Mbaroma

13 Hanma or nana̱ wa iyol i nan sha ikyev i mbautahav mba ve hemen nan la; gadia ma tahav mbugen mbu ga, saa mbu mbu dugh hen Aôndo la tseegh; mbu mbu lu ne kpa, ka Aôndo a de mbu lu her sha aan kposo kposo ye. 2 Sha nahan yô, hanma or u nan hendan a tahav mbura yô, ka Aôndo u a ver mbu la je nan lu hendan a na ye; mba ve lu hendan a mbu la, vea va a mtsaha sha ayol a ve. 3 Gadia mbautahav mbara mba ka sha ci u mba ve eren kwagh u dedoo la ve cia ga, kpa ka sha ci u mba ve eren kwagh u bo la ve cia. U soo wer orhemen nana de cier we iyol gaa? Yô, eren kwagh u dedoo, nahan nana wuese we; 4 gadia nan ngu ortom u Aôndo sha ci u iwasen you. Kpa aluer u ngu eren kwagh u bo yô, i̱ cier we iyol, sha ci u nan ngu a sanker ka gbilin ga. Ka ortom u Aôndo kua or u oron iyev sha u van a iyugh sha* mba ve eren kwagh u bo la.

5 Sha nahan yô, gba hange hange u ne wa ayol a en sha ikyev ve, i̱ de lu sha ci u iyugh la tseegh ga, kpa i̱ lu sha ci u imoshima yen. 6 Ka nahan ve ne te kpandegh kpaa ye; sha ci u mba mbatomov mba Aôndo mba ve lu kuren awashima shon ne hanma shighe yô. 7 Na nen hanmô ve kwagh u i gbe u a na nan la: or u i gbe u a ta nan kpandegh yô, i̱ ta nan kpandegh; or u i lu u nana sav kasua* kpaa, i̱ lumun nana̱ sav; or u i lu u a cia nan yô, i̱ cia nan er i gbe u a cia la, or u i gbe u a na nan icivir kpaa, i̱ na nan icivir la.

8 De lu nen or môm a kwagh ga, saa dooshima u i gbe u ne tesen ayol a en la tseegh; gadia or u ior ve doo nan ishima yô, nan er kwagh u atindi a tese la. 9 Gadia kwagh u i nger ken atindi ér, “Mayange de eren idya ga, mayange de woo or ga, mayange de iin ga, mayange de tômon kwagh u or ga,” man hanma kwagh ugen u atindi a kaa cii, i kohol i kaa ér: “Or u nan we ndor a we nana̱ doo u ishima kpee je, er iyol you nahan.” 10 Or u nan lu a dooshima yô, nan eren or u wan ndor a nan ifer ga; nahan kwagh u atindi a tese yô, ka dooshima.

11 Doo u ne er akaa ne sha ci u ne fa shighe u ne lu ker ne, er i lu ihwa i i gbe u ne nder ne lu per yô, gadia se hemba zurum a myom wase hegen a shighe u yange se hingir mbananjighjigh la. 12 Tugh za kpishi; sev mbu sôôn aven. Nahan yô, se de nen ityom i ken ime cii, se gema se haa nen ikyav mbi uityaav mbi iwanger iyol. 13 Se zenden nen sha inja, er ka tetan nahan, se nyôr nen iyol ken uiniongo mba i eren dang her la ga, shin ken msôrom ma hunden ga, shin ken idya shin ieren i ndôhôrshima* kpaa ga, shin ken ayôôso shin iyuhwe i eren kpaa ga. 14 Haa nen aeren a Ter Yesu Kristu iyol, shi de tsengan henen nen sha kwagh u ne er sha u kuren asaren a iyolough ga.