Xabuanii gúmbáñún e̱jña̱la maʼndún kuyáá Jeobá

1, 2. Náá numuu dí ikha dí na̱ʼkha̱ náa Biblia na̱jkha̱nú nagiʼdoo itháan numuu índo̱ naxtiʼkhuu xóo kuwáánʼlú rá.

NI̱JKHA̱NÚ mbiʼi rí mudamijná, dxámá ga̱jma̱a̱ dxáʼgú kugíʼ mbá xtíin mitsaanʼ ga̱jma̱a̱ nuxnatiʼñamijná májánʼ mudxawíín ndxájulú bi̱ naxná discurso náa naʼthí consejo dí na̱ʼkha̱ náa Biblia. Maski ajndu ikhiin nuniʼnuuʼ má májánʼ consejo rígi̱, mú rí mbiʼi xúgi̱, consejo dí ikhiin nudxawíín nagiʼdoo itháan numuu rí ndayóoʼ mugíʼ muni̱ índo̱ gúdamijná.

² Ikháá má kayuuʼ rígá ga̱jma̱a̱ numuu xóo munimbáji̱i̱n e̱ji̱n. Mbáa xa̱bu̱ gajmii nidxawíín má mbaʼa núthu náa discurso náa naʼthí ga̱jma̱a̱ numuu xóo muʼnimbáji̱i̱n e̱ji̱n. Mú índo̱ nuguáʼdiin e̱jñu̱ún naxtiʼkhuu xúgíʼ. Consejo dí ikhiin nidxawíín nagiʼdoo itháan numuu. ¡Xúgi̱ kajkuáa mbá ñajuunʼ dí ra̱ʼkhá tháán mba̱a̱ náa ñawúúnʼ xabuanii! Índo̱ naxtiʼkhuu xóo kuwáánʼlú, naxtiʼkhuu xóo nduʼyáálú ikha ndrígóo Biblia dí ikháánʼ má nuniʼnuuʼlú májánʼ. Ikha jngóo, ikháánʼ bi̱ ni̱ndxu̱lú xa̱bi̱i̱ Jeobá nuraxnulú Biblia “xúgíʼ mbiʼi” xó má ndiyóoʼ muni̱ xúgíinʼ reyes bi̱ nikúwá náa Israel ga̱jma̱a̱ nundxaʼwamíjná rí naʼthí ikhí (Deut. 17:19).

 3. Ndiéjunʼ gúʼyáá náa artículo rígi̱ rá.

³ Xabuanii, ikháanʼ bi̱ nindxa̱la cristianos kajkuáa náa ñawánla ñajunʼ dí ra̱ʼkhá tháán mba̱a̱: Dí mumbáñún e̱jña̱la muniʼniiʼ Jeobá. Mú raʼkháa i̱ndó ndayóoʼ muthu̱u̱nla xóo kaʼnii nindxu̱u̱ Dios, ikháanʼ ndayóoʼ mumbáñula mu maʼndún kuyáá Jeobá ga̱jma̱a̱ xúgíʼ a̱jkiu̱ún. Xú káʼnii gándoo gúnila rá. Náa artículo rígi̱ mbuʼyáá mbá a̱jkhu̱ ikha dí na̱ʼkha̱ náa Biblia dí ma̱ndoo mambáyala (2 Tim. 3:16). Ma̱ngaa mbuʼyáá xú káʼnii nimbáñún tikhun xabuanii índo̱ ninimbu̱ún consejos dí na̱ʼkha̱ náa Biblia.

 4. Ndiéjunʼ gámbañún xabuanii mumbañún e̱jñu̱ún mu maʼndún kuyáá Jeobá rá. (Santiago 1:5.)

⁴ Timbá: Guʼyáʼ ikha ndrígóo Jeobá. Mu mumbáñún e̱jña̱la maʼndún kuyáá Jeobá, ikháanʼ ndayála ku̱ma̱. Ikha jngóo ma̱ndoo munda̱ʼa̱la ikhaa (atraxnuu Santiago 1:5).b Jeobá nindxu̱u̱ bi̱ naxná itháan májánʼ consejos. Náá numuu rá. Timbá, rí ikhaa nindxu̱u̱ Anu̱lú bi̱ najmañuu wéñuʼ bi̱ xtáa náa xúgíʼ tsu̱du̱u̱ Ku̱ba̱ʼ (Sal. 36:9). Imbo̱o̱ nindxu̱u̱ dí ikhaa naxnúlú consejos dí nambáyulú má xúʼko̱ (Is. 48:17).

