Iweni Wasomaji Wenye Furaha wa Kitabu cha Ufunuo
“Mwenye furaha ni yeye asomaye kwa sauti kubwa na wale wasikiao maneno ya unabii huu, na washikao mambo yaliyoandikwa katika huo.”—UFUNUO 1:3.
1. Yohana alijikuta katika hali zipi alipoandika Ufunuo, na kwa nini maono hayo yaliandikwa?
“MIMI Yohana . . . nilikuja kuwa katika kisiwa kidogo kiitwacho Patmosi kwa ajili ya kusema juu ya Mungu na kutoa ushahidi kuhusu Yesu.” (Ufunuo 1:9) Mtume Yohana aliandika kitabu cha Apokalipsi, au Ufunuo akiwa katika hali hizo. Inadhaniwa kwamba alikuwa uhamishoni katika Patmosi wakati wa utawala wa Maliki wa Roma, Domitian (81-96 W.K.), ambaye alikuwa akiwalazimisha watu waabudu maliki na kuwanyanyasa Wakristo. Alipokuwa Patmosi, Yohana alipokea mfululizo wa maono na kuyaandika. Yeye aliwasimulia Wakristo wa mapema maono hayo si kwa kusudi la kuwaogofya, bali kuwaimarisha, kuwafariji, na kuwatia moyo kwa sababu ya majaribu waliyokuwa wakipata na yale ambayo yangewapata baadaye.—Matendo 28:22; Ufunuo 1:4; 2:3, 9, 10, 13.
2. Kwa nini hali ambamo Yohana na Wakristo wenzake walijikuta zinapendeza Wakristo wanaoishi leo?
2 Kitabu hiki cha Biblia kiliandikwa katika hali ambazo ni muhimu sana kwa Wakristo wanaoishi leo. Yohana alikuwa akinyanyaswa kwa sababu alikuwa shahidi wa Yehova na Mwana Wake, Kristo Yesu. Yeye na Wakristo wenzake waliishi katika hali zenye uhasama kwa sababu, ingawa walijaribu kuwa raia wema, wao hawangeweza kuabudu maliki. (Luka 4:8) Katika nchi fulani, Wakristo wa kweli leo hujikuta katika hali kama hizo, ambako Serikali ndiyo hujitwika mamlaka ya kufafanua “njia ifaayo ya kidini.” Basi, maneno yanayopatikana kwenye utangulizi wa kitabu cha Ufunuo yanafariji kama nini: “Mwenye furaha ni yeye asomaye kwa sauti kubwa na wale wasikiao maneno ya unabii huu, na washikao mambo yaliyoandikwa katika huo; kwa maana wakati uliowekwa rasmi uko karibu.” (Ufunuo 1:3) Ndiyo, wasomaji wa Ufunuo walio makini na watiifu wanaweza kupata furaha ya kweli na baraka nyingi.
3. Ni nani aliye Chanzo cha Ufunuo ambao Yohana alipewa?
3 Ni nani aliye Chanzo kikuu cha kitabu cha Ufunuo, na kimewasilishwaje? Mstari wa kwanza watuambia: “Ufunuo kupitia Yesu Kristo, ambao Mungu alimpa, kuonyesha watumwa wake mambo ambayo lazima yatukie upesi. Naye alituma malaika wake na kupitia yeye akautoa kwa njia ya ishara kwa mtumwa wake Yohana.” (Ufunuo 1:1) Yaani, Chanzo chenyewe cha Ufunuo ni Yehova Mungu, ambaye alimpa Yesu, na kupitia malaika, Yesu akauwasilisha kwa Yohana. Uchunguzi zaidi waonyesha kwamba Yesu alitumia pia roho takatifu ili kuwasilisha ujumbe kwa makutaniko na kumpa Yohana maono.—Ufunuo 2:7, 11, 17, 29; 3:6, 13, 22; 4:2; 17:3; 21:10; linganisha Matendo 2:33.
