ያእቆብ ናብ ካራን ይኸይድ

እዞም ያእቆብ ዝዛረቦም ዘለዉ ሰባት መን ምዃኖም ትፈልጥዶ፧ ንብዙሕ መዓልትታት ድሕሪ ምጕዓዙ: ያእቆብ ኣብ ጥቓ ሓደ ዔላ ረኸቦም። ኣባጊዖም ዝሕልዉ ዝነበሩ ሰባት ኢዮም። ያእቆብ ከኣ ‘ካበይ ኢኹም፧’ ኢሉ ሓተቶም።

‘ካብ ካራን’ በልዎ።

ያእቆብ ከኣ ‘ላባን ትፈልጥዎዶ፧’ ኢሉ ሓተቶም።

‘እወ። ራሄል ጓሉ እንሃ ምስተን ኣበጊዕ ትመጽእ ኣላ’ ኢሎም መለስሉ። ራሄል ብርሑቕ ክትመጽእ ከላ ኣብዚ ስእሊ ትርእያዶ ኣለኻ፧

ያእቆብ ንራሄል ምስ ኣባጊዕ ኣኮኡ ላባን ምስ ረኣያ: እተን ኣባጊዕ ምእንቲ ክሰትያ ነቲ እምኒ ካብ ኣፍ እቲ ዔላ ኣልዓሎ። ብድሕርዚ ያእቆብ ንራሄል ሰዓማ: መን ምዃኑ ኸኣ ነገራ። ኣዝያ ተሓጐሰት: ናብ ቤታ ተመሊሳ ኸኣ ነቡኣ ላባን ነገረቶ።

ላባን ያእቆብ ምስኡ ብምቕማጡ ኣዝዩ ተሓጐሰ። ያእቆብ ንራሄል ክምርዓዋ ኢሉ ምስ ሓተቶ ኸኣ ላባን ባህ በሎ። ይኹን እምበር: ምእንቲ ራሄል ሸውዓተ ዓመት ምስኡ ክዓዪ ሓተቶ። ያእቆብ ንራሄል ኣዝዩ ስለ ዘፍቀራ ከምኡ ገበረ። እቲ ናይ መርዓ ግዜ ምስ በጽሐ ግን እንታይ ከም ዝዀነ ትፈልጥዶ፧

ላባን ኣብ ክንዲ ራሄል: ንያእቆብ እታ ዓባይ ጓሉ ልያ ሃቦ። ያእቆብ ንላባን ተወሳኺ ሸውዓተ ዓመት ምስኡ ክሰርሕ ምስ ተሰማምዖ: ንራሄል እውን ሰበይቱ ክትከውን ንያእቆብ ሃቦ። ኣምላኽ ኣብቲ ግዜ እቲ ሰባት ካብ ሓንቲ ሰበይቲ ንላዕሊ ክትህልዎም የፍቅድ ነይሩ ኢዩ። ሎሚ ግን መጽሓፍ ቅዱስ ከም ዝገልጾ ሓደ ሰብኣይ ሓንቲ ሰበይቲ ጥራይ ኢያ ክትህልዎ ዘለዋ።