugaidi, magonjwa, matetemeko ya ardhi, na njaa, yanatukumbusha kwamba sasa Yesu anatawala mbinguni. Bado Shetani ndiye “mtawala wa ulimwengu huu” kwa “kipindi kifupi cha wakati.” (Ufunuo 12:7-12; Yohana 12:31; Mathayo 24:3-7; Luka 21:11) Hata hivyo, Yesu anawapa nafasi watu ulimwenguni pote wakubali utawala wake.

⁹ Ni muhimu sana kwetu kuchagua kumuunga mkono Mfalme wa Kimasihi. Katika maamuzi yote tunayofanya kila siku, ni lazima tujitahidi kumpendeza yeye bali si kuupendeza ulimwengu huu wenye ufisadi. Yesu, ambaye ni “Mfalme wa wafalme na Bwana wa mabwana,” anapowatazama wanadamu, moyo wake mwadilifu unawaka hasira na pia unasisimka kwa shangwe. (Ufunuo 19:16) Kwa nini?

Hasira na Shangwe ya Mfalme wa Kimasihi

10. Yesu ana utu wa aina gani, hata hivyo ni nini kinachomfanya Bwana wetu awe na hasira ya uadilifu?

¹⁰ Kama Baba yake, Yesu ni mtu mwenye furaha. (1 Timotheo 1:11) Akiwa duniani, Yesu hakuwa mchambuzi wala mwenye kudai mengi. Hata hivyo, kuna mambo mengi yanayotendeka leo duniani ambayo bila shaka yanamfanya awe na hasira ya uadilifu. Bila shaka, anakasirishwa na dini zote zinazodai kwa uwongo kwamba zinamwakilisha. Alitabiri jambo hilo aliposema: “Si kila mtu anayeniambia, ‘Bwana, Bwana,’ atakayeingia katika Ufalme wa mbinguni, bali yule anayefanya mapenzi ya Baba yangu aliye mbinguni ndiye atakayeingia. Wengi wataniambia siku hiyo: ‘Bwana, Bwana, . . . [hatukufanya] matendo mengi yenye nguvu katika jina lako?’ Ndipo nitakapowaambia: ‘Sikuwajua ninyi kamwe! Ondokeni kwangu, ninyi mnaotenda uasi sheria!’”​—Mathayo 7:21-23.

11-13. Kwa nini huenda wengine wakashangazwa na maneno makali ya Yesu kuelekea wale wanaofanya “matendo mengi yenye nguvu” katika jina lake, hata hivyo, kwa nini anakasirika? Toa mfano.

¹¹ Huenda wengi kati ya wale wanaojiita Wakristo leo wakashangazwa na maneno hayo. Kwa nini Yesu awashutumu vikali watu ambao wamekuwa wakifanya “matendo mengi yenye nguvu” katika jina lake? Dini zinazodai kuwa za Kikristo zimetoa misaada, zimewasaidia maskini, zimejenga hospitali na shule, na kufanya matendo mengine mengi. Ili kuelewa ni kwa nini Yesu amekasirishwa nao, fikiria mfano huu.

¹² Baba na mama wanataka kusafiri. Hawawezi kwenda pamoja na watoto wao, kwa hiyo wanamwajiri mtu ili awatunze watoto wao. Wanampa maagizo haya rahisi: “Watunze watoto wetu. Uwalishe, uhakikishe kwamba wako safi, na kuhakikisha kwamba wako salama.” Hata hivyo, wazazi wanaporudi wanashangaa kuona kwamba watoto wao wamedhoofika kwa kukosa chakula. Ni wachafu, wagonjwa, na wana huzuni. Wanamlilia mtu anayewatunza, lakini anawapuuza. Kwa nini? Yuko juu kwenye ngazi, akisafisha madirisha. Wakiwa wamekasirika, wazazi hao wanataka kujua ni kwa nini anawapuuza watoto hao. Mtu huyo anayewatunza anajibu: “Angalieni mambo yote niliyofanya! Nimeosha madirisha! Pia, nimerekebisha nyumba! Nimefanya yote hayo kwa faida yenu!” Je, hilo litatuliza hasira ya wazazi hao? Hapana! Hawakumwambia afanye kazi hizo; walitaka tu awatunze watoto wao. Wanakasirika sana kwa sababu hakutii maagizo yao.

¹³ Dini zinazodai kuwa za Kikristo zimetenda kama mtu huyo anayewatunza watoto. Yesu aliwapa maagizo wawakilishi wake wawalishe watu kiroho kwa kuwafundisha kweli ya Neno la Mungu na kuwasaidia wawe safi kiroho. (Yohana 21:15-17) Hata hivyo, dini hizo zimeshindwa kabisa kutii maagizo yake. Zimewaacha watu wakiwa na njaa ya kiroho, wakiwa wamechanganyikiwa na mafundisho ya uwongo, bila ufahamu wa kweli za msingi za Biblia. (Isaya 65:13; Amosi 8:11) Jitihada zake za kuboresha ulimwengu huu si kisingizio cha kutotii kimakusudi. Isitoshe, ulimwengu huu ni kama nyumba inayokusudiwa kubomolewa! Neno la Mungu linaonyesha wazi kwamba hivi karibuni ulimwengu wa Shetani utaharibiwa.​—1 Yohana 2:15-17.