4. Yehova bado anatumia njia gani leo kuwaongoza watu wake duniani?
4 Bado Yehova anatumia Mwana wake, “kichwa cha kutaniko,” kufundisha watumishi wake duniani. (Waefeso 5:23; Isaya 54:13; Yohana 6:45) Pia Yehova hutumia roho yake kuwafundisha watu wake. (Yohana 15:26; 1 Wakorintho 2:10) Na kama Yesu alivyomtumia “mtumwa wake Yohana” awasilishe chakula cha kiroho chenye kudumisha uhai kwa makutaniko ya karne ya kwanza, ndivyo leo anavyomtumia “mtumwa mwaminifu na mwenye busara,” ambaye ni “ndugu” zake watiwa-mafuta walio duniani, kuwapa watumishi wake wa nyumbani na waandamani wao ‘chakula cha kiroho kwa wakati ufaao.’ (Mathayo 24:45-47; 25:40) Wenye furaha ni wale wanaotambua Chanzo hiki cha “zawadi njema” tunazopokea zikiwa chakula cha kiroho na pia njia ambayo Yeye anatumia.—Yakobo 1:17.
Makutaniko Yanayoongozwa na Kristo
5. (a) Makutaniko ya Kikristo na waangalizi wake wanafananishwa na nini? (b) Japo kutokamilika kwa wanadamu, ni nini itakayochangia furaha yetu?
5 Katika sura za kwanza-kwanza za Ufunuo, makutaniko ya Kikristo yanafananishwa na vinara vya taa. Waangalizi wake wanafananishwa na malaika (wajumbe) na nyota. (Ufunuo 1:20)a Akisema juu yake mwenyewe, Kristo alimwambia Yohana aandike: “Haya ndiyo mambo asemayo yeye ashikaye zile nyota saba katika mkono wake wa kuume, yeye atembeaye katikati ya vile vinara saba vya taa vya dhahabu.” (Ufunuo 2:1) Ujumbe mbalimbali saba uliopelekwa kwenye makutaniko saba ya Asia waonyesha kwamba katika karne ya kwanza W.K., makutaniko na wazee wake walikuwa na sifa nzuri na vilevile udhaifu mbalimbali. Ndivyo ilivyo leo. Basi, tutafurahi zaidi tusiposahau kamwe kwamba Kristo, Kichwa chetu, yumo katikati ya makutaniko. Anajua vizuri sana mambo yanayoendelea. Kwa njia ya mfano, waangalizi wako “katika mkono wake wa kulia,” yaani, chini ya mamlaka yake na mwelekezo wake, nao wanawajibika kwake kwa njia ambayo wanachunga makutaniko.—Matendo 20:28; Waebrania 13:17.
6. Ni nini kionyeshacho kwamba si waangalizi peke yao wanaowajibika kwa Kristo?
6 Lakini, ni kujidanganya tu kufikiri kwamba ni waangalizi peke yao wanaowajibika kwa Kristo kwa matendo yao. Katika mmojawapo wa ujumbe wake, Kristo alisema: “Makutaniko yote yatajua kwamba mimi ndimi nichunguzaye mafigo na mioyo, nami hakika nitawapa nyinyi mmoja-mmoja kulingana na vitendo vyenu.” (Ufunuo 2:23) Jambo hilo ni onyo na vilevile kitia-moyo—onyo la kwamba Kristo anajua nia zetu za ndani kabisa, na ni kitia-moyo kwa sababu linatuhakikishia kwamba Kristo anajua jitihada zetu na atatubariki tukifanya yote tuwezayo.—Marko 14:6-9; Luka 21:3, 4.
7. Wakristo wa Filadelfia walikuwa ‘wametunzaje neno juu ya uvumilivu wa Yesu’?
7 Ujumbe wa Kristo kwa kutaniko la jiji la Filadelfia katika Lidia hauna karipio, lakini una ahadi ambayo inapasa kutupendeza sana. “Kwa sababu ulitunza neno juu ya uvumilivu wangu, hakika mimi pia nitakutunza utoke katika saa ya jaribu, itakayokuja juu ya dunia nzima inayokaliwa, ili kutia jaribu juu ya wale wanaokaa juu ya dunia.” (Ufunuo 3:10) Usemi wa Kigiriki unaomaanisha ‘kutunza neno juu ya uvumilivu wangu’ pia waweza kumaanisha ‘kutunza niliyosema juu ya uvumilivu.’ Mstari wa 8 wadokeza kwamba Wakristo wa Filadelfia walikuwa wametii amri za Kristo na vilevile kufuata mashauri ya Kristo ya kuvumilia kwa uaminifu.—Mathayo 10:22; Luka 21:19.
8. (a) Yesu aliwaahidi nini Wakristo wa Filadelfia? (b) Ni nani leo wanaopatwa na “saa ya jaribu”?
