Mateu

16 Tsô Mbafarishi man Mbasadushi va her a na sha u va karen un. Ve kaa ér a er ivande ken iti i Aôndo vea nenge. 2 A gema a kaa a ve ér: “Ka a lu aikighe yô, ne kaa ner, ‘Ura ua nôô ga, sha ci u wanger sha kwavaôndo.’ 3 A lu pepe yô, ne kaa ner, ‘Wanger sha kwavaôndo nyian ga, nahan ura ua nôô; kwavaôndo nyian kpa abeen gema yuhwa sha.’ Ne fa u pasen akaa a sha kwavaôndo, kpa ne mba fetyô u kaven inja i akaa a a lu eren ne ga. 4 Kov u ifer man u idyaa* ne zer keren ivande, kpa a tese ú ivande igen ga, saa ivande i Yona la tseegh.” Maa a kar a yem, a undu ve her.

5 Mbahenen mba peren yande la yô, ve kav er ve hungur u tôôn beredi yô. 6 Yesu kaa a ve ér: “Wa nen ikyo sha er Mbafarishi man Mbasadushi vea hôngor ne sha kwa ve la ga yô.” 7 Maa ve gba lamen ker ayol a ve kaan ér: “Se tôô ikpenberedi ga cii.” 8 Yesu kaven nahan yô, a kaa ér: “Er nan man ne lu lamen kaan ner ne tôô ikpenberedi ga ase? Jighjigh u nan wen vese ga tsôô! 9 Ne mba a kav kwagh u m lu ôron je gaa? Shin ne umbur kwagh u ikpenberedi i itian i yange m koso iorov* 5,000 a mi, man er ve ya, avur neer, ne kohol a iv akese kpishi la gaa? 10 Shin ikpenberedi i itiankarihiar i iorov* 4,000 ya, avur neer, ne kohol a iv akese* a vesen kpishi la gaa? 11 M ôr kwagh u beredi a ven ga, man er nan ve ne lu kaven ga? Kpa wa nen ikyo sha er Mbafarishi man Mbasadushi vea hôngor ne sha kwa ve la ga yô.” 12 Maa baver ve er lu kwa u wan sha beredi kaa ér ve wa ikyo sha mi ga, kpa lu ityesen i Mbafarishi man Mbasadushi yô.

13 Yesu va nyer hen haregh u Sesaria-Filipi yô, a pine mbahenen nav ér: “Ior mba kaan ér Wan u or ka ana?” 14 Ve kaa ér: “Mbagenev mba kaan ér u ngu Yohane u Eren Batisema, mbagen di mba kaan ér u ngu Eliya, mbagen ér u ngu Yeremia shin môm ken uprofeti mbagenev.” 15 A hide a pine ve ér: “Ne yô, ne mba kaan ner m ngu ana?” 16 Shimon Peteru kaa ér: “We u ngu Kristu, Wan u Aôndo u uma.” 17 Yesu kaa a na ér: “I saan we iyol Shimon wan u Yona, sha ci u ka orumace* nan pase u kwagh ne ga, kpa ka Terem u a lu sha la a pase u ye. 18 Shi m kaan we ne, u ngu Peteru, man ka sha vande ne je me maa tiônnongo wam ye. Man ihinda i Hade kpa ia hemba un agee ga.* 19 Me na u akii a Tartor u sha, nahan hanma kwagh u u kange shin tar ne yô, a lu u i vande kangen sha yô; shi hanma kwagh u u sagh shin tar ne yô, a lu u i vande saghen sha yô.” 20 Maa a ta mbahenen nav icin gbang gbang ér ve de pasen or môm ér un ngu Kristu ga.

21 Hii hen shighe la je, Yesu hii u ôron a mbahenen nav ér gba keng u una za ken Yerusalem una za ya atsan kpishi sha ikyev i mbatamen man upristi mba tamen man mbangerenatindi, shi a wua un, kpa sha iyange i sha utar la, a nder un shin ku. 22 Tsô Peteru ta ibyalegh a na gba za vendan a na kaan ér: “Tere, de ôron imbakwagh la sha iyol you ga; mayange kwagh a er u nahan ga.” 23 Kpa a gema ijime a na Peteru, maa a kaa a na ér: “Kar hidem ken ijime, Satan!* U ngu kwagh u nan mo gbeev mbu nôngon, sha ci u u ngu a mhen u Aôndo ga, kpa ka u ior.”

24 Tsô Yesu kaa a mbahenen nav ér: “Aluer or soo u dondon mo yô, nana̱ nyiman iyol i nan* nana̱ tôô kon* u nan nana̱ dondo sha a mo gbem. 25 Gadia hanma or u nan keren ér nana war uma u nan yô, una saa nan. Kpa or u uma u nan a saa nan sha ci wam yô, nana gema a zua a mi. 26 Mimi je, aluer or zua a tar cii kpa uma u nan gema saa nan yô, a lu nan a inja sha nyi? Shin ka nyi or a na sha ci u uma u nana? 27 Gadia ka u Wan u or una va sha iengem i Ter na vea mbatyomov nav, una va kimbi hanma or injar sha ieren i nan. 28 Mimi je me kaa ne, mbagenev ken mba ve til heen ne vea nenge a ku ashe ga, zan zan vea vande nengen a Wan u or ken iengem na i tor.”*