 5. a) Ndiéjunʼ dí Jeobá naxnún xabuanii mu muʼnimbáji̱i̱n e̱jñu̱ún rá. b) Ndiéjunʼ nijmañaaʼ xóo niʼnimbaji̱i̱n e̱ji̱i̱n ndxájulú Amorim xó má ni̱ʼkha̱ náa video rá.

⁵ Jeobá naxnún mbaʼa wéñuʼ consejos dí na̱ʼkha̱ náa Biblia xabuanii mu ma̱ndoo muʼnimbáji̱i̱n e̱jñu̱ún mu maʼndún kuyáá Jeobá (Mat. 24:45). Mbá xkri̱da, ma̱ndoo muxkamaa mbaʼa consejos náa sección dí naʼthí: “Rí mambáñún bi̱ mbá guʼwíin”, mba̱yu̱u̱ʼ tsiguʼ nigájnuu náa i̱yi̱ʼ ¡Awaxunʼ! mú rí xúgi̱ rígá náa jw.org. Náa ináa ndrígóo Internet ma̱ngaa mataxkamaa video dí na̱ʼkha̱ entrevistas ga̱jma̱a̱ i̱ʼwáʼ, dí ma̱ndoo mambáyala mu munimbáníí consejos dí naxná Jeobá mu xúʼko̱ muʼnimbáji̱i̱n e̱jña̱la (Prov. 2:4-6).c

 6. Ndiéjunʼ eʼthí mbáa xa̱bu̱ nikhi̱i̱ ga̱jma̱a̱ numuu ikha dí nigruigú náa xuajñuu Jeobá rá.

⁶ Mbaʼin xabuanii nuxnáa wéñuʼ núma̱aʼ Jeobá numuu rí najmuu xuajñuu mu mambáñún. Mbáa xa̱bu̱ nikhi̱i̱ bi̱ mbiʼyuu Joseph naʼthí: “Dí matanimbanuu mbá ajtsíin e̱jña̱a̱ʼ náa rí gajkhun nindxu̱u̱ gakhi̱i̱ wéñuʼ. Ikhúúnʼ ga̱jmu̱ʼ a̱ʼgiu̱ʼ nunda̱ʼa̱a̱ má xúʼko̱ Jeobá dí mambáyúxu, nguáná mbá artículo o mbá video nagájnuu phú mbiʼi dí ndayúxu. Dí mbuʼyáʼ ikha ndrígóo Jeobá ra̱ʼkhá tháán nimbáyuxu”. Joseph ga̱jma̱a̱ a̱ʼgiu̱u̱ ndiyáá rí artículo ga̱jma̱a̱ video nimbáñún e̱jñu̱ún mu mambajxúun gajmiún Jeobá.

 7. Náá numuu rí xabuanii ndayóoʼ mugíʼ májánʼ xkri̱da rá. (Romanos 2:21.)

⁷ Raga̱jma̱: Atagíʼ matani̱ dí naratá. E̱ji̱n nuyejxi̱i̱ xúgíʼ dí nuʼnilú ga̱jma̱a̱ nduyaridáá rí nduyáá. Gajkhun dí nimbáa xa̱bu̱ nikhi̱i̱ na̱nguá nindxu̱u̱ xa̱bu̱ jmbii (Rom. 3:23). Mú xabuanii bi̱ najmañún májánʼ nuni̱ mbá tsiakii mu mugíʼ mbá májánʼ xkri̱da (atraxnuu Romanos 2:21).d Mbáa xa̱bu̱ nikhi̱i̱ niʼthí rígi̱ ga̱jma̱a̱ numuu e̱ji̱i̱n: “Nindxu̱ún xóo mbá xtíin dí naʼgañu̱u̱n iyaʼ”. Niʼthí xóó: “Índo̱ ikháánʼ tséʼni̱ xó má eʼsngúnlú, ikhiin nuthulú”. Ikha jngóo á mu nandulú dí e̱jñu̱lú maʼndún kuyáá Jeobá, ikháánʼ gíʼmaa musngajmálú dí nandulú kuʼyáá gajkhun Jeobá ga̱jma̱a̱ rúʼko̱ mbuyáá mangiin.

8, 9. Ndiéjunʼ ejmañaaʼ dí naʼthí Andrew ga̱jma̱a̱ Emma rá.