8 Yesu aliongezea kusema kwamba angewaepusha na “saa ya jaribu.” Hatujui maneno hayo yalimaanisha nini kwa Wakristo wakati huo. Ijapokuwa mnyanyaso ulitulia kidogo baada ya kifo cha Domitian mwaka wa 96 W.K., mnyanyaso uliibuka tena wakati wa utawala wa Trajan (98-117 W.K.), na bila shaka ukaleta majaribu mengine zaidi. Lakini ile “saa ya jaribu” iliyo muhimu zaidi yatukia katika “siku ya Bwana” katika “wakati wa mwisho,” ambamo tumo sasa. (Ufunuo 1:10; Danieli 12:4) Wakristo watiwa-mafuta kwa roho walipatwa na jaribu katika kipindi fulani hususa wakati wa Vita ya Ulimwengu ya Kwanza na punde tu baadaye. Lakini, “saa ya jaribu” ingali inaendelea. Inaathiri “dunia nzima inayokaliwa,” kutia ndani mamilioni ya watu ambao ni washiriki wa umati mkubwa, wanaotumaini kuokoka dhiki kubwa. (Ufunuo 3:10; 7:9, 14) Tutafurahi ikiwa ‘tutatunza yale Yesu aliyosema juu ya uvumilivu,’ yaani: “Yeye ambaye amevumilia hadi mwisho ndiye atakayeokolewa.”—Mathayo 24:13.
Kuinyenyekea kwa Furaha Enzi Kuu ya Yehova
9, 10. (a) Ono la kiti cha Ufalme cha Yehova lapaswa kutuathiri katika njia zipi? (b) Kusoma Ufunuo kwaweza kuchangiaje furaha yetu?
9 Ono la kiti cha ufalme cha Yehova na ua wake wa kimbingu linaloonyeshwa katika sura ya 4 na 5 ya Ufunuo lapasa kututia kicho. Twapasa kuvutiwa sana na maneno ya sifa yatokayo moyoni ambayo viumbe wa kimbingu wenye nguvu wanasema wanapoinyenyekea kwa shangwe enzi kuu ya Yehova yenye uadilifu. (Ufunuo 4:8-11) Twapaswa kuwa miongoni mwa wale wasemao: “Kwake Yeye anayekaa juu ya hicho kiti cha ufalme na kwa Mwana-Kondoo kuwe na baraka na heshima na utukufu na uweza milele na milele.”—Ufunuo 5:13.
10 Kihalisi, jambo hilo lamaanisha kuyanyenyekea kwa shangwe mapenzi ya Yehova katika mambo yote. Mtume Paulo aliandika: “Lolote lile mfanyalo katika neno au katika kazi, fanyeni kila jambo katika jina la Bwana Yesu, mkimshukuru Mungu Baba kupitia yeye.” (Wakolosai 3:17) Kusoma Ufunuo kutatufanya tuwe wenye furaha kwelikweli ikiwa ndani kabisa katika akili zetu na mioyo yetu twatambua enzi kuu ya Yehova na kufikiria mapenzi yake katika kila sehemu ya maisha yetu.
11, 12. (a) Mfumo wa kidunia wa Shetani utatikiswaje na kuangamizwa? (b) Kulingana na Ufunuo sura ya 7, ni nani ‘atakayeweza kusimama’ wakati huo?
11 Kuinyenyekea enzi kuu ya Yehova kwa shangwe ndio msingi wa furaha yetu sisi binafsi na pia furaha ulimwenguni pote. Karibuni tetemeko kubwa la mfano litatikisa mfumo wa ulimwengu wa Shetani hadi kwenye misingi yake na kuuangamiza. Hapatakuwapo mahali pa usalama kwa wanadamu wanaokataa kuinyenyekea serikali ya Ufalme wa kimbingu wa Kristo, inayowakilisha enzi ya haki ya Mungu. Unabii huo wasema: “Wafalme wa dunia na wenye daraja la juu na makamanda wa kijeshi na matajiri na wenye nguvu na kila mtumwa na kila mtu huru wakajificha wenyewe katika mapango na katika matungamo-miamba ya milima. Nao wafuliza kuiambia milima na matungamo-miamba: ‘Tuangukieni mtufiche kutoka uso wa Yeye aketiye juu ya hicho kiti cha ufalme na kutoka hasira ya kisasi ya Mwana-Kondoo, kwa sababu siku kubwa ya hasira ya kisasi yao imekuja, na ni nani awezaye kusimama?’”—Ufunuo 6:12, 15-17.