14. Ni kazi gani inayomfurahisha Yesu leo, na kwa nini?

¹⁴ Kwa upande mwingine, ni lazima Yesu anafurahi sana anapotazama kutoka mbinguni na kuona mamilioni ya watu wakitimiza kazi ya kufanya wanafunzi ambayo aliwapa wafuasi wake kabla ya kuondoka duniani. (Mathayo 28:19, 20) Ni pendeleo kubwa kwetu kuchangia shangwe ya Mfalme huyo wa Kimasihi! Na tuazimie kuendelea kumsaidia “mtumwa mwaminifu na mwenye busara.” (Mathayo 24:45) Tofauti na makasisi wa dini zinazodai kuwa za Kikristo, kikundi hiki kidogo cha ndugu watiwa-mafuta kimeelekeza kwa utiifu kazi ya kuhubiri, nacho kimewalisha kondoo wa Kristo kwa uaminifu.

15, 16. (a) Yesu anahisije kuhusu ukosefu wa upendo ambao umeenea sana leo, nasi tunajuaje kwamba anahisi hivyo? (b) Kwa nini dini zinazodai kuwa za Kikristo zinamkasirisha Yesu?

¹⁵ Tuna hakika kwamba Mfalme huyo hukasirika anapoona ukosefu wa upendo ambao umeenea sana duniani leo. Huenda tunakumbuka jinsi Mafarisayo walivyomchambua Yesu kwa sababu aliponya watu siku ya Sabato. Mafarisayo walikuwa na mioyo migumu sana hivi kwamba walishikilia tu maoni yao yaliyopotoka kuhusu Sheria ya Musa na sheria ya mdomo. Yesu alipofanya miujiza aliwasaidia watu wengi! Lakini Mafarisayo hawakubadili mtazamo wao, hata ingawa miujiza ya Yesu ilifanya watu wawe na furaha, iliwapa kitulizo kutokana na mateso waliyokabili, na kuimarisha imani yao katika Mungu. Yesu alihisije kuhusu viongozi hao wa kidini? Pindi moja, ‘aliwatazama kwa hasira na kuhuzunika sana kwa sababu mioyo yao ilikuwa migumu.’​—Marko 3:5.

¹⁶ Leo, Yesu anaona mambo mengi zaidi ‘yanayomhuzunisha sana.’ Viongozi wa dini zinazodai kuwa za Kikristo wamepofushwa kwa sababu wameazimia kufuata mapokeo na mafundisho ambayo hayapatani na Maandiko. Isitoshe, wanakasirishwa na kazi ya kuhubiri habari njema ya Ufalme wa Mungu. Katika sehemu nyingi za ulimwengu, makasisi wamechochea mateso makali dhidi ya Wakristo wanaojitahidi kikweli kuhubiri ujumbe ambao Yesu alihubiri. (Yohana 16:2; Ufunuo 18:4, 24) Wakati huohuo, makasisi hao wanawahimiza wafuasi wao wenyewe waende vitani kuwaua wengine, kana kwamba kufanya hivyo kutamfurahisha Yesu Kristo!

17. Ni katika njia gani wafuasi wa kweli wa Yesu huufanya moyo wake ushangilie?

¹⁷ Tofauti na makasisi hao, wafuasi wa kweli wa Yesu hujitahidi kuwapenda wanadamu wenzao. Licha ya upinzani, wanawahubiria habari njema “watu wa namna zote,” kama Yesu alivyofanya. (1 Timotheo 2:4) Na upendo wanaoonyeshana ni wa pekee; hilo ndilo jambo kuu linalowatambulisha. (Yohana 13:34, 35) Wanapowatendea Wakristo wenzao kwa upendo na heshima, wanamfuata Yesu kikweli—na kuufanya moyo wa Mfalme huyo wa Kimasihi ushangilie!

18. Ni nini ambacho humhuzunisha Bwana wetu, na tunawezaje kumfurahisha?

¹⁸ Pia, tukumbuke kwamba Yesu huumia sana mtu anaporuhusu upendo wake kwa Yehova udhoofike na kuacha kumtumikia. (Ufunuo 2:4, 5) Hata hivyo, Yesu anafurahishwa na wale wanaovumilia mpaka mwisho. (Mathayo 24:13) Hivyo basi, na tukumbuke sikuzote amri hii ya Kristo: “Endelea kunifuata.” (Yohana 21:19) Acheni tuzungumzie baraka mbalimbali ambazo Mfalme wa Kimasihi atawapa wale wanaovumilia mpaka mwisho.