⁸ Xabuanii mbaʼa rí ma̱ndoo muni̱ mú musngúún e̱jñu̱ún dí maʼndún kuyáá Jeobá. Guʼyáá dí naʼthí mbáa dxámá bi̱ gíʼdoo 17 tsiguuʼ bi̱ nijngúun má iyááʼ bi̱ mbiʼyuu Andrew: “Anu̱ʼ ga̱jma̱a̱ ru̱dúʼ nisngóʼ má xúʼko̱ dí gíʼdoo wéñuʼ numuu rí matajkháan. Xúgíʼ mbruʼun anu̱ʼ naʼtájkháan ga̱jma̱á nindxu̱ʼ maski ajndu ikhúún nitajkháan má. Anu̱xu ga̱jma̱a̱ ru̱dúxu̱ nuthuxu má xúʼko̱ dí ma̱ndoo mutakáñii Jeobá asndu wátha má nuthu eyuxu. Ikha jngóo dí matajkáan nigiʼdoo wéñuʼ numuu ndi̱yo̱o̱ ikhúún. Rí xúgi̱ nadxunʼ dí nandoo natakáñúu Jeobá ga̱jma̱a̱ nda̱yo̱o̱ xóo mbáa Anu̱ʼ bi̱ nandoo kaʼyoʼ”. Ikháanʼla xabuanii, garmáʼáan a̱jkia̱la dí xóo nandala ku̱ya̱a̱ Jeobá rúʼko̱ gámbáñúún wéñuʼ e̱jña̱la.

⁹ Rí xúgi̱ guʼyáá ga̱jma̱a̱ numuu Emma, índo̱ anu̱u̱ niniñúnʼ bi̱ kúwíin náa goʼwóo, ru̱dúu̱ ndiyóoʼ maʼni̱i̱ gidxóó dí gíʼmaa. Emma naʼthí: “Mbaʼa nuthu ru̱dúʼ tséʼngo̱o̱ mbújkha̱a̱ dí gíʼdoo mu ma̱ʼtsi̱ rí ndayúxu. Mú ikhaa naʼthúxu má xúʼko̱ dí Jeobá nañewu̱u̱n xa̱bi̱i̱ ga̱jma̱a̱ naxnún rí itháan ndañúunʼ. Ga̱jma̱a̱ dí ikhaa naraʼwíí maʼni, na̱jkhánú nda̱yo̱o̱, dí ikhaa ndaʼyoo dí gajkhun nindxu̱u̱ rúʼko̱, ru̱dúʼ nagíʼ naʼni rí naʼthí”. Ndiéjunʼ ejmañulú rá. Dí maski ajndu rígá xkujndu xabuanii ma̱ndoo musngúún e̱jñu̱ún ga̱jma̱a̱ xkri̱da ndrígu̱ún (Gál. 6:9).

10. Nguáná ma̱ndoo mutamijná gajmiún e̱jñu̱ún xa̱bu̱ israelitas rá. (Deuteronomio 6:6, 7.)

¹⁰ Ragajtsú: Gaguʼwaanʼ maratamíjná gajmiáanʼ e̱jña̱a̱ʼ. Jeobá niʼthún israelitas dí gíʼmaa muthúún e̱jñu̱ún ga̱jma̱a̱ numuu ikhaa xúgíʼ mbiʼi (atraxnuu Deuteronomio 6:6, 7).e Xúgíʼ mbiʼi ma̱ngoo mutamijná gajmiún e̱jñu̱ún ga̱jma̱a̱ mumbañún rí maʼndún kuyáá Jeobá. Mbá xkri̱da, jiámá bi̱ kaʼníí chíjkhíinʼ ma̱ndoo mumbañún anu̱ún mu mudu ga̱jma̱a̱ murajxi̱i̱ dí nijma̱a̱. Waʼxaʼ bi̱ kaʼníí chíjkhíinʼ nandoo nakúwi̱i̱n gajmiún ru̱dún mu muni̱ ñajuunʼ dí rígá náa guʼwáá, xóo muxmí o i̱ʼwáʼ. Dí muni̱ mbóó ñajunʼ guáʼdáá mbiʼi mu mutajminá mbaʼa rí gíʼdoo numuu. Mbá xkri̱da, ma̱ngoo mundxaʼwamíjna̱ xú káʼnii májánʼ a̱jkiu̱u̱n Jeobá ga̱jma̱a̱ xú káʼnii embáñún bi̱ kúwá náa guʼwún.

