Sekarea

12 Molaetsa wa botlhokwa:

2 “Jaanong ke dira gore Jerusalema a nne senwelo se se nang le beine se se dirang gore ditšhaba tsotlhe tse di mo dikologileng di thetheekele; mme Juda le Jerusalema di tla tlhaselwa.+ 3 Mo letsatsing leo, ke tla dira gore Jerusalema a nne leje le le bokete* mo ditšhabeng tsotlhe. Botlhe ba ba le tsholetsang ruri le tla ba gobatsa mo go botlhoko;+ mme ditšhaba tsotlhe tse di mo lefatsheng di tla phuthiwa gore di mo tlhasele.”+ 4 Jehofa a re: “Mo letsatsing leo, ke tla dira gore pitse nngwe le nngwe e tlhakane tlhogo e bile ke tla dira gore mopalami wa yone a tsenwe. Ke tla tlhoma matlho a me mo bathong ba Juda, le fa go ntse jalo, ke tla foufatsa pitse nngwe le nngwe ya ditšhaba. 5 Mme dikgosana* tsa Juda di tla bua mo pelong ya tsone di re, ‘Banni ba Jerusalema ba nnaya nonofo ka ntlha ya ga Jehofa wa masomosomo, Modimo wa bone.’+ 6 Mo letsatsing leo, ke tla dira gore dikgosana tsa Juda di nne jaaka magala a a tukang mo sekgweng le jaaka dikgong tse di tukang mo gare ga dijo tsa ditlhaka tse di sa tswang go rojwa,+ mme di tla laila ditšhaba tsotlhe tse di di dikologileng ka fa mojeng le ka fa molemeng;+ mme batho ba Jerusalema ba tla boa ba nna mo lefelong la bone,* mo Jerusalema.+

7 “Mme Jehofa o tla boloka ditente tsa Juda pele, gore bontle* jwa ditlogolwana tsa ga Dafide le bontle* jwa banni ba Jerusalema bo tle bo se ka jwa nna bogolo thata fa bo bapisiwa le jwa Juda. 8 Mo letsatsing leo, Jehofa o tla femela banni ba Jerusalema;+ mo letsatsing leo, yo o kgopiwang* mo go bone o tla nna jaaka Dafide, mme ditlogolwana tsa ga Dafide di tla nna jaaka Modimo, di tla nna jaaka moengele wa ga Jehofa yo o tsamayang fa pele ga bone.+ 9 E bile mo letsatsing leo, ke tla tlhomamisa gore ke nyeletsa ditšhaba tsotlhe tse di tlhaselang Jerusalema.+

10 “Ke tla tshololela moya wa me mo ditlogolwaneng tsa ga Dafide le mo banning ba Jerusalema; ke tla ba amogela, e bile ba tla nthapela ka tlhoafalo. Mme ba tla leba kwa go ene yo ba mo tlhabileng,+ e bile ba tla mo lelela jaaka fa ba ka lelela morwa yo o esi fela; ba tla mo hutsafalela mo go botlhoko jaaka fa ba ka hutsafalela morwa wa leitibolo. 11 Mo letsatsing leo, go tla nna le selelo se segolo mo Jerusalema, jaaka selelo sa kwa Hadadarimone kwa Lebaleng la Megido.+ 12 Mme lefatshe le tla lela, lelapa lengwe le lengwe le tla lela le le losi; ba losika lwa ga Dafide ba le bosi, le basadi ba bone ba le bosi; ba losika lwa ga Nathane+ ba le bosi, le basadi ba bone ba le bosi; 13 ba losika lwa ga Lefi+ ba le bosi, le basadi ba bone ba le bosi; ba losika lwa ga Shimei+ ba le bosi, le basadi ba bone ba le bosi; 14 le malapa otlhe a a setseng a tla lela, ba lelapa lengwe le lengwe ba le bosi, le basadi ba bone ba le bosi.