ʻIsikeli

6 Naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, hanga atu ho matá ki he ʻotu moʻunga ʻo ʻIsilelí pea fai ha kikite ki ai. 3 Kuo pau ke ke lea ʻo pehē, ‘ʻE ʻotu moʻunga ʻo ʻIsileli, fanongo ki he folofola ʻa e ʻEiki Hau ko Sihová: Ko e meʻa eni ʻoku folofolaʻaki ʻe he ʻEiki Hau ko Sihová ki he ʻotu moʻungá, ki he ngaahi foʻi māʻolungá, ki he ngaahi vaitafé, pea ki he ngaahi teleʻá: “Vakai! Te u ʻomi ha heletā kiate kimoutolu, pea te u fakaʻauha homou ngaahi potu māʻolungá. 4 Ko homou ngaahi ʻōlitá ʻe holoki, ko hoʻomou ngaahi tuʻuʻanga ʻinisēnisí ʻe maumauʻi,+ pea te u laku hifo hoʻomou kau maté ʻi he ʻao ʻo hoʻomou ngaahi ʻaitoli fakalieliá.*+ 5 Te u laku ʻa e ngaahi ʻangaʻanga ʻo e kakai ʻo ʻIsilelí ʻi he ʻao ʻo ʻenau ngaahi ʻaitoli fakalieliá, pea te u fakamovetevete homou ngaahi huí ʻo takatakai ʻi homou ngaahi ʻōlitá.+ 6 ʻI he kotoa ʻo e ngaahi feituʻu ʻoku mou nofo aí, ʻe ʻai ʻa e ngaahi koló ke maomaonganoa+ pea ʻe holoki ʻa e ngaahi potu māʻolungá ʻo tuku liʻaki.+ ʻE holoki mo haveki homou ngaahi ʻōlitá, ko hoʻomou ngaahi ʻaitoli fakalieliá ʻe ʻauha, ko hoʻomou ngaahi tuʻuʻanga ʻinisēnisí ʻe tuʻusi, pea ʻe tafiʻi atu ʻa hoʻomou ngaahi ngāué. 7 Pea ʻe tō ʻi homou lotolotongá ʻa e faʻahinga kuo tāmateʻí,+ pea kuo pau ke mou ʻilo ko Sihova au.+

8 “‘“Ka te u tuku ha toenga, he ko e niʻihi ʻo kimoutolu te nau hao mei he heletaá ʻi he lotolotonga ʻo e ngaahi puleʻangá ʻi hono fakamovetevete atu kimoutolu ki he ngaahi fonuá.+ 9 Pea ko e faʻahinga ʻoku haó te nau manatuʻi au ʻi he lotolotonga ʻo e ngaahi puleʻanga ko ia ʻoku taki pōpula kinautolu ki aí.+ Te nau fakatokangaʻi naʻá ku loto-mamahi ʻi heʻenau loto taʻefaitōnunga* ʻo tafoki meiate aú+ pea mo e holi kovi ʻa honau matá ʻo nau muimui* ʻi heʻenau ngaahi ʻaitoli fakalieliá.+ Te nau hoko ʻo mā mo fakaliliʻa ʻi he kotoa ʻo e ngaahi meʻa kovi mo fakalielia kuo nau faí.+ 10 Kuo pau ke nau ʻilo ko Sihova au pea ko ʻeku ngaahi fakamanamana ke ʻomi ʻa e fakatamakí ni kiate kinautolú naʻe ʻikai ko ha koto ngeʻesi.”’+

11 “Ko e meʻa ʻeni ʻoku folofolaʻaki ʻe he ʻEiki Hau ko Sihová: ‘Pasipasi pea fakapatū ho vaʻé mo tengihia ʻa e kovi kotoa mo e ngaahi meʻa fakalielia kuo fai ʻe he fale ʻo ʻIsilelí, he te nau tō ʻi he heletā, ʻi he honge, pea ʻi he mahaki fakaʻauha.+ 12 Ko e tokotaha ʻoku mamaʻó te ne mate ʻi he mahaki fakaʻauha, pea ko e tokotaha ʻoku ofi maí te ne tō ʻi he heletā, pea ʻilonga ʻa ia ʻoku hao mei he ongo meʻá ni pea kei toé te ne mate ʻi he honge; pea te u tuku ange kakato atu ʻeku tuputāmakí kiate kinautolu.+ 13 Pea kuo pau ke mou ʻilo ko Sihova au,+ ʻi he taimi ʻe tākoto ai ʻenau kau maté ʻi he lotolotonga ʻo ʻenau ngaahi ʻaitoli fakalieliá, pea takatakai ki heʻenau ngaahi ʻōlitá,+ pea ʻi he foʻi māʻolunga kotoa pē, ʻi he funga moʻunga kotoa pē, pea ʻi he lalo ʻakau tupu ʻāfaʻafa kotoa pē, pea ʻi lalo ʻi he ngaahi vaʻa ʻo e ʻuluʻakau lalahi ʻa ia naʻa nau fai ai ʻa e ngaahi feilaulau namu-kakala* ke fakahōifuaʻi ʻaki ʻa e kotoa ʻo ʻenau ngaahi ʻaitoli fakalieliá.+ 14 Te u mafao atu hoku nimá kiate kinautolu ʻo ʻai ʻa e fonuá ke maomaonganoa, pea ko e kotoa ʻo e ngaahi feituʻu ʻoku nau nofo aí ʻe hoko ʻo maomaonganoa ange ia ʻi he toafa ʻoku ofi ki Tipilá. Pea kuo pau ke nau ʻilo ko Sihova au.’”