11. Náá mbiʼi gándoo gútamijná gajmiún e̱jñu̱ún a̱ngiu̱lú rá.

¹¹ Rí mbiʼi xúgi̱ nindxu̱u̱ mixtiʼkhu kayuuʼ. Náa mbaʼa xuajen xabuanii tséʼngo̱o̱ gútajmijná gajmiún e̱jñu̱ún numuu rí nuñajunʼ xúgíʼ mbiʼi ga̱jma̱a̱ e̱ji̱n nagúu̱n escuela. Ga̱jma̱a̱ numuu rúʼko̱ xabuanii nduyáʼ xóó muni̱ mu ma̱ndoo makuwá gajmiún e̱jñu̱ún ga̱jma̱a̱ dí mutamijná gajmiún (Efes. 5:15, 16; Filip. 1:10). Índo̱ nunigajma̱a̱ mbá guʼwíin ikhí ma̱ndoo muni̱ rígi̱. Mbáa dxámá bi̱ mbiʼyuu Alexander naʼthí: “Anu̱ʼ naʼniratoo xúgíʼ mu ma̱ndoo munígajma̱a̱ mbá guʼwáanʼ ga̱jma̱a̱ tséniñuʼ dí nimbá marígú kaʼyúxu̱ mbiʼi mu makuwáanʼxu mbóó. Nda̱wa̱á rí ninigajma̱a̱xu ikhú nutamíjna̱xu.

12. Ndiéjunʼ dí ragíʼmaa muni̱ xabuanii índo̱ nunigajma̱a̱ mbá guʼwíin rá.

¹² Ndiéjunʼ gándoo gúni̱ xabuanii mu e̱jñu̱ún manigu̱u̱nʼ índo̱ nunigajma̱a̱ mbá guʼwíin rá. Mbá rí ma̱ndoo muni̱ nindxu̱u̱ rí munigajma̱a̱ mbóó libro Araxtaa gagi kámuu. Á mu nunigajma̱a̱ mbóó i̱yi̱ʼ rígi̱, mbáa maʼni rí mutamijná májánʼ wéñuʼ. Numuu dí ikháanʼla xabuanii nandala dí e̱jña̱la mutala xóo kaʼnii ku̱mu̱ún ga̱jma̱a̱ dí naʼni maxmiéjúúnʼ, ikha jngóo xútrigáanʼla muriñún o muxnu̱u̱n mbá discurso índo̱ nunigajma̱a̱ mbá guʼwáanʼ. Á mu ikhiin nuthi mbá dí tsémbánii ga̱jma̱a̱ dí na̱ʼkha̱ raʼthí náa Biblia, xákiʼnáanʼla. Dí itháan májánʼ dí gíʼmaa muni̱, muxniin núma̱aʼ ga̱jma̱a̱ numuu rí nithala xóo kaʼnii ku̱mu̱ún ga̱jma̱a̱ guthu̱u̱n dí guni̱ má xúʼko̱ rúʼko̱. Á mú e̱jña̱la nuthi dí naku̱mu̱ún ikháanʼ xáʼniala mingíjyúuʼ mumbáñunla.

13. Nguáná gándoo gúthún e̱jñu̱ún xabuanii ga̱jma̱a̱ numuu Jeobá rá.

¹³ Ikháanʼla xabuanii, gu̱ya̱a̱ xóo ma̱ndoo muthu̱u̱n e̱jña̱la ga̱jma̱a̱ numuu Jeobá náa dí ikhaa niʼniwíi. Asndu tséyooʼ má mutriga̱a̱n kuyala Biblia mu muthu̱u̱n ga̱jma̱a̱ numuu Anu̱lú bi̱ nandoo kaʼyulú. Mbáa a̱ʼgú nikhi̱i̱ mbiʼyuu Lisa naʼthí: “Numbáñún e̱jñu̱xu mu muniʼniiʼ itháan májánʼ Jeobá ga̱jma̱a̱ numuu dí ikhaa niʼniwíi. Mbá xkri̱da, índo̱ xu̱wáánʼ jngrui̱go̱o̱ raʼtsíin, rúʼko̱ naʼni munduʼwa̱ ikhú nuthu̱u̱nxu rí Jeobá nindxu̱u̱ mbáa Dios gagi ga̱jma̱a̱ dí nandoo kaʼyoo vida, xó má ikháánʼlú”.

14. Ndíjkha rí xabuanii gíʼdoo wéñuʼ numuu mumbañún e̱jñu̱ún muraʼwíin májánʼ bi̱ mambajxúun gajmiún rá. (Proverbios 13:20.)

