Jeobá xtáa xawii maʼni mba̱a̱ a̱jkiu̱u̱n

 1. Ndiéjuunʼ niʼthí Rey Salomón náa Eclesiastés 7:20 rá.

REY Salomón niʼthí: “Nda̱wa̱a̱ náa tsu̱du̱u̱ ku̱ba̱ʼ xa̱bu̱ jmbii bi̱ maʼni má xúʼko̱ rí májánʼ ga̱jma̱a̱ xakiéʼkúun” (Ecl. 7:20). ¡Phú gajkhun nindxu̱u̱ rígi̱! Xúgiáánʼ ni̱ndxu̱lú xa̱bu̱ aʼkhá (1 Juan 1:8). Ikha jngóo, xúgiáanʼ ndayúlú rí Dios maʼni mba̱a̱ a̱jkiu̱u̱n kaʼyulú ma̱ngaa rí muni mba̱a̱ a̱jkiu̱ún kuyulú eʼwíinʼ.

 2. Xú kaʼnii nikumulú índo̱ mbáa bi̱ nambájxu gajmiúlú niʼni mba̱a̱ a̱jkiu̱u̱n kaʼyulú rá.

² Niʼni gawíínʼ mbá miʼtsu mbáa bi̱ nambájxu gajmiúlú ráʼ. Mbáa xúʼko̱. Mu mambájxulú má xúʼko̱ gajmiúlú ndiyóoʼ muʼthán dí maʼni mba̱a̱ a̱jkiu̱u̱n kaʼyulú. Xú káʼnii nikumulú índo̱ niʼni mba̱a̱ a̱jkiu̱u̱n kaʼyulú xá. Mbáa ra̱ʼkhá tháán nindxulú.

 3. Ndiéjuunʼ gúʼyáá náa artículo rá.

³ Xúgiáánʼ nandulú dí mambájxulú gajmiúlú itháán Jeobá, mu nguáná nuʼni o nuʼthá dí na̱nguá enigu̱u̱ʼ. Náá numuu rí ma̱ndoo mbuʼyáá gajkhun dí ikhaa nandoo maʼni mba̱a̱ a̱jkiu̱u̱n kaʼyulú xá. Náá numuu rí mixtiʼkhu nindxu̱u̱ rí xóo naʼni mba̱a̱ a̱jkiu̱u̱n Jeobá ga̱jma̱a̱ rí xóo nuni xa̱bu̱ numbaaʼ rá. Iwáá kayuuʼ mbuʼyáá tsíín eʼni mba̱a̱ a̱jkiu̱u̱n kaʼñún Jeobá.

 4. Xú kaʼnii eʼyáá gajkhun dí Jeobá xtáa xawii maʼni mba̱a̱ a̱jkiu̱u̱n rá.

⁴ Náa Biblia naʼthí dí Jeobá xtáa xawii mu maʼni mba̱a̱ a̱jkiu̱u̱n kaʼyulú. Mbá xkri̱da, náa kúbá Sinaí Jeobá niʼthúu̱n Moisés xú kaʼnii Dios nindxu̱u̱, ángel niʼthí: “Jeobá, Jeobá, mbáa Dios bi̱ naʼni mba̱a̱ a̱jkiu̱u̱n, ga̱jma̱a̱ nagáwiinʼ a̱jkiu̱u̱n, na̱nguá kiʼnáa nacha̱ ga̱jma̱a̱ ra̱ʼkhá tháán gíʼdoo ngajua rí nditháan tsétumuu ga̱jma̱a̱ gajkuwiin, bi̱ nasngájma dí ra̱ʼkhá tháán eyoo kaʼñún mbaʼin wéñuuʼ xa̱bu̱, bi̱ naʼni mba̱a̱ a̱jkiu̱u̱n índo̱ nakiéʼkúún ga̱jma̱a̱ índo̱ naʼni tígu̱u̱n ma̱ngaa índo̱ nuxuda̱mi̱jna̱ aʼkhá” (Éx. 34:6, 7). Jeobá nindxu̱u̱ mbáa Dios bi̱ nandoo kaʼyulú ga̱jma̱a̱ nagáwíinʼ a̱jkiu̱u̱n, ikhaa xtáa xawii maʼni mba̱a̱ a̱jkiu̱u̱n kaʼñún bi̱ natanga̱a̱ a̱jkiu̱ún (Neh. 9:17; Sal. 86:15).

