ድንግል ማርያም—መጽሓፍ ቅዱስ ብዛዕባኣ እንታይ ይብል፧

• መልሲ መጽሓፍ ቅዱስ

• ድንግል ከላ ኽትወልድ ዝኸኣለት ብኸመይ እያ፧

• የሱስ ካብ ድንግል እተወልደሉ ዕላማ እንታይ እዩ፧

• ማርያም ድንግል ኰይናዶ ቐጺላ እያ፧

• ማርያም ካብ እትጥነስ ኣትሒዛ፡ ካብቲ ኻብ ኣዳም ዚውረስ ሓጢኣት ሓራ ድያ ነይራ፧

• ንማርያም ብኸመይ ክንርእያ ኣሎና፧

ማርያም ኣደ የሱስ ገና ድንግል ከላ ንየሱስ ናይ ምውላድ ፍሉይ ክብሪ ኸም ዝረኸበት መጽሓፍ ቅዱስ ይሕብር እዩ። መጽሓፍ ቅዱስ ነዚ ተኣምር እዚ ኣብ መጽሓፍ ኢሳይያስ ተነብይዎ ነይሩ እዩ፣ ፍጻመኡ ኸኣ ኣብ ወንጌል ማቴዎስን ወንጌል ሉቃስን ተመዝጊቡ ኣሎ።

ኢሳይያስ ኣብቲ ብዛዕባ ልደት መሲሕ ዚገልጽ ትንቢቱ፡ “እንሆ፡ ጓል ክትጠንስ፡ ወዲ እውን ክትወልድ እያ” ኢሉ ተነብዩ ነይሩ እዩ። (ኢሳይያስ 7:14) ማቴዎስ እቲ ጸሓፍ ወንጌል ከኣ ብመንፈስ ኣምላኽ ተደሪኹ፡ ትንቢት ኢሳይያስ ኣብቲ ማርያም ንየሱስ ዝጠነሰትሉ ኣጋጣሚ ኸም እተፈጸመ ገሊጹ ኣሎ። ማርያም ብተኣምራዊ መገዲ ኸም ዝጠነሰት ድሕሪ ምዝንታዉ ድማ፡ ከምዚ ኢሉ ጽሒፉ ኣሎ፦ “እዚ ዅሉ፡ እቲ የሆዋ ብነብይኡ ኣቢሉ ኸምዚ ኢሉ እተዛረቦ ምእንቲ ኺፍጸም ኰነ፦ ‘እንሆ፡ ድንግልa ክትጠንስ፡ ወዲ እውን ክትወልድ እያ፣ ስሙ ኸኣ ኣማኑኤል ኪብልዎ እዮም፡’ ትርጉሙ ድማ፡ ‘ኣምላኽ ምሳና እዩ’ ማለት እዩ።”—ማቴዎስ 1:22, 23።

ሉቃስ እቲ ጸሓፍ ወንጌል እውን ብዛዕባ ተኣምራዊ ጥንሲ ማርያም መዝጊቡ ኣሎ። ብዛዕባ እዚ ኺገልጽ ከሎ ድማ፡ ኣምላኽ ንገብርኤል መልኣኽ ከም ዝለኣኾ ድሕሪ ምሕባሩ፡ “[ገብርኤል] ናብታ ኻብ ቤት ዳዊት፡ ንዮሴፍ ዝስሙ ሰብኣይ እተሓጽየት ድንግል ድማ እዩ እተላእከ፣ ስም እታ ድንግል ከኣ ማርያም ነበረ” ኢሉ ጽሒፉ ኣሎ። (ሉቃስ 1:26, 27) ሽዑ፡ ማርያም ድንግል ምዃና ገለጸት። ኣደ የሱስ፡ ማለት ኣደ መሲሕ ከም እትኸውን ምስ ሰምዐት፡ “ምስ ሰብኣይ ጾታዊ ርክብ ዘይገብር ክነሰይሲ፡ እዚ ኸመይ ኢሉ ይኸውን፧” ኢላ ሓተተት።—ሉቃስ 1:34።

ማርያም ብመንፈስ ቅዱስ እያ ጠኒሳ፣ መንፈስ ቅዱስ ከኣ ኣብ ዕዮ ዚነጥፍ ዘሎ ሓይሊ ኣምላኽ እዩ። (ማቴዎስ 1:18) ንማርያም ድማ፡ “መንፈስ ቅዱስ ኪወርደኪ፡ ሓይሊ እቲ ልዑል እውን ኬጽልለኪ እዩ። ስለዚ ኸኣ፡ እቲ ዚውለድ፡ ቅዱስ፡ ወዲ ኣምላኽb ኪብሃል እዩ” ተባሂሉ ተነጊርዋ እዩ። (ሉቃስ 1:35) ኣምላኽ ንህይወት ወዱ፡ ብተኣምራዊ መገዲ ናብ ማሕጸን ማርያም ብምምሕልላፍ፡ ከም እትጠንስ ገይሩ እዩ።

ኣምላኽ ንየሱስ ካብ ድንግል ከም ዚውለድ ብምግባር ፍጹም ሰብነት ሂብዎ እዩ፣ በዚ ኸምዚ ድማ፡ የሱስ ንደቂ ሰብ ካብ ሓጢኣትን ሞትን ኬድሕኖም ይኽእል እዩ። (ዮሃንስ 3:16፣ እብራውያን 10:5) ኣምላኽ ንህይወት ወዱ ናብ ማሕጸን ማርያም ኣሰጋገሮ። ድሕሪኡ፡ ናይ ኣምላኽ መንፈስ ቅዱስ ነቲ ድቂ፡ ዘይፍጽምና ዚብሃል ከይወርስ ተኸላኸለሉ።—ሉቃስ 1:35።

