Consejo rí ma̱ndoo mambáyulú makuwaanʼ májánʼ

 1. Náá numuu ndayúlú ku̱ma̱ ndrígóo Dios rá. (Proverbios 4:7.)

LÁ NDIYÓOʼ matraʼwíí mbá rí gíʼdoo wéñuuʼ numuu matani̱ ikháán ráʼ. Á mu dí xúʼko̱, ka gajkhun rí nitanda̱ʼa̱a̱ Jeobá rí maxnáaʼ ku̱ma̱ ráʼ. Numuu dí nitayáá rí ndayóoʼ mambáyáaʼ (Sant. 1:5). Rey Salomón niʼnirámáʼ: “Ku̱ma̱ gíʼdoo itháán numuu” (atraxnuu Proverbios 4:7).b Gajkhun má dí ikhaa na̱nguá xtáa raʼthí ga̱jma̱a̱ numuu asndu ndiéjúúnʼ má ku̱ma̱, ikhaa niʼthí ga̱jma̱a̱ numuu ku̱ma̱ dí na̱ʼkha̱ náa Jeobá (Prov. 2:6). Lá ma̱ndoo mambáyulú ku̱ma̱ ndrígóo Dios mu maʼngulú muraʼníí xkujndu rí mbiʼi xúgi̱ ráʼ. Ma̱ndoo, náa artículo rígi̱ mbuʼyáá xú káʼnii gándoo gámbáyulú.

 2. Ndiéjuunʼ gándoo gúʼni mu majmañulú itháan rá.

² Mbáa dí ma̱ndoo muʼni mu majmañulú itháan nindxu̱u̱ dí muʼnigajma̱a̱, ma̱ngaa dí muʼgíʼ mu̱ʼni̱ dí nisngáa a̱jmi̱i̱n xa̱bu̱ bi̱ niguáʼdáá wéñuuʼ ku̱ma̱. Ginii kayuuʼ muʼthá ga̱jma̱a̱ numuu Salomón. Náa Biblia naʼthí rí “Dios nixnúu ku̱ma̱ ga̱jma̱a̱ dí makro̱ʼo̱o̱ májánʼ Salomón” (1 Rey. 4:29). Nda̱wa̱á muʼthá ga̱jma̱a̱ numuu xkri̱da ndrígóo Jesús, mbáa xa̱bu̱ bi̱ itháán nijmañuu bi̱ nixtáa náa tsu̱du̱u̱ Ku̱ba̱ʼ (Mat. 12:42). Náa mbá profecía niʼthí ga̱jma̱a̱ numuu ikhaa: “Marigá náa ikhaa xi̱ʼ ndrígóo Jeobá, ga̱jma̱a̱ espíritu rí maʼni majmañuu wéñuuʼ ga̱jma̱a̱ rí maʼni makro̱ʼo̱o̱” (Is. 11:2).

 3. Ndiéjuunʼ guʼyáá náa artículo rígi̱ rá.

³ Ga̱jma̱a̱ numuu ku̱ma̱ rí Dios nixnúu Salomón ga̱jma̱a̱ Jesús, niʼni dí muxna májánʼ consejo dí ma̱ndoo mambáyúlú ikháanʼ. Náa artículo rígi̱ mbuʼyáá mbá ajtsú enii. Timbá, xóo mbuʼyáá awa̱án ga̱jma̱a̱ numuu mbújkha̱a̱. Ragajma, ga̱jma̱a̱ numuu ñajunʼ. Ragajtsú, ga̱jma̱a̱ numulú ikháanʼ.

 4. Xú káʼnii mixtiʼkhu nixtáa Salomón ga̱jma̱a̱ Jesús rá.

⁴ Salomón nigiʼdoo wéñuuʼ ga̱jma̱a̱ nixtáa náa mbá guʼwá mitsaanʼ (1 Rey. 10:7, 14, 15). Mú Jesús káaʼ nguátháá má nixtáa ga̱jma̱a̱, ma̱ngaa asndu goʼwóoʼ tágiʼdoo (Mat. 8:20). Maski ajndu xúʼko̱ Salomón ga̱jma̱a̱ Jesús ndiyáá awa̱án ga̱jma̱a̱ numuu rígi̱, numuu rí ku̱ma̱ ndrígu̱ún na̱ʼkha̱ náa Jeobá.

