ʻIsikeli

40 ʻI he taʻu hono 25 ʻo homau ʻave fakamālohí,+ ʻi he kamataʻanga ʻo e taʻú, ʻi he ʻaho hono hongofulu ʻo e māhiná, ʻi he taʻu hono 14 hili ʻa e tō ʻa e koló,+ ʻi he ʻaho pē ko iá naʻe ʻiate au ʻa e nima ʻo Sihová, pea naʻá ne ʻave au ki he koló.+ 2 Fakafou ʻi he ngaahi vīsone mei he ʻOtuá, naʻá ne ʻave au ki he fonua ko ʻIsilelí peá ne fokotuʻu au ʻi ha moʻunga māʻolunga ʻaupito,+ ʻa ia naʻe ʻi ai ha meʻa naʻe langa ʻo hangē ha koló ki he tafaʻaki fakatongá.

3 ʻI heʻene ʻomi au ki aí, naʻá ku sio ki ha tangata ʻa ia ko hono fōtungá naʻe hangē mai ha kopá.+ Naʻe ʻi hono nimá ha afo falakesi mo ha kaho* fua,+ pea naʻá ne tuʻu ʻi he matapaá. 4 Naʻe pehē mai ʻe he tangatá kiate au: “Foha ʻo e tangata, sio ke ofi, fanongo lelei, pea tokanga* ki he meʻa kotoa ʻoku ou fakahā atu kiate koé, he ko e ʻuhinga ia naʻe ʻomi ai koe ki hení. Tala ki he fale ʻo ʻIsilelí ʻa e meʻa kotoa te ke sio ki aí.”+

5 Naʻá ku sio ki ha ʻā takatakai ʻi tuʻa ʻi he temipalé.* Naʻe ʻi he nima ʻo e tangatá ha kaho fua naʻe kiupite ʻe ono ʻa hono lōloá (ko e kiupite taki taha, naʻe tānaki ki ai ha laulahi ʻo e lauʻinimá).* Naʻe kamata ke ne fua ʻa e ʻaá, pea ko hono matolú ko e kaho ʻe taha pea ko hono māʻolungá ko e kaho ʻe taha.

6 Naʻá ne haʻu leva ki he matapā naʻe hanga ki he hahaké+ ʻo kaka ʻi hono sitepú. ʻI he taimi naʻá ne fua ai ʻa e tuʻuʻanga matapaá, ko hono fālahí ko e kaho ʻe taha, pea ko e fālahi ʻo e tuʻuʻanga matapā ʻe tahá ko e kaho mo ia ʻe taha. 7 Ko e loki kaʻate taki taha ko hono lōloá ko e kaho ʻe taha pea ko hono fālahí ko e kaho ʻe taha, pea naʻe kiupite ʻe nima ʻa e vahaʻa ʻo e ngaahi loki kaʻaté.+ Ko e tuʻuʻanga matapā ʻi he tafaʻaki ʻo e fale-hūʻanga ʻo e matapaá ʻa ia ʻoku hanga ki lotó ko hono fuá ko e kaho ʻe taha.

8 Naʻá ne fua ʻa e fale-hūʻanga ʻo e matapaá ʻa ia ʻoku hanga ki lotó, pea naʻe kaho ʻe taha. 9 Naʻá ne fua leva ʻa e fale-hūʻanga ʻo e matapaá, ʻa ia naʻe kiupite ʻe valu; pea naʻá ne fua ʻa hono ongo pou ʻi he tafaʻakí, ʻa ia naʻe kiupite ʻe ua; pea ko e fale-hūʻanga ʻo e matapaá naʻe ʻi he tafaʻaki ia ʻoku hanga ki lotó.

10 Naʻe ʻi ai ha ngaahi loki kaʻate ʻe tolu ʻi he tafaʻaki taki taha ʻo e matapā ʻi he hahaké. Naʻe lalahi tatau ʻa e tolú ni, pea ko e ngaahi pou ʻi he tafaʻakí ʻi he tafaʻaki taki taha naʻe lalahi tatau.

11 Naʻá ne fua leva ʻa e fālahi ʻo e hūʻanga ʻo e matapaá, ʻa ia naʻe kiupite ʻe 10; pea ko e lōloa ʻo e matapaá naʻe kiupite ʻe 13.

12 Ko e ʻā vahevahe ʻi he ʻēlia ʻi muʻa ʻo e ngaahi loki kaʻaté ʻi he tafaʻaki taki taha naʻe kiupite ʻe taha. Ko e ngaahi loki kaʻate ʻi he ongo tafaʻakí fakatouʻosi naʻe taki kiupite ʻe ono.