በዚ ኸምዚ፡ የሱስ ፍጹም ሰብ ኰይኑ፡ ማለት ምስቲ ኣዳም ቅድሚ ምሕጣኡ ዝነበሮ ደረጃ ማዕረ ዀይኑ ተወልደ። መጽሓፍ ቅዱስ ብዛዕባ የሱስ፡ “ንሱ ሓጢኣት ኣይገበረን” ኢሉ ይገልጽ እዩ። (1 ጴጥሮስ 2:22) የሱስ ፍጹም ሰብ ብምንባሩ፡ ንደቂ ሰብ ካብ ሓጢኣትን ሞትን ንምድሓን በጃ ኪኸፍል ይኽእል ነይሩ እዩ።—1 ቈረንቶስ 15:21, 22፣ 1 ጢሞቴዎስ 2:5, 6።

መጽሓፍ ቅዱስ፡ ማርያም ንሓዋሩ ድንግል ኰይና ኸም ዝቐጸለት ኣይምህርን እዩ። ኣብ ክንዳኡስ፡ ካልኦት ደቂ ኸም ዝነበርዋ ይሕብር እዩ።—ማቴዎስ 12:46፣ ማርቆስ 6:3፣ ሉቃስ 2:7፣ ዮሃንስ 7:5።

ኣይፋልን። ኣብ ገሊኡ ሃይማኖታት ካብ ሓጢኣት ሓራ ምንባራ ይእመነሉ እዩ። ንኣብነት፡ ብመሰረት ኒው ካቶሊክ ኢንሳይክሎፔድያ፡ “ድንግል ማርያም ካብ መጀመርታ ህይወታ፡ ማለት ካብ እትጥነስ ኣትሒዛ፡ ካብቲ ናይ መጀመርታ ሓጢኣት ሓራ እያ። ዝተረፉ ደቂ ሰብ ብሓጢኣት እተበከለ ሰብኣዊ ባህርይ እዮም ወሪሶም። . . . ማርያም ግና ብፍሉይ ጸጋ በቲ ናይ መጀመርታ ሓጢኣት ከይትትንከ ተዓቂባ እያ።”c

ማርያም ካብቲ ናይ መጀመርታ ሓጢኣት ሓራ ኸም ዝነበረት ዚሕብር ትምህርቲ ኣብ መጽሓፍ ቅዱስ ኣይርከብን እዩ። (መዝሙር 51:5፣ ሮሜ 5:12) መሕልፎ እኳ ደኣስ፡ ማርያም ነቲ ኣብ ሕጊ ሙሴ ኻብ ኣዴታት ዚሕተት ሓጢኣት ዜተዓርቕ መስዋእቲ ኸተቕርብ ከላ፡ ሓጥእ ምዃና እያ ኣርእያ። (ዘሌዋውያን 12:2-8፣ ሉቃስ 2:21-24) ኒው ካቶሊክ ኢንሳይክሎፔድያ ብዛዕባ እቲ ማርያም ነቲ ናይ መጀመርታ ሓጢኣት ከም ዘይወረሰት ዚገልጽ ትምህርቲ፡ “ኣብ ቅዱሳት ጽሑፋት ብንጹር የሎን። . . . ቤተ ክርስትያን ዝበጽሓቶ መደምደምታ እዩ” ኢሉ ኣሎ።

ማርያም ብእምነታን ብተኣዛዝነታን ብትሕትናኣን በቲ ዓሚቝ መንፈሳውነታን ጽቡቕ ኣብነት ትዀነና እያ። ካብቶም ብእምነቶም ክንመስሎም ዘሎና ሰባት እውን እያ።—እብራውያን 6:12።

ማርያም ከም ኣደ የሱስ መጠን ፍሉይ ግደ እኳ እንተ ነበራ፡ መጽሓፍ ቅዱስ ግና ከነምልኻ ዀነ ናብኣ ኽንጽሊ ኣይምህርን እዩ። የሱስ ንኣዲኡ ኻብ ካልኦት ንበይና ፍሉይ ኣኽብሮት ኣይሃባን፣ ንሰዓብቱ እውን ከምኡ ኺገብሩ ኣይኣዘዞምን። እኳ ደኣስ፡ ማርያም ካብቲ ኣብ ኣርባዕተ ወንጌላት ብተደጋጋምን ኣብ መጽሓፍ ግብሪ ሃዋርያት ሓንሳእን እተጠቕሰትሉ ወጻኢ፡ ኣብ ዝተረፈ 22 መጻሕፍቲ እቲ ሓድሽ ኪዳን ኣይንረኽባን ኢና።—ግብሪ ሃዋርያት 1:14።

ማርያም ኣሽምባይ ኣምልኾስ፡ ፍሉይ ቈላሕታ እኳ ኸም ዝረኸበት ዚሕብር ነገር ኣብ ቅዱሳት ጽሑፋት የልቦን። ኣብ ክንዳኡስ፡ መጽሓፍ ቅዱስ ንክርስትያናት፡ ንኣምላኽ ጥራይ ኬምልኹ እዩ ዚምህሮም።—ማቴዎስ 4:10።