¹⁴ Raga̱jkhu̱: Gumbáñúún e̱jña̱la mu muguaʼdiin bi̱ mambajxúun májánʼ gajmiún. Náa Ajngá rawuunʼ Dios naʼthí kaʼwu dí bi̱ nambájxulú gajmiúlú ma̱ndoo mumbayulú mu̱ʼni̱ dí májánʼ o dí ra̱májánʼ (atraxnuu Proverbios 13:20).f Ikháanʼla xabuanii, lá ndu̱ya̱a̱ tsiéjúnʼ embájxu̱u̱n gajmiún e̱jña̱la ráʼ. Lá nuniʼniu̱u̱ʼ ga̱jma̱a̱ nakuwáanʼ gajmiála ikhiin xáʼ. Ndiéjunʼ gándoo gúni̱ mu mumbáñún e̱jña̱la mu muguaʼdiin bi̱ mambajxúun gajmiún bi̱ nandún kuyáá Jeobá rá. (1 Cor. 15:33.) Ikháanʼla ma̱ndoo mumbáñún e̱jña̱la mu muguaʼdiin bi̱ mambajxúun májánʼ gajmiún á mu nuthu̱u̱nla maguwáʼ náa guʼwála bi̱ nandún kuyáá Jeobá (Sal. 119:63).

15. Ndiéjunʼ gúni̱ xabuanii mu mumbañún e̱jñu̱ún mu muguaʼdiin bi̱ mambajxúun májánʼ gajmiún rá.

¹⁵ Guʼyáá mbá xkri̱da. Mbáa xa̱bu̱ nikhi̱i̱ bi̱ mbiʼyuu Tony naʼthí rí niʼni ikhaa ga̱jma̱a̱ a̱ʼgiu̱u̱ mu mumbañún e̱jñu̱ún muguaʼdiin bi̱ mambajxúun májánʼ gajmiún: “Ikhúún ga̱jmu̱ʼ a̱ʼgiu̱ʼ niʼni má mba̱yu̱u̱ʼ tsiguʼ dí nuthu̱u̱nxu̱ a̱ngiu̱lú maguwáʼ, xa̱bekha ga̱jma̱a̱ gu̱ʼu̱ bi̱ mixtiʼkhu tsigúnʼ ga̱jma̱a̱ mixtiʼkhu náa eguwáʼ mu maguwáʼ náa guʼwúxu muphiʼtsúxu mbóó ga̱jma̱a̱ nunigajma̱a̱ mbóó gajmiúxu bi̱ kúwíi̱n náa guʼwúxu. Ra̱ʼkhá tháán mitsaanʼ rígi̱, índo̱ matatsiʼnuuʼ xa̱bu̱ bi̱ nandún kuyáá Jeobá ga̱jma̱a̱ bi̱ nuni̱ ñajuunʼ ga̱jma̱a̱ gagi. Ma̱ngaa asndu nithu̱u̱nxu maguanún náa guʼwúxu a̱ngiu̱lú bi̱ nindxu̱ún circuito, misioneros ga̱jma̱a̱ eʼwíinʼ a̱ngiu̱lú. Nijkhuánú ndi̱ya̱a̱ dí experiencias dí ikhiin guáʼdáá xóo rí nadxún ga̱jma̱a̱ rí ikhiin kúwá xawii mu mumbañún eʼwíinʼ, rúʼko̱ nimbáñúún e̱jñu̱xu mu maku̱mu̱ún rí kúwíin mijngii náa Jeobá”. Ikháanʼla xabuanii, gu̱ni̱ asndu xó má eʼngo̱o̱ mumbáñún e̱jña̱la mu muguaʼdiin bi̱ mambajxúun májánʼ gajmiún.