 5. Xú káʼnii awa̱án ndiʼyoo ga̱jma̱a̱ numuu mbújkha̱a̱ Salomón rá.

⁵ Salomón ni̱jkha̱nú ndiʼyoo dí mbújkha̱a̱ ma̱ndoo ‹mañewulu› (Ecl. 7:12). Á mu kuaʼdáá mbújkha̱a̱ ma̱ndoo muʼtsi̱ rí ndayúlú o muguaʼdáá rí nandulú. Maski ajndu Salomón nigiʼdoo wéñuuʼ, mu ni̱jkha̱nú ndiʼyoo dí rígá rí itháán gíʼdoo numuu ki xóo mbújkha̱a̱. Mbá xkri̱da, ikhaa niʼnirámáʼ: “Itháán májánʼ dí majmaʼníínʼ xóo mbáa xa̱bu̱ bi̱ májáanʼ ki xóo dí maraʼdáá wéñuuʼ” (Prov. 22:1; nota). Ma̱ngaa ni̱jkha̱nú ndiʼyoo dí raʼkháa xúgíʼ mbiʼi kúwá gagi xa̱bu̱ bi̱ nandún kuyáá mbújkha̱a̱ (Ecl. 5:10, 12). Ma̱ngaa niʼthí rí xákumulú kuʼyáá wéñuuʼ mbújkha̱a̱ numuu dí rúʼko̱ nacha̱ naguámbá (Prov. 23:4, 5).

 6. Ndiéjuunʼ rí itháán gíʼdoo numuu ndiʼyoo Jesús rá. (Mateo 6:31-33.)

⁶ Jesús ndiʼyoo awa̱án ga̱jma̱a̱ numuu dí magiʼdoo. Ikhaa naniguuʼ mikhu ga̱jma̱a̱ maga̱a̱n (Luc. 19:2, 6, 7). Mbá miʼtsú ikhaa niʼni dí iyaʼ magutajxi̱i̱ vino rí itháán májánʼ, rúʼko̱ ninindxu̱u̱ timbá milagro dí niʼni (Juan 2:10, 11). Mbiʼi rí ikhaa nikháñuu kagíʼ mbá xtíin rí minumuu (Juan 19:23, 24). Dí magiʼdoo na̱nguá nindxu̱u̱ dí itháán gíʼdoo numuu náa vida ndrígóo, ikha jngóo niʼthún xa̱bi̱i̱: “Nimbáa xándoo mani̱ndxu̱u̱ ñumbáá náa inún a̱jmi̱i̱n xa̱bu̱ [...]. Xándoo mu̱ni̱ ñajuunʼ Dios ga̱jma̱a̱ ikhú má mbuʼyáʼ muguaʼdáá wéñuuʼ” (Mat. 6:24). Á mu nuʼgíʼ ginii muʼni ñajuunʼ Jeobá ikhaa má gúxnulú rí gáʼyulúʼ (atraxnuu Mateo 6:31-33).c

 7. Xú káʼnii niguma tsajkurámaaʼ mbáa ndxájulú dí mbaʼyoo awa̱án ga̱jma̱a̱ numuu mbújkha̱a̱ rá.

⁷ Mbaʼiin a̱ngiu̱lú nimbáñún dí munimbu̱ún consejo ndrígóo Jeobá dí xú káʼnii gíʼmaa mbuyáá ga̱jma̱a̱ numuu mbújkha̱a̱. Mbá xkri̱da, guʼyáá ga̱jma̱a̱ numuu ndxájulú Daniel, ikhaa naʼthí: “Índo̱ kaʼníí nindxu̱ʼ dxámá niraʼwíí maʼni ñajuunʼ Jeobá ga̱jma̱a̱ ndi̱yo̱o̱ dí rígi̱ gíʼdoo itháán numuu”. Numuu rí Daniel niʼni tsiakiminaʼ mu xágiʼdoo wéñuuʼ, ikha jngóo nijmuu mbiʼi ndrígóo ga̱jma̱a̱ dí najmañuu mu mayambáá náa narígá gamiéjunʼ ma̱ngaa náa Betel. Ikhaa naʼthí xóó: “Nditháan tsétanga̱a̱ a̱jkiu̱nʼ dí niraʼwíí ma̱ni̱. Gajkhun má dí nikhánuʼ itháán mbújkha̱a̱ á mu niʼgíminaʼ mbayáʼ, mú xáguʼdíin bi̱ nambájxuʼ májánʼ gajmíʼ xóo dí mbiʼi xúgi̱. Dí magíʼ ma̱ni̱ ginii ñajuunʼ Jeobá naʼni dí maxtáá gagi, xándoo gáxtáá gagi á mu i̱ndó mbújkha̱a̱ eʼyáʼ. Xáʼngo̱o̱ mbújkha̱a̱ gaʼni mbríguii ga̱jma̱a̱ xúgíʼ dí naʼni tsajkurámúúnʼ Jeobá”. Nakujmaa kaʼwu dí á mu nugíʼ nuʼni ginii ñajuunʼ Jeobá naʼni dí makuwáánʼ gagi, raʼkháa dí mbuʼyáʼ mbújkha̱a̱.

