11. (ሀ) ፈሪሳውያን ንየሱስ ብዛዕባ ብሰንበት ምሕዋይ ዝሓተትዎ ስለምንታይ ኢዮም፧ (ለ) መልሲ ናይ የሱስከ እንታይ ኢዩ ዝገለጸ፧

¹¹ የሱስ ብ31 ከ.ኣ.ዘ. ኣብ እዋን ጽድያ ኣብ ገሊላ ከገልግል ከሎ ኣብቲ ቤት ጸሎት ሓደ ኢዱ ዝነቐጸት ሰብኣይ ረኣየ። ሰንበት ብምንባሩ እቶም ፈሪሳውያን ንየሱስ “ብሰንበት ምፍዋስዶ ግቡእ እዩ፧” ኢሎም ሓተትዎ። እዚ ድኻ ሰብኣይ እዚ ይሳቐ ብምህላዉ ናይ ሓቂ ሓልዮት ኣብ ክንዲ ዝስምዖም: እቲ ዝሓተትዎ ሕቶ ከም ዝሕብሮ ንየሱስ ንምዅናን ምኽንያት ኢዮም ዝደልዩ ነይሮም። የሱስ ነቲ ዋላ ሓንቲ ርሕራሐ ዘይብሉ ልቦም ርእዩ ምጕሃዩ ዘገርም ኣይኰነን! ንሱ ድማ “ብሰንበትሲ ጽቡቕ ምግባርዶ . . . ይግባእ፧” ብምባል ተመሳሳሊ ሕቶ ሓተቶም። ምስ ኣጽቀጡ ድማ: ንሓንቲ ብሰንበት ኣብ ጕድጓድ ዝወደቐት በጊዕ የውጽእዋ እንተ ዀይኖም ብምሕታት ንሕትኡ ባዕሉ መለሶ።b የሱስ ከኣ ክከሓድ ብዘይክእል ሓሳባት ገይሩ “ካብ በጊዕሲ ሰብዶ ግዳ ኣዝዩ ኣይበልጽን፧” በሎም። እምበኣርሲ “ብሰንበት ጽቡቕ ምግባር ግቡእ [ቅኑዕ] እዩ” ብምባል ደምደመ። ፍትሒ ኣምላኽ ብሰብኣዊ ልምድታት ክቕየድ የብሉን። የሱስ ነዚ ነጥቢ እዚ ብምብራህ: ንኢድ እቲ ሰብኣይ ኣሕወየ።​—⁠ማቴዎስ 12:9-13፣ ማርቆስ 3:⁠1-5