13 Naʻá ne fua leva ʻa e matapaá mei he ʻato ʻo e loki kaʻate* ʻe taha ki he ʻato ʻo e loki kaʻate ʻe tahá, pea naʻe kiupite ʻe 25 ʻa hono fālahí; ko e hūʻanga ʻe tahá naʻe hanga mai ki he hūʻanga ʻe tahá.+ 14 Naʻá ne fua leva ʻa e ngaahi pou ʻi he tafaʻakí, ʻa ia naʻe kiupite ʻe 60 ʻa hono māʻolungá, pea pehē ki he ngaahi pou ʻi he tafaʻakí ʻi he ngaahi matapā kotoa ʻoku tuʻu takai ʻi he lotoʻaá. 15 Mei he tafaʻaki ki muʻa ʻo e hūʻanga ʻo e matapaá ki he tafaʻaki ki muʻa ʻo e fale-hūʻangá ʻa ia ʻoku hanga ki lotó naʻe kiupite ʻe 50.

16 Naʻe ʻi ai mo e ngaahi matapā teuteu fāsiʻi+ ʻo e ngaahi loki kaʻaté pea mo e ngaahi pou ʻi he tafaʻakí ʻi loto ʻi he matapaá ʻi he tafaʻaki taki taha. Ko e konga ʻi loto ʻo e ngaahi fale-hūʻangá naʻe ʻi ai hono fanga kiʻi matapā teuteu ʻi hono tafaʻaki taki taha, pea naʻe ʻi ai ha ngaahi fakatātā ʻo e fuʻu paame+ ʻi he ngaahi pou ʻi he tafaʻakí.

17 Naʻá ne ʻave leva au ki he lotoʻā ʻi tuʻá, pea naʻá ku sio ki he ngaahi loki kai*+ mo ha faliki takatakai ʻi he lotoʻaá. Naʻe ʻi ai ha loki kai ʻe 30 naʻe tuʻu ʻi he falikí. 18 Ko e faliki ʻi he tafaʻaki ʻo e ngaahi matapaá naʻe tatau hono fālahí mo e lōloa ʻo e ngaahi matapaá—ko e faliki ia ʻi laló.

19 Naʻá ne fua leva ʻa e mamaʻo* mei he konga ki muʻa ʻo e matapā ʻi laló ki he takatakai ʻo e lotoʻā ʻi lotó. Naʻe kiupite ʻe 100 mei he matapā ʻi he hahaké pea naʻe tatau pē mei he matapā ʻi he tokelaú.

20 Ko e lotoʻā ʻi tuʻá naʻe ʻi ai hano matapā naʻe hanga ki he tokelaú, pea naʻá ne fua ʻa hono lōloá mo hono fālahí. 21 Naʻe ʻi ai ha loki kaʻate ʻe tolu ʻi he tafaʻaki taki taha. Ko hono ngaahi pou ʻi he tafaʻakí mo e fale-hūʻangá naʻe tatau pē hono fuá mo e ʻuluaki matapaá. Naʻe kiupite ʻe 50 ʻa hono lōloá pea kiupite ʻe 25 ʻa hono fālahí. 22 Ko hono fanga kiʻi matapā teuteú, ko hono fale-hūʻangá, mo hono ngaahi fakatātā ʻo e fuʻu pāmé+ naʻe lalahi tatau pē mo ia ʻi he matapā fakahahaké. Naʻe malava ke kaka ki ai ʻa e kakaí ʻi he lauʻi sitepu ʻe fitu, pea naʻe ʻi muʻa ai ʻa hono fale-hūʻangá.

23 Naʻe ʻi ai ha matapā ʻi he lotoʻā ʻi lotó naʻe fehangahangai mo e matapā ʻi he tokelaú pea mo e taha naʻe fehangahangai mo e matapā ʻi he hahaké. Naʻá ne fua ʻa e mamaʻo mei he matapā ki he matapā, pea naʻe kiupite ʻe 100.

24 Ko hono hokó naʻá ne ʻomai au ki he tafaʻaki fakatongá, pea naʻá ku sio ki ha matapā ʻi he tafaʻaki fakatongá.+ Naʻá ne fua ʻa hono ongo pou ʻi he tafaʻakí mo hono fale-hūʻangá, pea naʻe tatau pē ʻa hono lalahí mo e ngaahi matapā kehé. 25 Naʻe ʻi ai ʻa e fanga kiʻi matapā teuteu ʻi hono tafaʻaki taki taha pea ʻi hono fale-hūʻanga, ʻo hangē ko e fanga kiʻi matapā teuteu kehé. Naʻe kiupite ʻe 50 ʻa hono lōloá pea kiupite ʻe 25 ʻa hono fālahí. 26 Naʻe ʻi ai ha lauʻi sitepu ʻe fitu naʻe ʻalu hake ki ai,+ pea ko hono fale-hūʻangá naʻe ʻi muʻa ai. Pea naʻe ʻi ai ha ngaahi fakatātā ʻo e fuʻu paame ʻi hono ongo pou he tafaʻakí, ko e pou ʻe taha ʻi he tafaʻaki taki taha.