 5. Xó má eʼthí náa Salmo 103: 13, 14, ndiéjuunʼ eʼni Jeobá índo̱ naniniáánʼlú májánʼ rá.

⁵ Numuu rí Jeobá nindxu̱u̱ bi̱ niʼniwáanʼlú, ikha jngóo naniniáanʼlú májánʼ. Mitsaanʼ wéñuuʼ nindxu̱u̱ rí mbuʼyáá dí Jeobá naniniiʼ mambáa xa̱bu̱ numbaaʼ (Sal. 139:15-17). Ikha jngóo naʼngo̱o̱ ndaʼyoo xúgíʼ aʼkhá dí nindríʼgúulú náa xabuanii, mu raʼkháa i̱ndó rúʼko̱, asndu niʼngo̱o̱ ndiʼyoo xú kaʼnii nikuwáánʼlú ga̱jma̱a̱ tsíin bi̱ nikuwáanʼ gajmiúlú. Ndiéjuunʼ eʼni Jeobá índo̱ ndaʼyoo xúgíʼ rígi̱ rá. Ga̱jma̱a̱ numuu rí naniniáanʼlú májánʼ naxkaxi̱i̱ magáwíinʼ a̱jkiu̱u̱n (Sal. 78:39; atraxnuu Salmo 103:13, 14).b

 6. Xú kaʼnii nisngájma Jeobá rí nandoo maʼni mba̱a̱ a̱jkiu̱u̱n kaʼyulú rá.

⁶ Jeobá nasngájma dí nandoo maʼni mba̱a̱ a̱jkiu̱u̱n kaʼyulú, ikhaa nakro̱ʼo̱o̱ májánʼ dí ga̱jma̱a̱ numuu timbáa xa̱bu̱ niʼni dí mundrígúu aʼkhá ga̱jma̱a̱ dí makhañún xúgíinʼ xa̱bu̱ (Rom. 5:12). Ndaa nimbá dí muʼni, mu muʼni kawumijná náa aʼkhá ni má dí muʼni káwíin eʼwíinʼ (Sal. 49:7-9). Dios nigáwíinʼ a̱jkiu̱u̱n ga̱jma̱a̱ ndiyáʼ xóo maʼni káwáanʼ, xó má eʼthí náa Juan 3:16, ga̱jma̱a̱ numuu rí nandoo kaʼyulú nikunguaanʼ A̱ʼdióo bi̱ mbáwíi mu makhañúu ga̱jma̱a̱ numulú (Mat. 20:28; Rom. 5:19). Jesús nikháñuu ga̱jma̱a̱ numún xúgíinʼ bi̱ nusngajma fe náa ikhaa (Heb. 2:9). Lá naʼngo̱o̱ nundxaʼwamíjná xú kaʼnii nikumu̱u̱ Jeobá índo̱ ndiʼyoo rí A̱ʼdióo bi̱ nandoo kaʼyoo wéñuuʼ nimínúunʼ ga̱jma̱a̱ nda̱wa̱á nikháñuu ráʼ. Náá numuu rí Jeobá niniñuuʼ makhañúu A̱ʼdióo á mu tsíyoo gaʼni mba̱a̱ a̱jkiu̱u̱n kaʼyulú rá.