16. Ndiéjunʼ dí ragíʼmaa mundxaʼwamíjná xabuanii á mu mbáa aʼdiún naraʼwíí maniñuuʼ raʼni ñajuunʼ Jeobá rá.

¹⁶ Á mu maski ajndu ni̱ni̱la xó má eʼngo̱o̱ mu mumbáñún e̱jña̱la, mú mbáa naraʼwíí rí maniñuuʼ raʼni ñajuunʼ Jeobá rá. Xúndxa̱ʼwa̱míjna̱la dí ikháanʼ tájmañala gúsngún e̱jña̱la. Jeobá nixnála ikháanʼ asndu e̱jña̱la dí muraʼwi̱i̱ dí muni̱, á mu nuni̱ ñajuunʼ Jeobá o na̱nguá. Á mu mbáa a̱ʼdiála naraʼwíí dí maniñuuʼ raʼni ñajuunʼ Jeobá, xúndxa̱ʼwa̱míjna̱la rí xátanga̱a̱. Garmáʼáan a̱jkia̱la ajngáa xkri̱da dí naʼthí ga̱jma̱a̱ numuu dxámá bi̱ nitanga̱a̱ (Luc. 15:11-19, 22-24). Dxámá buʼko̱ niniñuuʼ goʼwóo mu ndáwa̱á nitanga̱a̱. Mbáa ikháán maratha̱: “Rúʼko̱ nindxu̱u̱ mbá historia, na̱nguá rígá xúʼko̱ rí mbiʼi xúgi̱”. Mú xkridoo dxámá bi̱ mbiʼyuu Elie nasngájma dí gajkhun narígá rígi̱.

17. Xóo embáyaaʼ ikháán dí nigíʼnuu Elie rá.

¹⁷ Elie naʼthí: “Anu̱ʼ ga̱jma̱a̱ ru̱dúʼ nini̱ asndu xó má eʼngo̱o̱ mu ikhúún maʼndoʼ ka̱yo̱o̱ Jeobá ga̱jma̱a̱ Ajngá rawuunʼ dí nindxu̱u̱ Biblia. Mú índo̱ nigúʼdoo xóo 15 wáa tsiguʼ nánguá niʼnimboʼ”. Elie nigíʼdu̱u̱ niʼni dí ra̱májánʼ, maski ajndu anu̱u̱ ga̱jma̱a̱ ru̱dúu̱ niʼni mbá tsiakii mu mumbayíí mú ikhaa táʼnimbo̱o̱, ikhaa niniñuuʼ goʼwóo, nda̱wa̱á nánguá niʼnimbo̱o̱ xtángoo ndrígóo Jeobá. Maski ajndu xúʼko̱, nguáná bi̱ nambájxu̱u̱ ga̱jma̱a̱ naʼthúu̱n dí naʼthí náa Biblia. Elie naʼthí: “Índo̱ itháan na̱thu̱u̱n bi̱ nambájxuʼ ga̱jmu̱ʼ ga̱jma̱a̱ numuu Jeobá itháán nandxa̱ʼwamínáʼ ga̱jma̱a̱ numuu ikhaa, mañu mañu̱ú dí niʼsngóʼ anu̱ʼ ga̱jma̱a̱ ru̱dúʼ dí na̱ʼkha̱ raʼthí náa Biblia ni̱jkha̱ raʼni mba̱a̱”. Nda̱wa̱á Elie nitanga̱a̱ náa rí gajkhun.g Lá naʼngo̱o̱ nundxaʼwamíjna̱ xú káʼnii gagi nixtáa anu̱u̱ ga̱jma̱a̱ ru̱dúu̱ Elie numuu dí nisngáá ajndu nákhá chíʼgíiʼ mu maʼndoo kaʼyoo Jeobá ráʼ. (2 Tim. 3:14, 15)

18. Ndiéjunʼ rathá ikháán ga̱jma̱a̱ numún xabuanii bi̱ nuni̱ mbá tsiakii mu musngúún e̱jñu̱ún maʼndún kuyáá Jeobá rá.

¹⁸ Ikháanʼla xabuanii, Jeobá nixnála regalo dí mitsaanʼ wéñuʼ dí muʼnimbáji̱i̱n e̱jña̱la bi̱ maguánú manidxu̱ún xa̱bi̱i̱ ikhaa nda̱wa̱á (Sal. 78:4-6). Ndu̱ya̱a̱xu dí ñajunʼ rí kajkuáa ñawáanla nindxu̱u̱ gakhi̱i̱. Ikha jngóo nuxna̱a̱ʼlaxu wéñuʼ núma̱aʼ ga̱jma̱a̱ numuu ñajunʼ gakhi̱i̱ dí nuni̱la ga̱jma̱a̱ dí nuyambáála wéñuʼ. Gu̱ni̱ mbá tsiakii má xúʼko̱ mu mumbáñún e̱jña̱la mu maʼndún kuyáá Jeobá ga̱jma̱a̱ gunimbáji̱i̱n xó má naʼthí náa xtángoo ndrígóo (Efes. 6:4). Á mu nuni̱la ma̱ndoo mbu̱ya̱a̱ gajkhun dí Anu̱lú bi̱ xtáa mekhuíí maxtáa gagi ga̱jma̱a̱ numala.