ትምህርቲ 08

ዓርኪ የሆዋ ኽትከውን ትኽእል ኢኻ

ብወረቐት ኣብ እተሓትመ

የሆዋ ብዝያዳ ኽትፈልጦ ይደልየካ እዩ። ስለምንታይ፧ ምኽንያቱ ብዛዕባ ባህርያቱን መገድታቱን ዕላማኡን ብዝያዳ ብዝፈለጥካ መጠን፡ ዓርኩ ኽትከውን ዝያዳ ድሌት ከተሕድር ተስፋ ይገብር እዩ። ግናኸ፡ ብሓቂዶ ዓርኪ ኣምላኽ ኽትከውን ትኽእል ኢኻ፧ (መዝሙር 25:14 ኣንብብ።) ዓርኩ ንምዃን እንታይ ክትገብር ትኽእል፧ መጽሓፍ ቅዱስ፡ መልሲ እዚ ሕቶታት እዚ ይህብ እዩ። ምስ የሆዋ እትምስርቶ ዕርክነት ካብ ኵሉ ንላዕሊ ኣገዳሲ ዝዀነሉ ምኽንያት እውን ይገልጽ እዩ።

1. የሆዋ እንታይ ዕድመ እዩ ኣቕሪቡልካ ዘሎ፧

“ንኣምላኽ ቅረብዎ፡ ንሱ እውን ኪቐርበኩም እዩ።” (ያእቆብ 4:8) እዚ እንታይ ማለት እዩ፧ የሆዋ ዓርኩ ኽትከውን እዩ ዚዕድመካ ዘሎ። ገሊኦም ንኣምላኽ ኪርእይዎ ስለ ዘይክእሉ፡ ምስኡ ዕርክነት ምምስራት ኣጸጋሚ ይመስሎም እዩ። የሆዋ ግና ኣብ ቃሉ መጽሓፍ ቅዱስ፡ ኵሉ እቲ ናብኡ ንምቕራብ ክንፈልጦ ዜድልየና ባህርያቱ ገሊጹልና ኣሎ። ኣብ መጽሓፍ ቅዱስ ዚርከብ ዝለኣኸልና መልእኽቲ ኸነንብብ ከለና፡ ዋላ እኳ ርኢናዮ ዘይንፈልጥ እንተ ዀንና፡ ምስኡ ዘሎና ዕርክነት ይዓቢ እዩ።

2. የሆዋ ብሉጽ ዓርኪ ዝዀነ ስለምንታይ እዩ፧

ከም የሆዋ ገይሩ ዜፍቅረካ ኻልእ የልቦን። ሕጉስ ክትከውንን ሓገዝ ኬድልየካ ኸሎ ናብኡ ኽትቀርብን ይደልየካ እዩ። መጽሓፍ ቅዱስ ብዛዕባኡ፡ “ንሱ ይሓልየልኩም እዩ እሞ፡ ንዅሉ ጭንቀትኩም ናብኡ ደርብይዎ” ይብል። (1 ጴጥሮስ 5:7) የሆዋ ንፈተውቱ ንምድጋፍን ንምጽንናዕን ንምስማዕን ወትሩ ድሉው እዩ።—መዝሙር 94:18, 19 ኣንብብ።

3. የሆዋ ኻብ ኣዕሩኹ እንታይ ይጽበ፧

የሆዋ ንሰባት ብሓፈሻ የፍቅሮም እዩ፣ “ናይ ቀረባ ዕርክነቱ ግና ምስቶም ቅኑዓት እዩ።” (ምሳሌ 3:32) ስለዚ፡ ንኣዕሩኹ ጽቡቕ ኪገብሩን ካብ ሕማቕ ኪርሕቁን ይጽበዮም እዩ። ገሊኦም ሰባት በቲ የሆዋ ብዛዕባ ጽቡቕን ክፉእን ዘለዎ መለክዒታት ኪመላለሱ ኸም ዘይክእሉ ይስምዖም እዩ። የሆዋ ግና ንድኻምና ይርድኣልና እዩ። ብሓቂ ዜፍቅሮን ንዕኡ ባህ ንምባል ዚከኣሎ ዚገብርን ዘበለ ብእኡ ቕቡል እዩ።—መዝሙር 147:11፣ ግብሪ ሃዋርያት 10:34, 35።