 7. Tsíín nindxu̱ún tikhuun xa̱bu̱ bi̱ Jeobá niʼni mba̱a̱ a̱jkiu̱u̱n kaʼñún rá.

⁷ Náa Biblia naʼthí ga̱jma̱a̱ numún mbaʼin xa̱bu̱ bi̱ Jeobá niʼni mba̱a̱ a̱jkiu̱u̱n kaʼñún (Efes. 4:32). Lá narmáʼáan a̱jkia̱a̱nʼ tsíin nindxu̱ún ráʼ. Mbáa natatsaʼwáminaʼ ga̱jma̱a̱ numuu rey Manasés, ikhaa ninindxu̱u̱ xa̱bu̱ ra̱májáanʼ ga̱jma̱a̱ nikudaminaʼ aʼkhá mbiiʼ náa inuu Jeobá. Ikhaa ndiʼyamajkhún dios bi̱ ragájkhun ma̱ngaa niʼni rí eʼwíinʼ muni xúʼko̱ kaʼnii, asndu nixnájxi̱i̱n e̱ji̱i̱n xóo tsigijñaʼ náa inún dios bi̱ ragájkhun ma̱ngaa asndu nikhudaaʼ xándú náa templo ndrígóo Jeobá. Náa Biblia naʼthí: “Niʼni xúgíʼ enii dí ra̱májánʼ náa inuu Jeobá mu maʼni makiʼnáa” (2 Crón. 33:2-7). Índo̱ Manasés nisngájma rí gajkhun nitanga̱a̱ a̱jkiu̱u̱n, ikhú Jeobá niʼni mba̱a̱ a̱jkiu̱u̱n kaʼyoo, ikha jngóo niniñuuʼ rí mata̱nga̱a̱ mani̱ndxu̱u̱ rey (2 Crón. 33:12, 13). Imba̱a̱ tsáa bi̱ ma̱ndoo ma̱ʼkha̱ náa edxu̱lú nindxu̱u̱ rey David bi̱ niʼni aʼkhá mbiiʼ, índo̱ nikudaminaʼ aʼkhá ga̱jma̱a̱ mbáa a̱ʼgiu̱u̱ xa̱bu̱, nda̱wa̱á nixiyáa ajmbio̱o̱ a̱ʼgu̱ buʼko̱. Índo̱ David ndiʼyoo rí nigiʼdoo aʼkhúun, ikhú nitanga̱a̱ a̱jkiu̱u̱n, Jeobá niʼni mba̱a̱ a̱jkiu̱u̱n kaʼyoo (2 Sam. 12:9, 10, 13, 14). Ikha jngóo nduʼyáá gajkhun dí Jeobá nandoo maʼni mba̱a̱ a̱jkiu̱u̱n kaʼyulú. Xó má mbuʼyáá xúgi̱, rí naʼni mba̱a̱ a̱jkiu̱u̱n Jeobá nindxu̱u̱ mixtiʼkhu kayuuʼ xóo rí nuni xa̱bu̱.

 8. a) Náá numuu rí Jeobá nindxu̱u̱ mbáa juez bi̱ itháán najmañuu rá. b) Xú kaʼnii esngájma rígi̱ xá.

⁸ Jeobá nindxu̱u̱ mbáa ‹Juez bi̱ xtáa náa xúgíʼ tsu̱du̱u̱ ku̱ba̱ʼ› (Gén. 18:25). Mbáa juez bi̱ najmañuu naninuuʼ májánʼ Xtángoo, Jeobá nindxu̱u̱ xúʼko̱ kaʼnii numuu dí raʼkháa i̱ndó nindxu̱u̱ Juez ma̱ngaa nindxu̱u̱ bi̱ Naʼni Xtángoo (Is. 33:22). Nimbáa tséʼngo̱o̱ gáʼyoo dí májánʼ ga̱jma̱a̱ dí ra̱májánʼ xóo eʼyoo Jeobá. Ndiéjuunʼ imbo̱o̱ʼ gíʼdoo maʼni mbáa juez bi̱ najmañuu rá. Nákha xóó tséʼthí dí magíʼnuu xa̱bu̱, ikhaa gíʼmaa maʼngo̱o̱ mbaʼyoo xúgíʼ dí nirígá. Ikha jngóo nda̱wa̱a̱ nimbáa bi̱ maʼngo̱o̱ maʼni rígi̱ xóo Jeobá.