 8. Xú kaʼnii eʼyáá dí Salomón ndiʼyoo awa̱án ga̱jma̱a̱ numuu ñajunʼ rá. (Eclesiastés 5:18, 19.)

⁸ Salomón niʼthí dí ñajunʼ gakhii dí nuʼnilú ‹nindxu̱u̱ dí nimináanʼlú Dios› (atraxnuu Eclesiastés 5:18, 19).d Ma̱ngaa niʼnirámáʼ: “Xúgíʼ ñajunʼ rí gakhii na̱jkha̱nú narígá rí májánʼ” (Prov. 14:23). Raʼkháa i̱ndó niʼthíí, ikhaa ndiʼyoo májánʼ xú káʼni nindxu̱u̱ rí matiejunʼ gakhii, numuu dí niñajunʼ náa niguma guʼwá, náa nudu̱u̱ ixi̱ uva, ixi̱ ri̱ʼi̱ ga̱jma̱a̱ niʼni puzu ma̱ngaa niʼni rí magiʼi xuajen (1 Rey. 9:19; Ecl. 2:4-6). Ikhaa niñajunʼ gakhii wéñuuʼ ma̱ngaa nidxuu ga̱jma̱a̱ numuu ñajunʼ dí niʼni, ikhaa ndiʼyoo dí raʼkháa i̱ndó rúʼko̱ eyóoʼ maʼni mu maxtáa itháán gagi. Ma̱ngaa niʼni i̱ʼwáʼ ñajunʼ ga̱jma̱a̱ numuu Jeobá. Mbá xkri̱da, nixtáa raʼyoo náa niguma templo ndrígóo Jeobá mu mbiʼyamajkuíí, rí ndijyúuʼ itháán rí juwan tsiguʼ (1 Rey. 6:38; 9:1). Nda̱wa̱á dí niʼni mbaʼa wéñuuʼ ñajunʼ, ni̱jkha̱nú ndiʼyoo dí maʼni ñajuunʼ Jeobá gíʼdoo itháán numuu, niʼnirámáʼ: “Rí guámbulú niʼdxawíín xúgíʼ, nindxu̱u̱: Gamiñáʼ xtayáá Dios bi̱ gajkhun ga̱jma̱a̱ atatsimbaaʼ rí naʼtáñajunʼ” (Ecl. 12:13).

 9. Ndiéjuunʼ niʼni Jesús mu mbaʼyoo awa̱án ñajunʼ rá.

⁹ Jesús ninindxu̱u̱ mbáa xa̱bu̱ bi̱ niñajunʼ wéñuuʼ. Índo̱ ninindxu̱u̱ mbáa dxámá niʼthóo ixi̱ (Mar. 6:3). Mbáa anu̱u̱ ga̱jma̱a̱ rudúu̱ nidxún wéñuuʼ numuu rí nimbáñúún maxnún rí nda̱ñúunʼ bi̱ kúwá náa goʼwóo, numuu rí mbaʼin. Numuu rí ikhaa na̱nguá nindxu̱u̱ xa̱bu̱ aʼkhá, xúgíʼ rí naʼni nagájnuu májánʼ, ikha jngóo mbaʼin wéñuuʼ xa̱bu̱ eguwáʼ náa nañajunʼ. Naʼngo̱o̱ nundxaʼwamíjna̱ dí Jesús naniguuʼ ñajunʼ rí naʼni, mú na̱nguá niñuuʼ dí rúʼko̱ marígú káyúuʼ mbiʼi dí maʼni ñajuunʼ Anu̱u̱ (Juan 7:15). Índo̱ ikhaa xtáa raʼni kájxi̱ ñajuunʼ Anu̱u̱ niʼthí consejo rígi̱: “Xúñejunʼla mu mbuʼyáʼ ganitsu rí nachúu, guñejunʼla mu mbuʼyáʼ ganitsu rí ndajyúuʼ ga̱jma̱a̱ rí maʼga kaguáanʼ makuwáanʼ kámuu mbiʼi” (Juan 6:27). Ga̱jma̱a̱ náa discurso dí nixnáa náa Kúbá niʼthí: ‹Gurajxi̱i̱ rí gíʼdoo numuu náa mekhuíí› (Mat. 6:20).