Watumishi Waaminifu wa Mfalme Wanapata Baraka Nyingi

19, 20. (a) Kumfuata Yesu huleta baraka gani leo? (b) Ni katika njia gani kumfuata Kristo kunaweza kutusaidia kutosheleza tamaa yetu ya kuwa na “Baba wa Milele”?

¹⁹ Kumfuata Yesu ndiyo njia ya kuwa na maisha yenye baraka ya kweli leo. Tukimkubali Kristo kuwa Bwana wetu, kwa kufuata mwongozo na mfano wake, tutapata baraka ambazo watu ulimwenguni pote wanatafuta lakini hawapati. Tutabarikiwa kwa kupata kazi inayofanya maisha yetu yawe na kusudi, kuwa na familia ya ndugu na dada zetu ambao wanatupenda kikweli, uhusiano mzuri na Yehova, na kuwa na amani. Kwa maneno mengine, tutakuwa na maisha yenye furaha na yenye kuridhisha. Na tutapata baraka nyingi zaidi.

²⁰ Yehova amemchagua Yesu kuwa “Baba wa Milele” kwa wale wanaotumaini kuishi milele duniani. Yesu anachukua mahali pa Adamu, baba ya wanadamu aliyewakosea sana wazao wake wote. (Isaya 9:6, 7) Kwa kumkubali Yesu kuwa “Baba [yetu] wa Milele,” na kumwamini, tunakuwa na tumaini hakika la uzima wa milele. Isitoshe, tunamkaribia Yehova Mungu hata zaidi. Kama tulivyojifunza, kujitahidi kufuata mfano wa Yesu kila siku ndiyo njia nzuri zaidi ya kutii amri hii ya Mungu: “Iweni waigaji wa Mungu, kama watoto wapendwa.”​—Waefeso 5:1.

21. Wafuasi wa Kristo wanaangaza nuru jinsi gani katika ulimwengu wenye giza?

²¹ Tunapomwiga Yesu na Baba yake, Yehova, tunapata pendeleo la pekee. Tunaangaza nuru nyangavu. Katika ulimwengu uliojaa giza, ambamo mabilioni ya watu wamepotoshwa na Shetani na wanaiga tabia zake, sisi tunaomfuata Kristo tunamulika kotekote nuru iliyo nyangavu zaidi—nuru ya kweli za Kimaandiko, nuru ya sifa nzuri za Kikristo, nuru ya shangwe ya kweli, amani ya kweli, na upendo halisi. Tunapomfuata Kristo, tunamkaribia pia Yehova, na hilo ndilo jambo bora na muhimu zaidi ambalo mtu yeyote anaweza kufanya.

22, 23. (a) Wale wanaoendelea kumfuata Yesu kwa ushikamanifu watapata baraka gani wakati ujao? (b) Tunapaswa kuazimia kufanya nini?

²² Fikiria pia mambo ambayo Yehova anataka kukufanyia wakati ujao kupitia Mfalme wa Kimasihi. Hivi karibuni, Mfalme huyo atapigana vita vya uadilifu dhidi ya mfumo huu mwovu wa Shetani. Bila shaka, Yesu atashinda vita hivyo! (Ufunuo 19:11-15) Kisha, Kristo ataanza Utawala wake wa Miaka Elfu Moja juu ya dunia. Serikali yake ya mbinguni itamwezesha kila mwanadamu mwaminifu kunufaika na fidia, na kufikia ukamilifu. Wazia ukiwa na afya nzuri, sikuzote ukiwa kijana mwenye nguvu, ukifanya kazi kwa furaha pamoja na familia yenye umoja na kuifanya dunia hii iwe paradiso! Mwishoni mwa Miaka hiyo Elfu Moja, Yesu atamrudishia Baba yake utawala. (1 Wakorintho 15:24) Ukiendelea kumfuata Kristo kwa ushikamanifu, utapata baraka iliyo bora zaidi—“uhuru wenye utukufu wa watoto wa Mungu”! (Waroma 8:21) Ndiyo, tutapata baraka zote ambazo Adamu na Hawa walikuwa nazo na wakazipoteza. Tutakuwa wana na binti za Yehova na hatutakuwa tena watumwa wa dhambi ya Adamu. Kwa kweli, “kifo hakitakuwapo tena.”​—Ufunuo 21:4.

²³ Mkumbuke yule mtawala kijana tuliyemzungumzia katika Sura ya 1. Aliukataa mwaliko huu wa Yesu: ‘Njoo uwe mfuasi wangu.’ (Marko 10:17-22) Usifanye kosa hilo kamwe! Badala yake, kubali mwaliko huo wa Yesu kwa shangwe na kwa uchangamfu. Na uazimie kuvumilia, na kuendelea kumfuata yule Mchungaji Mwema siku baada ya siku, mwaka baada ya mwaka, nawe uishi na kuona siku ambayo atakuwa ametimiza kwa utukufu kusudi la Yehova!