 9. Ndiéjuunʼ rí ndaʼyoo Jeobá mu maʼni mba̱a̱ a̱jkiu̱u̱n rá.

⁹ Jeobá na̱nguá nindxu̱u̱ xóo juez bi̱ kúwá náa numbaaʼ, numuu dí ikhaa ndaʼyoo xúgíʼ dí nirígá (Gén. 18:20, 21; Sal. 90:8). Mu maʼnimbánuu numuu xa̱bu̱, tséʼni ga̱jma̱a̱ i̱ndó rí nduyáá o nidxawíín xa̱bu̱. Ikhaa nakro̱ʼo̱o̱ májánʼ xú kaʼnii nigumáanʼlú, xóo nijuiʼsngúlú, náa niganiáanʼlú, xóo nundxa̱ʼwa̱míjna̱ ga̱jma̱a̱ xóo kumulú. Jeobá ma̱ngaa ndaʼyoo dí rígá náa a̱jkiu̱lú, xóo muʼthá, ikhaa nakro̱ʼo̱o̱ májánʼ ndiéjuunʼ rí naxkajxáánʼ ga̱jma̱a̱ náá numuu rí nandulú muʼni. Ikhaa naʼngo̱o̱ ndaʼyoo xúgíʼ (Heb. 4:13). Jeobá naʼni mba̱a̱ a̱jkiu̱u̱n numuu rí ndaʼyoo xúgíʼ dí narígá.

10. Náá numuu ma̱ndoo muʼthá rí xúgíʼ dí naraʼwíí maʼni Jeobá nindxu̱u̱ májánʼ rá. (Deuteronomio 32:4.)

¹⁰ Xúgíʼ dí naraʼwíí maʼni Jeobá nindxu̱u̱ májánʼ. Ikhaa tséraʼwíin xa̱bu̱. Índo̱ naʼni mba̱a̱ a̱jkiu̱u̱n tseʼyoo káaʼ mbájníí, xóo á mu kuaʼdáá mbújkha̱a̱, guaʼdáá numulú o najmañulú (1 Sam. 16:7; Sant. 2:1-4). Xándoo mutsuʼdaa Jeobá ni má muxnáá mbújkha̱a̱ (2 Crón. 19:7). Índo̱ ikhaa naraʼwíí dí maʼni, tséʼni numuu dí nakiʼnáa o mbá nacha̱ nandoo dí mambanúu (Éx. 34:7). Jeobá nindxu̱u̱ mbáa juez bi̱ itháán najmañuu, numuu rí ikhaa ndaʼyoo májánʼ xóo kaʼniáanʼlú ga̱jma̱a̱ xóo kuwáanʼlú (atraxnuu Deuteronomio 32:4).c

11. Náá numuu rí tsembríguii ga̱jma̱a̱ nimbá xóo naʼni mba̱a̱ a̱jkiu̱u̱n Jeobá rá.

¹¹ Bi̱ niniraʼmáʼ Escrituras Hebreas nduyáá rí nimbá tséʼni mbríguii ga̱jma̱a̱ xóo naʼni mba̱a̱ a̱jkiu̱u̱n Jeobá. Xó má eʼthí mbá i̱yi̱ʼ, ajngáa hebreo rígi̱ i̱ndó nijmún mu muthi ‹xú kaʼnii Jeobá naʼni mba̱a̱ a̱jkiu̱u̱n kaʼyoo mbáa bi̱ nakudaminaʼ aʼkhá›. Ikhí naʼthí xóó: ‹Nimbá miʼtsú tájmuun mu muthi índo̱ xa̱bu̱ numbaaʼ naʼni mba̱a̱ a̱jkiu̱u̱n kaʼyoo mbáa ndxájuu› (Sinónimos del Antiguo Testamento, dí niʼtájuíi Santiago Escuain). I̱ndó Jeobá ma̱ndoo maʼni mba̱a̱ a̱jkiu̱u̱n kaʼyoo aʼkhúun xa̱bu̱ bi̱ natanga̱a̱ a̱jkiu̱u̱n. Xú kaʼnii kumulú índo̱ Jeobá naʼni mba̱a̱ a̱jkiu̱u̱n kaʼyulú rá.