27 Ko e lotoʻā ʻi lotó naʻe ʻi ai hano matapā naʻe hanga ki he tongá; naʻá ne fua ki he tafaʻaki fakatongá mei he matapā ki he matapā, pea ko hona mamaʻó naʻe kiupite ʻe 100. 28 Ko hono hokó naʻá ne ʻomi au ʻi he matapā ʻi he tongá ki he lotoʻā ʻi lotó; ʻi heʻene fua ʻa e matapā ki he tongá, naʻe lalahi tatau pē mo e ngaahi matapā kehé. 29 Ko hono ngaahi loki kaʻaté, mo hono ngaahi pou he tafaʻakí, pea mo hono fale-hūʻangá naʻe lahi tatau pē mo ia ʻi he ngaahi matapā kehé. Naʻe ʻi ai ʻa e fanga kiʻi matapā teuteu ʻi hono ongo tafaʻaki taki taha pea ʻi hono fale-hūʻangá. Naʻe kiupite ʻe 50 ʻa hono lōloá pea kiupite ʻe 25 ʻa hono fālahí.+ 30 Naʻe ʻi ai ha ngaahi fale-hūʻanga takatakai; naʻe kiupite ʻe 25 ʻa honau lōloá pea kiupite ʻe 5 ʻa honau fālahí. 31 Ko hono fale-hūʻangá naʻe hanga ki he lotoʻā ʻi tuʻá, pea naʻe ʻi ai ʻa e ngaahi fakatātā ʻo e fuʻu paame ʻi hono ongo pou he tafaʻakí,+ pea naʻe ʻalu hake ki ai ʻi ha lauʻi sitepu ʻe valu.+

32 ʻI heʻene ʻomi au mei he hahaké ki he lotoʻā ʻi lotó, naʻá ne fua ʻa e matapaá, pea naʻe lalahi tatau pē mo e ngaahi matapā kehé. 33 Ko hono ngaahi loki kaʻaté, ko hono ngaahi pou ʻi he tafaʻakí, mo hono fale-hūʻangá naʻe lalahi tatau pē mo e ngaahi matapā kehé, pea naʻe ʻi ai ʻa e fanga kiʻi matapā teuteu ʻi hono ongo tafaʻaki taki taha pea ʻi hono fale-hūʻangá. Naʻe kiupite ʻe 50 ʻa hono lōloá pea kiupite ʻe 25 ʻa hono fālahí. 34 Ko hono fale-hūʻangá naʻe hanga ki he lotoʻā ʻi tuʻá, pea naʻe ʻi ai ʻa e ngaahi fakatātā ʻo e fuʻu paame fakatouʻosi ʻi hono ongo pou ʻi he tafaʻakí, pea naʻe ʻalu hake ki ai ʻi ha lauʻi sitepu ʻe valu.

35 Naʻá ne ʻomi leva au ki he matapā ʻi he tokelaú+ peá ne fua ia; naʻe lalahi tatau pē mo e ngaahi matapā kehé. 36 Ko hono ngaahi loki kaʻaté, mo hono ngaahi pou he tafaʻakí, pea mo hono fale-hūʻangá naʻe lalahi tatau pē mo ia ʻi he ngaahi matapā kehé. Naʻe ʻi ai hono fanga kiʻi matapā teuteu ʻi he ongo tafaʻaki taki taha. Naʻe kiupite ʻe 50 ʻa hono lōloá pea kiupite ʻe 25 ʻa hono fālahí. 37 Ko hono ongo pou he tafaʻakí naʻe hanga ia ki he lotoʻā ʻi tuʻá, pea naʻe ʻi ai ʻa e ngaahi fakatātā ʻo e fuʻu paame fakatouʻosi ʻi hono ongo pou he tafaʻakí, pea naʻe ʻalu hake ki ai ʻi ha lauʻi sitepu ʻe valu.

38 Naʻe ʻi ai ha loki kai mo hono hūʻanga naʻe tuʻu ʻo ofi ki he ongo pou ʻi he tafaʻaki ʻo e matapaá, ʻa ia naʻe fufulu+ ai ʻa e ngaahi feilaulau tutu kakató.