10. Ndiéjuunʼ gamíi magíʼnulú á mu nuñajunʼ májánʼ wéñuuʼ rá.

¹⁰ Ku̱ma̱ dí naxnúlú Jeobá nambáyulú mbuʼyáá awa̱án ñajunʼ ndrígúlú. Xúgiáanʼ bi̱ ni̱ndxu̱lú cristianos najuiʼtúlú dí muñajunʼ gakhii mu xúʼko̱ muʼni ‹mbá májánʼ ñajunʼ› (Efes. 4:28). Índo̱ patriúnlú ndaʼyoo dí tséʼni kuʼwáʼ ga̱jma̱a̱ nuñajunʼ májánʼ, mbáa asndu maʼthúlú dí nanigu̱u̱ʼ ñajunʼ dí nuʼnilú. Ma̱ngaa ma̱ndoo maʼni dí mbáa ga̱jma̱a̱ numuu rí nandulú dí patriúnlú maʼthí dí májánʼ ga̱jma̱a̱ numún Testigos de Jeobá maʼni dí muguáʼdíi muñajunʼ itháan asndu wakhíʼ. Á mu nuʼni̱ rígi̱ maʼni dí muniʼñáánʼlú ruñaʼwu̱u̱n bi̱ kúwíin náa guʼwúlú ga̱jma̱a̱ muniʼñááʼ ru̱ʼni̱ ñajuunʼ Jeobá. Á mu nuguáʼníílú rígi̱ mbaʼyóoʼ mbuʼyáá ndiéjuunʼ gúʼni mu matangáanʼ mbuʼyáá awa̱án ga̱jma̱a̱ numuu ñajunʼ.

11. Ndiéjuunʼ nijmañuu William índo̱ ndiʼyoo xkri̱da ndrígóo mbáa ndxájulú rá.

¹¹ Mbáa ndxájulú dxámá bi̱ mbiʼyuu William nijmañuu xú káʼnii gíʼmaa mbaʼyoo awa̱án ñajunʼ. Ikhaa niñajunʼ ga̱jma̱a̱ mbáa ndxájulú bi̱ kayá edxu̱u̱ náa Guʼwá nagimbáanʼ. William naʼthí rígi̱ ga̱jma̱a̱ numuu ndxájulú bi̱ kayá edxu̱u̱: “Ikhaa nindxu̱u̱ mbá májánʼ xkri̱da xóo gíʼmaa mbuʼyáá awa̱án ñajunʼ, ikhaa nañajunʼ wéñuuʼ ga̱jma̱a̱ nadxún xa̱bu̱ ga̱jma̱a̱ numuu ñajunʼ dí ikhaa naʼni, mú índo̱ naguámbóo naniñuuʼ xúgíʼ, ikhú naríyaʼ mbiʼi ga̱jma̱a̱ tsiakii ndrígóo mu mambáñún bi̱ kúwá náa goʼwóo ga̱jma̱a̱ maʼni ñajuunʼ Jeobá. Ikhaa nindxu̱u̱ mbáa xa̱bu̱ bi̱ itháán xtáa gagi bi̱ ikhúún naniʼníiʼ”.e

12. a) Xú káʼnii nisngajma Salomón rí ndiʼyoo awa̱án ga̱jma̱a̱ numuu ikhaa xá. b) Xú kaʼnii niʼni gachíminaʼ xá.

