ʻIsikeli

46 “Ko e folofola eni ʻa e ʻEiki Hau ko Sihová: ‘Ko e matapā ʻo e lotoʻā ʻi loto ʻa ia ʻoku hanga ki he hahaké+ ʻe tāpuni ai pē ia+ ʻi he ʻaho ngāue ʻe onó,+ ka ʻi he ʻaho Sāpaté pea ʻi he ʻaho ʻo e māhina foʻoú ʻe fakaava ai ia. 2 ʻE hū atu mei tuʻa ʻa e ʻeikí ʻi he fale-hūʻanga ʻo e matapaá,+ pea te ne tuʻu ʻi he veʻe kaumatapā ʻo e matapaá. ʻE ʻohake ʻe he kau taulaʻeikí ʻa ʻene feilaulau tutu kakató mo ʻene ngaahi feilaulau feʻinasiʻakí, pea te ne punou ʻi he hūʻanga ʻo e matapaá pea toki ʻalu atu ki tuʻa. Ka heʻikai ke tāpuni ʻa e matapaá kae ʻoua kuo efiafi. 3 Ko e kakai ʻo e fonuá te nau punou hifo foki mo kinautolu ʻi he ʻao ʻo Sihová ʻi he hūʻanga ʻo e matapā ko iá ʻi he ngaahi Sāpaté pea ʻi he ngaahi māhina foʻoú.+

4 “‘Ko e feilaulau tutu kakato ʻe ʻohake ʻe he ʻeikí kia Sihova ʻi he ʻaho Sāpaté ʻe faiʻaki ia ʻa e fanga lami tangata taʻemele ʻe ono mo ha sipi tangata taʻemele.+ 5 Ko e feilaulau meʻakaí ko ha efa* ʻe taha ki he sipi tangatá mo ha meʻa pē ʻokú ne malava ke foaki ki he fanga lami tangatá, fakataha mo ha hini* ʻo e lolo ki he efa taki taha.+ 6 ʻI he ʻaho ʻo e māhina foʻoú ʻe faiʻaki ʻa e feilaulaú ha kiʻi pulu tangata taʻemele mei he tākangá, ko e fanga lami tangata ʻe ono, pea mo ha sipi tangata; ʻoku totonu ke nau taʻemele.+ 7 Te ne foaki ko ha feilaulau meʻakai ha efa ʻe taha ki he kiʻi pulu tangatá, ko ha efa ʻe taha ki he sipi tangatá, pea mo ha meʻa pē ʻe lava ke ne maʻu ki he fanga lami tangatá. Pea te ne foaki ha hini ʻo e loló ki he efa taki taha.

8 “‘ʻI he hū ki loto ʻa e ʻeikí, te ne hū ʻi he fale-hūʻanga ʻo e matapaá, pea te ne hū ki tuʻa ʻi he hala tatau.+ 9 Pea ʻi he hū ʻa e kakai ʻo e fonuá ki he ʻao ʻo Sihová lolotonga ʻa e ngaahi kātoangá,+ ko e faʻahinga ʻoku nau hū ki loto ʻi he matapā ki he tokelaú+ te nau hū ki tuʻa ʻi he matapā ki he tongá,+ pea ko e faʻahinga ʻoku nau hū ki loto ʻi he matapā ki he tongá te nau hū ki tuʻa ʻi he matapā ki he tokelaú. Heʻikai ke foki ha taha ʻi he matapā ʻa ia naʻá ne hū mai aí, he ʻoku totonu ke nau hū ki tuʻa ʻi he matapā ʻoku nau fehangahangai mo iá. 10 Ko e meʻa ki he ʻeiki ʻoku ʻi honau lotolotongá, te ne hū ki loto ʻi heʻenau hū ki lotó, pea te ne hū ki tuʻa ʻi heʻenau hū ki tuʻá. 11 ʻI he lolotonga ʻa e ngaahi kātoangá mo e ngaahi faʻahitaʻu kātoangá ko e feilaulau meʻakaí ko ha efa ʻe taha ki he kiʻi pulu tangatá, mo ha efa ʻe taha ki he sipi tangatá, mo ha meʻa pē ʻokú ne malava ke foaki ki he fanga lami tangatá, fakataha mo ha hini ʻo e lolo ki he efa taki taha.+

12 “‘Kapau ʻoku tokonaki ʻe he ʻeikí ha feilaulau tutu kakato+ pe ko ha ngaahi feilaulau feʻinasiʻaki ko ha feilaulau loto-tauʻatāina kia Sihova, ko e matapā ʻoku hanga ki he hahaké ʻe fakaava kiate ia, pea te ne tokonaki ʻa ʻene feilaulau tutu kakató mo ʻene ngaahi feilaulau feʻinasiʻakí ʻo hangē pē ko ia ʻokú ne fai ʻi he ʻaho Sāpaté.+ ʻI he hili ʻa ʻene hū ki tuʻá, ʻe tāpuni ʻa e matapaá.+