39 Naʻe ʻi ai ha tēpile ʻe ua ʻi he ongo tafaʻaki taki taha ʻo e fale-hūʻanga ʻo e matapaá ke tāmateʻi ai ʻa e fanga monumanu ki he ngaahi feilaulau tutu kakató,+ ko e ngaahi feilaulau angahalá,+ mo e ngaahi feilaulau halaiá.+ 40 ʻI he ʻalu hake ki he matapā ʻi he tokelaú, naʻe ʻi ai ha tēpile ʻe ua ʻi tuʻa ʻi he hūʻangá. Naʻe ʻi ai foki mo ha tēpile ʻe ua ʻi he tafaʻaki ʻe taha ʻo e fale-hūʻanga ʻo e matapaá. 41 Naʻe ʻi ai ha tēpile ʻe fā ʻi he tafaʻaki taki taha ʻo e matapaá—ko e tēpile fakakātoa ʻe valu—ʻa ia naʻe tāmateʻi ai ʻa e fanga monumanu ki he feilaulaú. 42 Ko e tēpile ʻe fā ki he feilaulau tutu kakató naʻe ngaohi mei he maka kuo tā. Naʻe kiupite ʻe taha mo e konga ʻa honau lōloá, pea kiupite ʻe taha mo e konga ʻa honau fālahí, pea kiupite ʻe taha ʻa honau māʻolungá. Naʻe hili ai ʻa e ngaahi meʻangāue naʻe ngāueʻaki ki hono tāmateʻi ʻo e fanga monumanu ki he ngaahi feilaulau tutú mo e ngaahi feilaulaú. 43 Ko ha ngaahi hiliʻanga meʻa, ko hono fālahí ko e laulahi ʻo e lauʻinimá, naʻe fakapipiki takai ʻi he ngaahi holisi ʻi lotó; pea ko e kakanoʻi-manu ʻo e ngaahi feilaulau meʻaʻofá naʻe hili ia ʻi he ngaahi tēpilé.

44 Naʻe ʻi ai ha ngaahi loki kai ʻi tuʻa ʻi he matapā ʻi lotó ki he kau hivá;+ naʻa nau ʻi he lotoʻā ʻi lotó ʻo ofi ki he matapā ʻi he tokelaú, ʻo hanga ki he tongá. Naʻe ʻi ai mo e loki kai ʻe taha naʻe ofi ki he matapā ʻi he hahaké, ʻo hanga ki he tokelaú.

45 Naʻá ne pehē mai kiate au: “Ko e loki kai ko eni ʻoku hanga ki he tongá ʻoku maʻá e kau taulaʻeiki ia ʻoku fakafatongiaʻaki ʻa e ngaahi ngāue ʻi he temipalé.+ 46 Ko e loki kai ʻoku hanga ki he tokelaú ʻoku maʻá e kau taulaʻeiki ia ʻoku fakafatongiaʻaki ʻa e ngāue ʻi he ʻōlitá.+ Ko e ngaahi foha kinautolu ʻo Sātoki,+ ko e faʻahinga mei he kau Līvaí ʻa ia ʻoku vaheʻi ke nau ʻunuʻunu kia Sihova ke tauhi kiate ia.”+

47 Naʻá ne fua leva ʻa e lotoʻā ʻi lotó. Naʻe kiupite ʻe 100 ʻa hono loloá pea kiupite ʻe 100 ʻa hono fālahí, ʻo tapafā tatau. Ko e ʻōlitá naʻe ʻi muʻa ʻi he temipalé.

48 Naʻá ne ʻomi leva au ki he fale-hūʻanga ʻo e temipalé,+ pea naʻá ne fua ʻa e pou ʻi he tafaʻaki ʻo e fale-hūʻangá, pea naʻe kiupite ʻe nima ʻa hono tafaʻaki ʻe taha pea kiupite ʻe nima ʻa hono tafaʻaki ʻe taha. Ko e fālahi ʻo e matapaá naʻe kiupite ʻe tolu ʻa hono tafaʻaki ʻe taha pea kiupite ʻe tolu ʻa hono tafaʻaki ʻe taha.

49 Ko e fale-hūʻangá naʻe kiupite ʻe 20 ʻa hono lōloá pea kiupite ʻe 11* ʻa hono fālahí. Naʻe kaka ki ai ʻa e kakaí ʻi ha ngaahi lauʻi sitepu. Naʻe ʻi ai ʻa e ongo fuʻu pou ʻi he ongo faʻahi holisí, ko e taha ʻi he tafaʻaki taki taha.+