¹² Maski ajndu Salomón ninindxu̱u̱ májáanʼ xa̱bi̱i̱ Jeobá, ndiʼyoo awa̱án ga̱jma̱a̱ numuu ikhaa. Mbá miʼtsú índo̱ ikhaa kaʼníí nindxu̱u̱ dxámá ga̱jma̱a̱ tséʼni má mba̱yu̱u̱ʼ rí nigíʼdu̱u̱ niʼtáñajunʼ ndiʼyoo dí xájmaa gáʼni, ikha jngóo nindo̱ʼo̱o̱ Jeobá rí mambáyúu (1 Rey. 3:7-9). Ndiʼyoo dí gamíi nindxu̱u̱ dí matanimbamínaʼ, ikha jngóo niʼnirámáʼ: “Rí matanimbamínaʼ na̱ʼkha̱ ginii ki xóo mbá gamiéjunʼ, ga̱jma̱a̱ rí mataxuximínaʼ nákha xóó tsijpatriga̱a̱n” (Prov. 16:18). Phú ngíná nindxu̱u̱ dí nimbumuu ajngáa dí niʼnirámáʼ. Índo̱ ikhaa mbayuuʼ má xtáa raʼtáñajunʼ niʼnimbamínáʼ ga̱jma̱a̱ ninújngorámuuʼ kiʼtáñajunʼ ndrígóo Dios. Mbá xkri̱da, náa Xtángoo naʼthí rígi̱ dí gíʼmaa muni reyes hebreos: ‹Ragíʼmaa munigu̱nʼ gajmiún mbaʼin gu̱ʼu̱, mu xúʼko̱ a̱jkiu̱ún xáʼni jngarígi̱i̱n› (Deut. 17:17). Salomón táʼnimbo̱o̱ Xtángoo rígi̱, ikhaa nigiʼdiin 700 guʼwi̱i̱ ga̱jma̱a̱ 300 ñawiin, mbaʼiin dí ikhiin nduyamajkhún eʼwíinʼ dios (1 Rey. 11:1-3). Mbáa ikhaa nikumu̱u̱ rí ndaa má dí gágíʼnuu, mú nda̱wa̱á nimínuuʼ ga̱jma̱a̱ numuu dí niniñuuʼ Jeobá (1 Rey. 11:9-13).

13. Ndiéjuunʼ ejmañulú dí mundxa̱ʼwa̱míjna̱ ga̱jma̱a̱ numuu Jesús rí nindxu̱u̱ xa̱bu̱ wabaaʼ rá.

¹³ Jesús ninindxu̱u̱ xa̱bu̱ wabaaʼ ndiʼyoo awa̱án ga̱jma̱a̱ numuu ikhaa. Nákha xóó tséʼkha̱ náa tsu̱du̱u̱ Ku̱ba̱ʼ niʼni mbaʼa wéñuuʼ rí mitsaanʼ ga̱jma̱a̱ numuu Jeobá. Colosenses 1:16 naʼthí: “Ga̱jma̱a̱ numuu ikhaa nigumawíi xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ”. Índo̱ Jesús nijngúun iyááʼ nirmáʼáan xúgíʼ a̱jkiu̱u̱n dí niʼni ga̱jma̱a̱ Anu̱u̱ nákha nixtáa mekhuíí (Mat. 3:16; Juan 17:5). Mú na̱nguá niʼnimbamínáʼ ga̱jma̱a̱ numuu dí nirmáʼáan a̱jkiu̱u̱n, ni má na̱nguá niʼni mbuyáá dí ikhaa gíʼdoo itháán numuu ki xóo eʼwíinʼ. Ikhaa niʼthúún xa̱bi̱i̱ dí táʼkha̱ náa tsu̱du̱u̱ Ku̱ba̱ʼ “mu muni̱ mbáʼwi̱i̱, ni̱ʼkha̱ mu maʼni mbáʼwi̱i̱n eʼwíinʼ ga̱jma̱a̱ maxnájximinaʼ mu maʼnikáwíin mbaʼin xa̱bu̱” (Mat. 20:28). Ikhaa niʼthí dí xándoo maʼni rí ikhaa nandoo (Juan 5:19). Gajkhun dí Jesús ninindxu̱u̱ xa̱bu̱ wabaaʼ, mangáanʼ nandulú dí mbuʼyaridáá xkri̱da ndrígóo.