12 Kuhusu swali hilo, katika sura ifuatayo, mtume Yohana afafanua wale ambao ni washiriki wa umati mkubwa, watokao katika dhiki kubwa, wakiwa “wamesimama mbele ya kiti cha ufalme na mbele ya Mwana-Kondoo.” (Ufunuo 7:9, 14, 15) Kule kusimama mbele ya kiti cha ufalme cha Mungu kwaonyesha kwamba wao wanatambua kiti hicho cha ufalme na kuinyenyekea enzi kuu ya Yehova kikamili. Basi wao wamekubalika.
13. (a) Wakazi wengi wa dunia huabudu nini, na alama kwenye kipaji cha uso wao au kwenye mkono wao inafananisha nini? (b) Basi kwa nini itakuwa lazima kuvumilia?
13 Kwa upande mwingine, sura ya 13 yawataja wakazi wa dunia wanaosalia kuwa waabudu wa mfumo wa kisiasa wa Shetani, unaofananishwa na hayawani-mwitu. Wao wapokea alama kwenye “kipaji cha uso” wao au kwenye “mkono” wao, ikionyesha kwamba wanaunga mkono mfumo huo kiakili na kihalisi. (Ufunuo 13:1-8, 16, 17) Kisha, sura ya 14 yaongezea kusema: “Ikiwa yeyote aabudu hayawani-mwitu na sanamu yake, na apokea alama juu ya kipaji cha uso wake au juu ya mkono wake, yeye atakunywa pia kutokana na divai ya hasira ya Mungu imwagwayo bila kutoholewa ndani ya kikombe cha hasira ya kisasi yake . . . Hapa ndipo humaanisha uvumilivu kwa watakatifu, wale washikao amri za Mungu na imani kwa Yesu.” (Ufunuo 14:9, 10, 12) Muda uzidipo kupita, swali litazidi kuwa: Wewe wamwunga nani mkono? Je, unaunga mkono Yehova na enzi yake kuu ama unaunga mkono mfumo wa kisiasa usiomcha Mungu ambao unawakilishwa na hayawani-mwitu? Wenye furaha watakuwa wale ambao wanaepuka kupokea alama ya hayawani na wale wavumiliao kwa uaminifu wanapoinyenyekea enzi kuu ya Yehova.
14, 15. Ni ujumbe gani unaokatiza ufafanuzi wa Har–Magedoni kwenye Ufunuo, ukiwa na maana gani kwetu?
14 Watawala wa “dunia yote inayokaliwa” wanaelekea kukabiliana na Yehova, na kupambana naye juu ya suala la enzi kuu. Pambano hilo la kukata maneno litakuwa ni Har–Magedoni, ile “vita ya siku kubwa ya Mungu Mweza-Yote.” (Ufunuo 16:14, 16) Kuna maneno yenye kushangaza ambayo yameingizwa katikati ya ufafanuzi wa kukusanywa kwa watawala wa dunia kwa ajili ya vita pamoja na Yehova. Yesu mwenyewe akatiza ono hilo akisema: “Tazama! Ninakuja kama mwizi. Mwenye furaha ni yeye akaaye macho na hutunza mavazi yake ya nje, ili asipate kutembea akiwa uchi na watu waitazame hali yake ya aibu.” (Ufunuo 16:15) Huenda maneno hayo yanawahusu Walawi waliokuwa walinzi wa hekalu ambao walikuwa wakivuliwa mavazi na kuaibishwa peupe wakipatikana wamelala usingizi wakati wa kazi yao ya kulinda.
15 Ujumbe huo u wazi kabisa: Tukitaka kuokoka Har–Magedoni, ni lazima tudumu tukiwa macho kiroho na kuvaa mavazi ya mfano ambayo yanatutambulisha kuwa Mashahidi waaminifu wa Yehova Mungu. Tutafurahi ikiwa tutaepuka uchovu wa kiroho na kuendelea bila kuacha, kueneza kwa bidii “habari njema idumuyo milele” ya Ufalme wa Mungu uliosimamishwa.—Ufunuo 14:6.
