Bakorintha wa Ntlha

10 Jaanong bakaulengwe, ke batla gore lo itse gore borraaronamogolo botlhe ba ne ba feta ka fa tlase ga leru+ e bile botlhe ba ne ba ralala lewatle.+ 2 Botlhe ba ne ba kolobediwa go nna balatedi ba ga Moshe ka leru le ka lewatle. 3 Botlhe ba ne ba ja dijo tse di tswang kwa Modimong+ 4 e bile ba ne ba nwa metsi a a tswang kwa Modimong.+ Gonne ba ne ba tle ba nwe metsi mo lefikeng le le neng le le gaufi le bone. Lefika leo le ne le tswa kwa Modimong mme le ne le tshwantshetsa* Keresete.+ 5 Le fa go ntse jalo, Modimo o ne a se ka a itumelela bontsi jwa bone, ka jalo ba ne ba bolawa kwa nageng.+

6 Jaanong dilo tseno e ne ya nna dikai mo go rona, gore re se ka ra eletsa dilo tse di utlwisang botlhoko fela jaaka ba ne ba di eletsa.+ 7 Le gore re se ka ra obamela medingwana, jaaka bangwe ba bone ba ne ba dira; fela jaaka go kwadilwe go twe: “Batho ba ne ba nna fa fatshe gore ba je ba bo ba nwe. Go tswa foo, ba ne ba ema ba ijesa monate.”+ 8 Gape a re se ka ra dira boitsholo jo bo sa siamang jwa tlhakanelodikobo,* jaaka bangwe ba bone ba ne ba dira, mme go bo go swa ba le 23 000 mo go bone ka letsatsi le le lengwe.+ 9 Le gone a re se ka ra leka Jehofa,*+ jaaka bangwe ba bone ba ne ba mo leka, mme ba lomiwa ke dinoga ba bo ba swa.+ 10 Gape a re se ka ra ngongorega, fela jaaka bangwe ba bone ba ne ba ngongorega,+ mme moengele wa Modimo a bo a ba bolaya.*+ 11 Jaanong dilo tseno di ne tsa ba diragalela gore re ithute mo go tsone, e bile di ne tsa kwalelwa gore di re tlhagise,+ rona ba re tshelang mo bokhutlong jwa motlha ono.*

12 Ka jalo, a motho yo o akanyang gore o eme a nne kelotlhoko gore a se ka a wa.+ 13 Diteko* tse di lo welang di wela batho botlhe.+ Mme Modimo o a ikanyega, e bile ga a kitla a letla gore lo welwe ke diteko tse lo ka se kgoneng go di itshokela,+ mme fa lo welwa ke diteko, o tla lo naya tsela ya go tswa, gore lo kgone go di itshokela.+

14 Ka jalo, baratwa ba me, lo se ka lwa* obamela medingwana.+ 15 Ke bua le lona batho ba ba botlhale, ka jalo itireleng tshwetso gore a se ke se buang se siame kgotsa ga se a siama. 16 Fa re nwa senwelo se re lebogang Modimo ka ntlha ya sone, a ga re nne le seabe mo mading a ga Keresete?+ Fa re ja senkgwe se re se ngathoganyang, a ga re nne le seabe mo mmeleng wa ga Keresete?+ 17 E re ka go na le senkgwe se le sengwe fela, rona le fa re le bantsi, re mmele o le mongwe,+ ka gonne rotlhe re ja senkgwe seo.

18 Akanyang ka setšhaba sa Iseraele: Fa ba ne ba ja ditlhabelo tse di ntshiwang mo sebesong, a go ne go sa nna jaaka e kete ba ja le Modimo?+ 19 A fa ke bua jaana, ke raya gore modingwana le setlhabelo se se ntshediwang modingwana di botlhokwa? 20 Nnyaa; mme ka re dilo tse ditšhaba di di ntshang setlhabelo di di ntshetsa madimona mme e seng Modimo;+ mme ga ke batle gore lo ikamanye le madimona.+ 21 Ga lo ka ke lwa nwa senwelo sa ga Jehofa* le senwelo sa madimona; ga lo ka ke lwa ja mo “tafoleng ya ga Jehofa”*+ le mo tafoleng ya madimona. 22 Kgotsa ‘a re batla go galefisa Jehofa’?*+ A re maatla go mo feta?

23 Dilo tsotlhe di ka fa molaong,* mme ga se dilo tsotlhe tse di tswelang mosola. Dilo tsotlhe di ka fa molaong, mme ga se dilo tsotlhe tse di kgothatsang.+ 24 A mongwe le mongwe a nne a dire se se tswelang motho yo mongwe mosola, e seng se se tswelang ene mosola.+

25 Jang sengwe le sengwe se se rekisiwang mo marekisetsong a nama lo sa botse sepe gore segakolodi sa lona se se ka sa lo tshwenya, 26 gonne “lefatshe ke la ga Jehofa* le sengwe le sengwe se se mo go lone.”+ 27 Fa motho yo o sa dumeleng mo go Keresete a lo laletsa gore lo tle go ja le ene mme lo batla go ya, jang sepe fela se a se lo nayang lo sa botse sepe gore segakolodi sa lona se se ka sa lo tshwenya. 28 Mme fa mongwe a lo raya a re, “Nama eno e ne e ntsheditswe medingwana setlhabelo,” lo se ka lwa e ja gore lo se ka lwa kgopisa motho yo o lo boleletseng le ka ntlha ya segakolodi.+ 29 Ga ke bue ka segakolodi sa lona, mme ke bua ka segakolodi sa motho yo mongwe. Gonne ke ka ntlha yang fa kgololesego ya me e tshwanetse go atlholwa ka segakolodi sa motho yo mongwe?+ 30 Fa ke ja e bile ke lebogela Modimo se ke se jang, a ke tshwanetse go se ja fa e le gore seo se tla dira gore ba bangwe ba ntshwaye phoso?+

31 Ka jalo, le fa lo ja kgotsa lo nwa kgotsa lo dira sepe fela, dirang dilo tsotlhe ka tsela e e tla dirang gore Modimo a galalediwe.+ 32 Lo nne kelotlhoko gore lo se ka lwa kgopisa Bajuda kgotsa Bagerika kgotsa phuthego ya Modimo,+ 33 fela jaaka le nna ke leka go itumedisa batho botlhe mo dilong tsotlhe, ke sa ipatlele molemo+ mme ke o batlela batho ba bantsi, gore ba tle ba bolokwe.+