12, 13. a) Xú kaʼnii kúwá xa̱bu̱ bi̱ naʼni mba̱a̱ a̱jkiu̱u̱n kaʼñún Jeobá rá. b) Xú kaʼnii eʼni Jeobá ga̱jma̱a̱ aʼkhá dí niʼni xa̱bu̱ rá.

¹² Índo̱ nduʼyáá dí Jeobá naʼni mba̱a̱ a̱jkiu̱u̱n kaʼyulú, naʼni makuwaanʼ tsímáá, ‹naʼni̱i̱ a̱jkiu̱lú› ga̱jma̱a̱ naguaʼdáá mbá ku̱ma̱ kaʼwu. Xúgíʼ rígi̱ i̱ndó maʼndoo ‹ma̱ʼkha̱ náa Jeobá› (Hech. 3:19). Índo̱ naʼni mba̱a̱ a̱jkiu̱u̱n kaʼyulú naniñuuʼ dí matanga̱ánʼ mambájxu gajmiúlú mbujúuʼ, nindxu̱u̱ asndu xóo nditháan túʼni aʼkhá.

¹³ Índo̱ Jeobá naʼni mba̱a̱ a̱jkiu̱u̱n kaʼyoo mbáa xa̱bu̱, ikhaa na̱nguá tanga̱a̱ maʼthúu̱n o maxnúu castigo ga̱jma̱a̱ numuu rí niʼni (Is. 43:25; Jer. 31:34). Jeobá naniñuuʼ ‹xóo mitsinguánʼ egájnuu a̱jkha̱ʼ asndu náa narámáaʼ a̱jkha̱ʼ, aʼkhá ndrígu̱ún› (Sal. 103:12).d Índo̱ nduʼyáá xóo ikhaa naʼni mba̱a̱ a̱jkiu̱u̱n, rúʼko̱ naʼni muxnáa núma̱aʼ ga̱jma̱a̱ mbuʼyamajkuíí (Sal. 130:4). Tsíin ñajunʼ bi̱ naʼni mba̱a̱ a̱jkiu̱u̱n kaʼñún Jeobá rá.

14. Ndiéjuunʼ ejmañulú xóo naʼni mba̱a̱ a̱jkiu̱u̱n Jeobá rá.

¹⁴ Xó má ndiʼyáá, índo̱ Jeobá naʼni mba̱a̱ a̱jkiu̱u̱n, ikhaa tséyejxuu á mu aʼkhá dí niʼni mbáa xa̱bu̱ nindxu̱u̱ mba̱a̱ wéñuʼ. Ma̱ngaa nijmañulú dí Jeobá najmuu ku̱ma̱ ndrígóo. Numuu dí ikhaa nindxu̱u̱ bi̱ Niʼniwáanʼlú, bi̱ Naʼni Xtángoo ga̱jma̱a̱ Juez, najmuu xúgíʼ rígi̱ índo̱ naraʼwíí á mu maʼni mba̱a̱ a̱jkiu̱u̱n kaʼyoo mbáa xa̱bu̱ o na̱nguá. Ndiéjunʼ eʼyoo Jeobá índo̱ naraʼwíí mbá rí maʼni rá.

15. Xó má eʼthí náa Lucas 12:47, 48, ndiéjunʼ eyajxu̱u̱ Jeobá índo̱ naraʼwíí maʼni mba̱a̱ a̱jkiu̱u̱n rá.

¹⁵ Mbá rí Jeobá nayejxu̱u̱ nindxu̱u̱ á mu dí xa̱bu̱ bi̱ nakudaminaʼ aʼkhá ndaʼyoo má dí xtáa raʼni nindxu̱u̱ ra̱májánʼ. Jesús niʼthí kaʼwu náa Lucas 12:47, 48 (atraxnuu). Á mu xa̱bu̱ naʼni mbá dí ra̱májánʼ kayuuʼ ga̱jma̱a̱ ndaʼyoo má rí Dios tsénigu̱u̱ʼ o nawiyuuʼ, ikhaa xtáa rakudaminaʼ mbá aʼkhá mbiiʼ, mbáa Jeobá xándoo maʼni mba̱a̱ a̱jkiu̱u̱n kaʼyoo (Mar. 3:29; Juan 9:41). Á mu mbóoʼ mbiʼi na̱jkua̱nú nduʼyáá dí nuʼnilú nindxu̱u̱ mbá dí ra̱májánʼ, ma̱ndoo maʼni mba̱a̱ a̱jkiu̱u̱n kaʼyulú Jeobá ráʼ. Ma̱ndoo má, mú rígá imbo̱o̱ʼ rí ndaʼyoo Jeobá.

