ʻIsikeli

5 “Ko koe, foha ʻo e tangata, toʻo ha heletā māsila ke ke ngāueʻaki ʻo hangē ko ha tele ʻa ha tangata kosi. Tele ho ʻulú mo ho kavá, peá ke toʻo ha meʻafua ʻo fua ia pea vahevahe fakatuʻunga ʻa e fulufuluʻiʻulú. 2 Te ke tutu hano vahe tolu ʻe taha ʻaki ʻa e afi ʻi loto ʻi he koló ʻi he taimi ʻe kakato ai ʻa e ngaahi ʻaho ʻo e ʻākoloʻí.+ Te ke toʻo leva ha vahe tolu ʻe taha ʻo ke taaʻi ʻaki ia ʻa e heletaá ʻi he tafaʻaki kotoa ʻo e koló,*+ pea ko e vahe tolu ʻe taha fakaʻosí te ke fakamovete atu ia ʻi he matangí, pea te u unuhi hake ha heletā ke tulimui kiate kinautolu.+

3 “Kuo pau foki ke ke toʻo ha ngaahi tuʻoni louʻulu siʻisiʻi pē mei ai pea takatakaiʻi ia ʻi he ngaahi pelu* ʻo ho kofú. 4 Pea toe toʻo mai ha niʻihi mei ai ʻo laku ki he afí ʻo tutu ai ke efuefu. ʻE ʻalu atu mei heni ha afi ki he fale kotoa ʻo ʻIsilelí.+

5 “Ko e folofola eni ʻa e ʻEiki Hau ko Sihová: ‘Ko Selusalema eni. Kuó u fokotuʻu ia ʻi he lotolotonga ʻo e ngaahi puleʻangá, ʻo takatakai kiate ia ʻa e ngaahi fonuá. 6 Ka kuó ne angatuʻu ki heʻeku ngaahi tuʻutuʻuni fakaefakamāú mo ʻeku ngaahi tuʻutuʻuní, ʻo fulikivanu ange ʻene tōʻongá ʻi he ngaahi puleʻanga mo e ngaahi fonua takatakai kiate iá.+ He kuo nau talitekeʻi ʻa ʻeku ngaahi tuʻutuʻuni fakaefakamāú, pea naʻe ʻikai te nau ʻaʻeva ʻi heʻeku ngaahi tuʻutuʻuní.’

7 “Ko ia ai, ko e folofola eni ʻa e ʻEiki Hau ko Sihová: ‘Koeʻuhi ko hoʻomou fakatupu kovi ange ʻi he ngaahi puleʻanga takatakai ʻiate kimoutolú pea ʻikai ke mou ʻaʻeva ʻi heʻeku ngaahi tuʻutuʻuní pe fakahoko ʻeku ngaahi tuʻutuʻuni fakaefakamāú, ka mou muimui ʻi he ngaahi tuʻutuʻuni fakaefakamaau ʻa e ngaahi puleʻanga takatakai kiate kimoutolú,+ 8 ko e folofola eni ʻa e ʻEiki Hau ko Sihová: “Ko eni ʻoku ou hoko ko ho fili, ʻa e kolo ko koé,+ pea te u fakahoko ʻa e fakamaau ʻi ho lotolotongá ʻi he ʻao ʻo e ngaahi puleʻangá.+ 9 Te u fai ʻiate koe ʻa e meʻa kuo teʻeki ʻaupito te u fai ki muʻa, pea heʻikai te u toe fai ha ngaahi meʻa tatau mo ia, koeʻuhi ko e kotoa ʻo hoʻo ngaahi tōʻonga fakalieliá.+

10 “‘“Ko ia ko e ngaahi tamai ʻi ho lotolotongá te nau kai honau ngaahi fohá,+ pea ʻe kai ʻe he ngaahi fohá ʻenau ngaahi tamaí, pea te u fakahoko ha fakamaau ʻi ho lotolotongá pea fakamovetevete atu ʻa e kotoa ʻo e toenga ʻoʻoú ki he tapa kotoa pē.”’*+

11 “‘Ko ia ai, ʻoku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘koeʻuhi ko hoʻo ʻuliʻi ʻa hoku feituʻu toputapú ʻaki ʻa e kotoa ʻo hoʻo ngaahi ʻaitoli fakalieliá mo e kotoa ʻo hoʻo ngaahi tōʻonga fakalieliá,+ te u siʻaki* foki koe; ʻe ʻikai haʻaku mataʻi fakaʻofaʻia, pea heʻikai te u fakahaaʻi ha manavaʻofa.+ 12 ʻE mate hao vahe tolu ʻe taha ʻi he mahaki fakaʻauha* pe ʻauha ʻi ho lotolotongá ʻi ha honge. ʻE tō takatakai ʻiate koe ha toe vahe tolu ʻe taha ʻi he heletā.+ Pea te u fakamovetevete ʻa e vahe tolu ʻe taha fakaʻosí ki he tapa kotoa pē,* pea te u unuhi hake ha heletā ke tulimui kiate kinautolu.+ 13 ʻE toki ngata leva ʻa ʻeku ʻitá, pea ʻe lolou ʻa ʻeku tuputāmaki kiate kinautolú, pea te u hoko ʻo fiemālie.+ Pea kuo pau ke nau ʻilo, ko au Sihova, kuó u lea ʻi heʻeku fiemaʻu maʻu pē ke fai mai ʻa e anga-līʻoa maʻataʻataá,+ ʻi he ʻosi ʻa ʻeku tuku ange atu ʻa ʻeku tuputāmakí kiate kinautolú.

14 “‘Te u ʻai koe ko ha feituʻu maomaonganoa mo ha lumaʻanga ʻi he lotolotonga ʻo e ngaahi puleʻanga takatakaí pea ʻi he ʻao ʻo e tokotaha kotoa ʻoku fononga atu aí.+ 15 Te ke hoko ko ha lumaʻanga mo ha manukiaʻanga,+ ko ha fakatātā fakaefakatokanga mo ha fakalilifuʻiaʻanga ki he ngaahi puleʻanga takatakai kiate koé, ʻi heʻeku fakahoko atu ʻa e fakamaau kiate koe ʻi he ʻita pea ʻi he tuputāmaki fakataha mo e ngaahi tautea fakalilifu. Ko au Sihova kuó u leaʻaki iá.

16 “‘Te u tuku atu kiate kinautolu ʻa e ngaahi ngahau fakatupu mate ʻo e honge ke fakaʻauha kinautolu. Ko e ngaahi ngahau ko ia te u tuku atú te ne fakaʻauha kimoutolu.+ Te u ʻai ʻa e hongé ke toe kovi ange kiate kimoutolu ʻaki hono tuʻusi ʻa hoʻomou maʻuʻanga meʻatokoní.*+ 17 Te u tuku atu kiate kimoutolu ʻa e honge mo e fanga manu fekai,+ pea te na ʻave meiate koe ʻa hoʻo fānaú. ʻE lōmekina koe ʻe he mahaki fakaʻauha mo e lingitoto, pea te u ʻomi ha heletā kiate koe.+ Ko au Sihova kuó u leaʻaki iá.’”