14. Xú kaʼnii gámbáyulú ajngáa dí niʼthí Jesús mu awa̱án guʼyáá xóo ni̱ndxu̱lú rá.

¹⁴ Jesús niʼsngúún xa̱bi̱i̱ dí gíʼmaa mbuyáá awa̱án ga̱jma̱a̱ numún. Mbá miʼtsú niʼthún: “Asndu kíxnuu xúgíʼ xtátsúun edxa̱la” (Mat. 10:30). Ra̱ʼkhá tháán eʼni̱i̱ a̱jkiu̱lú ajngáa rígi̱, itháán á mu nindxu̱u̱ bi̱ nakumulú dí na̱nguá guaʼdáá wéñuuʼ numulú. Rígi̱ naʼni marmáʼáan a̱jkiu̱lú rí Anu̱lú bi̱ xtáa mekhuíí naxmiéjuunʼ kaʼyulú ma̱ngaa ndaʼyoo dí guaʼdáá wéñuuʼ numulú. Á mu Jeobá naniñulú dí mbuʼyamajkuíí ga̱jma̱a̱ nandxa̱ʼwáminaʼ dí ma̱ndoo makuwáánʼ náa ku̱ba̱ʼ nuxi̱ʼ, ikháanʼ ragíʼmaa mundxaʼwamíjna̱lú dí nijngawa̱a̱n.

15. a) Xó má eʼthí i̱yi̱ʼ Bi̱ Nayejngoo dí naʼni má 15 tsiguʼ dí nigájnuu, xú káʼnii awa̱án gíʼmaa mbuʼyamijná rá. b) Xó má nakujmaa náa xtiʼkhuu dí na̱ʼkha̱ náa ináa 24, ndiéjuunʼ dí nandáti̱gu̱lú índo̱ nundxaʼwámíjna i̱ndó ga̱jma̱a̱ numulú ikháanʼ rá.

¹⁵ Rí xúgi̱ naʼni má 15 tsiguʼ dí mbá i̱yi̱ʼ Bi̱ Nayejngoo niʼthí dí: “Gíʼmaa mbuʼyáá awa̱án ga̱jma̱a̱ numulú. Xúʼyáá dí guaʼdáá wéñuuʼ numulú dí asndu muʼni mbaʼwumíjnalú ma̱ngaa dí asndu makumulú dí na̱nguá ejmáánʼ kayuuʼ. Rí phú nandulú dí mbuʼyáá awa̱án ga̱jma̱a̱ numulú. Mbuʼyáá náá rí maʼngulú muʼni ga̱jma̱a̱ dí xáʼngulú. Mbáa ndxájulú a̱ʼgu̱ niʼthí: ‹Na̱nguá má nindxu̱ʼ bi̱ itháan ra̱májáanʼ ni má bi̱ itháán májáanʼ. Rígá dí najmún na̱ni̱ ma̱ngaa rígá náa nakiéʼkhunʼ xó má xúgíinʼ xa̱bu̱›”.f Nduʼyáá dí májánʼ nindxu̱u̱ dí awa̱án guʼyáá ga̱jma̱a̱ numulú ráʼ.

16. Náá numuu rí naxnúlú consejo rí itháán májánʼ Jeobá rá.

¹⁶ Náa Ajngá rawuunʼ Dios naxnúlú consejo rí itháán májánʼ, naʼni rígi̱ numuu rí nandoo kaʼyulú ma̱ngaa dí makuwáanʼlu tsímáá (Is. 48:17, 18). Rí itháán májánʼ dí muraʼwíí muʼni nindxu̱u̱ rí muʼni ñajuunʼ Jeobá ga̱jma̱a̱ rígi̱ maʼni dí makuwáanʼlu gagi. Ga̱jma̱a̱ xaguaʼdáálú wéñuuʼ xkujndu xóo xa̱bu̱ bi̱ i̱ndó nduyáʼ mbújkha̱a̱, bi̱ nuñajunʼ ga̱jma̱a̱ bi̱ i̱ndó nundxa̱ʼwa̱míjna̱ ga̱jma̱a̱ numún ikhiin. Ikha jngóo gánindxu̱lú xa̱bu̱ bi̱ najmañuu mu xúʼko̱ muʼni rí maʼdxuu Jeobá (Prov. 23:15).