16. a) Ndiéjunʼ eyoo gáʼthúu̱n rí mata̱nga̱a̱ a̱jkia̱a̱nʼ rá. b) Ndíjkha rí gíʼdoo numuu muʼni rá.

¹⁶ I̱mba̱ rí ndaʼyoo Jeobá nindxu̱u̱ dí á mu xa̱bu̱ bi̱ nakudaminaʼ aʼkhá natanga̱a̱ gajkhun a̱jkiu̱u̱n. Ndiéjuunʼ eyoo gáʼthúu̱n rí mata̱nga̱a̱ a̱jkia̱a̱nʼ rá. Nandoo gáʼthúu̱n rí matriʼkui̱i̱ o matatsiʼñáánʼ rí xtaa ratani̱. Xa̱bu̱ bi̱ natanga̱a̱ a̱jkiu̱u̱n nagawúunʼ ma̱ngaa xtáa ngíná ga̱jma̱a̱ numuu rí niʼni. Numuu rí niniñuuʼ maʼchúu rí nambájxuu ga̱jma̱a̱ Jeobá, rúʼko̱ nijkha kayáa maʼni dí ra̱májánʼ. Xó má rey Manasés ga̱jma̱a̱ David, maski ajndu ikhiin nixudami̱jna̱ aʼkhá dí mbiiʼ wéñuʼ, mú Jeobá niʼni mba̱a̱ a̱jkiu̱u̱n kaʼñún numuu rí nitanga̱a̱ a̱jkiu̱u̱n (1 Rey. 14:8). Jeobá naʼni mba̱a̱ a̱jkiu̱u̱n kaʼñún bi̱ nusngajma dí gajkhun natanga̱a̱ a̱jkiu̱ún. Rúʼko̱ eyoo gáʼthúu̱n dí raʼkháa i̱ndó ndayóoʼ muʼtháá dí natanga̱a̱ a̱jkiu̱lú, dí phú gíʼmaa muʼni nindxu̱u̱ dí muniʼñááʼ ru̱ʼni̱ dí raʼkhí.e

17. a) Ndiéjunʼ eyoo gáʼthúu̱n rí matriʼkuminaʼ rá. b) Ndiéjunʼ embáyulú mu xátanga̱ánʼ muʼni ikháá aʼkhá rá. (Isaías 55:7.)

¹⁷ Ndiéjunʼ imbo̱o̱ʼ rí ndaʼyoo Jeobá rá. Á mu natriʼkumina̱a̱ʼ, rúʼko̱ nandoo gáʼthúu̱n rí matatsiʼñáánʼ ratani̱ dí ra̱májánʼ ga̱jma̱a̱ matagíʼdi̱i̱ maraxtaa xóo eyoo Jeobá (atraxnuu Isaías 55:7).f Ma̱ngaa ndayóoʼ matriʼkuíí xóo tatsaʼwáminaʼ mu xúʼko̱ Jeobá ma̱ndoo maxnáa ikha (Rom. 12:2; Efes. 4:23). Gíʼmaa maraxtaa xawii matriʼkuíí xóo tatsaʼwáminaʼ ga̱jma̱a̱ rí natani̱ (Col. 3:7-10). Mú xámbumulú dí musngajmá fe náa tsingijñaʼ dí nixnájxi̱ Jesús nambáyulú mu Jeobá maʼni mba̱a̱ a̱jkiu̱u̱n ga̱jma̱a̱ maʼni kaʼwii aʼkhá ndrígúlú. Índo̱ Jeobá gáʼyoo tsiakii dí nuʼni mu muniʼñááʼ dí nuʼnilú, ikhaa maʼni mba̱a̱ a̱jkiu̱u̱n kaʼyulú ga̱jma̱a̱ numuu tsigijñaʼ dí nixnájxi̱ A̱ʼdióo (1 Juan 1:7).