13 “‘Te ke tokonaki ʻi he ʻaho taki taha ha lami tangata taʻemele ʻi hono ʻuluaki taʻú ko ha feilaulau tutu kakato kia Sihova.+ Te ke fai eni ʻi he pongipongi ki he pongipongi. 14 ʻI he pongipongi taki taha te ke tokonaki fakataha mo ia ha vahe ono ʻe taha ʻo ha efa ko ha feilaulau meʻakai, fakataha mo ha vahe tolu ʻe taha ʻo ha hini ʻo e loló ke afuhi ʻi he mahoaʻa leleí ko ha feilaulau meʻakai tuʻumaʻu kia Sihova. Ko ha tuʻutuʻuni taʻengata eni. 15 Kuo pau ke nau tokonaki ʻa e lami tangata, mo e feilaulau meʻakai, pea mo e lolo ʻi he pongipongi taki taha ko ha feilaulau tutu kakato tuʻumaʻu.’

16 “Ko e folofola eni ʻa e ʻEiki Hau ko Sihová: ‘Kapau ʻe foaki ʻe he ʻeikí ha meʻaʻofa ki he tokotaha taki taha ʻo hono ngaahi fohá ko hano tofiʻa, ʻe hoko ia ko e tofiʻa ʻo hono ngaahi fohá. Ko honau tofiʻa tukufakaholo ia. 17 Ka ʻo kapau ʻokú ne foaki ha meʻaʻofa mei hono tofiʻá ki ha taha ʻo ʻene kau sevānití, ʻe ʻoʻona ia ʻo aʻu ki he taʻu ʻo e fakatauʻatāiná;+ pea ʻe toki foki leva ia ki he ʻeikí. Ko e tofiʻa pē ʻo hono ngaahi fohá ʻe ʻonautolu ʻo tuʻuloá. 18 Heʻikai ke toʻo ʻe he ʻeikí ha tofiʻa pē mei he tofiʻa ʻo hono kakaí ʻaki hono fakamālohiʻi kinautolu ke nau mavahe mei honau tofiʻá. ʻOku totonu ke ne foaki ki hono ngaahi fohá ha tofiʻa mei hono tofiʻa ʻoʻoná, koeʻuhí ke ʻoua naʻa kapusi ha taha ʻi he lotolotonga ʻo hoku kakaí mei hono tofiʻá.’”

19 Naʻá ne ʻomi leva au ʻi he hūʻanga+ ʻa ia naʻe ʻi he veʻe matapā ʻoku ʻalu atu ai ki he ngaahi loki kai toputapu* ʻo e kau taulaʻeikí, ʻa ia naʻe hanga ki he tokelaú,+ pea naʻá ku sio ai ki ha feituʻu ʻi he tafaʻaki ki muí, ki he tafaʻaki fakahihifó. 20 Naʻá ne pehē mai kiate au: “Ko e feituʻu eni ʻa ia ʻe haka ai ʻe he kau taulaʻeikí ʻa e feilaulau halaiá mo e feilaulau angahalá pea ko e feituʻu ia te nau taʻo ai ʻa e feilaulau meʻakaí,+ koeʻuhí ke ʻoua te nau toʻo ha meʻa ki tuʻa ki he lotoʻā ʻi tuʻá pea aʻu atu ai ha tuʻunga māʻoniʻoni ki he* kakaí.”+

21 Naʻá ne ʻomi au ki tuʻa ki he lotoʻā ʻi tuʻá pea taki au ʻo fakalaka atu ʻi he tuliki ʻe fā ʻo e lotoʻaá, pea naʻá ku sio ki ha lotoʻā ʻi he veʻe tuliki taki taha ʻo e lotoʻā ʻi tuʻá. 22 ʻI he tuliki ʻe fā ʻo e lotoʻaá naʻe ʻi ai ʻa e fanga kiʻi lotoʻā, naʻe kiupite* ʻe 40 ʻa hono lōloá pea kiupite ʻe 30 ʻa hono fālahí. Ko e lotoʻā ʻe fā kotoa ko iá naʻa nau lahi tatau.* 23 Naʻe ʻi ai ʻa e ngaahi fakasitepu* takatakai ʻi he fā ko iá, pea naʻe faʻu ʻi lalo ʻi he ngaahi fakasitepú ʻa e ngaahi feituʻu ke haka ai ʻa e ngaahi feilaulaú. 24 Naʻá ne pehē mai leva kiate au: “Ko e ngaahi fale eni ʻa ia ʻoku haka ai ʻe he kau faifatongia ʻi he temipalé ʻa e feilaulau ʻa e kakaí.”+