மேசியாவைப் பற்றிய தீர்க்கதரிசனங்கள் இயேசுதான் மேசியா என்பதை நிரூபிக்கின்றனவா?

அதில் சந்தேகமே இல்லை. இயேசு பூமியில் வாழ்ந்தபோது “உலகத்துக்கு மீட்பராக” இருக்கப்போகிற, ‘தலைவராகிய மேசியாவை’ பற்றிய நிறைய தீர்க்கதரிசனங்களை நிறைவேற்றினார். (தானியேல் 9:25; 1 யோவான் 4:14) தன்னுடைய மரணத்துக்குப் பிறகும்கூட மேசியாவைப் பற்றிய தீர்க்கதரிசனங்களை அவர் தொடர்ந்து நிறைவேற்றினார்.—சங்கீதம் 110:1; அப்போஸ்தலர் 2:34-36.

• “மேசியா” என்பதன் அர்த்தம் என்ன?

• மேசியாவைப் பற்றிய தீர்க்கதரிசனங்களை ஒன்றுக்கும் அதிகமானவர்களால் நிறைவேற்ற முடியுமா?

• மேசியா எதிர்காலத்தில்தான் தோன்றுவாரா?

• மேசியாவைப் பற்றிய எத்தனை தீர்க்கதரிசனங்கள் பைபிளில் இருக்கின்றன?

• இயேசுவில் நிறைவேறிய சில தீர்க்கதரிசனங்கள்

மஷியாக் (மேசியா) என்ற எபிரெய வார்த்தைக்கும், இதற்கு இணையான கிறிஸ்டோஸ் (கிறிஸ்து) என்ற கிரேக்க வார்த்தைக்கும் “அபிஷேகம் செய்யப்பட்டவர்,” அதாவது “தேர்ந்தெடுக்கப்பட்டவர்,” என்று அர்த்தம். அப்படியென்றால், “இயேசு கிறிஸ்து” என்பதற்கு “அபிஷேகம் செய்யப்பட்ட இயேசு” அதாவது, “மேசியாவாகிய இயேசு” என்று அர்த்தம்.

பைபிள் காலங்களில் ஒருவரை ஒரு விசேஷப் பொறுப்பில் நியமிக்கும்போது அவருடைய தலையில் எண்ணெய் ஊற்றி அபிஷேகம் செய்வார்கள். (லேவியராகமம் 8:12; 1 சாமுவேல் 16:13) மேசியாவாக ஒரு உயர்ந்த பொறுப்பில் இருப்பதற்கு இயேசுவைக் கடவுள் நியமித்தார். (அப்போஸ்தலர் 2:36) இந்தப் பொறுப்பில் நியமித்தபோது, இயேசுவை எண்ணெயால் அபிஷேகம் செய்வதற்குப் பதிலாக தன்னுடைய சக்தியால் அவரைக் கடவுள் அபிஷேகம் செய்தார்.—மத்தேயு 3:16.

முடியாது. ஒரு கைரேகை எப்படி ஒருவரை மட்டும் அடையாளம் காட்டுகிறதோ, அதேபோல் பைபிள் தீர்க்கதரிசனங்களின் நிறைவேற்றம் ஒரேவொரு மேசியாவைதான், அதாவது கிறிஸ்துவைதான், அடையாளம் காட்டுகிறது. ஆனாலும், “போலிக் கிறிஸ்துக்களும் போலித் தீர்க்கதரிசிகளும் வருவார்கள்; முடிந்தால், தேர்ந்தெடுக்கப்பட்டவர்களைக்கூட ஏமாற்றுவதற்குப் பெரிய அடையாளங்களையும் அற்புதங்களையும் செய்வார்கள்” என்ற எச்சரிப்பை பைபிள் கொடுக்கிறது.—மத்தேயு 24:24.

இல்லை. இஸ்ரவேல் ராஜாவான தாவீதின் வம்சத்தில்தான் மேசியா வருவார் என்று பைபிள் முன்கூட்டியே சொன்னது. (சங்கீதம் 89:3, 4) ஆனால், தாவீதின் வம்சாவளிப் பதிவேடுகள் இப்போது இல்லை. ஒருவேளை, ரோமர்கள் கி.பி. 70-ல் எருசலேமைக் கைப்பற்றியபோது அவை அழிக்கப்பட்டிருக்கலாம்.a அந்தச் சமயத்திலிருந்து, தான்தான் தாவீதின் ராஜ வம்சத்தில் வந்தவர் என்று யாராலும் நிரூபிக்க வாய்ப்பில்லாமல் போனது. ஆனால், இயேசுவின் காலத்தில் இந்த வம்சாவளிப் பதிவேடுகள் இருந்தன. அதனால்தான், இயேசு தாவீதின் வம்சத்தில் வந்தவர் என்பதை அவருடைய எதிரிகளால்கூட மறுத்துப் பேச முடியவில்லை.—மத்தேயு 22:41-46.

மேசியாவைப் பற்றிய தீர்க்கதரிசனங்களின் எண்ணிக்கையைத் திட்டவட்டமாகச் சொல்லமுடியாது. ஏனென்றால், தீர்க்கதரிசனங்களின் எண்ணிக்கையைக் கணக்கிடும் விதம் மாறுபடலாம். மேசியாவைப் பற்றிய தீர்க்கதரிசனம்தான் என்று தெளிவாகத் தெரிந்தாலும்கூட அது மாறுபடலாம். உதாரணத்துக்கு, ஏசாயா 53:2-7 வசனங்களில் மேசியாவைப் பற்றிய தீர்க்கதரிசனத்தின் பல விவரங்கள் கொடுக்கப்பட்டிருக்கின்றன. சிலர் இந்த முழு பதிவையும் ஒரே தீர்க்கதரிசனமாகக் கணக்கிடலாம். மற்றவர்கள் இந்த ஒவ்வொரு விவரத்தையும் ஒவ்வொரு தீர்க்கதரிசனமாகக் கணக்கிடலாம்.