Забур

72 Худоё, ба подшоҳ фаҳми ҳукмҳоятро бидеҳ

Ва ба писари подшоҳ адолатпарварии худро ато кун.+

 2 Бигзор ӯ халқи туро аз рӯйи адолат

Ва бандаҳои бечораатро аз рӯйи инсоф доварӣ кунад.+

 3 Бигзор кӯҳҳо ба халқ осоиштагӣ оранд

Ва мардум аз адолати теппаҳо баҳравар шаванд.

 4 Бигзор подшоҳ бечорагони халқро пуштибонӣ кунад,

Бигзор фарзандони камбағалро наҷот бахшад

Ва фиребгарро шикаст диҳад.+

 5 То даме ки офтоб нурафшон

Ва моҳ тобон аст, аз ту хоҳанд тарсид,

Абадан, аз насл ба насл.+

 6 Ӯ мисли борон ба алафи даравида хоҳад борид,

Мисли қатраҳои борон, ки заминро сероб мекунанд.+

 7 Дар рӯзҳои ӯ росткор нашъунамо меёбад+

Ва, то даме ки моҳ ҳаст, осоиштагӣ фаровон мешавад.+

 8 Қаламрави ӯ аз канори як баҳр то канори баҳри дигар

Ва аз дарёи бузург* то гӯшаву канори замин хоҳад буд.+

 9 Дар пеши ӯ сокинони биёбон зону хоҳанд зад

Ва душманонаш хок хоҳанд лесид.+

10 Подшоҳони Таршиш ва ҷазираҳо хироҷ хоҳанд дод,+

Подшоҳони Сабо ва Сибо туҳфаҳо пешкаш хоҳанд кард.+

11 Тамоми подшоҳон пеши ӯ таъзим хоҳанд кард

Ва ҳамаи халқҳо ба ӯ хизмат хоҳанд намуд.

12 Ӯ бечораеро, ки нола мекунад

Ва бенавову бепушту паноҳро халосӣ хоҳад дод.

13 Ба камбағалу бечора раҳм хоҳад кард

Ва ҷони мискинро наҷот хоҳад дод.

14 Онҳоро аз зулму ситам халос хоҳад кард,

Хунашон дар назари ӯ гаронбаҳо хоҳад буд.

Бигзор доимо дар ҳаққи ӯ дуо гӯянд

Ва тамоми рӯз ӯро дуои нек кунанд.

16 Дар рӯйи замин ғалла фаровон мешавад,+

Он то ба қуллаи кӯҳҳо паҳн мегардад.

Ҳосили ӯ мисли ҷангали Лубнон бузург мешавад+

Ва дар шаҳрҳо одамон мисли сабзаи замин нашъунамо меёбанд.+

17 Бигзор номи ӯ то абад пойдор бошад+

Ва номбардоронаш, то даме офтоб нурафшон аст, боқӣ монанд.

Бигзор одамон ба воситаи ӯ баракат ёбанд,+

Бигзор ҳама халқҳо ӯро хушбахт хонанд.

18 Ҳамду сано бод ба Яҳува Худо, Худои Исроил,+—

Фақат ӯ корҳои ҳайратангезро ба амал меорад.+

19 Бигзор номи пуршукӯҳаш то абад ситоиш шавад+

Ва ҷалолаш тамоми заминро пур кунад.+