18. Ndiéjunʼ ejmañulú xóo eʼni mba̱a̱ a̱jkiu̱u̱n kaʼyulú Jeobá rá.

¹⁸ Guʼyáá dí nijmañulú náa artículo rígi̱. Náa xúgíʼ numbaaʼ, nda̱wa̱a̱ i̱mba̱a̱ bi̱ naʼni mba̱a̱ a̱jkiu̱u̱n xóo Jeobá. Náá numuu nuʼthá rígi̱ rá. Timbá, numuu rí ikhaa xtáa xawii mu maʼni mba̱a̱ a̱jkiu̱u̱n kaʼyulú. Raga̱jma̱, numuu dí naniniáanʼlú májánʼ. Ikhaa ndaʼyoo xúgíʼ xóo ni̱ndxu̱lú ga̱jma̱a̱ naʼngo̱o̱ ndaʼyoo á mu gajkhun natanga̱a̱ a̱jkiu̱lú. Índo̱ Jeobá naʼni mba̱a̱ a̱jkiu̱u̱n nambumuu xúgíʼ aʼkhá ndrígúlú, ga̱jma̱a̱ numuu rúʼko̱ nandoo naguáʼdáá mbá ku̱ma̱ kaʼwu ma̱ngaa nagruiguáanʼlú.

19. Náá numuu dí gíʼmaa makuwáanʼ gagi maski ajndu nakiéʼkulu má xúʼko̱ ga̱jma̱a̱ numuu dí ni̱ndxu̱lú xa̱bu̱ aʼkhá rá.

¹⁹ Ga̱jma̱a̱ numuu rí ni̱ndxu̱lú xa̱bu̱ aʼkhá naʼni dí makiéʼkulú má xúʼko̱. Mú naʼni̱i̱ a̱jkiu̱lú dí naʼthí náa Perspicacia para comprender las Escrituras, volumen 1, ináa 209. Ikhí naʼthí: “Jeobá nindxu̱u̱ mbáa Dios bi̱ nagáwíinʼ a̱jkiu̱u̱n, ikhaa ndaʼyoo dí xa̱bi̱i̱ nakiéʼkúún. Ikha jngóo xáʼyóoʼ makuwáanʼlu ngíná ga̱jma̱a̱ numuu dí ni̱ndxu̱lú xa̱bu̱ aʼkhá ma̱ngaa rí nakiéʼkulu (Sl 103:8-14; 130:3). Á mu nuʼni xó má eʼngo̱o̱ mu makuwáanʼlu xó má eyoo Dios, maʼni rí makuwáánʼ gagi (Flp 4:4-6; 1Jn 3:19-22)”. ¡Ra̱ʼkhá tháán naxnúlú tsiakii ajngáa rígi̱!

20. Ndiéjuunʼ gúʼyáá náa imbo̱o̱ artículo rá.

²⁰ Nuxnáa núma̱aʼ Jeobá dí xtáa xawii maʼni mba̱a̱ a̱jkiu̱u̱n kaʼyulú índo̱ natanga̱a̱ gajkhun a̱jkiu̱lú. Xú káʼnii guʼyaridáá xá. Ndiéjunʼ dí naʼni mbríguii xóo naʼni mba̱a̱ a̱jkiu̱u̱n Jeobá ga̱jma̱a̱ xóo nuʼnilú ikháánʼ rá. Ndiéjunʼ dí naʼni mixtiʼkhu rá. Ndíjkha rí gíʼdoo numuu makru̱ʼu̱lú rígi̱ rá. Náa imbo̱o̱ʼ artículo mbuʼyáá xóo xtíñaaʼ graxe̱ rígi̱.