‘Mwenye Furaha Ni Yeyote Anayeshika Maneno Haya’
16. Kwa nini sura za mwisho za Ufunuo hasa ni zenye kufurahisha?
16 Wasomaji wenye furaha wa kitabu cha Ufunuo wanaweza kusisimka sana kwa shangwe wasomapo sura za mwisho zinazofafanua tumaini letu tukufu—mbingu mpya na dunia mpya, yaani, serikali ya Ufalme wa kimbingu yenye uadilifu ikitawala jamii ya wanadamu waliosafishwa, ili kumsifu “Yehova Mungu Mweza-Yote.” (Ufunuo 21:22) Mfululizo huo mzuri ajabu wa maono ulipofikia mwisho, malaika aliye mjumbe alimwambia Yohana: “Maneno haya ni ya uaminifu na ya kweli; ndiyo, Yehova Mungu wa semi zilizopuliziwa za manabii alimtuma malaika wake kuonyesha watumwa wake mambo ambayo lazima yatukie upesi. Na, tazama! mimi ninakuja upesi. Mwenye furaha ni yeyote anayeshika maneno ya unabii wa hati-kunjo hii.”—Ufunuo 22:6, 7.
17. (a) Andiko la Ufunuo 22:6 latuhakikishia nini? (b) Ni lazima tuwe macho kuepuka nini?
17 Wasomaji wenye furaha wa Ufunuo watakumbuka kwamba maneno yanayofanana na haya yanatajwa mwanzoni mwa “hati-kunjo.” (Ufunuo 1:1, 3) Maneno haya yatuhakikishia kwamba “mambo” yote yaliyotabiriwa katika kitabu hiki cha mwisho cha Biblia ‘yatatukia upesi.’ Twaishi katika kipindi cha mwisho kabisa hivi kwamba mambo yanayotuhusu ambayo yalitabiriwa katika Ufunuo kwa hakika ni lazima yatukie upesi, yakifuatana haraka-haraka. Kwa hiyo uthabiti wowote ule uonekanao katika mfumo wa Shetani haupaswi kutufanya tulale usingizi. Msomaji makini atakumbuka maonyo yaliyotolewa katika ujumbe ambao ulipelekwa kwenye makutaniko saba ya Asia naye ataepuka mitego ya kufuatia vitu vya kimwili, ibada ya sanamu, ukosefu wa adili, uvuguvugu, na uasi-imani wenye mafarakano.
18, 19. (a) Kwa nini bado lazima Yesu aje, na tunashiriki katika tumaini gani analotaja Yohana? (b) Bado Yehova ‘atakuja’ kwa kusudi gani?
18 Katika kitabu cha Ufunuo, Yesu alitangaza mara kadhaa: “Mimi ninakuja upesi.” (Ufunuo 2:16; 3:11; 22:7, 20a) Ni lazima bado aje kutekeleza hukumu juu ya Babiloni Mkubwa, mfumo wa kisiasa wa Shetani, na juu ya wanadamu wote wanaokataa kuinyenyekea enzi kuu ya Yehova, kama inavyowakilishwa na Ufalme wa Kimesiya. Twaungana pamoja na mtume Yohana, aliyepaza sauti akisema: “Ameni! Njoo, Bwana Yesu.”—Ufunuo 22:20b.
19 Yehova mwenyewe asema: “Tazama! Mimi ninakuja upesi, na thawabu niitoayo ipo pamoja nami, kulipa kila mmoja kama kazi yake ilivyo.” (Ufunuo 22:12) Tunapongojea zawadi tukufu ya uhai wa milele tukiwa ama sehemu ya “mbingu mpya” ama “dunia mpya” iliyoahidiwa na tuendelee kuwaalika kwa bidii watu wenye mioyo minyofu: ‘Njooni! Na acha yeyote anayeona kiu aje; acha yeyote atakaye achukue maji ya uhai bure.’ (Ufunuo 22:17) Na wao pia wawe wasomaji wenye furaha wa kitabu kilichopuliziwa na chenye kuchochea cha Ufunuo!
[Maelezo ya Chini]
a Ona Ufunuo—Upeo Wao Mtukufu U Karibu!, ukurasa wa 28-29, 136 (kielezi-chini).
Mambo ya Kurudia
◻ Yehova alitumia njia gani kuwasilisha Ufunuo, na twaweza kujifunza nini kutokana nayo?
◻ Kwa nini tunapaswa kufurahi kusoma ujumbe ambao ulipelekwa kwenye makutaniko saba katika Asia?
◻ Tunaweza kuhifadhiwaje wakati wa “saa ya jaribu”?
◻ Tutapata furaha gani tukitii maneno ya hati-kunjo yaliyo na Ufunuo?
[Picha katika ukurasa wa 15]
Wenye furaha ni wale wanaotambua Chanzo cha taarifa zenye mteremo
[Picha katika ukurasa wa 18]
Mwenye furaha ni yeye akaaye macho