Basupi ba ga Jehofa mo Lefatsheng Lotlhe—Brazil

BRAZIL ke naga e kgolo thata ka ditsela di le dintsi. Ka bogolo jwa yone le ka palo ya batho, ke naga ya maemo a botlhano ka bogolo mo lefatsheng. E ikadile mo karolong e e ka nnang halofo ya naga ya Amerika Borwa mme mo go yone go nna batho ba le bantsi go gaisa ba ba nnang kwa dinageng tse dingwe tsotlhe tsa kontinente eo di kopane. Gape Brazil e na le sekgwa se segolo sa pula go feta tse dingwe tsotlhe mo lefatsheng. Go ralala sekgwa seo go ela noka e kgolo go di feta tsotlhe mo lefatsheng—ya Amazon.

Gape Brazil e kgolo ka kutlwisiso e nngwe. Palo ya baboledi ba yone ba mafoko a a molemo a Bogosi jwa Modimo e atamela 400 000, mme ngogola batho ba ba fetang 1 000 000 ba ne ba nna gone kwa Segopotsong sa loso lwa ga Keresete. Ka gone naga eno e tlhomologile thatathata mo tirong ya go rera ka Bogosi. Maitemogelo a bosheng jaana a supela ntlha eno.

Go Direla Kwa go Nang le Tlhokego e Kgolo Gone

Antonio le mosadi wa gagwe ba ne ba dira tshwetso e e boima ya go tlogela ba masika a bone le tiro e e neng e ba thusa, e e duelang kwa São Paulo gore ba ye go direla kwa go neng go tlhokega baboledi ba Bogosi thata teng kwa nageng ya Minas Gerais. Tshimo ya bone e ne e akaretsa setlhopha sa badiri se se neng se dira kwa feketiring ya sukiri. Letsatsi la ntlha fa ba ne ba neela bosupi koo, ba ne ba simolola dithuto tsa Baebele di le robong. Mo dikgweding di le 18, ba ne ba tshwara dithuto tse di fetang 40!

La ntlha, dipokano di ne di tshwarelwa kwa feketiring eo ya sukiri. Lefa go ntse jalo, baboledi ba ba sa tswang go kopanela ba ne ba batla go bona Holo ya mmatota ya Bogosi. Ka gone, go ne ga hiriwa base gore e tseye batho ba le 75 go ba isa kwa phuthegong e e gaufi. Go tswa foo go ne ga latela kopano; baithuti ba Baebele ba ba neng ba sa tswa go kopanela ba le 45 ba ne ba nna gone mme ba ne ba botsolodiwa. Go ne ga kolobediwa ba le 15 ba bone mo kopanong eo. Legale, dikeledi tsa boitumelo di ne di tshologa fela!

Go ne go dirisiwa khampani ya dibase e e tshwanang fa go tsewa maeto a a tshwanang le ao, mme badiredi ba yone ba ne ba re duedisa dituelo tse di kwa tlase. Antonio o ne a neela mong wa feme eo buka e e ithutang Baebele, e le go mo leboga. O ne a dumela gore a simolole go ithuta Baebele mo go one maitsiboa ao mme o ne a kolobediwa morago ga dikgwedi di le mmalwa a ntse a ithuta ka tlhagafalo. Kwa tshimologong mosadi wa gagwe o ne a le kgatlhanong le go ithuta, mme fa nako e ntse e ya, boikutlo jwa gagwe bo ne jwa fetoga. Gompieno le ene ke Mosupi yo o kolobeditsweng wa ga Jehofa.

Ka February 1992 go ne ga tlhomiwa phuthego e na le baboledi ba ba tlhagafetseng ba le 22. Ka 1994 palo eno e ile ya oketsega ya fitlha go 42, e na le babulatsela ba ka metlha ba le 4, kana bareri ba ka metlha ba mafoko a a molemo. Ka ntlha ya seo, Antonio o ne a konela jaana: “Nna le mosadi wa me re bone gore fa re ‘leka Jehofa,’ jaaka Malaki 3:10 e bolela, o tla re ‘goromeletsa lesego le go se ketlang go nna le bonno jo bo lekanyeng go le baya.’”

Go Tsamaisa Dibuka Tsa Baebele

Gongwe lebaka le lengwe le le dirang gore tiro ya go rera e bo e gatetse pele jaana kwa Brazil ke gore Basupi ba tsamaisa dibuka tsa Baebele ka sebaka sengwe le sengwe. Ka sekai, phuthego nngwe e ne ya kwalela ofisi ya lekala la Mokgatlho wa Watch Tower e kopa dikopi di le 250 tsa buka ya Dipotso Tse Basha Ba Di Botsang—Dikarabo Tse Di Nang le Tharabololo. Ke ka ntlha yang fa ba ne ba otora dibuka tse di kalokalo?

Lekwalo le ne la tlhalosa jaana: ‘Sengwe sa dikolo tse di mo toropong eo se ne sa swetsa ka gore se dirise buka eno go ruta mo go nngwe ya ditlelase. Badiredi ba sekolo ba ne ba dira tshwetso eo morago ga gore batsadi ba baithuti ba e leng Basupi ba ga Jehofa le mongwe wa baeteledipele ba sekolo ba neele bosupi jo e seng jwa ka tlwaelo. E kete Jehofa a ka tswelela pele a segofatsa batlhanka ba gagwe fa ba ntse ba ruta ka tsela e e molemo ka buka eno.’ Ee, mme e kete Jehofa a ka tswelela pele a segofatsa kgatelopele e e molemo ya tiro ya go rera ka Bogosi mo nageng e kgolo thata ya Brazil.

[Setshwantsho mo go tsebe 8]

DIPALO TSA NAGA EO

Ngwaga wa Tirelo wa 1994

TLHORA YA BA BA NENG BA NEELA BOSUPI: 385 099

KAROLELANO: Mosupi a le 1 mo bathong ba le 404

BA BA NNILENG TENG KWA SEGOPOTSONG: 1 018 210

PALOGARE YA BABOLEDI BA E LENG BABULATSELA: 38 348

PALOGARE YA DITHUTO TSA BAEBELE: 461 343

PALO YA BA BA KOLOBEDITSWENG: 24 634

PALO YA DIPHUTHEGO: 5 928

OFISI YA LEKALA: CESÁRIO LANGE

[Setshwantsho mo go tsebe 9]

Koloi e e nang le sebuelagodimo e e neng e dirisiwa kwa São Paulo mo e ka nnang ka 1940

[Setshwantsho mo go tsebe 9]

Go neela bosupi kwa Botanical Garden kwa Rio de Janeiro

[Setshwantsho mo go tsebe 9]

Ofisi ya lekala kwa Cesário Lange